ଭୁବନେଶ୍ୱର: ବାତ୍ୟା ଅମ୍ପନ କ୍ଷୟକ୍ଷତି ସମ୍ପର୍କରେ ବିସ୍ତୃତ ସୂଚନା ଦେଇଛନ୍ତି ଏସଆରସି(ସ୍ୱତନ୍ତ୍ର ରିଲିଫ୍ କମିଶନ) ପ୍ରଦୀପ ଜେନା। ଏସଆରସିଙ୍କ ସୂଚନା ଅନୁସାରେ ଜଗତସିଂହପୁର, କେନ୍ଦ୍ରାପଡ଼ା ଓ ଭଦ୍ରକ ଜିଲ୍ଲାର ବିଭିନ୍ନ ସ୍ଥାନରେ ଗଛ ଉପୁଡ଼ି ପଡ଼ିଛି ଓ ବିଦ୍ୟୁତ୍ ଖୁଣ୍ଟ ଭାଙ୍ଗିଛି। ଫଳରେ ଅନେକ ସ୍ଥାନରେ ରାସ୍ତା ବନ୍ଦ ହୋଇଯାଇଛି।
ତେବେ୧୨ ଘଣ୍ଟା ଭିତରେ ସେସବୁ ସ୍ଥାନରେ ରାସ୍ତା ସଫା କରାଯିବାକୁ ଲକ୍ଷ୍ୟ ରହିଛି। ଯଥାଶୀଘ୍ର ପ୍ରଭାବିତ ଅଞ୍ଚଳରେ ବିଦ୍ୟୁତ୍ ସରୋବରାହ ସ୍ୱାଭାବିକ କରିବାକୁ ଉଦ୍ୟମ ଚାଲିଛି ବୋଲି ଏସ୍ଆର୍ସି ସୂଚନା ଦେଇଛନ୍ତି।
ଜଗତସିଂହପୁର ଓ ପାରାଦୀପରେ ଆଜି ସନ୍ଧ୍ୟା ସୁଦ୍ଧା ବାତ୍ୟା ଆଶ୍ରୟସ୍ଥଳରୁ ଲୋକେ ଘରକୁ ଫେରିଯିବେ। ତେବେ ବାଲେଶ୍ୱର ଜିଲ୍ଲାରେ ବାତ୍ୟା ଆଶ୍ରୟସ୍ଥଳରୁ ଆଜି ଲୋକେ ଘରକୁ ଫେରିବା ନେଇ ସ୍ଥାନୀୟ ଜିଲ୍ଲାପାଳ ନିଷ୍ପତ୍ତି ନେବେ।
ବାତ୍ୟା ଅମ୍ପନ ପାଇଁ ୧ଲକ୍ଷ ୪୮ ହଜାର ୪୮୨ ଲୋକଙ୍କୁ ୨୯୨୧ଟି ଆଶ୍ରୟସ୍ଥଳରେ ରଖାଯାଇଥିଲା ହେଲେ କୌଣସି ସ୍ଥାନରେ ଟେଲିକମ୍ ଟାଓ୍ୱାର ଭୁଶୁଡ଼ିନାହିଁ। ବାତ୍ୟା ପ୍ରଭାବିତ ଜିଲ୍ଲାରେ ୨ଦିନ ଭିତରେ ୧୮୮୫ଜଣ ଗର୍ଭବତୀଙ୍କୁ ମେଡିକାଲ ସ୍ଥାନାନ୍ତର କରାଯାଇଥିଲା ବୋଲି ଏସ୍ଆର୍ସି ପ୍ରଦୀପ ଜେନା ସୂଚନା ଦେଇଛନ୍ତି।
