କ୍ୟାବିନେଟ୍ କମିଟି ଦ୍ୱାରା ଓଡ଼ିଶାରେ 06 ଟି ସମେତ 08 ଟି ରେଳ ପ୍ରକଳ୍ପକୁ ଅନୁମୋଦନ: ପ୍ରଧାନମନ୍ତ୍ରୀ ଏବଂ ରେଳମନ୍ତ୍ରୀଙ୍କୁ ଧନ୍ୟବାଦ ଜଣାଇଲେ ଓଡିଶା ମୁଖ୍ୟମନ୍ତ୍ରୀ
• ସମୁଦାୟ ପ୍ରକଳ୍ପର ମୋଟ ଆନୁମାନିକ ମୂଲ୍ୟ ହେଉଛି 24,657 କୋଟି ଟଙ୍କା (ପାଖାପାଖି), ଓଡିଶାରେ ପ୍ରକଳ୍ପ ପାଇଁ 15004 କୋଟି ଟଙ୍କା ଯାହାକି 2030-31 ସୁଦ୍ଧା ଶେଷ ହେବ |
• ଏହି ପ୍ରକଳ୍ପଗୁଡ଼ିକ ସଂଯୋଗୀକରଣ ଯୋଗାଇବ, ଯାତାୟାତର ସୁବିଧାକୁ ସହଜ କରିବ, ଲଜିଷ୍ଟିକ୍ ମୂଲ୍ୟକୁ କମ୍ କରିବ, ତୈଳ ଆମଦାନୀ ହ୍ରାସ କରିବ ଏବଂ କାର୍ବନ ଡାଇଅକ୍ସାଇଡ୍ ନିର୍ଗମନକୁ ହ୍ରାସ କରିବ |
• ପ୍ରସ୍ତାବିତ ପ୍ରକଳ୍ପଗୁଡିକ ସଂଯୋଗ ହୋଇନଥିବା ଅଞ୍ଚଳକୁ ସଂଯୋଗ କରି ପରିବହନ ନେଟୱର୍କକୁ ବଢ଼ାଇ ଲଜିଷ୍ଟିକ୍ ଦକ୍ଷତାକୁ ଉନ୍ନତ କରିବ, ଫଳସ୍ୱରୂପ ଯୋଗାଣ ଶୃଙ୍ଖଳା ଏବଂ ଅର୍ଥନୈତିକ ଅଭିବୃଦ୍ଧିକୁ ତ୍ୱରାନ୍ୱିତ କରିବ |
• ଏହି ପ୍ରକଳ୍ପଗୁଡ଼ିକ ନିର୍ମାଣ ସମୟରେ ପ୍ରାୟ ତିନି (3) କୋଟି ମାନବ ଦିବସ ପାଇଁ ପ୍ରତ୍ୟକ୍ଷ ନିଯୁକ୍ତି ସୃଷ୍ଟି କରିବ |
• ଓଡ଼ିଶାରେ ରେଳ ଭିତ୍ତିଭୂମି ବିକାଶ ପାଇଁ ଏକ ଲକ୍ଷ କୋଟି ମୂଲ୍ୟର ପ୍ରକଳ୍ପ ଯୋଜନା କରାଯାଇଛି |
• ବର୍ତ୍ତମାନ ସୁଦ୍ଧା 70 ହଜାର କୋଟି ମୂଲ୍ୟର ପ୍ରକଳ୍ପଗୁଡିକ ମଞ୍ଜୁର ହୋଇସାରିଛି |
କ୍ୟାବିନେଟ କମିଟି ଦ୍ୱାରା ଗତକାଲି ଓଡିଶା ପାଇଁ ପ୍ରାୟ 15004 କୋଟି ଟଙ୍କାର ଛଅ ଗୋଟି ଗୁରୁତ୍ୱପୂର୍ଣ୍ଣ ରେଳ ପ୍ରକଳ୍ପକୁ ଅନୁମୋଦନ କରାଯାଇଥିବାରୁ ଓଡିଶାର ମାନ୍ୟବର ମୁଖ୍ୟମନ୍ତ୍ରୀ ଶ୍ରୀ ମୋହନ ଚରଣ ମାଝୀ ମାନ୍ୟବର ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଜୀ ଏବଂ ମାନ୍ୟବର ରେଳମନ୍ତ୍ରୀ ଶ୍ରୀ ଅଶ୍ୱିନୀ ବୈଷ୍ଣବ ଜୀଙ୍କୁ ଧନ୍ୟବାଦ ଜଣାଇଛନ୍ତି |
ଗତକାଲି ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ଅନୁଷ୍ଠିତ ଅର୍ଥନୈତିକ ବ୍ୟାପାର କମିଟି ରେଳ ମନ୍ତ୍ରଣାଳୟର ଆଠ ଗୋଟି ପ୍ରକଳ୍ପକୁ ଅନୁମୋଦନ କରିଛନ୍ତି ଯାହାର ମୋଟ ଆନୁମାନିକ ମୂଲ୍ୟ ₹24,657 କୋଟି ଟଙ୍କା |
ନୂତନ ରେଳ ପ୍ରକଳ୍ପ ଗୁଡ଼ିକ ସିଧାସଳଖ ସଂଯୋଗ ଯୋଗାଇବ ଓ ଗତିଶୀଳତାକୁ ଉନ୍ନତ କରିବା ସହିତ ଭାରତୀୟ ରେଳ ପାଇଁ ଉନ୍ନତ ଦକ୍ଷତା ଏବଂ ସେବା ନିର୍ଭରଯୋଗ୍ୟତା ପ୍ରଦାନ କରିବ | ଏହି ପ୍ରକଳ୍ପଗୁଡିକ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ଏକ ନୂତନ ଭାରତର ଦର୍ଶନର ଅନୁରୂପ ଅଟେ ଯାହା ଏହି ଅଞ୍ଚଳର ଲୋକଙ୍କୁ “ଆତ୍ମନିର୍ଭର” କରାଇବ ଯାହାଦ୍ୱାରା ସେମାନଙ୍କର ନିଯୁକ୍ତି / ଆତ୍ମ ନିଯୁକ୍ତି ସୁଯୋଗ ବୃଦ୍ଧି ପାଇବ |
ମଲ୍ଟି-ମୋଡାଲ୍ କନେକ୍ଟିଭିଟି ପାଇଁ ପିଏମ-ଗତି ଶକ୍ତି ଜାତୀୟ ମାଷ୍ଟର ପ୍ଲାନର ଫଳସ୍ୱରୂପ ଏହି ପ୍ରକଳ୍ପ ଗୁଡିକ ହାତକୁ ନିଆଯାଇଅଛି ଯାହା ଏକୀକୃତ ଯୋଜନା ମାଧ୍ୟମରେ ସମ୍ଭବ ହୋଇଛି ଏବଂ ଯାତ୍ରୀ, ଦ୍ରବ୍ୟ ପରିବହନ ପାଇଁ ସେବାଗୁଡିକର ନିରନ୍ତର ସଂଯୋଗ ଯୋଗାଇବ |
ସାତଟି ରାଜ୍ୟର 14 ଟି ଜିଲ୍ଲା ଅର୍ଥାତ୍ ଓଡ଼ିଶା, ମହାରାଷ୍ଟ୍ର, ଆନ୍ଧ୍ରପ୍ରଦେଶ, ଝାଡ଼ଖଣ୍ଡ, ବିହାର, ତେଲେଙ୍ଗାନା ଏବଂ ପଶ୍ଚିମବଙ୍ଗର 8 ଟି (ଆଠ) ରେଳ ପ୍ରକଳ୍ପ ଭାରତୀୟ ରେଳବାଇର ନେଟୱାର୍କକୁ 900 କିମି ବୃଦ୍ଧି କରିବ |
ଏହି ପ୍ରକଳ୍ପଗୁଡିକରେ 64 ଟି ନୂତନ ଷ୍ଟେସନ୍ ନିର୍ମାଣ ହେବ, ଯାହା ଛଅ (6) ଆକାଂକ୍ଷା ଜିଲ୍ଲା (ପୂର୍ବ ସିଂହଭୂମ, ଭାଦାଦ୍ରି କୋଥାଗୁଡେମ୍, ମାଲକାନଗିରି, କଳାହାଣ୍ଡି, ନବରଙ୍ଗପୁର, ରାୟଗଡା) କୁ ସଂଯୋଗ ବୃଦ୍ଧି କରିବା ସହିତ 510 ଗାଁ ଏବଂ ପ୍ରାୟ 40 ଲକ୍ଷ ଜନସଂଖ୍ୟାକୁ ଯୋଡି ହେବ |
କୃଷିଜାତ ଦ୍ରବ୍ୟ, ସାର, କୋଇଲା, ଲୁହାପଥର, ଇସ୍ପାତ, ସିମେଣ୍ଟ, ବକ୍ସାଇଟ୍, ଚୂନ ପଥର, ଆଲୁମିନିୟମ୍ ପାଉଡର, ଗ୍ରାନାଇଟ୍, ବାଲାଷ୍ଟ, କଣ୍ଟେନର ଇତ୍ୟାଦି ସାମଗ୍ରୀ ପରିବହନ ପାଇଁ ଏହି ପ୍ରକଳ୍ପ ଗୁଡିକ ଅତ୍ୟାବଶ୍ୟକ ମାର୍ଗ ଭାବେ ବିବେଚିତ ହେବ | ଏହା ଦ୍ୱାରା ଅତିରିକ୍ତ ପଣ୍ୟ ପରିବହନ ଟ୍ରାଫିକ୍ ସୃଷ୍ଟି କରିବା ସହିତ 143 MTPA (ବାର୍ଷିକ ମିଲିୟନ୍ ଟନ୍ସ୍) କ୍ଷମତା ବୃଦ୍ଧି କରିପାରିବ | ରେଳବାଇ ପରିବେଶ ଅନୁକୂଳ ଏବଂ ପରିବହନର ଦକ୍ଷତା ଶକ୍ତି ଗୁଡିକର ମାଧ୍ୟମ ହୋଇ ଉଭୟ ଜଳବାୟୁ ଏବଂ ଦେଶର ଲଜିଷ୍ଟିକ୍ ମୂଲ୍ୟ ହ୍ରାସ କରିବାରେ ଲକ୍ଷ୍ୟ ହାସଲ କରିବ ଯାହାଦ୍ୱାରା ତୈଳ ଆମଦାନୀ (32.20 କୋଟି ଲିଟର) ଏବଂ କାର୍ବନ ଡାଇଅକ୍ସାଇଡ୍ ନିର୍ଗମନକୁ (0.87 ମିଲିୟନ୍ ଟନ୍) ହ୍ରାସ କରିବାରେ ସାହାଯ୍ୟ କରିବ ଯାହାକି 3.5 କୋଟି ବୃକ୍ଷ ରୋପଣ ସହିତ ସମାନ |
ଓଡିଶାରେ ମଞ୍ଜୁର ହୋଇଥିବା ନୂତନ ରେଳ ପ୍ରକଳ୍ପ ଗୁଡ଼ିକ ହେଉଛି ₹1326 କୋଟି ଟଙ୍କା ମୂଲ୍ୟର 73.62 କିମି ଦୈର୍ଘ୍ୟ ଗୁଣୁପୁର-ଥେରୁବାଲି ନୂତନ ରେଳ ଲାଇନ (ରାୟଗଡା) ଜିଲ୍ଲା; ₹3274 କୋଟି ଟଙ୍କା ମୂଲ୍ୟର 116.21 କିମି ଦୈର୍ଘ୍ୟ ଜୁନାଗଡ଼ ରୋଡ଼-ନବରଙ୍ଗପୁର ନୂତନ ରେଳ ଲାଇନ (ନବରଙ୍ଗପୁର ଓ କଳାହାଣ୍ଡି) ଜିଲ୍ଲା; ₹4109 କୋଟି ଟଙ୍କା ମୂଲ୍ୟର 173.61 କିମି ଦୈର୍ଘ୍ୟ ମାଲକାନଗିରି-ପାଣ୍ଡୁରଙ୍ଗାପୁରମ ଭାୟା ଭଦ୍ରାଚଳମ ନୂତନ ରେଳ ଲାଇନ (ଓଡ଼ିଶାର ମାଲକାନଗିରି, ଆନ୍ଧ୍ର ପ୍ରଦେଶର ପୂର୍ବ ଗୋଦାବରୀ ଓ ତେଲେଙ୍ଗାନାର ଭଦ୍ରାଦ୍ରି କୋଥାଗୁଡେମ) ଜିଲ୍ଲା; ₹2107 କୋଟି ଟଙ୍କା ମୂଲ୍ୟର 82.06 କିମି ଦୈର୍ଘ୍ୟ ବାଦାମପାହାଡ଼-କେନ୍ଦୁଝରଗଡ଼ ନୂତନ ରେଳ ଲାଇନ (କେନ୍ଦୁଝର ଓ ମୟୁରଭଞ୍ଜ) ଜିଲ୍ଲା; ₹2549 କୋଟି ଟଙ୍କା ମୂଲ୍ୟର 85.60 କିମି ଦୈର୍ଘ୍ୟ ବାଙ୍ଗିରିପୋଷି-ଗୋରୁମହିଷାଣି ନୂତନ ରେଳ ଲାଇନ (ମୟୁରଭଞ୍ଜ) ଜିଲ୍ଲା; ₹1639 କୋଟି ଟଙ୍କା ମୂଲ୍ୟର 59.96 କିମି ଦୈର୍ଘ୍ୟ ବୁଡ଼ାମରା-ଚକୁଳିଆ ନୂତନ ରେଳ ଲାଇନ (ଓଡ଼ିଶାର ମୟୁରଭଞ୍ଜ, ଝାଡ଼ଖଣ୍ଡର ପୂର୍ବ ସିଂହଭୂମ ଓ ପଶ୍ଚିମ ବଙ୍ଗର ଝାରଗ୍ରାମ) ଜିଲ୍ଲା ମାନଙ୍କରେ ସେବା ଉପଲବ୍ଧ କରାଇବ |
ଗଣମାଧ୍ୟମକୁ ସୂଚନା ଦେଇ ମାନ୍ୟବର ରେଳମନ୍ତ୍ରୀ ଶ୍ରୀ ଅଶ୍ୱିନୀ ବୈଷ୍ଣବ କହିଛନ୍ତି ଯେ ରାଜ୍ୟ ତଥା କେନ୍ଦ୍ରରେ ଡବଲ୍ ଇଞ୍ଜିନ ସରକାରକୁ ଦୃଷ୍ଟିରେ ରଖି ରାଜ୍ୟରେ ଚାଲୁରହିଥିବା ସମସ୍ତ ନୂତନ ପ୍ରକଳ୍ପ ଗୁଡିକ ସହିତ ଏହି ନୂତନ ପ୍ରକଳ୍ପ ଗୁଡିକର କାର୍ଯ୍ୟକୁ ତ୍ୱରାନ୍ୱିତ କରାଯିବ | ସେ ଆହୁରି ମଧ୍ୟ କହିଛନ୍ତି ଯେ ରେଳ ଲାଇନ ନିର୍ମାଣରେ ଉପୁଜୁଥିବା ବାଧା ଗୁଡିକର ଶୀଘ୍ର ସମାଧାନ ହେବ | ଏହି ପ୍ରକଳ୍ପଗୁଡିକ ମାନ୍ୟବର ପ୍ରଧାନମନ୍ତ୍ରୀଙ୍କ ପୂର୍ବ ଭାରତର ବିକାଶର ଦୃଷ୍ଟିକୋଣରେ ସ୍ଥାନାପାଇଁଅଛି | ଶ୍ରୀ ବୈଷ୍ଣବ ଏହା ମଧ୍ୟ କହିଛନ୍ତି ଯେ ଓଡ଼ିଶାର ରେଳ ଭିତ୍ତିଭୂମି ବିକାଶ ପାଇଁ ଏକ ଲକ୍ଷ କୋଟି ଟଙ୍କା ମୂଲ୍ୟର ପ୍ରକଳ୍ପ ଯୋଜନା କରାଯାଇଛି | ଅଦ୍ୟାବଧି, ₹ 70 ହଜାର କୋଟି ମୂଲ୍ୟର ପ୍ରକଳ୍ପ ଓଡିଶା ପାଇଁ ମଞ୍ଜୁର ହୋଇସାରିଛି |
ରାଜ୍ୟରେ ରେଳ ଭିତ୍ତିଭୂମି ବିକାଶ ପାଇଁ ରାଜ୍ୟ ସରକାର ସମସ୍ତ ଉଦ୍ୟମ କରିବେ ବୋଲି ମାନ୍ୟବର ମୁଖ୍ୟମନ୍ତ୍ରୀ ଶ୍ରୀ ମୋହନ ଚରଣ ମାଝୀ ମଧ୍ୟ ଆଶ୍ୱାସନା ଦେଇଛନ୍ତି | ଜମି ଅଧିଗ୍ରହଣ କାର୍ଯ୍ୟ ଶୀଘ୍ର ସମ୍ପାଦନ କରିବା ପାଇଁ ରାଜ୍ୟ ସରକାରଙ୍କ ପକ୍ଷରୁ ତ୍ୱରିତ ପଦକ୍ଷେପ ନିଆଯିବ ବୋଲି ସେ କହିଛନ୍ତି |
ଅନ୍ୟମାନଙ୍କ ମଧ୍ୟରେ ମାନ୍ୟବର ସାଂସଦ ମାନେ ଶ୍ରୀ ନବ ଚରଣ ମାଝୀ (ମୟୂରଭଞ୍ଜ), ବଳଭଦ୍ର ମାଝୀ (ନବରଙ୍ଗପୁର), ଅନନ୍ତ ନାୟକ (କେନ୍ଦୁଝର) ଏବଂ କଳାହାଣ୍ଡି ସାଂସଦ ଶ୍ରୀମତୀ ମାଳବୀକା ଦେଓ ନୂଆଦିଲ୍ଲୀରୁ ଭିଡିଓ କନଫରେନ୍ସିଂ ମାଧ୍ୟମରେ ଶ୍ରୀ ବୈଷ୍ଣବଙ୍କ ସହ ଉପସ୍ଥିତ ଥିଲେ | ମାନ୍ୟବର ମୁଖ୍ୟମନ୍ତ୍ରୀ ଶ୍ରୀ ମୋହନ ଚରଣ ମାଝୀ ମଧ୍ୟ ଭୁବନେଶ୍ୱରରୁ ଭିଡିଓ କନଫରେନ୍ସିଂରେ ଯୋଗ ଦେଇଥିଲେ |
