ଛତ୍ରପୁର ୧୩/୦୨ : ତ୍ରିସ୍ତରୀୟ ପଂଚାୟତ ନିର୍ବାଚନରେ ବିଜୟୀ ହାସଲ କରିବା ପାଇଁ ସମସ୍ତ ଦଳର ପ୍ରାର୍ଥୀ ମାନେ ପାଗ ଭିଡୁଥିବା ବେଳେ ଛତ୍ରପୁର ବ୍ଲକର ୧୯ନଂ ଜିଲ୍ଲାପରିଷଦ ଜୋନ୍ ରେ ବିଭିନ୍ନ ଦଳ ମଧ୍ୟରେ କଡା ଟକ୍କର ହେଉଥିବା ଦେଖିବାକୁ ମିଳିଛି । ସମସ୍ତ ଦଳ ପକ୍ଷରୁ ନିଜ ନିଜ ଦଳୀୟ ପ୍ରାର୍ଥୀ ମାନଙ୍କୁ ବିଜୟୀ କରିବା ପାଇଁ ପ୍ରଚାର ଜୋରଦାର ଆରମ୍ଭ କରିସାରିଲେଣି । ଏଥି ନିମନ୍ତେ୫ ଜଣ ପ୍ରାର୍ଥୀନୀ ନିର୍ବାଚନ ମୈଦାନକୁ ଓହ୍ଲାଇଛନ୍ତି । କଂଗ୍ରେସ ଦଳ ପକ୍ଷରୁ ସୁନିତା ବିଷୋୟୀ, ସିପିଆଇ ଦଳ ପକ୍ଷରୁ ଏନ୍. ପୁଷ୍ପା ରେଡ୍ଡୀ, ଆମ ଆଦମୀ ପାର୍ଟି ପକ୍ଷରୁ ଶିବାନି ମିଶ୍ର, ବିଜେଡି ଦଳ ପକ୍ଷରୁ ରଶ୍ମିତା ନାହାକ ଓ ବିଜେପି ଦଳ ପକ୍ଷରୁ ସନ୍ତୋଷୀ ନାହାକ ନିଜ ନିଜ ପ୍ରଚାର ଚଳାଇଛନ୍ତି ।
ଏହି ପରିପ୍ରେକ୍ଷୀରେ ରବିବାର ୧୯ନଂ ଜିଲ୍ଲା ପରିଷଦ ସଭ୍ୟ ନିମନ୍ତେ କଂଗ୍ରସ ପ୍ରାର୍ଥୀନୀ ସୁନିତା ବିଷୋୟୀ ନିଜ ପ୍ରଚାର କାର୍ଯ୍ୟକୁ ଜୋରସୋରରେ ଆରମ୍ଭ କରିଥିବା ଦେଖିବାକୁ ମିଳିଛି । ଆଜି ଖୋଦ୍ ପ୍ରଚାର ମଇଦାନରେ ସାନଖେମୁଣ୍ଡି ବିଧାୟକ ତଥା ଜିଲ୍ଲା କଂଗ୍ରେସ କମିଟି ସଭାପତି ରମେଶ ଚନ୍ଦ୍ର ଜେନା ମଙ୍ଗ ଧରି ଜୋନ୍ ଅନ୍ତର୍ଗତ ଟାଙ୍ଗଣାପଲ୍ଲୀ ପଞ୍ଚାୟତର ବିଭିନ୍ନ ଘରକୁ ଘର ବୁଲି କଂଗ୍ରେସ ପ୍ରାର୍ଥୀନୀ ସୁନିତା ବିଷୋୟୀଙ୍କ ନିମନ୍ତେ ଭୋଟ ଭିକ୍ଷା କରିଛନ୍ତି ।
ସେହିପରି ଟାଙ୍ଗଣାପଲ୍ଲୀ ପଞ୍ଚାୟତର କଂଗ୍ରେସ ସମର୍ଥିତ ସରପଞ୍ଚ ପ୍ରାର୍ଥୀ ଗିରିଶ କୁମାର ଶତପଥୀ ଓ ସମିତି ସଭ୍ୟ ପ୍ରାର୍ଥୀ ପ୍ରଶାନ୍ତ କୁମାର ପ୍ରଧାନଙ୍କ ନିମନ୍ତେ ମଧ୍ୟ ସାନଖେମୁଣ୍ଡି ବିଧାୟକ ଶ୍ରୀ ଜେନା ପ୍ରଚାର କରିଥିଲେ । ଏଥିରେ ଛତ୍ରପୁର ବ୍ଲକ କଂଗ୍ରସ ସଭାପତି ଅବନୀ ଶତପଥୀ ନେତୃତ୍ୱ ନେଇଥିବା ବେଳେ ବହୁ ଛାମୁଆ ନେତା ମାନେ ଏହି ପ୍ରଚାର କାର୍ଯ୍ୟରେ ସାମିଲ ହୋଇଥିଲେ । ୧୯ନଂ ଜିଲ୍ଲାପରିଷଦ ଜୋନ୍ ଅଧିନରେ ଶ୍ରୀରାମଚନ୍ଦ୍ରପୁର, ଚମାଖଣ୍ଡି, ନରେନ୍ଦ୍ରପୁର, ଟାଙ୍ଗଣାପଲ୍ଲୀ, ଲକ୍ଷ୍ମୀପୁର ଓ ସୁନ୍ଦରପୁର ଗ୍ରାମ ପଂଚାୟତ ରହିଥିବା ବେଳେ ୩୭୯୧୮ ଜଣ ଭୋଟର ରହିଛନ୍ତି ।
