ଭଞ୍ଜନଗର,୨୩/୧(ଆପ୍ର)ଘୁମୁସରର ବିପ୍ଳବୀବୀର ଚକରା ବିଶୋୟୀଙ୍କ ଜୟନ୍ତୀ ମହା ସମାରୋହରେ ପାଳିତ ହୋଇଛି । ଏହି ଜୟନ୍ତୀ ପାଳନ ଅବସରରେ ଭଞ୍ଜନଗର ସହରବାସୀ ବୀର ଚକରାଙ୍କୁ ମନେ ପକାଇଥିଲେ । ଭୋରରୁ ସହରର ଚକରା ବିଶୋୟୀ ଛକରେ ବୀର ଚକରାଙ୍କ ପ୍ରତିମୂର୍ତ୍ତିରେ ଏନଏସି ପକ୍ଷରୁ ମଲ୍ୟାର୍ପଣ କରାଯାଇଥିଲା । ସେହିପରି ସଂଗ୍ରାମୀଙ୍କ ମାଟି ବି‚ଗିରି ଗ୍ରାମର କିଛି ଯୁବକ ମୁରଲୀଧର ପଣ୍ଡାଙ୍କ ନେତୃତ୍ୱରେ ଚକରା ବିଶୋୟୀଙ୍କ ପ୍ରତିମୂର୍ତ୍ତିରେ ପୁଷ୍ପମାଲ୍ୟ ଅର୍ପଣ କରିଥିଲେ । ଅନ୍ୟପକ୍ଷରେ ସ୍ଥାନୀୟ ବାର ଆସୋସିଏସନ୍ ପରିସରରେ ମଧ୍ୟ ଓକିଲ ସଂଘ ସଭାପତି ଦଣ୍ଡପାଣି ସ୍ୱାଇଁଙ୍କ ଅଧ୍ୟକ୍ଷତାରେ ବୀର ଚକରା ବିଶୋୟୀଙ୍କ ଜୟନ୍ତୀ ଉତ୍ସବ ମହାସମାରୋହରେ ପାଳିତ ହୋଇଯାଇଛି । ଶନିବାର ଗୋଟିଏ ଦିନ ସାରା ସହର ସକାଳୁ ସଂଧ୍ୟା ଯାଏଁ ସଂଗ୍ରାମୀ ବୀର ଚକରାଙ୍କୁ ମନେ ପକାଇ ବିଭିନ୍ନ କାର୍ଯ୍ୟକ୍ରମ ହାତକୁ ନେଇଥିଲା ।
ଏନଏସି ପକ୍ଷରୁ ସ୍ଥାନୀୟ ଚକରା ବିଶୋୟୀ ଛକରେ ସଂଧ୍ୟାରେ ଆୟୋଜିତ ଜୟନ୍ତୀ ପାଳନ ଉତ୍ସବରେ ମୁଖ୍ୟଅତିଥିଭାବେ ରାଜ୍ୟର ପ୍ରାକ୍ତନ ସଂଗୀତ ନାଟକ ଏକାଡେମୀର ସଚିବ ମନ୍ମଥ କୁମାର ଶତପଥୀ ମୁଖ୍ୟଅତିଥିଭାବେ ଯୋଗଦେଇ ଚକରାଙ୍କ ତ୍ୟାଗପୂତ ଜୀବନୀ ସଂପର୍କରେ ବିସ୍ତୃତ ଆଲୋଚନା କରିଥିଲେ । ଘୁମୁସର ମାଟିରୁ ବୀର ଚକରା ହିଁ ଭାରତର ପ୍ରଥମ ମୁକ୍ତି ଆନେ୍ଦାଳନର ନେତୃତ୍ୱ ନେଇଥିଲେ ବୋଲି ସେ ଉଲ୍ଲେଖ କରିବାସହ ଏଭଳି ଜଣେ ବୀର ଯୋଦ୍ଧାଙ୍କ୍ୁ ପାଇଁ ଘୁମୁସର ମାଟି ବେଶ ଗର୍ବିତ ବୋଲି ଉଲ୍ଲେଖ କରିଥିଲେ ।
ଅନ୍ୟମାନଙ୍କ ମଧ୍ୟରେ ଉପଜିଲ୍ଲାପାଳ ରାଜେନ୍ଦ୍ର ମିଞ୍ଜ, କେଏସୟୁବି କଲେଜ ଅଧ୍ୟକ୍ଷ ଡକ୍ଟର ନୀଳାଞ୍ଚଳ ମୁନି, ପ୍ରାକ୍ତନ ଅଧ୍ୟକ୍ଷ ପ୍ରଫେସର କୃତିବାସ ବିଶ୍ୱାଳ, ଆରଟିଓ ଶୁଭେନ୍ଦୁ ରଂଜନ ରାୟ, ବରିଷ୍ଠ ଆଇନଜୀବି ଏମ. ତାଜ ଆଦେନୀ, ସମାଜସେବୀ ଶୁଳପାଣି ଶତପଥୀ, ସୁଚନା ଓ ଲୋକସଂପର୍କ ଅଧିକାରୀ ଫକୀର ଚରଣ ମାଝି, ଏନଏସି କନିଷ୍ଟ ଯନ୍ତ୍ରୀ ସୁଶାନ୍ତ କୁମାର ସାହୁ ପ୍ରମୁଖ ସମ୍ମାନୀତ ଅତିଥିଭାବେ ମଞ୍ଚାସୀନ ରହି ସଂଗ୍ରାମୀ ବୀର ଚକରା ବିଶୋୟୀଙ୍କ ସଂପର୍କରେ ଆଲୋଚନା ରଖିଥିଲେ । ଚକରା ବିଶୋୟୀ କଲଚ୍ୟୁରାଲ ଏକାଡେମୀର ସଭାପତି ଜଗବନ୍ଧୁ ଜେନାଙ୍କ ଅଧ୍ୟକ୍ଷତାରେ ଆୟୋଜିତ ଉକ୍ତ କାର୍ଯ୍ୟକ୍ରମରେ ପ୍ରାରମ୍ଭରେ ବାହାଡାପଦର ଗାୟତ୍ରୀ ପରିବାର ପକ୍ଷରୁ ବେଦଧ୍ୱନୀ କରାଯାଇଥିଲା । ସହରର ସ୍ୱସ୍ତିସୁଧା ଭଜନ ମଣ୍ଡଳୀ ଦ୍ୱାରା ଭଜନ ଓ ଭଞ୍ଜ ସଂଗୀତ ପରିବେଷଣ କରାଯାଇଥିଲା । ଶେଷରେ ଯୁବ ସମାଜସେବୀ ଜଗଦ୍ଦୀଶ ପାଣିଗ୍ରାହୀ ଉପସ୍ଥିତ ସମସ୍ତଙ୍କୁ ଧନ୍ୟବାଦ ଅର୍ପଣ କରିଥିଲେ ।
