ବାରିପଦା : ଶିମିଳିପାଳ ଜାତୀୟ ଉଦ୍ୟାନରେ ଆଜି ବି ରହସ୍ୟାବୃତ୍ତ ଓ ଅନାଲୋଚିତ ଭାବରେ ରହିଛି ଅନେକ ସ୍ଥାନ । ଲୋକଲୋଚନ ଆଢୁଆଳରେ ରହିଥିବା ଏଭଳି ସ୍ଥାନର ପ୍ରଚାର ପ୍ରସାର ଦିଗରେ ୨୦୧୮ ମସିହାରୁ କାର୍ଯ୍ୟ କରୁଥିବା ସ୍ୱେଚ୍ଛାସେବୀ ସଂଗଠନ ‘ମୟୂରଭଞ୍ଜ ମିରର’ ଶିମିଳିପାଳ ଜାତୀୟ ଉଦ୍ୟାନର ବାସିପିଠା ନିକଟ ସୁବର୍ଣ୍ଣମଞ୍ଜରୀ ଠାରୁ ପ୍ରାୟଃ ୫ କିଲୋମିଟର ଦୂର ଘଞ୍ଚ ଜଙ୍ଗଲ ମଧ୍ୟରେ ଆବିଷ୍କାର କରିଛି ସୁବର୍ଣ୍ଣଝରଣ ନାମକ ୧୧୧୫ ଫୁଟ ଉଚ୍ଚ ଜଳପ୍ରପାତ । ୬ସ୍ତର ବିଶିଷ୍ଟ ଏହି ସୁବର୍ଣ୍ଣଝରଣ ଜଳପ୍ରପାତର ୪ଟି ସ୍ତର ଦୃଶ୍ୟମାନ ହେଉଥିବାବେଳେ ଅନ୍ୟଦୁଇଟି ସ୍ତର ଗଛପତ୍ରର ସବୁଜ ଆବରଣ ଭିତରେ ରହିଛି । ଘଞ୍ଚ ଅରଣ୍ୟ ପରିବେଷ୍ଟିତ ଏହି ଅଞ୍ଚଳରେ ଏଭଳି ଏକ ଜଳପ୍ରପାତ ଆବିଷ୍କୃତ ହେବା ପରେ ଆଖପାଖ ଅଞ୍ଚଳବାସୀଙ୍କ ମଧ୍ୟରେ ଉକôଣ୍ଠା ପ୍ରକାଶ ପାଇଛି । ପ୍ରାୟଃ ୮.୫ କିମିର ଦୁଃସାଧ୍ୟ ଓ ଦୁଃସାହସିକ ଅଙ୍କାବଙ୍କା ରାସ୍ତାରେ ପାହାଡ ଉପରକୁ ଚଢି ଏହି ଜଳପ୍ରପାତକୁ ‘ମୟୂରଭଞ୍ଜ ମିରରର’ ସଦସ୍ୟମାନେ ଆବିଷ୍କାର କରିଛନ୍ତି । ମୋଟ୍ ୧୮ କିମିର ଯାତ୍ରା ସମ୍ପୂର୍ଣ୍ଣ କରିଥିବା ସଂଗଠନର ସଦସ୍ୟଙ୍କୁ ବିଭିନ୍ନ ମହଲରୁ ପ୍ରଶଂସା କରାଯାଇଛି । ଏହି ଦୁଃସାହସିକ ଯାତ୍ରାରେ ସଂଗଠନର ସଦସ୍ୟ କୁମାରେଶ ନାୟକ, ଜୟପ୍ରକାଶ ସିଂହ, ସନତ ବାରିକ, ରଞ୍ଜିତ ପଲେଇ, ଲୋକେଶ୍ୱର ଭଞ୍ଜ, ବିଶ୍ୱଜିତ ମାରାଣ୍ଡି ଓ ସୁବର୍ଣ୍ଣମଞ୍ଜରୀ ଗ୍ରାମର କୈଳାସ ସିଂ ପ୍ରମୁଖ ସାମିଲ ହୋଇଥିଲେ ।
