ବ୍ରହ୍ମପୁର, ୨।୧୧ : ଏକ ନାବାଳିକା ଦୁଷ୍କର୍ମ ମାମଲାର ବିଚାରଣା କରି ସ୍ବତନ୍ତ୍ର ଫାଷ୍ଟଟ୍ରାକ୍ କୋର୍ଟ ଜଜ୍ ଗଣେଶ୍ବର ପତି ଅଭିଯୁକ୍ତକୁ ୨୦ବର୍ଷ ଜେଲଦଣ୍ଡରେ ଦଣ୍ଡିତ କରିଛନ୍ତି। ଅଭିଯୁକ୍ତ ଜଣକ ହେଲେ ଧରକୋଟ ଥାନା ଅଞ୍ଚଳର କ୍ରିଷ୍ଣ ପ୍ରଧାନ(୨୫)। ଏହା ସହିତ ଅଭିଯୁକ୍ତଙ୍କୁ ୧ ଲକ୍ଷ ଟଙ୍କା ଜରିମାନା ଦେବାକୁ ନିର୍ଦେଶ ରହିଛି । ଜରିମାନା ଅନାଦେୟ ହେଲେ ଆଉ ଅଧିକ ୧୦ ମାସ ଜେଲଦଣ୍ଡ ଭୋଗିବେ ବୋଲି ନିର୍ଦ୍ଦେଶ ହୋଇଛି । ଅନ୍ୟପକ୍ଷରେ ପୀଡ଼ିତାଙ୍କୁ ସାଢେ ୪ ଲକ୍ଷ ଟଙ୍କା ଆର୍ଥିକ ସହାୟତା ପ୍ରଦାନ କରିବାକୁ ଜିଲ୍ଲା ଆଇନସେବା ପ୍ରାଧିକରଣକୁ ନିର୍ଦ୍ଦେଶ ଦିଆ ଯାଇଛି। ସୂଚନାଯୋଗ୍ୟଯେ, ଗତ ୨୦୧୯ ଅକ୍ଟୋବର ୨୪ ତାରିଖରେ କ୍ରିଷ୍ଣ ପ୍ରଧାନ ଗଣେଶ ପୂଜାରେ ଭଲ ନୃତ୍ୟ କରୁଥିବାରୁ ଜୈନିକ ନାବାଳିକା ତାଙ୍କୁ ଶୁଭେଚ୍ଛା ଜଣାଇଥିଲେ । ପରେ କ୍ରିଷ୍ଣ ତାଙ୍କୁ ପ୍ରେମ ନିବେଦନ କରିଥିଲେ । ନାବାଳିକା ଜଣକ ଏହାର ପ୍ରତିବାଦ କରିବାରୁ କ୍ରିଷ୍ଣ ନିଜ ଶରୀରର ବିଭିନ୍ନ ସ୍ଥାନକୁ ବ୍ଲେଡ଼ ରେ କଟିଦେଇଥିଲେ । ସେହିପରି ନାବାଳିକାଙ୍କୁ ଭୟଭୀତ କରି ବାଇକରେ ବସାଇ ବ୍ରହ୍ମପୁର ଆଣିଥିଲେ । ଏଠାରୁ ଟ୍ରେନ ରେ ବସାଇ ଆନ୍ଧ୍ରପ୍ରଦେଶ ବିଜୟୱାଡା ନେଇଥିଲେ । ସେଠାରେ ନାବାଳିକାଙ୍କୁ ବିବାହ କରିବା ସହ ସୁରତ ନେଇ ଯାଇଥିଲେ । ସେଠାରେ ଘରଭଡା ନେଇ ରଖିବା ସହ ତାଙ୍କ ଇଛା ବିରୁଦ୍ଧରେ ବାରମ୍ବାର ବଳାତ୍କାର କରିଥିଲେ । ଲକଡାଉନ ବେଳେ ନାବାଳିକାଙ୍କୁ ସୁରତରୁ ଗଞ୍ଜାମର ପାଟପୁର ଅଞ୍ଚଳକୁ ଆଣିଥିଲେ । ନାବାଳିକା ଜଣକ ଚାଇଲଡ଼ ଲାଇନ ସହ ଯୋଗାଯୋଗ କରିବାପରେ ସେଠାରୁ ତାଙ୍କୁ ଉଦ୍ଧାର କରାଯାଇଥିଲା । ଚାଇଲଡ଼ ଲାଇନ ପକ୍ଷରୁ ନାବାଳିକାଙ୍କୁ ଉତ୍କଳ ବଳାଶ୍ରମରେ ରଖା ଯାଇଥିଲା । ଘଟଣା ସମ୍ପର୍କରେ ପାଟପୁର ଥାନାକୁ ଉତ୍କଳ ବଳାଶ୍ରମ ଅଧିକ୍ଷକ ଜଣାଇଥିଲେ । ପିଡିତା ନବଳିକଙ୍କ ବୟାନ ଅନୁସାରେ ଧରକୋଟ ଥାନାରେ ୧୬୭/୧୯ ରେ ଏକ ଅପହରଣ ଓ ବଳାତ୍କାର ମାମଲା ରୁଜୁ ହୋଇଥିଲା । ଅଭଯୋଗର ୨ ଦିନ ପରେ ପୁଲିସ ଅଭିଯୁକ୍ତ କ୍ରିଷ୍ଣ ପ୍ରଧାନକୁ ଗିରଫ କରି କୋର୍ଟ ଚାଲାଣ କରିଥିଲା । ତଦନ୍ତ ଅଧିକାରୀ ଧରକୋଟ ଥାନା ଏସ୍ଆଇ ଵିନୟ କୁମାର ସାହୁ କୋର୍ଟରେ ଚାର୍ଜସିଟ୍ ଦାଖଲ କରିଥିଲେ। ଏହି ମାମଲାର ବିଚାରଣା ବେଳେ ୧୦ଜଣ ସାକ୍ଷୀଙ୍କ ବୟାନ୍କୁ ଭିତ୍ତି କରି ଉପଯୁକ୍ତ ସାକ୍ଷ୍ୟ ପ୍ରମାଣ ଥିବାରୁ କୋର୍ଟ ଉପରକ୍ତ ଦଣ୍ଡାଦେଶ ଶୁଣାଇଛନ୍ତି। ସରକାରଙ୍କ ତରଫରୁ ସ୍ବତନ୍ତ୍ର ପିପି ମୋହନ ସିଙ୍ଗାରୀ ମକଦ୍ଦମା ପରିଚାଳନା କରିଥିଲେ ।
