Odisha news

ନବଜାତ ହାତୀ “ରାଜା” ର ଜୀବନ ରକ୍ଷା ପାଇଁ ଅନନ୍ତ ଅମ୍ବାନୀ ପଠାଇଲେ ସ୍ୱତନ୍ତ୍ର ବିମାନ

0

– ଆସାମରୁ ଜାମନଗରସ୍ଥିତ ବନତାରାକୁ ଅଣାଯାଉଛି ଶିଶୁ ହାତୀ, ସ୍ୱତନ୍ତ୍ର ବିମାନରେ ଡାକ୍ତରୀ ଦଳ ମଧ୍ୟ ରହିବେ

– ଜନ୍ମର ପ୍ରଥମ ଦିନରେ ହିଁ ଭାଙ୍ଗିଯାଇଥିଲା ଗୋଡ଼, ସାତ ସପ୍ତାହ ଧରି ଜୀବନ ସହ ସଂଘର୍ଷ କରୁଛି ରାଜା

ଜାମନଗର / ଗୁଆହାଟୀ, ୨୦ ନଭେମ୍ବର, ୨୦୨୬: ମାତ୍ର ସାତ ସପ୍ତାହର ଶିଶୁ ହାତୀ “ରାଜା” ଏବେ ନିଜ ଗୋଡ଼ରେ ଠିକ୍ ଭାବେ ଠିଆ ହେବାକୁ ମଧ୍ୟ ସକ୍ଷମ ହୋଇନାହିଁ। ଯେଉଁ ବୟସରେ ସେ ନିଜ ମାଆ ସହ ଖେଳିବା ଓ ଦୌଡ଼ିବା କଥା, ସେହି ବୟସରେ ତାକୁ ଜୀବନ ପାଇଁ ସଂଘର୍ଷ କରିବାକୁ ପଡ଼ୁଛି। ଜନ୍ମର ପ୍ରଥମ ଦିନରେ ହିଁ ମାଆର ଭୟଭୀତ ଅବସ୍ଥାରେ ମାରିଥିବା ଏକ ଗୋଇଠା ଯୋଗୁଁ ତା’ର ପଛ ଗୋଡ଼ର ହାଡ଼ ଭାଙ୍ଗିଯାଇଥିଲା। ଦୁର୍ଭାଗ୍ୟବଶତଃ, ସେ ମାଆର କ୍ଷୀର ପିଇବାରୁ ମଧ୍ୟ ବଞ୍ଚିତ ହୋଇଛି।

ଆସାମରେ ଅକ୍ଟୋବର ୨ ତାରିଖରେ ଜନ୍ମ ହୋଇଥିବା ରାଜାର ସ୍ୱାସ୍ଥ୍ୟାବସ୍ଥା ଏବେ ମଧ୍ୟ ଗୁରୁତର ରହିଛି। ଗତ ସାତ ସପ୍ତାହ ଧରି ବନତାରାର ଡାକ୍ତରମାନେ ତା’ର ଚିକିତ୍ସା ଓ ଯତ୍ନ ନେଉଛନ୍ତି। ଭଙ୍ଗା ଗୋଡ଼ ସହିତ ସଂକ୍ରମଣ ଓ ଦୁର୍ବଳତା ତା’ର ସମସ୍ୟାକୁ ଆହୁରି ବଢ଼ାଇ ଦେଇଛି। ଏବେ ତା’ର ଜୀବନ ରକ୍ଷା ପାଇଁ ଅନନ୍ତ ଅମ୍ବାନୀଙ୍କ ଉଦ୍ୟମରେ ଏକ ସ୍ୱତନ୍ତ୍ର ବିମାନ ଯୋଗେ ଆସାମରୁ ଗୁଜରାଟର ଜାମନଗରସ୍ଥିତ ବନତାରାକୁ ଅଣାଯାଉଛି। ପ୍ରାୟ ୨,୫୦୦ କିଲୋମିଟରରୁ ଅଧିକ ଦୂରତାର ସଡ଼କ ଯାତ୍ରା ଏହି ଶିଶୁ ହାତୀ ପାଇଁ ବିପଦଜନକ ହୋଇଥାନ୍ତା। ତେଣୁ ମାତ୍ର ଚାରି ଘଣ୍ଟାର ବିମାନ ଯାତ୍ରାର ବ୍ୟବସ୍ଥା କରାଯାଇଛି।

ରାଜା ପାଇଁ ବିମାନରେ ସ୍ୱତନ୍ତ୍ର ଶଯ୍ୟା ଏବଂ ତା’ର ଆହତ ଗୋଡ଼କୁ ସାହାରା ଦେବା ପାଇଁ ବିଶେଷ ବ୍ୟବସ୍ଥା କରାଯାଇଛି। ସମଗ୍ର ଯାତ୍ରା ସମୟରେ ଡାକ୍ତର ଓ ଯତ୍ନକାରୀଙ୍କ ଏକ ଦଳ ତା’ ସହିତ ରହିବେ। ବନତାରାରେ ପହଞ୍ଚିବା ପରେ ତାକୁ ଏକ ସ୍ୱତନ୍ତ୍ର ହସ୍ପିଟାଲରେ ଭର୍ତ୍ତି କରାଯାଇ ଉନ୍ନତମାନର ଚିକିତ୍ସା ଯୋଗାଇ ଦିଆଯିବ।

ବନତାରାର ସିଇଓ ଭିଭାନ କରାନୀ କହିଛନ୍ତି, “ରାଜା ଗତ ସାତ ସପ୍ତାହ ଧରି ଗୁରୁତର ଆଘାତ ଓ ସ୍ୱାସ୍ଥ୍ୟ ସମସ୍ୟା ସହ ସଂଘର୍ଷ କରୁଛି। ଅନନ୍ତ ଅମ୍ବାନୀଙ୍କ ସହଯୋଗରେ ତାକୁ ଯଥାଶୀଘ୍ର ବନତାରାକୁ ଅଣାଯାଉଛି। ଏଠାରେ ବିଶେଷଜ୍ଞ ଡାକ୍ତରମାନେ ତା’ର ଚିକିତ୍ସା ଓ ଯତ୍ନ ନେବେ। ରାଜା ସୁସ୍ଥ ହୋଇ ପୁଣିଥରେ ନିଜ ଗୋଡ଼ରେ ଚାଲିପାରିବ, ସେଥିପାଇଁ ଆମେ ସମସ୍ତ ପ୍ରକାର ଉଦ୍ୟମ କରୁଛୁ।”

Ad2
Leave A Reply