ବାରିପଦା : ଗୁରୁବାର ଅପରାହ୍ନରେ ୪୯ନଂ ଜାତୀୟ ରାଜପଥର ବାଙ୍ଗିରିପୋଷି ନିକଟ ଦୁଆରଶୁଣୀ ଘାଟିରେ ଏକ ସଡକ ଦୁର୍ଘଟଣାରେ ଦମ୍ପତିଙ୍କ ଘଟଣାସ୍ଥଳରେ ମୃତୁ୍ୟ ଘଟିଛି । ମୃତକ ମାନେ ହେଲେ ବିଶୋଇ ବ୍ଲକ ଦେଉଳସାହିର ରବିନାରାୟଣ ଦାଶ (୫୦) ଓ ପତ୍ନୀ ରେବତୀ ଦାଶ(୪୨) । ଘଟଣାରୁ ପ୍ରକାଶ ଯେ, ମୟୂରଭଞ୍ଜ ଜିଲ୍ଲା ଝାରପୋଖରିଆ ପାର୍ଶ୍ୱରୁ ଏକ ଟ୍ରକ୍ ୪୯ ନମ୍ବର ଜାତୀୟ ରାଜପଥରେ ଦୁଆରଶୁଣୀ ଅଭିମୁଖେ ଯାଉଥିଲା । ଅପରପକ୍ଷେ ବିଶୋଇ ପଟରୁ ବାରିପଦାକୁ ବାଇକ୍ରେ ଦମ୍ପତି ଯାଉଥିଲେ । ଦୁଆରଶୁଣୀ ଘାଟିରେ ଟ୍ରକ୍ ସହିତ ବାଇକ୍ ଆରୋହୀ ଦମ୍ପତିଙ୍କର ମୁହାଁମୁହିଁ ହୋଇଥିଲା । ଦୁର୍ଘଟଣା ନେଇ ପୋଲିସ ଓ ଦମକଳବାହିନୀ ଘଟଣାସ୍ଥଳରେ ପହଞ୍ଚି ଥିଲେ । ସେମାନେ ଚିକିତ୍ସା ପାଇଁ ଗୁରୁତର ଦମ୍ପତିଙ୍କୁ ବାଙ୍ଗିରିପୋଷି ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ନେଇଥିଲେ । କିନ୍ତୁ ସେଠାରେ ଡାକ୍ତର ଉଭୟଙ୍କୁ ମୃତ ଘୋଷଣା କରିଥିଲେ । ଏହି ଦୁର୍ଘଟଣା ପରେ ଟ୍ରକ୍ ଡ୍ରାଇଭର ଘଟଣାସ୍ଥଳରୁ ଫେରାର ହୋଇଯାଇଥିଲା । ପୋଲିସ ସୂଚନା ପାଇ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରି ଘଟଣାର ତଦନ୍ତ ଆରମ୍ଭ କରିଛନ୍ତି । ଏହି ଦୁର୍ଘଟଣା ପରେ ଦୀର୍ଘ ସମୟ ଧରି ଦୁଆରଶୁଣୀ ଘାଟିରେ ଉତ୍ତେଜନା ପ୍ରକାଶ ପାଇଥିଲା ।
