ଜିଓର ୧୦ ବର୍ଷ: ମିସ୍ଡ କଲ୍ ରୁ ଭିଡିଓ କଲ୍ ପର୍ଯ୍ୟନ୍ତ ; ୧ ଜିବି ଡାଟା ମୂଲ୍ୟ ୨୨୮ ଟଙ୍କାରୁ ହ୍ରାସ ପାଇ ପ୍ରାୟ ୮ ଟଙ୍କାରେ ପହଞ୍ଚିଛି

– ଭାରତରେ ପ୍ରତି ଗ୍ରାହକ ମାସିକ ହାରାହାରି ଡାଟା ବ୍ୟବହାର ୦.୨ ଜିବିରୁ କମ୍ ରୁ ୨୬.୭ ଜିବିକୁ ବୃଦ୍ଧି ପାଇଛି

– ଜିଓ ନେଟୱାର୍କରେ ପ୍ରତି ଗ୍ରାହକ ଏବେ ପ୍ରତି ମାସରେ ହାରାହାରି ୪୩.୭ ଜିବି ଡାଟା ବ୍ୟବହାର କରୁଛନ୍ତି

– ୧୦ ବର୍ଷ ମଧ୍ୟରେ ଇଣ୍ଟରନେଟ୍ ସ୍ପିଡ୍ ୨୭ ଗୁଣ ବୃଦ୍ଧି ପାଇଛି, ଡାଟା ୨୯ ଗୁଣ ଶସ୍ତା ହୋଇଛି ଏବଂ ଡାଟା ବ୍ୟବହାର ୧୨୮ ଗୁଣରୁ ଅଧିକ ବୃଦ୍ଧି ପାଇଛି

ଗୋଟିଏ ସମୟ ଥିଲା ଯେତେବେଳେ ମୋବାଇଲ୍ ଖର୍ଚ୍ଚ ସଞ୍ଚୟ କରିବା ପାଇଁ “ମିସ୍ଡ କଲ୍” ବ୍ୟବହାର କରାଯାଉଥିଲା – ଘରେ ପହଞ୍ଚିବାର ସଙ୍କେତ ଦେବା ପାଇଁ କିମ୍ବା କଥା ହେବାର ଇଚ୍ଛା ଜଣାଇବା ପାଇଁ ଏକ ମିସ୍ଡ କଲ୍। ଏପରିକି ଇଣ୍ଟରନେଟ୍ ବ୍ୟବହାର ଶେଷ ମେଗାବାଇଟ୍ ପର୍ଯ୍ୟନ୍ତ ଟ୍ରାକ୍ କରାଯାଉଥିଲା। ଦଶ ବର୍ଷ ପରେ, ଭିଡିଓ କଲ୍, ଡିଜିଟାଲ୍ ପେମେଣ୍ଟ, ଓଟିଟି ଷ୍ଟ୍ରିମିଂ, ଅନଲାଇନ୍ ଶିକ୍ଷା, ୱାର୍କ ଫ୍ରମ ହୋମ ଏବଂ ସେହି ସମାନ ମୋବାଇଲ୍ ଡିଭାଇସରେ ଅନଲାଇନ୍ ସପିଂ ଦୈନନ୍ଦିନ ଜୀବନର ଅଂଶ ପାଲଟିଛି। ସେପ୍ଟେମ୍ବର ୫ ରେ ରିଲାଏନ୍ସ ଜିଓ ଲଞ୍ଚ ହେବାର ଦଶ ବର୍ଷ ପୂରଣ ହେଉଛି। ଏହି ଦଶନ୍ଧି ମଧ୍ୟରେ, ଭାରତୀୟ ମୋବାଇଲ୍ ବଜାର ମହଙ୍ଗା, କମ୍ ବ୍ୟବହୃତ ଡାଟାରୁ ସୁଲଭ, ପ୍ରଚୁର ଡାଟାକୁ ପରିବର୍ତ୍ତନ ହୋଇଛି। ଗତି ବହୁଗୁଣିତ ହୋଇଛି, ଏବଂ ପ୍ରତି ଗ୍ରାହକଙ୍କ ମାସିକ ବ୍ୟବହାର ବର୍ତ୍ତମାନ ୨୬ ଗିଗାବାଇଟରୁ ଅଧିକରେ ପହଞ୍ଚିଛି।

ଏହି ଦଶ ବର୍ଷ ମଧ୍ୟରେ, ଡାଟା ଗତି, ମୂଲ୍ୟ ଏବଂ ବ୍ୟବହାରର ଦୃଶ୍ୟପଟ ସମ୍ପୂର୍ଣ୍ଣ ଭାବରେ ପରିବର୍ତ୍ତନ ହୋଇଛି। ୨୦୧୬ ରେ, ଭାରତରେ ହାରାହାରି ମୋବାଇଲ୍ ଡାଉନଲୋଡ୍ ଗତି ପ୍ରାୟ ୨.୫ ଏମବିପିଏସ ରହିଥିବା ବେଳେ ଡିସେମ୍ବର ୨୦୨୫ ସୁଦ୍ଧା, ଏହା ୨୭ ଗୁଣରୁ ଅଧିକ ବୃଦ୍ଧି ପାଇ ୬୮ ଏମବିପିଏସ ଅତିକ୍ରମ କରିଛି। ସେହି ସମୟ ମଧ୍ୟରେ, ୧ ଜିବି ଡାଟାର ହାରାହାରି ମୂଲ୍ୟ ୨୨୮ ଟଙ୍କାରୁ ୮ ଟଙ୍କାକୁ ହ୍ରାସ ପାଇଛି – ଯାହା ଡାଟାକୁ ପ୍ରାୟ ୨୯ ଗୁଣ ଶସ୍ତା କରିଛି। ଡାଟା ବ୍ୟବହାର ଉପରେ ପ୍ରଭାବ ସ୍ପଷ୍ଟ ଭାବରେ ପରିଲକ୍ଷିତ ହୋଇଛି। ଏହି ଦଶ ବର୍ଷରେ ପ୍ରତି ମୋବାଇଲ ଡାଟା ଗ୍ରାହକଙ୍କ ମାସିକ ଡାଟା ବ୍ୟବହାର ୦.୨ ଜିବି ରୁ ୨୬.୭ ଜିବିକୁ ବୃଦ୍ଧି ପାଇଛି – ଯାହା ୧୨୮ ଗୁଣରୁ ଅଧିକ ହୋଇଛି। ଏହି ତଥ୍ୟ ଜିଓର ଆଇପିଓ ପାଇଁ ଡିଆରଏଚପିରେ ସାମିଲ ଥିବା ଆନାଲିସିସ୍ ମେସନ୍ ରିପୋର୍ଟ ର ଭାରତୀୟ ଟେଲିକମ୍ ବଜାରର ଆକଳନ ଉପରେ ଆଧାରିତ।

ଟ୍ରାଇ ପକ୍ଷରୁ ଜାରି ହୋଇଥିବା ସଦ୍ୟତମ ତଥ୍ୟ ସୂଚାଇଛି ଯେ ଡାଟା ପାଇଁ ଏହି ବଢୁଥିବା ଚାହିଦା ଆହୁରି ବୃଦ୍ଧି ପାଇଛି। ମାର୍ଚ୍ଚ ୨୦୨୬ ରେ ଶେଷ ହୋଇଥିବା ତ୍ରୈମାସିକରେ, ଦେଶରେ ହାରାହାରି ୱାୟାରଲେସ୍ ଡାଟା ଗ୍ରାହକ ପ୍ରତି ମାସରେ ୨୬.୭ ଜିବି ଡାଟା ବ୍ୟବହାର କରୁଥିଲେ। ପ୍ରତି ଜିବି ୱାୟାରଲେସ୍ ଡାଟାରୁ ପ୍ରାପ୍ତ ହାରାହାରି ରାଜସ୍ୱ ୭.୫୧ ଟଙ୍କାକୁ ହ୍ରାସ ପାଇଛି। ମାର୍ଚ୍ଚ ଶେଷ ସୁଦ୍ଧା, ଭାରତରେ ଇଣ୍ଟରନେଟ୍ ଗ୍ରାହକଙ୍କ ସଂଖ୍ୟା ପ୍ରାୟ ୧୦୯.୩ କୋଟି ରହିଥିବା ବେଳେ ବ୍ରଡବ୍ୟାଣ୍ଡ ଗ୍ରାହକଙ୍କ ସଂଖ୍ୟା ୧୦୬.୬ କୋଟି ରହିଥିଲା।

ଡାଟା ବ୍ୟବହାର – ଜାତୀୟ ହାରାହାରି ୨୬.୭ ଜିବି; ଜିଓ ନେଟୱର୍କରେ ହାରାହାରି ୪୩.୭ ଜିବି

ଡାଟା ବ୍ୟବହାରରେ ବ୍ୟାପକ ବୃଦ୍ଧି ଜିଓ ନେଟୱାର୍କରେ ସ୍ପଷ୍ଟ ପରିଲକ୍ଷିତ ହେଉଛି। ଏପ୍ରିଲ-ଜୁନ୍ ୨୦୨୬ ତ୍ରୈମାସିକରେ, ଜିଓର ପ୍ରତି ଗ୍ରାହକ ପ୍ରତି ମାସରେ ୪୩.୭ ଜିବି ଡାଟା ବ୍ୟବହାର କରିଥିଲେ। ଏହି ସମୟ ମଧ୍ୟରେ ଜିଓ ନେଟୱାର୍କରେ ମୋଟ ଡାଟା ଟ୍ରାଫିକ୍ ୬୯.୪ ବିଲିୟନ ଜିବି ରେକର୍ଡ କରାଯାଇଛି, ଯାହା ପୂର୍ବ ବର୍ଷ ତୁଳନାରେ ୨୬.୯% ଅଧିକ ରହିଛି। ଜୁନ୍ ଶେଷ ସୁଦ୍ଧା, ଜିଓର ମୋଟ ଗ୍ରାହକ ସଂଖ୍ୟା ୫୩.୩୩ କୋଟି ହୋଇଛି। ମୋବାଇଲ୍ ଡାଟାରେ ପରବର୍ତ୍ତୀ ଲମ୍ଫ ଏବେ ୫ଜିରେ ଆସୁଥିବା ଦେଖାଯାଉଛି। ଜୁନ୍ ୨୦୨୬ ସୁଦ୍ଧା, ଜିଓର ୫ଜି ଗ୍ରାହକ ସଂଖ୍ୟା ପ୍ରାୟ ୨୮.୫ କୋଟିରେ ପହଞ୍ଚିଛି। କମ୍ପାନୀର ନେଟୱାର୍କରେ ୫ଜି ଡାଟା ଟ୍ରାଫିକ୍ ଏବେ ୪ଜି ତୁଳନାରେ ପ୍ରାୟ ଦେଢ଼ ଗୁଣ ରହିଛି।

ଡାଟା ବ୍ୟବହାରରେ ଏହି ଦ୍ରୁତ ବୃଦ୍ଧି ଭାରତର ବିଶ୍ୱ ସ୍ଥିତିକୁ ମଧ୍ୟ ପରିବର୍ତ୍ତନ କରିଛି। ଆନାଲିସିସ୍ ମେସନ୍ ରିପୋର୍ଟ ଅନୁଯାୟୀ, ଭାରତ ମାର୍ଚ୍ଚ ୨୦୨୬ ସୁଦ୍ଧା ମୋବାଇଲ୍ ଡାଟା ଟ୍ରାଫିକ୍ ବ୍ୟବହାର କ୍ଷେତ୍ରରେ ବିଶ୍ୱର ଦ୍ୱିତୀୟ ସର୍ବବୃହତ ଦେଶ ରହିଥିଲା। ଚୀନ୍ କୁ ବାଦ ଦେଇ, ଜିଓର ଡିଜିଟାଲ୍ ନେଟୱାର୍କ ୨୦୨୫-୨୬ ଆର୍ଥିକ ବର୍ଷରେ ବିଶ୍ୱସ୍ତରରେ ସର୍ବାଧିକ ପରିମାଣର ମୋବାଇଲ୍ ଡାଟା ଟ୍ରାଫିକ୍ ପରିଚାଳନା କରିଥିଲା।

ଯଦି ଆମେ ପରିସଂଖ୍ୟାନ ବାହାରକୁ ଦେଖିବା, ତେବେ ଏହି ଦଶନ୍ଧି ଧରି ଚାଲିଥିବା ପରିବର୍ତ୍ତନର ଚିତ୍ର ଆହୁରି ସ୍ପଷ୍ଟ ହୋଇଯିବ। ପୂର୍ବରୁ ଯେଉଁ ମୋବାଇଲ୍ ଫୋନରେ ଖର୍ଚ୍ଚ କମ କରିବା ପାଇଁ “ମିସ୍ଡ କଲ୍” ଦିଆଯାଉଥିଲା, ଏବେ ତାହା ଭିଡିଓ କଲ୍ ଏବଂ ପେମେଣ୍ଟ ଠାରୁ ଆରମ୍ଭ କରି ଶିକ୍ଷା, ସପିଂ ଏବଂ ମନୋରଞ୍ଜନ ପର୍ଯ୍ୟନ୍ତ ସବୁକିଛି ପାଇଁ ମାଧ୍ୟମ ପାଲଟିଛି। ଏକ ସମୟରେ ଜଗିରଖି ପ୍ରତି ମେଗାବାଇଟ୍ ଡାଟା ବ୍ୟବହାର କରୁଥିବା ଭାରତ ଏବେ ପ୍ରତି ମାସରେ ଗ୍ରାହକ ପିଛା ହାରାହାରି ୨୬ ଜିବିରୁ ଅଧିକ ମୋବାଇଲ୍ ଡାଟା ବ୍ୟବହାର କରୁଛି।

ଏହି ଦଶ ବର୍ଷ ମଧ୍ୟରେ ଜିଓ ଟେଲିକମ ରୁ ସମ୍ପୂର୍ଣ୍ଣ ଡିଜିଟାଲ ଟେକ୍ନୋଲଜି କମ୍ପାନୀରେ ରୂପାନ୍ତରିତ ହେବା ସହିତ ନିଜସ୍ୱ ୫ଜି ଉପକରଣ ଓ ପ୍ରଯୁକ୍ତି ବିକଶିତ କରିଛି ଏବଂ ୪ଜି, ୫ଜି, ୬ଜି,  କୃତ୍ରିମ ବୁଦ୍ଧିମତା, କ୍ଲାଉଡ଼, ଆଇଓଟି, ଅପରେଟିଙ୍ଗ ସିଷ୍ଟମ ଇତ୍ୟାଦି କ୍ଷେତ୍ରରେ ୧୦୦୯ରୁ ଉର୍ଦ୍ଧ୍ବ ପେଟେଣ୍ଟ ହାସଲ କରିଛି।