ବ୍ରହ୍ମପୁର, ୨୦/୧୦ -ବ୍ରାଉନସୁଗର କାରବାରରେ ସଂପୃକ୍ତି ଅଭିଯୋଗରେ ବଡ଼ ବଜାର ଥାନା ପୁଲିସ ମାଆ ଓ ଦି’ପୁଅଙ୍କୁ ଗିରଫ କରିଛି । ରଘୁପତି ନଗର ୨ୟ ଲାଇନ୍ର ପୂଜା ପ୍ରଧାନ(୪୧) ଏବଂ ତାଙ୍କର ଦି’ପୁଅ ଆକାଶ ପ୍ରଧାନ(୨୨) ଓ ବିକାଶ ପ୍ରଧାନ (୧୯)କୁ ଗିରଫ କରି କୋର୍ଟ ଚାଲାଣ କରାଯାଇଛି । ସେମାନଙ୍କ ଠାରୁ ୮.୪୮ ଗ୍ରାମ୍ ବ୍ରାଉନ୍ସୁଗର, ୮୯୦୦ ଟଙ୍କା ଓ ତିନୋଟି ମୋବାଇଲ୍ ଫୋନ୍ ଜବତ ହୋଇଥିବାବ୍ରହ୍ମପୁର ଏସ୍ପି ଡା.ସବଣା ବିବେକ ଏମ୍ ଏକ ପ୍ରେସ୍ ବିବୃତିରେ ସୂଚନା ଦେଇଛନ୍ତି । ବ୍ରହ୍ମପୁରରେ ପୂର୍ବରୁ ବ୍ରାଉନସୁଗର କାରବାର ନଥିଲା। ତିନିବର୍ଷ ହେଲା ଏଠାରେ ନିୟମିତ ଭାବେ ବ୍ରାଉନସୁଗର ବେପାରି ଧରାପଡୁଛନ୍ତି। ପୁଲିସ ଓ ଅବକାରୀ ବିଭିନ୍ନ ଜାଗାରୁ ଏହି କାରବାରରେ ଲିପ୍ତ ଅଭିଯୁକ୍ତଙ୍କୁ ଗିରଫ କରୁଛନ୍ତି। ତଥାପି ଏଠାରେ ବ୍ରାଉନସୁଗର ବେପାରି ସକ୍ରିୟ ରହିଥିବା ଜଣାପଡିଛି। ସେମାନେ ଭୁବନେଶ୍ବର ଓ ଖୋଦ୍ଧାରୁ ବ୍ରାଉନସୁଗର ଆଣି ଏଠାରେ କାରବାର କରୁଛନ୍ତି ଏବଂ ଯୁବ ଗୋଷ୍ଠୀଙ୍କୁ ଟାର୍ଗେଟ୍ କରାଯାଉଛି । ବିଶେଷ କରି ଇଞ୍ଜିନିୟରିଂ ପଢୁଥିବା ଛାତ୍ରଛାତ୍ରୀଙ୍କୁ ନିଶାର ଅଭ୍ୟସ୍ତ କରାଯାଉଛନ୍ତି ବେପାରି । ପ୍ରଥମେ ମାଗଣା ଓ କମ୍ ଟଙ୍କାରେ ଏହା ଯୋଗାଉଥିବା ବେଳେ ପରବର୍ତ୍ତୀ ସମୟରେ ସେମାନଙ୍କ ଠାରୁ ମୋଟା ଅଙ୍କର ଟଙ୍କା ନେଇ ଏହି ନିଶାଦ୍ରବ୍ୟ ଯୋଗାଉଛନ୍ତି ବୋଲି ପୁଲିସର ତଦନ୍ତ ବେଳେ ଧରାପଡିଛି ।
ଉପରୋକ୍ତ ଅଭିଯୁକ୍ତ ମାନେ ବ୍ରାଉନସୁଗର କାରବାର କରୁଥିବା ସୁରାକ୍ ମିଳିବା ପରେ ଚଢ଼ାଉ ହୋଇଥିଲା। ମାଜିଷ୍ଟ୍ରେଟ ରବୀନ୍ଦ୍ର କୁମାର ମିଶ୍ରଙ୍କ ଉପସ୍ଥିତିରେ ବ୍ରାଉନସୁଗର ଜବତ ହୋଇଥିଲା । କିଛି ମାସ ହେଲା ଏମାନେ ଏହି କାରବାର କରୁଥିଲେ । ବାହାରୁ ନିଶା ଜିନିଷ ଆଣି ଛୋଟ ପାଉନ୍ କରି ୫ଶହ ଟଙ୍କାରେ ବିକ୍ରି କରୁଥିଲେ । ବଡ଼ବଜାର ଥାନା କେସ୍ ନମ୍ବର ୪୧୦/୨୦୨୩ରେ ମାମଲା ରୁଜୁ କରାଯାଇ ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯାଇଛି ।
