ଆସାମ ବନ୍ୟା ସହାୟତା ପାଇଁ ୨୧ କୋଟି ଟଙ୍କା ପ୍ରଦାନ କରିବ ରିଲାଏନ୍ସ ଫାଉଣ୍ଡେସନ୍

ଗୌହାଟି, ଅଗଷ୍ଟ ୩, ୨୦୨୬: ଆସାମରେ ବନ୍ୟା ପ୍ରଭାବିତ ପରିବାରକୁ ସହାୟତା କରିବା ପାଇଁ ରିଲାଏନ୍ସ ଫାଉଣ୍ଡେସନ୍ ଆସାମ ମୁଖ୍ୟମନ୍ତ୍ରୀଙ୍କ ରିଲିଫ୍ ପାଣ୍ଠିକୁ ୨୧ କୋଟି ଟଙ୍କା ପ୍ରଦାନ କରିବା ନେଇ ଘୋଷଣା କରିଛି। ଏହି ରାଶି ବ୍ୟତୀତ ରାଜ୍ୟରେ ପୂର୍ବରୁ ରିଲାଏନ୍ସ ପକ୍ଷରୁ ଚାଲିଥିବା ରିଲିଫ୍ କାମ ଜାରି ରହିବ। ଫାଉଣ୍ଡେସନର ବିଭିନ୍ନ ଦଳଗୁଡ଼ିକ ଶିବସାଗର ଏବଂ ଚରାଇଦେଓ ଜିଲ୍ଲାରେ ଖାଦ୍ୟ, ସୁରକ୍ଷିତ ପାନୀୟ ଜଳ, ସ୍ୱାସ୍ଥ୍ୟସେବା, ଅସ୍ଥାୟୀ ଆଶ୍ରୟସ୍ଥଳ ଏବଂ ଗୃହପାଳିତ ପଶୁ ଯତ୍ନ ଯୋଗାଇବାରେ ସକ୍ରିୟ ଭାବରେ ନିୟୋଜିତ ଅଛନ୍ତି।

ପ୍ରଭାବିତ ପରିବାରଗୁଡିକ ପ୍ରତି ସମବେଦନା ପ୍ରକାଶ କରି ରିଲାଏନ୍ସ ଫାଉଣ୍ଡେସନର ପ୍ରତିଷ୍ଠାତା ଏବଂ ଅଧ୍ୟକ୍ଷା ନୀତା ଏମ୍. ଅମ୍ବାନୀ କହିଛନ୍ତି, “ଆପଣମାନେ ଏକା ନୁହଁନ୍ତି। ଆମେ ଆପଣଙ୍କ ସହିତ ଠିଆ ହୋଇଛୁ ଏବଂ ଆଗାମୀ ଦିନରେ ଆପଣଙ୍କ ପାଖରେ ରହିବୁ। ଏକାଠି, ଆମେ ଜୀବନକୁ ପୁଣି ଟ୍ରାକକୁ ଫେରାଇ ଆଣିବା ଏବଂ ଆଶା ପୁନଃ ଜାଗ୍ରତ କରିବା।”

ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ୱ ଶର୍ମା ସହାୟତା ପାଇଁ ନୀତା ଅମ୍ବାନୀ ଏବଂ ରିଲାଏନ୍ସ ଫାଉଣ୍ଡେସନକୁ କୃତଜ୍ଞତା ପ୍ରକାଶ କରିଛନ୍ତି। ସେ ଉଲ୍ଲେଖ କରିଛନ୍ତି ଯେ ଫାଉଣ୍ଡେସନର ଦଳଗୁଡ଼ିକ ବନ୍ୟା ପ୍ରଭାବିତ ଅଞ୍ଚଳରେ ଭୋଜନ, ସ୍ୱାସ୍ଥ୍ୟସେବା, ଅସ୍ଥାୟୀ ଆଶ୍ରୟସ୍ଥଳ ଏବଂ ପଶୁଧନ ଯତ୍ନରେ ସହଯୋଗ କରୁଛନ୍ତି।

ଫାଉଣ୍ଡେସନର ଲକ୍ଷ୍ୟ ଉଭୟ ଜିଲ୍ଲାରେ ଅତି କମରେ ୫୦,୦୦୦ ଜରୁରୀ ସହାୟତା ଆବଶ୍ୟକ କରୁଥିବା ବ୍ୟକ୍ତିଙ୍କୁ ରିଲିଫ୍ ଏବଂ ପୁନର୍ବାସ ସହାୟତା ପ୍ରଦାନ କରିବା। ପ୍ରଭାବିତ ଅଞ୍ଚଳରେ ସାମୁଦାୟିକ ରୋଷେଇ ଘର ମାଧ୍ୟମରେ ଗରମ ଭୋଜନ ପରିବେଷଣ କରାଯାଉଛି। ପାନୀୟ ଜଳ ଯୋଗାଣ ଏବଂ ଜଳ ବିଶୋଧନ ବ୍ୟବସ୍ଥାକୁ ପୁନଃସ୍ଥାପିତ କରିବା ସହିତ ସ୍ୱାସ୍ଥ୍ୟ କେନ୍ଦ୍ରଗୁଡ଼ିକର  ସଫେଇ ଏବଂ ପୁଣିଥରେ ସକ୍ରିୟ କରିବା ଦିଗରେ ମଧ୍ୟ କାମ କରାଯାଉଛି।

ପଶୁମାନଙ୍କ ଯତ୍ନ ସୁନିଶ୍ଚିତ କରିବା ପାଇଁ, ବନତାରାର ବିଭିନ୍ନ ଦଳଗୁଡ଼ିକ ଘରକୁ ଘର ପରିଦର୍ଶନ କରି ପଶୁଚିକିତ୍ସା ସେବା ପ୍ରଦାନ କରୁଛନ୍ତି। ସ୍ଥାନୀୟ ପ୍ରଶାସନ ଏବଂ ସମୁଦାୟଗୁଡିକ ସହିତ ସହଯୋଗରେ ରିଲିଫ୍ ଅଭିଯାନ ଜାରି ରହିଛି, ଯାହା ଦ୍ୱାରା ରିଲିଫ୍ ଶିବିରରେ ରହୁଥିବା ପରିବାରଗୁଡ଼ିକୁ ଶୀଘ୍ର ସେମାନଙ୍କ ନିଜ ଘରକୁ ଫେରିପାରିବେ।