ତିହିଡି,୦୯/୦୮(ଯଦୁମଣି ପାଣିଗ୍ରାହୀ) : ତିହିଡି ଅଞ୍ଚଳରେ ଅଘୋଷିତ ବିଜୁଳିକାଟ୍କୁ ନେଇ ଉପଭୋକ୍ତାଙ୍କ ମହଲରେ ତିବ୍ର ଅସନ୍ତୋଷ ଦେଖାଦେଇଛି । କି ଖରା କି ବର୍ଷା କିମ୍ବା କି ଶୀତ ସବୁ ବେଳେ ବିଜୁଳି କାଟ୍ । ସେହିପରି ସାମାନ୍ୟ ବର୍ଷା ପବନ କିମ୍ବା ବିଜୁଳି ଘଡଘଡି ହେଲେ ଘଣ୍ଡା ଘଣ୍ଠା ଧରି ବିଜୁଳି କାଟ୍ କରାଯାଉଛି । ଏହି ବିଜୁଳିକାଟ୍ର କୌଣସି ସମୟସୀମା ନାହିଁ । ଯେତେବେଳେ ନାହିଁ ସେତେବେଳେ କରାଯାଉଛି ବିଜୁଳିକାଟ୍ । ଦିନର ଅଧିକାଂଶ ସମୟ ବିଜୁଳି ରହୁନଥିବା ବେଳେ ବିଳମ୍ବିତ ରାତି ଆଉ ଭୋର ସମୟରେ ମଧ୍ୟ ବିଜୁଳିକାଟ୍ କରାଯାଉଛି । ତିହିଡି ନନ୍ଦପୁର ବିଜୁଳି ଷ୍ଟ୍ରକଚରରେ ତିହିଡି ଲାଗି ସ୍ୱତନ୍ତ୍ର କ୍ଷମତା ସଂପନ୍ନ ବିଜୁଳି ଟ୍ରାନସଫର୍ମର ବସା ଯାଇଥିବା ବେଳେ କେଉଁ କାରଣରୁ ବିଜୁଳିକାଟ୍ କରାଯାଉଛି ତାହା ଜଣାପଡୁନି । ପୂର୍ବରୁ ତାର ଛିଡିଯିବା କିମ୍ବା ଶଙ୍ଖ ଫାଟିଯିବା କଥା କହି ବିଜୁଳି ବିଭାଗ ବିଜୁଳିକାଟ୍ କରୁଥିବା ବେଳେ ଏବେ ମେଣ୍ଟନାନ୍ସ କଥା କହି ବିଜୁଳିକାଟ୍ କରାଯାଉଛି ।
ପୂର୍ବରୁ ତିହିଡି ଓ ଚାନ୍ଦବାଲି ଯୁଗ୍ମ ଭାବେ ନନ୍ଦପୁର ଷ୍ଟ୍ରକଚର ଉପରେ ନିର୍ଭର କରୁଥିବା ବେଳେ ଏବେ ଚାନ୍ଦବାଲି ଲାଗି ସ୍ୱତନ୍ତ୍ର ଗ୍ରୀଡ୍ ସ୍ଥାପନ କରାଯାଇଛି । ଏହା ସତ୍ତ୍ୱେ ବି ଅଧିକାଂଶ ସମୟରେ ବିନା କାରଣରେ ବିଜୁଳିକାଟ୍ କରାଯିବାର କାରଣ ଜଣାପଡୁନି । ଏ ସଂପର୍କରେ ବିଭାଗୀୟ ଅଧିକାରୀଙ୍କୁ ପଚରାଯିବାରୁ ନନ୍ଦପୁର ଷ୍ଟ୍ରକଚରରେ କୌଣସି ସମସ୍ୟା ନାହିଁ ବରଂ ବିଜୁଳି ମୁଖ୍ୟ ଯୋଗାଣ କେନ୍ଦ୍ର ଡୁବୁରିରୁ ଭଦ୍ରକ ବିଜୁଳି ଯୋଗାଣ ବନ୍ଦ କରାଯାଉଛି, ତେଣୁ ବାରିପଦା ଓ ଅନ୍ୟଆଡୁ ବିଜୁଳି ଆଣି ଆମେ କୌଣସି ପ୍ରକାର କାମ ଚଳାଉଛୁ ବୋଲି ସେ କହିଛନ୍ତି । ସେହିପରି ନିଅଣ୍ଟିଆ ବିଜୁଳିକୁ ଆଖି ଆଗରେ ରଖି ଭଦ୍ରକ ସହରାଞ୍ଚଳ ଓ କେତେକ ମୁଖ୍ୟ ଦପ୍ତରକୁ ବିଜୁଳି ଯୋଗାଣ କରି ଗ୍ରାମଞ୍ଚଳ ଗୁଡିକୁ ଏଥିରୁ ବାଦ୍ ଦେଉଛୁ ବୋଲି ସଂପୃକ୍ତ ଅଧିକାରୀ ଆମ ପ୍ରତିନିଧିଙ୍କୁ କହିଛନ୍ତି ।
