ପୁରୀ ଜିଲ୍ଲା କଣାସ ଅଞ୍ଚଳ ଦେଇ ପ୍ରବାହିତ ହେଉଥିବା ଦୟାନଦୀ ର ଅତି ପ୍ରବଳ ବନ୍ୟା ଜଳ ଦୁଇ କୂଳ ଲଙ୍ଘିବା ସହ ତ୍ରିଲୋଚନ ପୁର ପଞ୍ଚାୟତ ର ବରଦା ଗ୍ରାମ ନିକଟରେ ଏକ ଦୁଇଶହ ଫୁଟ ର ଘାଇ ସୃଷ୍ଟି ହେବା ଫଳରେ ସଂପୂର୍ଣ୍ଣ ଅଞ୍ଚଳ ଜଳମଗ୍ନ ପାଲଟିଛି l ବହୁ ଲୋକ ଙ୍କ ଘରେ ପାଣି ପଶିଯିବା ଫଳରେ ସେମାନେ ଛାତ ଉପରେ କିମ୍ବା ଯେ କୌଣସି ଉଚ୍ଚ ସ୍ଥାନରେ ଯାଇ ପିଲା ଛୁଆ ଙ୍କୁ ଧରି ବଡ଼ ଦୟନୀୟ ଅବସ୍ଥା ରେ ରହୁଛନ୍ତି l ନୂଆ କରି ଲଗା ଯାଇଥିବା ଧାନ ଗଛ ଗୁଡିକ ଧୋଇ ଯିବା ସହ କ୍ଷେତ ବାଡ଼ି ଚାରିଆଡେ ଗଭୀର ଜଳ ଜମି ରହିବା ଦ୍ୱାରା ଗାଈ ଗୋରୁ ପଦା କୁ ନ ବାହାରି ଭୋକ ରେ ସନ୍ତ ସନ୍ତିଆ ଘରେ ପଡି ରହିଛନ୍ତି l
ସମସ୍ତେ ସରକାର ଙ୍କ ଦ୍ୱାରା ଦିଆଯାଉଥିବା ଓଳିଏ ରନ୍ଧା ଖାଦ୍ୟ ଖାଇ ଚଳେଇ ନେବା ସହ କେବେ ଜଳ ସ୍ତର ଖସିବ ସେଥି ନେଇ ଚିନ୍ତା ରେ ଦିନ କାଟୁଛନ୍ତି l ଏଇ ଗୋଳିଆ ନଈ ପାଣି ଭିତର ଦେଇ ଅନେକ ଵିଷଧର ସାପ ଓ ଗୋଧି ଇତ୍ୟାଦି ଜନ୍ତୁ ମଧ୍ୟ ଏବେ ଏଇ ଅଞ୍ଚଳ ର ଲୋକ ମାନଙ୍କ ପାଇଁ ଚିନ୍ତା ର କାରଣ ସାଜିଲେଣି l
ସ୍ଥାନୀୟ ପ୍ରଶାସନ ଓ ସରକାର ଙ୍କ ସଠିକ ଉଦ୍ୟମ ରହିଲେ ଲୋକ ମାନେ କିଛି ଟା ଥଇଥାନ ବାଟ ପାଇ ଯାଆନ୍ତେI କରୋନା ମହାମାରୀ ସମୟରେ ବନ୍ୟା ଲୋକମାନଙ୍କ ପାଈଁ ବୋଝ ଉପରେ ନଳିତା ବିଡା ହୋଇ ଯାଇଛି । ଏଭଳି ଦୁର୍ଦୀନ ସମୟରେ ଥିଓସୋଫିକାଲ ଅର୍ଡର ଅଫ ସର୍ଭିସ ର ସଭାପତି ଡକ୍ଟର ଦୀପା ପାଢୀ ଙ୍କ ତତ୍ତ୍ବାବଧାନ ରେ ଓ ମେଜର ଡକ୍ଟର କଳ୍ପନା ଦାଶ ଙ୍କ ପରିଚାଳନାରେ କିଛି ସ୍ଵେଚ୍ଛାସ୍ଵେବୀ ପୁରୀ ଜିଲ୍ଲାର କଣାସ ବ୍ଲକ ଅନ୍ତର୍ଗତ ବରଡା ଗ୍ରାମକୁ ଯାଇ ବନ୍ୟାର ସ୍ଥିତି ପରଖିବା ସହ ଗ୍ରାମ ବାସୀଙ୍କୁ ରିଲିଫ ସମାଗ୍ରୀ ଯଥା ଚୁଡା , ଗୁଡ଼ , ବିସ୍କୁଟ , କେକ , ନୁଡୁଲ୍ସ ଓ ଅଟା ଇତ୍ୟାଦି ବଣ୍ଟନ କରିଥିଲେ I
ଏହି କାର୍ଯ୍ୟରେ ଦୀପକ ଚୌଧୁରୀ , ଲକ୍ଷ୍ମଣ ସ୍ବାଇଁ , ଅରୁଣ କୁମାର ଦାସ , ଦୀପକ ରଞ୍ଜନ ପ୍ରଧାନ , ହିମାଂଶୁ ଶେଖର ବେହେରା , ରଞ୍ଜିତ ନାୟକ ପ୍ରମୁଖ ବଣ୍ଟନ କାର୍ଯରେ ସହଯୋଗ କରିଥିଲେ । ସ୍ଥାନୀୟ ଲୋକମାନେ ଥିଓସୋଫିକାଲ ଅର୍ଡର ଅଫ ସର୍ଭିସ ର ଏ ଭଳି ମାନବୀୟ କାର୍ଯ୍ୟକୁ ପ୍ରସଂଶା କାରିଥିଲେ ।
