ଭାରତରେ ୫ଜିର ବାସ୍ତବ ଚିତ୍ର : ଷ୍ଟାଣ୍ଡଆଲୋନ ନେଟୱାର୍କ ସହିତ ଜିଓ ନେତୃତ୍ୱ ସ୍ଥାନ ସୁଦୃଢ଼ କରିଛି

ନୂଆଦିଲ୍ଲୀ: ଭାରତରେ ୫ଜି ପ୍ରତିଦ୍ୱନ୍ଦିତା ଆଉ କେବଳ ସେବା ପ୍ରାରମ୍ଭ ପର୍ଯ୍ୟନ୍ତ ସୀମିତ ହୋଇ ରହିନାହିଁ। ଦେଶର ଦୁଇ ପ୍ରମୁଖ ଟେଲିକମ୍ ଅପରେଟର ରିଲାଏନ୍ସ ଜିଓ ଏବଂ ଭାରତୀ ଏୟାରଟେଲ୍ ୫ଜି ପାଇଁ ଭିନ୍ନ ଭିନ୍ନ ରଣନୀତି ଗ୍ରହଣ କରିଥିଲେ। ଜିଓ ଆରମ୍ଭରୁ ଏକ ସମ୍ପୂର୍ଣ୍ଣ ଷ୍ଟାଣ୍ଡଆଲୋନ (ଏସଏ) ୫ଜି ନେଟୱାର୍କରେ ନିବେଶ କରିଥିବାବେଳେ ଏୟାରଟେଲ୍ ଏକ ନନ୍-ଷ୍ଟାଣ୍ଡଆଲୋନ (ଏନଏସଏ) ମଡେଲ୍ ବ୍ୟବହାର କରି ସେବା ଆରମ୍ଭ କରିଥିଲା। ଏବେ ଏହି ପାର୍ଥକ୍ୟ ଉପଭୋକ୍ତା ଅଭିଜ୍ଞତାରେ ସ୍ପଷ୍ଟ ଭାବରେ ପରିଲକ୍ଷିତ ହେଉଛି।

ଓପନ୍ ସିଗନାଲ ତଥ୍ୟ ଅନୁଯାୟୀ, ଜିଓର ୫ଜି ଗ୍ରାହକମାନେ ବାସ୍ତବରେ ସେମାନଙ୍କର ମୋଟ ମୋବାଇଲ୍ ସମୟର ୬୭.୩ ପ୍ରତିଶତ ୫ଜି ନେଟୱାର୍କରେ ବିତାଉଥିବାବେଳେ ୫ଜି ସିଗନାଲ ଉପଲବ୍ଧତା ୬୮.୧ ପ୍ରତିଶତ ରହିଛି। ଏହି ସ୍ୱଳ୍ପ ପାର୍ଥକ୍ୟ ସୂଚାଇ ଦେଉଛି ଯେ ଜିଓ ନେଟୱାର୍କ କଭରେଜକୁ ପ୍ରଭାବଶାଳୀ ବ୍ୟବହାରରେ ପରିଣତ କରିବାକୁ ସକ୍ଷମ ହୋଇଛି। ତୁଳନାତ୍ମକ ଭାବରେ, ଏୟାରଟେଲ୍‌ର ୫ଜି ସିଗନାଲ ଉପଲବ୍ଧତା ୬୬.୬ ପ୍ରତିଶତ ଥିବା ସତ୍ତ୍ୱେ, ଏହାର ଗ୍ରାହକମାନେ ମାତ୍ର ୨୮ ପ୍ରତିଶତ ସମୟ ୫ଜି ନେଟୱାର୍କରେ ରହିଥାନ୍ତି, ଯାହାର ମୁଖ୍ୟ କାରଣ ହେଉଛି ଏହାର ୪ଜି ଉପରେ ନିର୍ଭରଶୀଳ ଏନଏସଏ ନେଟୱାର୍କ। ଭୋଡାଫୋନ ଆଇଡ଼ିଆ ମାର୍ଚ୍ଚ ୨୦୨୫ ରେ ମୁମ୍ବାଇରେ ୫ଜି ସେବା ଆରମ୍ଭ କରିଥିଲା, ଏବଂ ଏହାର ନେଟୱାର୍କ ଏପର୍ଯ୍ୟନ୍ତ ପ୍ରାରମ୍ଭିକ ଅବସ୍ଥାରେ ଅଛି, ଯାହା ଫଳରେ ପ୍ରକୃତ ୫ଜି ବ୍ୟବହାର ସୀମିତ ରହିଛି। ଏହି ସମୟରେ, ବିଏସଏନଏଲ ୫ଜି ପୂର୍ବରୁ ଏହାର ସ୍ୱଦେଶୀ ୪ଜି ନେଟୱାର୍କ ଉପରେ ଧ୍ୟାନ ଦେଉଛି।

ବିଶେଷଜ୍ଞମାନଙ୍କ ଅନୁଯାୟୀ ଜିଓର ଅଗ୍ରଣୀ ସ୍ଥିତି ପଛରେ ରହିଛି ଏହାର ସ୍ୱତନ୍ତ୍ର ୫ଜି ଆର୍କିଟେକଚର। ଏସଏ ନେଟୱାର୍କରେ ୫ଜି ନେଟୱାର୍କ ୪ଜି ଉପରେ ନିର୍ଭର କରେ ନାହିଁ, ଯାହା ଡାଟା ବ୍ୟବହାର ସମୟରେ ନେଟୱାର୍କ ସ୍ୱିଚିଂକୁ ହ୍ରାସ କରିଥାଏ। ଏହା ବ୍ୟତୀତ, ଜିଓର ୭୦୦ ମେଗାହର୍ଜ ସ୍ପେକ୍ଟ୍ରମ୍ ବ୍ୟବହାର ଘର ଭିତରେ ଉତ୍ତମ କଭରେଜ୍ ଏବଂ ସ୍ଥିର ସଂଯୋଗକୁ ସୁନିଶ୍ଚିତ କରିଥାଏ, ଯାହା ଦୈନନ୍ଦିନ ବ୍ୟବହାରରେ ଏକ ଗୁରୁତ୍ୱପୂର୍ଣ୍ଣ ପାର୍ଥକ୍ୟ ସୃଷ୍ଟି କରୁଛି।

ଓପନ ସିଗନାଲ ତଥ୍ୟ ଏହା ସୂଚିତ କରୁଛି ଯେ ଜିଓର ୫ଜି ଉପଭୋକ୍ତାମାନେ ୪ଜି ଅପେକ୍ଷା ପ୍ରାୟ ୧୧ ଗୁଣ ଦ୍ରୁତ ଡାଉନଲୋଡ୍ ସ୍ପିଡ୍ ଉପଭୋଗ କରୁଛନ୍ତି। ତେବେ ଜିଓର ପ୍ରକୃତ ଶକ୍ତି ଏହାର ଦ୍ରୁତ ଗତି ସହିତ ଭିଡିଓ ଷ୍ଟ୍ରିମିଂ, ଭିଡିଓ କଲିଂ ଏବଂ ୱେବ୍ ବ୍ରାଉଜିଂ ଭଳି ଦୈନନ୍ଦିନ କାର୍ଯ୍ୟ ପାଇଁ ଏହାର ସ୍ଥିର ଏବଂ ନିର୍ଭରଯୋଗ୍ୟ ଗ୍ରାହକ ଅଭିଜ୍ଞତାରେ ମଧ୍ୟ ରହିଛି।

ଉପଭୋକ୍ତା ଏବଂ ରାଜସ୍ୱ ଦୃଷ୍ଟିରୁ ମଧ୍ୟ ଜିଓ ଆଗରେ ରହିଛି। ଆକଳନ ଅନୁଯାୟୀ ୨୦୨୬ ଆର୍ଥିକ ବର୍ଷ ସୁଦ୍ଧା ଜିଓର ୫ଜି ଗ୍ରାହକ ସଂଖ୍ୟା ୩୦ କୋଟି ପାଖାପାଖି ପହଞ୍ଚିବା ଆଶା ରହିଛି। ଏହି ସମୟରେ, ଫିକ୍ସଡ଼ ୱାୟାରଲେସ୍ ଆକ୍ସେସ (ଏୟାରଫାଇବର) କ୍ଷେତ୍ରରେ ଅକ୍ଟୋବର ୨୦୨୫ ସୁଦ୍ଧା ଜିଓର ଗ୍ରାହକ ସଂଖ୍ୟା ୧.୨ କୋଟିରେ ପହଞ୍ଚିଛି, ଯାହା ଏହାର ପ୍ରତିଦ୍ୱନ୍ଦ୍ୱୀମାନଙ୍କୁ ଯଥେଷ୍ଟ ପଛରେ ପକାଇଦେଇଛି।

ବିଶେଷଜ୍ଞମାନଙ୍କ ଅନୁଯାୟୀ ସୁଲଭ ୫ଜି ସ୍ମାର୍ଟଫୋନ୍ ର ପ୍ରସାର ଏବଂ ପ୍ରତି-ଉପଭୋକ୍ତା ଡାଟା ବ୍ୟବହାର ପ୍ରତି ମାସରେ ୪୦ ଜିବି ପାଖାପାଖି ପହଞ୍ଚିବ ଏବଂ ନେଟୱାର୍କ ଉପରେ ଚାପ ବୃଦ୍ଧି ପାଇବ। ବର୍ତ୍ତମାନ, ଏହାର ସ୍ୱତନ୍ତ୍ର ୫ଜି ନେଟୱାର୍କ, ବ୍ୟାପକ କଭରେଜ୍ ଏବଂ ଦୃଢ଼ ବ୍ୟବହାରକାରୀ ଅଭିଜ୍ଞତା ସହିତ, ରିଲାଏନ୍ସ ଜିଓ ଭାରତରେ ୫ଜିର ଦିଶା ଏବଂ ସ୍ୱରୂପ ଉଭୟ ପରିବର୍ତ୍ତନ କରୁଥିବା ପରିଲକ୍ଷିତ ହେଉଛି।