ଵ୍ରହ୍ମପୁର, ୨/୧୧- ଭିଜିଲାନ୍ସ ଜାଲରେ ପଡ଼ିଛନ୍ତି ଗଞ୍ଜାମ ଜିଲ୍ଲା ବୁଗୁଡ଼ା ଏନ୍ଏସି କାର୍ଯ୍ୟାଳୟର କନିଷ୍ଠ ଯନ୍ତ୍ରୀ(ଜେଇ) ସାଗରିକା ମହାନ୍ତି। ଲାଞ୍ଚ ଗ୍ରହଣ ମାମଲାରେ ବ୍ରହ୍ମପୁର ଭିଜିଲାନ୍ସ ବିଭାଗ କେସ୍ ନମ୍ବର ୨୧/୨୩ରେ ଜେଇ ସାଗରିକାଙ୍କୁ ଗିରଫ କରିଛି।
ସୂଚନା ଅନୁସାରେ ବୁଗୁଡ଼ା ଅଞ୍ଚଳର ଜଣେ ବ୍ୟକ୍ତି ତାଙ୍କର ଘର ପ୍ଲାନ୍ ପାଇଁ ଏନ୍ଏସି କାର୍ଯ୍ୟାଳୟରେ ଆବେଦନ କରିଥିଲେ। ପ୍ଲାନ୍ ମଂଜୁର ପାଇଁ ଜେଇ ସାଗରିକା ତାଙ୍କୁ ୪ହଜାର ଟଙ୍କା ଲାଞ୍ଚ ମାଗିଥିଲେ। ଏ ନେଇ ଆବେନକାରୀ ବ୍ରହ୍ମପୁର ଭିଜିଲାନ୍ସ ବିଭାଗ ନିକଟରେ ଅଭିଯୋଗ କରିଥିଲେ। ଆଜି ଆବେଦନକାରୀ ଅପରାହ୍ଣରେ ଲାଞ୍ଚ ଟଙ୍କା ନେଇ ବୁଗୁଡ଼ା ଏନ୍ଏସି କାର୍ଯ୍ୟାଳୟକୁ ଯାଇଥିଲେ। ଲାଞ୍ଚ ଟଙ୍କା ଦେଇ ସାରିବା ପରେ ଭିଜିଲାନ୍ସ ଟିମ୍ ସେଠାରେ ଚଢ଼ଉ କରିଥିଲା। ସେଠାରୁ ଲାଞ୍ଚ ବାବଦ ୪ହଜାର ଟଙ୍କା ଜବତ କରିବା ସହିତ ଜେଇ ସାଗରିକାଙ୍କୁ ଗିରଫ କରିଥିଲା। ସାଗରିକାଙ୍କ ଘର ଜଗତସିଂହପୁର ଜିଲ୍ଲାର ସୋମେଆ ହୋଇଥିବା ବେଳେ ସେ ଗତ ଅଗଷ୍ଟ ୨୫ତାରିଖରେ ବୁଗୁଡ଼ା ଏନ୍ଏସି କାର୍ଯ୍ୟାଳୟରେ କନିଷ୍ଠ ଯନ୍ତ୍ରୀ ଭାବେ ଯୋଗଦାନ କରିଥିଲେ। ଏହାପରେ ଭିଜିଲାନ୍ସ ବିଭାଗର ଜେଇ ସାଗରିକାଙ୍କ ସମ୍ପତ୍ତି ଯାଞ୍ଚ ଆରମ୍ଭ କରିଥିବା ସୂଚନା ଦିଆଯାଇଛି।
