କାକଟପୁର ତା 6/11 ପରିବେଶ ସୁରକ୍ଷା ଲାଗି କେନ୍ଦ୍ର ଓ ରାଜ୍ୟ ସରକାର ବନୀକରଣ ଓ ବନସୁରକ୍ଷା ପାଇଁ ବିଭିନ୍ନ ଯୋଜନା ମାଧ୍ୟମରେ ପ୍ରତିବର୍ଷ କୋଟି କୋଟି ଟଙ୍କା ବ୍ୟୟ କରୁଛନ୍ତି l ପ୍ରତିବର୍ଷ ବନମହୋତ୍ସବ ସପ୍ତାହ ପାଳନ କରାଯାଉଛି l ଏମିତିକି କାର୍ଯ୍ୟକ୍ରମରେ ନେତା , ମନ୍ତ୍ରୀ , ସମାଜସେବୀ, ଜଙ୍ଗଲ ବିଭାଗ କର୍ମଚାରୀମାନେ ସାମିଲ ହୋଇ ଗୋଚର , ଅନାବାଦୀ , ଜଙ୍ଗଲ କିସମ ଜମି ଓ ରାସ୍ତା କଡରେ ଚାରା ରୋପଣ କରୁଥିବାର ଫଟୋ ଉଠାଇ ପ୍ରଚାର ପ୍ରସାର କରୁଛନ୍ତି l ଜଙ୍ଗଲ ବିଭାଗ ବି ଗଛ ଲଗାଅ ଓ ପରିବେଶ ବଞ୍ଚାଅ ବୋଲି ଜନସଚେତନତା କରିବା ସହ ଛକ ବଜାରରେ ପ୍ରଚାର ପ୍ରସାର ସାଙ୍ଗକୁ ବିଭିନ୍ନ ସ୍ଥାନରେ ବଡ଼ ବଡ଼ ବ୍ୟାନର ପୋଷ୍ଟର ଲଗାଉଛି l ମାତ୍ର ପୁରୀ ଜିଲ୍ଳାର କାକଟପୁର ପାଣିଛତ୍ର ଠାରେ ଥିବା ଅସ୍ତରଙ୍ଗ ବନ୍ୟପ୍ରାଣୀ ବନାଞ୍ଚଳ କାର୍ଯ୍ୟାଳୟ ପକ୍ଷରୁ ବିଗତ ୫ ବର୍ଷ ମଧ୍ୟରେ ବନୀକରଣ , ବନସୁରକ୍ଷା , ଚାରା ଉତ୍ପାଦନ, ଚାରା ଉତ୍ପାଦନ କ୍ଷେତ୍ରରେ ଶ୍ରମିକ ନିୟୋଜନ , ସେମାନଙ୍କୁ ମଜୁରୀ ପ୍ରଦାନ , ଜନସଚେତନତା ଓ ବ୍ୟାନର ପୋଷ୍ଟର ମାରିବା ଆଳରେ ବିଭାଗକୁ ମିଳିଥିବା ସରକାରୀ ଅନୁଦାନ ଅର୍ଥର ସିଂହଭାଗ ହରିଲୁଟ କରାଯାଇଛି ବୋଲି ଅଭିଯୋଗ ହୋଇଛି l ଏମିତିକି ଡିପାର୍ଟମେଣ୍ଟ କାର୍ଯ୍ୟଆଳରେ ଏବଂ ଏକାଧିକ ଗୁପ୍ତ ଟେଣ୍ଡର ମାଧ୍ୟମରେ ଜନୈକ ଅଣଠିକାଦାରକୁ ତୁଷ୍ଟିକରଣ କରି ବିଭାଗର କେତେକ ଦୁର୍ନୀତିଗ୍ରସ୍ତ ପଦାଧିକାରୀ ଓ କର୍ମଚାରୀ ମାଲାମାଲ ହେଉଥିବା ଅଭିଯୋଗ ହେଉଛି l ଅପରପକ୍ଷରେ ଆଜକୁ ଚାରିବର୍ଷ ତଳେ ଅସ୍ତରଙ୍ଗରୁ ନିମାପଡା ଓ କାକଟପୁରରୁ କୋଣାର୍କ ପୂର୍ତ୍ତ ବିଭାଗର ରାସ୍ତାକାର୍ଯ୍ୟ ପ୍ରଶସ୍ଥିକରଣ ବେଳେ ଉଭୟ ରାସ୍ତା କଡରେ ଥିବା ଶହ ଶହ ସଂଖ୍ୟାରେ ଗଛ କଟାହେଲା କିନ୍ତୁ ରାସ୍ତା ନିର୍ମାଣର ଚାରି ବର୍ଷ ପରେଵି ରାସ୍ତା କଡରେ ଚାରାଟିଏ ଜଙ୍ଗଲ ବିଭାଗ ରୋପଣ କଲାନାହିଁ l ବିନା ଟେଣ୍ଡରରେ ଫରେଷ୍ଟ କର୍ପୋରେସନ ଗଛ କାଟିଲା ଏବଂ କଟା ଯାଇଥିବା ଗଛକୁ କର୍ପୋରେସନ ତାର ଡିପୋକୁ ନନେଇ ଏଠାରେ ସ୍ଥାନୀୟ ଚୋରା କାଠ ବେପାରୀମାନଙ୍କୁ କାଠ ସବୁ ବିକ୍ରି କରିଦେଲା l ରାସ୍ତା କଡରେ ଥିବା ପୁରୁଣା ଚାକୁଣ୍ଡା , ଜାମୁ , ଆକାଶୀ , (ଆମ୍ବ ), ପଣସ , କୃଷ୍ଣଚୂଡ଼ା , ଝାଉଁ , ଇଉକିଲ ପଟାସ ଶାଗୁଆନ ଗଛ କଟା ହେବା ପରେ ଚୁକ୍ତି ମୁତାପକ ଯେତିକି ଗଛ କଟା ହେଲା ସେହି ପରିମାଣର ନୂଆ ଚାରା ଜଙ୍ଗଲ ବିଭାଗ ରାସ୍ତା କଡରେ ରୋପଣ କରିବା କଥା l କିନ୍ତୁ ଚାରାଟିଏ ଏଯାବତ ପୋତା ହେଲା ନାହିଁ l କଟାଯାଇଥିବା ଗଛର ମୂଳ ତଡା ହୋଇନଥିବାରୁ ଏବେ ସେହି ଗଛ ମୂଳରୁ କୁଆଁ ବାହାରି ଏବେ ବଡ଼ ବଡ଼ ଗଛରେ ପରିଣତ ହେଲାଣି l କିନ୍ତୁ ଅସ୍ତରଙ୍ଗ ବନ୍ୟପ୍ରାଣୀ ବନାଞ୍ଚଳ ମନରେଗା ଯୋଜନାରେ ଏହି ରାସ୍ତା କଡରେ ଏକାଧିକ ଚାରା ରୋପଣ କରିଥିବା ଦର୍ଶାଇ ଲକ୍ଷ ଲକ୍ଷ ଟଙ୍କା ବିଲ କରିଥିବା ଅଭିଯୋଗ ହେଉଛି l ବିଭାଗୀୟ ମନ୍ତ୍ରୀ ଏବଂ ସଚ୍ଚିବ ଏଦିଗରେ ଦୃଷ୍ଟି ଦେବା ସହ ବିଗତ ୫ ବର୍ଷ ମଧ୍ୟରେ ଅସ୍ତରଙ୍ଗ ବନ୍ୟପ୍ରାଣୀ ବନାଞ୍ଚଳକୁ କେଉଁ ଯୋଜନାରେ କେତେଟଙ୍କା ମିଳିଛି , ବିଭାଗ କେଉଁ ବାବଦରେ କେତେଟଙ୍କା ଖର୍ଚ୍ଚ କରିଛି ଓ କେତେ ଟଙ୍କାର ବିଲ ପୈଠ କରିଛି ତାହାର ଭିଜିଲାନ୍ସ ତଦନ୍ତ ପାଇଁ ଦୁର୍ନୀତି ସଙ୍ଘର୍ଷ ମଞ୍ଚ, ବରିଷ୍ଟ ନାଗରିକ ମଞ୍ଚ, ସୁରକ୍ଷା ମଞ୍ଚ ସହିତ ବିଭିନ୍ନ ମହଲରେ ଦୃଢ଼ ଦାବୀ ହୋଇଛି l ଅଭିଯୋଗ ସଂପର୍କରେ ନିକଟରେ ନୂତନ ଭାବେ କାର୍ଯ୍ୟଭାର ଗ୍ରହଣ କରିଥିବା ଅସ୍ତରଙ୍ଗ ବନ୍ୟପ୍ରାଣୀ ବନାଞ୍ଚଳ ରେଞ୍ଜରଙ୍କ ସହିତ ଯୋଗାଯୋଗ କରିବାକୁ ଚେଷ୍ଠା କରାଯାଇଥିଲେ ମଧ୍ୟ ସେ ମହାଶୟ ଛୁଟିରେ ଥିବାରୁ ତାଙ୍କ ମତାମତ ନିଆଯାଇପାରିନାହିଁ
