ମୁମ୍ବାଇ, ୨୮ ଅଗଷ୍ଟ, ୨୦୨୫: ଭାରତର ମ୍ୟୁଚୁଆଲ୍ ଫଣ୍ଡ ବଜାରରେ ଧମାକାଦାର ପ୍ରବେଶ ପରେ, ଜିଓ ଫାଇନାନ୍ସିଆଲ୍ ସର୍ଭିସେସ୍ (ଜେଏଫଏସଏଲ) ମୁମ୍ବାଇରେ ଅନୁଷ୍ଠିତ ଏହାର ଅନଲାଇନ୍ ବାର୍ଷିକ ସାଧାରଣ ବୈଠକରେ କମ୍ପାନୀର ଆର୍ଥିକ କାରବାର ସମ୍ପର୍କରେ ସେୟାରଧାରକମାନଙ୍କୁ ସୂଚନା ଦେଇଛି। ଏହାର ବାର୍ଷିକ ରିପୋର୍ଟରେ, କମ୍ପାନୀ ଏହାର ଏନବିଏଫସି ବ୍ୟବସାୟ, ବ୍ଲାକରକ୍ ସହିତ ମିଳିତ ଉଦ୍ୟମ, ପେମେଣ୍ଟ ବ୍ୟାଙ୍କ, ପେମେଣ୍ଟ ସମାଧାନ ଭର୍ଟିକଲ୍ ଏବଂ ବୀମା ବ୍ରୋକିଙ୍ଗ ଶାଖାର ସଫଳ ଶୁଭାରମ୍ଭ ବିଷୟରେ ସୂଚନା ପ୍ରଦାନ କରିଛି।
କମ୍ପାନୀର ନିର୍ଦ୍ଦେଶକ ମଣ୍ଡଳୀ ୨୦୨୫ ଆର୍ଥିକ ବର୍ଷ ପାଇଁ ୧୦ ଟଙ୍କା ଅଙ୍କିତ ମୂଲ୍ୟର ପ୍ରତି ଇକ୍ୱିଟି ସେୟାର ପାଇଁ ୦.୫୦ ଟଙ୍କା ଲାଭାଂଶ ସୁପାରିଶ କରିଛି। ଏଥିସହିତ, ପ୍ରାଇଭେଟ୍ ପ୍ଲେସମେଣ୍ଟ ଆଧାରରେ ପ୍ରମୋଟରଙ୍କୁ ୧୫,୮୨୫ କୋଟି ଟଙ୍କାର ଏକ ପ୍ରିଫରେନ୍ସିଆଲ୍ ଇସ୍ୟୁ ମଧ୍ୟ ମଞ୍ଜୁର କରାଯାଇଛି, ଯାହା ସେୟାରହୋଲ୍ଡରଙ୍କ ଅନୁମୋଦନ ଉପରେ ନିର୍ଭରଶୀଳ।
ଜେଏଫଏସଏଲ ଅଧ୍ୟକ୍ଷ କେ.ଭି. କାମାଥ ସେୟାରଧାରକମାନଙ୍କୁ ସମ୍ବୋଧିତ କରି କହିଛନ୍ତି, “ଭାରତର ଅର୍ଥନୀତି ପ୍ରାୟ ୬.୫-୭% ହାରରେ ବୃଦ୍ଧି ପାଉଛି। ଏହା ଯୁବ ଜନସଂଖ୍ୟା, ବର୍ଦ୍ଧିତ ଆୟ, ନୀତି-ଆଧାରିତ ସଂସ୍କାର, ଦୃଢ଼ ଭିତ୍ତିଭୂମି ଏବଂ ଦୈନନ୍ଦିନ କାର୍ଯ୍ୟରେ ବ୍ୟାପକ ଭାବରେ ଡିଜିଟାଲାଇଜେସନ୍ ଦ୍ୱାରା ସମ୍ଭବ ହୋଇଛି। ସାମ୍ପ୍ରତିକ ବର୍ଷଗୁଡ଼ିକର ସବୁଠାରୁ ଉଲ୍ଲେଖନୀୟ ସଫଳତା ମଧ୍ୟରୁ ଗୋଟିଏ ହେଉଛି ଏକ ଦୃଢ଼ ଡିଜିଟାଲ୍ ସାର୍ବଜନିକ ଭିତ୍ତିଭୂମିର ନିର୍ମାଣ। ଏହି ପ୍ଲାଟଫର୍ମ ଗ୍ରାମୀଣ ଓ ସହରାଞ୍ଚଳ ବିଭେଦକୁ ଦୂର କରିବା ସହିତ ଲକ୍ଷ ଲକ୍ଷ ନୂତନ ବ୍ୟବହାରକାରୀଙ୍କ ଆନୁଷ୍ଠାନିକ ଅର୍ଥବ୍ୟବସ୍ଥାରେ ସାମିଲ କରି ଏକ ନୂତନ ଡିଜିଟାଲ୍ ଇକୋସିଷ୍ଟମ ସୃଷ୍ଟି କରିବାରେ ସାହାଯ୍ୟ କରୁଛି।”
ଜେଏଫଏସଏଲର ପରିଚାଳନା ନିର୍ଦ୍ଦେଶକ ଓ ସିଇଓ ହିତେଶ ସେଠିଆ କହିଛନ୍ତି, “ଏକ ପୂର୍ଣ୍ଣ ଆର୍ଥିକ ସେବା ସଂସ୍ଥାନ ହେବା ଆମର ଯୋଜନା ରହିଛି। ଯାହାର ବଜାରରେ ମହତ୍ତ୍ୱପୂର୍ଣ୍ଣ ଅଂଶ ରହିବ। କମ୍ପାନୀ ବର୍ତ୍ତମାନ ନିର୍ମାଣର ଏକ ରଣନୈତିକ ପର୍ଯ୍ୟୟରେ ଅଛି, ଯେଉଁଥିରେ ବିଭିନ୍ନ ବ୍ୟବସାୟଗୁଡ଼ିକୁ ବିସ୍ତାର କରାଯାଉଛି କିମ୍ବା ନୂତନ ଭାବରେ ବିକଶିତ କରାଯାଉଛି। ଆମର ବ୍ୟବସାୟର ଶକ୍ତି ନିରନ୍ତର ବୃଦ୍ଧି ପାଉଛି। ୨୦୨୬ ଆର୍ଥିକ ବର୍ଷର ପ୍ରଥମ ତ୍ରୈମାସିକରେ ସମନ୍ବିତ ସୁଦ୍ଧା ଆୟରେ ବ୍ୟବସାୟ ପରିଚାଳନାଗତ ଆୟ ୪୦ ପ୍ରତିଶତ ସ୍ତରରେ ପହଞ୍ଚିଛି, ଯାହା ଗତ ବର୍ଷର ସମାନ ଅବଧିରେ ୧୨ ପ୍ରତିଶତ ରହିଥିଲା। ୨୦୨୬ ଆର୍ଥିକ ବର୍ଷର ପ୍ରଥମ ତ୍ରୈମାସିକରେ, ଆମେ ଆମର ସମସ୍ତ ଡିଜିଟାଲ୍ ପ୍ଲାଟଫର୍ମରୁ ପ୍ରତି ମାସରେ ହାରାହାରି ୮୧ ଲକ୍ଷ ବ୍ୟବହାରକାରୀଙ୍କୁ ସେବା ପ୍ରଦାନ କରିଛୁ।”
କମ୍ପାନୀ ପକ୍ଷରୁ ପ୍ରକାଶ କରାଯାଇଛି ଯେ ଜିଓବ୍ଲାକରକର ମ୍ୟୁଚୁଆଲ୍ ଫଣ୍ଡ ଭଳି ନୂତନ ଉତ୍ପାଦ ତଥା ଟିକସ ଫାଇଲିଂ ଓ ପ୍ଲାନିଂ ଭଳି ସୁବିଧାର ଶୁଭାରମ୍ଭ ହେବା ସହିତ, ବ୍ୟବହାରକାରୀ ସଂଖ୍ୟାରେ ଏକ ବିଶେଷ ବୃଦ୍ଧି ଘଟିଛି। କମ୍ପାନୀ ଆଗାମୀ ମାସଗୁଡ଼ିକରେ ନୂତନ ଉତ୍ପାଦ ଆଣିବା, ପୋର୍ଟଫୋଲିଓ ବିସ୍ତାର କରିବା ଏବଂ ଅନ୍ୟ ପ୍ରମୁଖ ଆର୍ଥିକ ସେବା କମ୍ପାନୀଗୁଡ଼ିକ ସହିତ ରଣନୈତିକ ସହଭାଗିତା କରିବା ନେଇ ସୂଚନା ଦେଇଛି।
