– ଅଷ୍ଟ୍ରେଲୀୟ କ୍ରିକେଟର ପ୍ୟାଟ୍ କମିନ୍ସ ସମର୍ଥିତ ହାଇଡ୍ରେସନ୍ ବ୍ରାଣ୍ଡ ପେସ (PACE) ଭାରତୀୟ ବଜାରରେ ପ୍ରବେଶ କରିଛି
– ଆରସିପିଏଲର ସ୍ୱାସ୍ଥ୍ୟ–କେନ୍ଦ୍ରିକ ପାନୀୟ ପୋର୍ଟଫୋଲିଓର ଗୁରୁତ୍ୱପୂର୍ଣ୍ଣ ବିସ୍ତାର
– ଆଗାମୀ ପାଞ୍ଚ ବର୍ଷ ମଧ୍ୟରେ ୫୦ଟି ପାଶ୍ଚାତ୍ୟ ବଜାରରେ ପହଞ୍ଚିବାର ଯୋଜନା
ବେଙ୍ଗାଲୁରୁ: ରିଲାଏନ୍ସ ଇଣ୍ଡଷ୍ଟ୍ରିଜ୍ ଲିମିଟେଡର ଏଫଏମସିଜି କମ୍ପାନୀ ରିଲାଏନ୍ସ କଞ୍ଜ୍ୟୁମର ପ୍ରଡକ୍ଟସ୍ ଲିମିଟେଡ୍ (ଆରସିପିଏଲ), ଅଷ୍ଟ୍ରେଲିଆର ଲୋକପ୍ରିୟ ‘ବେଟର ଫର ୟୁ’ ପାନୀୟ ବ୍ୟବସାୟ, ଗୁଡନେସ୍ ଗ୍ରୁପ୍ ଗ୍ଲୋବାଲ୍ ପ୍ରାଇଭେଟ୍ ଲିମିଟେଡ୍ (ଜିଜିଜି) ରେ ଅଧିକାଂଶ ଅଂଶଧନ ହାସଲ କରିଛି। ଏହି କାରବାର ସହିତ, କମ୍ପାନୀ ଅଷ୍ଟ୍ରେଲିଆର ଉପଭୋକ୍ତା ବଜାରରେ ପ୍ରବେଶ ସହିତ ଏହାର ବିଶ୍ୱ ସ୍ତରରେ ସମ୍ପ୍ରସାରଣ ଦିଗରେ ଆଉ ଏକ ପାଦ ଆଗକୁ ବଢ଼ାଇଛି।
ରଣନୈତିକ ସହଭାଗୀତା ଅଧୀନରେ, ଆରସିପିଏଲ ଗୁଡନେସ୍ ଗ୍ରୁପ୍ ର ପ୍ରମୁଖ ବ୍ରାଣ୍ଡ, ନେକ୍ସବା ତଥା ଅଷ୍ଟ୍ରେଲୀୟ କ୍ରିକେଟ୍ ଅଧିନାୟକ ପ୍ୟାଟ୍ କମିନ୍ସଙ୍କ ସହିତ ସହ-ନିର୍ମିତ ହାଇଡ୍ରେସନ୍ ପାନୀୟ ବ୍ରାଣ୍ଡ ପେସ (PACE) କୁ ଭାରତ ସମେତ ଅନେକ ନୂତନ ବଜାରରେ ଉପଲବ୍ଧ କରିବ। କମ୍ପାନୀ ପକ୍ଷରୁ ପ୍ରକାଶ କରାଯାଇଛି ଯେ ଏହି ପଦକ୍ଷେପ ଏହାର ସ୍ୱାସ୍ଥ୍ୟ-କେନ୍ଦ୍ରିକ ପାନୀୟ ପୋର୍ଟଫୋଲିଓକୁ ମଜଭୁତ କରିବ।
ଆରସିପିଏଲ ନିର୍ଦ୍ଦେଶକ ଟି. କୃଷ୍ଣକୁମାର କହିଛନ୍ତି, “ଏହି ସହଭାଗୀତା ଭାରତରୁ ଏକ ବିଶ୍ୱସ୍ତରୀୟ ଏଫଏମସିଜି କମ୍ପାନୀ ଭାବରେ ଆରସିପିଏଲକୁ ସ୍ଥାପିତ କରିବା ଦିଗରେ ଏକ ମହତ୍ତ୍ୱପୂର୍ଣ୍ଣ ପଦକ୍ଷେପ। ନେକ୍ସବା ଏବଂ ପେସ ଭଳି ସ୍ୱାସ୍ଥ୍ୟ-କେନ୍ଦ୍ରିତ ବ୍ରାଣ୍ଡ ଆମର ପୋର୍ଟଫୋଲିଓକୁ ମଜଭୁତ କରିବ। ଆମର ଯୋଗାଣ ଶୃଙ୍ଖଳ ଏବଂ ବିତରଣ କ୍ଷମତା ଜରିଆରେ, ଆମେ ଏହି ବ୍ରାଣ୍ଡଗୁଡ଼ିକୁ ଭାରତ ଏବଂ ଅନ୍ୟାନ୍ୟ ବଜାରରେ ବ୍ୟାପକ ଭାବରେ ଉପଲବ୍ଧ କରାଇବୁ। ଆମର ଲକ୍ଷ୍ୟ ହେଉଛି ବିଶ୍ୱସ୍ତରୀୟ ଗୁଣାତ୍ମକ ଉତ୍ପାଦଗୁଡ଼ିକୁ ପ୍ରତ୍ୟେକ ଗ୍ରାହକଙ୍କ ପାଇଁ ସୁଲଭ ମୂଲ୍ୟରେ ଉପଲବ୍ଧ କରାଇବା।”
କମ୍ପାନୀ ପୂର୍ବରୁ ୟୁଏଇ, କାତାର, ଓମାନ, ବାହାରିନ, ନେପାଳ ଏବଂ ଶ୍ରୀଲଙ୍କା ଭଳି ବଜାରରେ ଉପସ୍ଥିତ ଜାହିର କରିଛି। ଆରସିପିଏଲର ପୋର୍ଟଫୋଲିଓରେ ରସ୍କିକ୍ ଏବଂ ସନ୍ କ୍ରଶ୍ ଜୁସ୍, ଜିରୋ-ସୁଗାର କାର୍ବୋନେଟେଡ୍ ପାନୀୟ ଏବଂ ହର୍ବାଲ-ନାଚୁରାଲ ବ୍ରାଣ୍ଡ ‘ଶୂନ୍ୟ’ ଭଳି ଉତ୍ପାଦ ଅନ୍ତର୍ଭୁକ୍ତ ରହିଛି।
ଗୁଡନେସ୍ ଗ୍ରୁପର ପ୍ରତିଷ୍ଠାତା ଟ୍ରୟ ଡଗଲାସ୍ କହିଛନ୍ତି, “ଆମର ବ୍ରାଣ୍ଡ ଏବଂ ନବସୃଜନକୁ ମିଳିଥିବା ସ୍ୱୀକୃତିରେ ଆମେ ବହୁତ ଉତ୍ସାହିତ। ଆରସିପିଏଲ ଏକ ଦ୍ରୁତ ଗତିରେ ବୃଦ୍ଧି ପାଉଥିବା ଅଗ୍ରଣୀ ଏଫଏମସିଜି କମ୍ପାନୀ, ଏବଂ ବିଶ୍ୱ ସ୍ତରରେ ଏହି ସମ୍ପ୍ରସାରଣରେ ଆମେ ଏକ ମଜଭୁତ ଅଂଶୀଦାର ପାଇଛୁ। ଆମେ ଆଗାମୀ ପାଞ୍ଚ ବର୍ଷ ମଧ୍ୟରେ ୫୦ ଟି ପାଶ୍ଚାତ୍ୟ ବଜାରରେ ପହଞ୍ଚିବାକୁ ଲକ୍ଷ୍ୟ ରଖିଛୁ, ଏବଂ ଏହି ସହଭାଗୀତା ଆମକୁ ‘ଉନ୍ନତ-ସ୍ୱାସ୍ଥ୍ୟ’ ବର୍ଗରେ ବିଶ୍ୱସ୍ତରୀୟ ନେତୃତ୍ୱ ହାସଲ କରିବାରେ ସହାୟକ ହେବ।”
ସିଡନୀସ୍ଥିତ ଗୁଡନେସ୍ ଗ୍ରୁପ୍ ଗ୍ଲୋବାଲ୍ ଅଷ୍ଟ୍ରେଲିଆ ସମେତ ୨୧ ରୁ ଅଧିକ ଦେଶରେ ସ୍ୱାସ୍ଥ୍ୟ-କେନ୍ଦ୍ରିତ ପାନୀୟ ବିକଳ୍ପ ପ୍ରଦାନ କରେ।
