ବ୍ୟକ୍ତିଗତ ଓ କମ୍ପାନୀମାନଙ୍କ ସ୍ୱାର୍ଥ ପାଇଁ ଘରୋଇ ବସ୍ମାଲିକଙ୍କୁ ଅଣଦେଖା କରୁଛନ୍ତି ରାଜ୍ୟ ସରକାର
୨୩ବର୍ଷ ଶାସନରେ ଗମନା ଗମନ ବ୍ୟବସ୍ଥାରେ ରାଜ୍ୟ ସରକାର ବିଫଳ ହୋଇଥିଲା ବେଳେ କେନ୍ଦ୍ର ସରକାର ବିଭିନ୍ନ ଜିଲ୍ଲାକୁ ପ୍ୟାସେଞ୍ଜର ଟ୍ରେନ୍ ଚଳାଇ ଲୋକଙ୍କୁ ସୁବିଧା ପ୍ରଦାନ କରିଛନ୍ତି
ସଂଘ ଭିତରେ ଫାଟ କରି କ’ଣ ବାର୍ତା ଦେବାକୁ ଚାହୁଁଛନ୍ତି ରାଜ୍ୟ ସରକାର ?
ରାଜ୍ୟ ସରକାରଙ୍କ “ଡିଭାଇଡ୍ ଆଣ୍ଡ ରୁଲ୍” ଆଚରଣ ଓ ବ୍ୟବହାର ଅତ୍ୟନ୍ତ ବିପଦଜନକ
ଭୁବନେଶ୍ୱର, ତା.୨୬/୧୦: ୨୩ବର୍ଷ ଧରି ଶାସନ କରିଥିଲେ ମଧ୍ୟ ଗମନା ଗମନର ସୁବ୍ୟବସ୍ଥା କରିବାରେ ବିଫଳ ସାବ୍ୟସ୍ତ ହୋଇଛନ୍ତି ରାଜ୍ୟ ସରକାର । ମୋଦି ସରକାର ଶାସନକୁ ଆସିବା ପରେ ବିଭିନ୍ନ ଜିଲ୍ଲାକୁ ପ୍ୟାସେଞ୍ଜର ଟ୍ରେନ୍ ଚଳାଇ ଲୋକଙ୍କୁ ସୁବିଧା ପ୍ରଦାନ କରିଛନ୍ତି, କିନ୍ତୁ ମୁଖ୍ୟମନ୍ତ୍ରୀ ନବୀନ ବାବୁ ଯାତ୍ରୀଙ୍କୁ ଗମନା ଗମନ କ୍ଷେତ୍ରରେ ରାଜ୍ୟବାସୀଙ୍କୁ ସାମାନ୍ୟ ବସ୍ ସେବା ଯୋଗାଇ ଦେବାରେ ବିଫଳ ହୋଇଛନ୍ତି । ଅତୀତରେ “ବିଜୁ ଗାଁ ଗାଡି” ଯୋଜନାରେ କୋଟି କୋଟି ଟଙ୍କା ଦୁର୍ନୀତି କରିଥିଲେ ରାଜ୍ୟ ସରକାର । ଏବେ ସେହି ବସ୍ ଗୁଡିକ ଖତ ଖାଇବା ସହ କବାଡିଆଙ୍କୁ ବିକ୍ରି କରାଯାଇଛି । ଏସମସ୍ତ ଘଟଣା ରାଜ୍ୟବାସୀ ଜାଣିଛନ୍ତି ଓ ଦେଖିଛନ୍ତି । ବର୍ତମାନ ରାଜ୍ୟ ସରକାର ବ୍ୟକ୍ତିଗତ ଓ କମ୍ପାନୀମାନଙ୍କ ସ୍ୱାର୍ଥ ପାଇଁ ଘରୋଇ ବସ୍ମାଲିକଙ୍କୁ ଅଣଦେଖା କରୁଛନ୍ତି । ସରକାର ସର୍ବଦା ସଂଘ ତଥା ୟୁନିୟନକୁ ଭାଗ ଭାଗ କରିବାରେ ବ୍ୟସ୍ତ । ସଂଘ ଭିତରେ ଫାଟ କରି କ’ଣ ବାର୍ତା ଦେବାକୁ ଚାହୁଁଛନ୍ତି ରାଜ୍ୟ ସରକାର ? ରାଜ୍ୟ ସରକାରଙ୍କ “ଡିଭାଇଡ୍ ଆଣ୍ଡ ରୁଲ୍” ଆଚରଣ ଓ ବ୍ୟବହାର ଅତ୍ୟନ୍ତ ବିପଦଜନକ । ରାଜ୍ୟ ସରକାର ଏଥିରୁ ନିବୃତ ରୁହନ୍ତୁ ବୋଲି ରାଜ୍ୟ ଗଣମାଧ୍ୟମ ମୁଖ୍ୟ ଦିଲୀପ ମଲ୍ଲିକ କହିଛନ୍ତି ।
ରାଜ୍ୟବାସୀଙ୍କୁ ଗମନା ଗମନ ସେବା ଯୋଗାଇ ଆସୁଥିବା ଘରୋଇ ବସ୍ ମାଲିକମାନଙ୍କୁ ରାଜ୍ୟ ସରକାର ଅଣଦେଖା କରିବାରୁ ନିବୃତ ରୁହନ୍ତୁ । ଲୋକଙ୍କ ସ୍ୱାର୍ଥ ପାଇଁ ଏବଂ ଘରୋଇ ବସ୍ର ଅବଦାନକୁ ଆଖି ଆଗରେ ରଖି ଏ ଅଚଳ ଅବସ୍ଥାର ସ୍ଥାୟୀ ସମାଧାନ କରନ୍ତୁ ରାଜ୍ୟ ସରକାର ବୋଲି ଶ୍ରୀ ମଲ୍ଲିକ କହିଛନ୍ତି ।
