ଏଆଇ ଶକ୍ତିରେ ପରିବର୍ତ୍ତିତ ହେଉଛି ଭାରତ : ₹୧୦,୩୦୦ କୋଟିର ନିବେଶ ଓ ୩୮,୦୦୦ ଜିପିୟୁ ମାଧ୍ୟମରେ ସମାବେଶୀ ନବସୃଜନକୁ ଗତି
By Suvendra Pattanaik : ଭାରତ ଆଜି ଆର୍ଟିଫିସିଆଲ୍ ଇଣ୍ଟେଲିଜେନ୍ସ ଦ୍ୱାରା ପରିଚାଳିତ ଏକ ନୂତନ ଯୁଗର ଦ୍ୱାରଦେଶରେ ଛିଡ଼ା ହୋଇଛି, ଯେଉଁଠାରେ ଟେକ୍ନୋଲୋଜି ଜୀବନରେ ରୂପାନ୍ତରଣ ଆଣୁଛି ଏବଂ ଦେଶର ପ୍ରଗତିକୁ ଏକ ନୂଆ ରୂପ ଦେଉଛି। ଏଆଇ ଆଉ କେବଳ ଗବେଷଣାଗାର କିମ୍ବା ବଡ଼ କର୍ପୋରେଟ୍ ସଂସ୍ଥା ମଧ୍ୟରେ ସୀମିତ ହୋଇ ରହିନାହିଁ। ଏହା ପ୍ରତ୍ୟେକ ସ୍ତରରେ ନାଗରିକମାନଙ୍କ ପାଖରେ ପହଞ୍ଚୁଛି। ଦୂରଦୂରାନ୍ତ ଅଞ୍ଚଳରେ ସ୍ୱାସ୍ଥ୍ୟସେବା ସୁବିଧାରେ ଉନ୍ନତି ଆଣିବାଠାରୁ ଆରମ୍ଭ କରି କୃଷକମାନଙ୍କୁ ଚାଷ କାର୍ଯ୍ୟରେ ସଠିକ୍ ନିଷ୍ପତ୍ତି ନେବାରେ ସାହାଯ୍ୟ କରିବା ପର୍ଯ୍ୟନ୍ତ, ଏଆଇ ଦୈନନ୍ଦିନ ଜୀବନକୁ ସରଳ, ସ୍ମାର୍ଟ ଏବଂ ଅଧିକ ସଂଯୁକ୍ତ କରୁଛି। ବ୍ୟକ୍ତିଗତ ଶିକ୍ଷା ମାଧ୍ୟମରେ ଏହା ଶ୍ରେଣୀଗୃହଗୁଡ଼ିକରେ ବୈପ୍ଳବିକ ପରିବର୍ତ୍ତନ ଆଣୁଛି, ସହରଗୁଡ଼ିକୁ ସ୍ୱଚ୍ଛ ଏବଂ ନିରାପଦ କରୁଛି ଏବଂ ତଥ୍ୟ-ଭିତ୍ତିକ ଶାସନ ମାଧ୍ୟମରେ ସରକାରୀ ସେବାଗୁଡ଼ିକୁ ଅଧିକ ତ୍ୱରାନ୍ୱିତ କରୁଛି। ଆଉ ଏଥିଲାଗି ଅଧିକ ପ୍ରତିଶୃତିବଦ୍ଧ ହୋଇ ଭାରତ ସରକାର ୧୦ ହଜାର ୩୦୦ କୋଟି ଟଙ୍କାର ନିବେଶ ପାଇଁ ପ୍ରତିବଦ୍ଧତା ପ୍ରକାଶ କରିଛନ୍ତି। ଏହାସହ ଭାରତର ଏଆଇ ଯାତ୍ରାରେ ୩୮ ହଜାର ଜିପିୟୁ ସବୁ ସ୍ତରର ଲୋକଙ୍କ ଜୀବନକୁ ପ୍ରଭାବିତ କରୁଛି।
ଇଣ୍ଡିଆ ଏଆଇ ମିଶନ ଏବଂ ସେଣ୍ଟରସ୍ ଅଫ୍ ଏକ୍ସଲେନ୍ସ ଫର୍ ଏଆଇ ଭଳି ପଦକ୍ଷେପଗୁଡ଼ିକ ଏହି ପରିବର୍ତ୍ତନର କେନ୍ଦ୍ରବିନ୍ଦୁରେ ରହିଛି। ଏଗୁଡ଼ିକ କମ୍ପ୍ୟୁଟିଂ ପାୱାରର ବ୍ୟବହାରକୁ ବୃଦ୍ଧି କରୁଛନ୍ତି, ଗବେଷଣାକୁ ସହାୟତା କରୁଛନ୍ତି ଏବଂ ଷ୍ଟାର୍ଟଅପ୍ ତଥା ଅନୁଷ୍ଠାନଗୁଡ଼ିକୁ ଏଭଳି ସମାଧାନ ପ୍ରସ୍ତୁତ କରିବାରେ ସାହାଯ୍ୟ କରୁଛନ୍ତି ଯାହା ସିଧାସଳଖ ଲୋକମାନଙ୍କୁ ଉପକୃତ କରୁଛି। ଭାରତର ଆଭିମୁଖ୍ୟ ଏଆଇକୁ ଉନ୍ମୁକ୍ତ, ଶସ୍ତା ଏବଂ ସମସ୍ତଙ୍କ ପାଇଁ ଉପଲବ୍ଧ କରାଇବା ଉପରେ ଗୁରୁତ୍ୱ ଦେଉଛି, ଯାହାଦ୍ୱାରା ନୂତନତ୍ୱ ସମଗ୍ର ସମାଜର ଉନ୍ନତି କରିପାରିବ।
ଆର୍ଟିଫିସିଆଲ୍ ଇଣ୍ଟେଲିଜେନ୍ସ (ଏଆଇ) କ’ଣ?
ଆର୍ଟିଫିସିଆଲ୍ ଇଣ୍ଟେଲିଜେନ୍ସ ବା ଏଆଇ ହେଉଛି ମେସିନ୍ ବା ଯନ୍ତ୍ରଗୁଡ଼ିକର ସେହି ଦକ୍ଷତା, ଯାହା ସାଧାରଣତଃ ମାନବୀୟ ବୁଦ୍ଧିମତା ଆବଶ୍ୟକ କରୁଥିବା କାର୍ଯ୍ୟଗୁଡ଼ିକୁ ସମ୍ପାଦନ କରିପାରେ। ଏହା ସିଷ୍ଟମଗୁଡ଼ିକୁ ଅଭିଜ୍ଞତାରୁ ଶିଖିବା, ନୂତନ ପରିସ୍ଥିତି ସହିତ ଖାପ ଖୁଆଇବା ଏବଂ ଜଟିଳ ସମସ୍ୟାଗୁଡ଼ିକର ସ୍ୱାଧୀନ ଭାବେ ସମାଧାନ କରିବାରେ ସକ୍ଷମ କରିଥାଏ। ଏଆଇ ତଥ୍ୟାବଳୀ, ଆଲଗୋରିଦମ୍ ଏବଂ ବୃହତ ଭାଷା ମଡେଲ୍ ବ୍ୟବହାର କରି ସୂଚନା ବିଶ୍ଳେଷଣ କରେ, ବିଭିନ୍ନ ଢାଞ୍ଚାକୁ ଚିହ୍ନଟ କରେ ଏବଂ ପ୍ରତିକ୍ରିୟା ପ୍ରସ୍ତୁତ କରେ। ସମୟ ସହିତ ଏହି ସିଷ୍ଟମଗୁଡ଼ିକ ନିଜର କାର୍ଯ୍ୟଦକ୍ଷତାକୁ ଅଧିକ ସୁଧାରନ୍ତି, ଯାହା ସେମାନଙ୍କୁ ମଣିଷ ପରି ଯୁକ୍ତି କରିବା, ନିଷ୍ପତ୍ତି ନେବା ଏବଂ ଯୋଗାଯୋଗ କରିବା ପାଇଁ ସୁଯୋଗ ଦେଇଥାଏ।
ଏହି ସମାବେଶୀ ଦୃଷ୍ଟିକୋଣ ନୀତି ଆୟୋଗଙ୍କ ଅକ୍ଟୋବର ୨୦୨୫ରେ ପ୍ରକାଶିତ ରିପୋର୍ଟରେ ମଧ୍ୟ ପ୍ରତିଫଳିତ ହୋଇଛି। ଏହି ରିପୋର୍ଟ ଦର୍ଶାଉଛି ଯେ କିଭଳି ଏଆଇ ସ୍ୱାସ୍ଥ୍ୟସେବା, ଶିକ୍ଷା, ଦକ୍ଷତା ବିକାଶ ଏବଂ ଆର୍ଥିକ ଅନ୍ତର୍ଭୁକ୍ତିକରଣ ମାଧ୍ୟମରେ ଭାରତର ୪୯ କୋଟି ଅଣସଂଗଠିତ କ୍ଷେତ୍ରର ଶ୍ରମିକଙ୍କୁ ସଶକ୍ତ କରିପାରିବ। ଏହା ଦର୍ଶାଉଛି ଯେ କିଭଳି ଏଆଇ-ଚାଳିତ ଉପକରଣଗୁଡ଼ିକ ଭାରତୀୟ ଅର୍ଥନୀତିର ମେରୁଦଣ୍ଡ ସାଜିଥିବା ଲକ୍ଷ ଲକ୍ଷ ଲୋକଙ୍କ ଉତ୍ପାଦନ କ୍ଷମତା ଏବଂ ସହନଶୀଳତାକୁ ବଢ଼ାଇପାରିବ। ଟେକ୍ନୋଲୋଜି ସାମାଜିକ ଏବଂ ଆର୍ଥିକ ବ୍ୟବଧାନକୁ ଦୂର କରିପାରିବ ବୋଲି ମଧ୍ୟ ଏହି ରିପୋର୍ଟରେ ଗୁରୁତ୍ୱ ଦିଆଯାଇଛି।
ବର୍ତ୍ତମାନ ଭାରତରେ ଏଆଇ ଇକୋସିଷ୍ଟମ୍
- ଭାରତର ଟେକ୍ନୋଲୋଜି କ୍ଷେତ୍ର ଦ୍ରୁତ ଗତିରେ ବଢ଼ୁଛି ଏବଂ ଚଳିତ ବର୍ଷ ବାର୍ଷିକ ରାଜସ୍ୱ ୨୮୦ ବିଲିୟନ ଆମେରିକୀୟ ଡଲାର ଅତିକ୍ରମ କରିବାର ସମ୍ଭାବନା ଅଛି।
- ଟେକ୍ନୋଲୋଜି ଏବଂ ଏଆଇ କ୍ଷେତ୍ରରେ ୬୦ ଲକ୍ଷରୁ ଅଧିକ ଲୋକ ନିୟୋଜିତ ଅଛନ୍ତି।
- ଦେଶରେ ୧,୮୦୦+ ଗ୍ଲୋବାଲ୍ କାପାବିଲିଟି ସେଣ୍ଟର (ଜିସିସି) ରହିଛି, ଯେଉଁଥିରେ ୫୦୦ ରୁ ଅଧିକ କେବଳ ଏଆଇ ଉପରେ କେନ୍ଦ୍ରିତ।
- ଭାରତରେ ପ୍ରାୟ ୧.୮ ଲକ୍ଷ ଷ୍ଟାର୍ଟଅପ୍ ଅଛନ୍ତି ଏବଂ ଗତବର୍ଷ ଆରମ୍ଭ ହୋଇଥିବା ପ୍ରାୟ ୮୯% ନୂତନ ଷ୍ଟାର୍ଟଅପ୍ ସେମାନଙ୍କ ଉତ୍ପାଦ ବା ସେବାରେ ଏଆଇ ବ୍ୟବହାର କରିଛନ୍ତି।
- ନାସକମ୍ ଏଆଇ ଆଡପସନ ଇଣ୍ଡେକ୍ସରେ ଭାରତର ସ୍କୋର ୪ ମଧ୍ୟରୁ ୨.୪୫ ରହିଛି, ଯାହା ଦର୍ଶାଉଛି ଯେ ୮୭% ସଂସ୍ଥା ସକ୍ରିୟ ଭାବେ ଏଆଇ ସମାଧାନ ବ୍ୟବହାର କରୁଛନ୍ତି।
- ଶିଳ୍ପ ଓ ଅଟୋମୋବାଇଲ୍, ଗ୍ରାହକ ସାମଗ୍ରୀ ଓ ଖୁଚୁରା ବ୍ୟବସାୟ, ବ୍ୟାଙ୍କିଙ୍ଗ୍, ଆର୍ଥିକ ସେବା ଓ ବୀମା ଏବଂ ସ୍ୱାସ୍ଥ୍ୟସେବା କ୍ଷେତ୍ର ଏଆଇ ବ୍ୟବହାରରେ ଆଗୁଆ ଅଛନ୍ତି। ଏହି କ୍ଷେତ୍ରଗୁଡ଼ିକ ମିଳିତ ଭାବେ ଏଆଇର ମୋଟ ମୂଲ୍ୟର ପ୍ରାୟ ୬୦ ପ୍ରତିଶତ ଯୋଗଦାନ କରନ୍ତି।
ଯେହେତୁ ଭାରତ ଏକ ସମାବେଶୀ ଏଆଇ ଇକୋସିଷ୍ଟମ୍ ଗଢ଼ୁଛି, ଏହାର ବଢ଼ୁଥିବା ବିଶ୍ୱସ୍ତରୀୟ ମାନ୍ୟତା ଏହି ଅଗ୍ରଗତିକୁ ପ୍ରତିଫଳିତ କରୁଛି। ଷ୍ଟାନଫୋର୍ଡ ଏଆଇ ଇଣ୍ଡେକ୍ସ ଭଳି ମାନ୍ୟତା ଭାରତକୁ ଏଆଇ ଦକ୍ଷତା, ସାମର୍ଥ୍ୟ ଏବଂ ନୀତି କ୍ଷେତ୍ରରେ ଶୀର୍ଷ ଚାରୋଟି ଦେଶ ମଧ୍ୟରେ ସ୍ଥାନ ଦେଇଛି। GitHubର ଏଆଇ ପ୍ରକଳ୍ପରେ ଯୋଗଦାନ କରୁଥିବା ଦେଶମାନଙ୍କ ମଧ୍ୟରେ ଭାରତ ଦ୍ୱିତୀୟ ବୃହତ୍ତମ ଦେଶ। ଶକ୍ତିଶାଳୀ STEM କାର୍ଯ୍ୟବଳ, ବଢ଼ୁଥିବା ଗବେଷଣା ଏବଂ ଡିଜିଟାଲ ଭିତ୍ତିଭୂମି ସହିତ, ଭାରତ ୨୦୪୭ ସୁଦ୍ଧା ବିକଶିତ ଭାରତର ସ୍ୱପ୍ନ ସାକାର କରିବା ପାଇଁ ନିଜକୁ ପ୍ରସ୍ତୁତ କରୁଛି।
ଭାରତ ବିଶ୍ୱର ତୃତୀୟ ସବୁଠାରୁ ଏଆଇ-ପ୍ରତିଯୋଗୀ ଦେଶ
ଷ୍ଟାନଫୋର୍ଡ ୟୁନିଭରସିଟିର ୨୦୨୫ ଗ୍ଲୋବାଲ୍ ଏଆଇ ଭାଇବ୍ରାନ୍ସି ଟୁଲ୍ ଅନୁଯାୟୀ, ଏଆଇ ପ୍ରତିଯୋଗିତା କ୍ଷେତ୍ରରେ ଭାରତ ବିଶ୍ୱରେ ତୃତୀୟ ସ୍ଥାନ ହାସଲ କରିଛି। ଏହି ମାନ୍ୟତା ବିଶ୍ୱସ୍ତରରେ ଭାରତର ଦ୍ରୁତ ଏଆଇ ଅଭିବୃଦ୍ଧିକୁ ଦର୍ଶାଉଛି। ୨୦୧୭ ରୁ ୨୦୨୪ ମଧ୍ୟରେ ଏଆଇର ଅଭିବୃଦ୍ଧି ଏବଂ ନୂତନତ୍ୱକୁ ଏହି ରିପୋର୍ଟ ଅନୁଧ୍ୟାନ କରିଛି।
“ଭାରତରେ ଏଆଇ ତିଆରି ଏବଂ ଭାରତ ପାଇଁ ଏଆଇକୁ କାର୍ଯ୍ୟକାରୀ କରିବା” ଦୂରଦୃଷ୍ଟି ଦ୍ୱାରା ଅନୁପ୍ରାଣିତ ହୋଇ କେନ୍ଦ୍ର କ୍ୟାବିନେଟ୍ ମାର୍ଚ୍ଚ ୨୦୨୪ ରେ ୧୦,୩୭୧.୯୨ କୋଟି ଟଙ୍କାର ବଜେଟ୍ ବ୍ୟୟବରାଦ ସହ ‘ଇଣ୍ଡିଆ ଏଆଇ ମିଶନ’କୁ ଅନୁମୋଦନ କରିଛନ୍ତି। ଏହି ମିଶନ ଭାରତକୁ ଏଆଇ କ୍ଷେତ୍ରରେ ଏକ ବିଶ୍ୱସ୍ତରୀୟ ନେତା ଭାବେ ଗଢ଼ି ତୋଳିବା ଦିଗରେ ଏକ ନିର୍ଣ୍ଣାୟକ ପଦକ୍ଷେପ। ଏହାର ଆରମ୍ଭ ପରଠାରୁ ଦେଶର କମ୍ପ୍ୟୁଟିଂ ଭିତ୍ତିଭୂମି ସମ୍ପ୍ରସାରଣରେ ଏହା ଉଲ୍ଲେଖନୀୟ ସଫଳତା ପାଇଛି। ପ୍ରାରମ୍ଭିକ ୧୦,୦୦୦ ଜିପିୟୁର ଲକ୍ଷ୍ୟ ତୁଳନାରେ ଭାରତ ଏବେ ୩୮,୦୦୦ ଜିପିୟୁ ହାସଲ କରିଛି।
ଜିପିୟୁ ବା ଗ୍ରାଫିକ୍ସ ପ୍ରସେସିଂ ୟୁନିଟ ହେଉଛି ଏକ ଶକ୍ତିଶାଳୀ କମ୍ପ୍ୟୁଟର ଚିପ୍ ଯାହା ମେସିନ୍କୁ ଦ୍ରୁତ ଗତିରେ ଚିନ୍ତା କରିବା, ଚିତ୍ର ପ୍ରକ୍ରିୟାକରଣ କରିବା, ଏଆଇ ପ୍ରୋଗ୍ରାମ୍ ଚଲାଇବା ଏବଂ ଜଟିଳ କାର୍ଯ୍ୟଗୁଡ଼ିକୁ ସାଧାରଣ ପ୍ରୋସେସର ତୁଳନାରେ ଅଧିକ ଦକ୍ଷତାର ସହ ସମ୍ପାଦନ କରିବାରେ ସାହାଯ୍ୟ କରିଥାଏ।
ଇଣ୍ଡିଆ ଏଆଇ ମିଶନର ସାତୋଟି ସ୍ତମ୍ଭ:
୧. ଇଣ୍ଡିଆ ଏଆଇ କମ୍ପ୍ୟୁଟ୍ ସ୍ତମ୍ଭ: ଏହା ଶସ୍ତା ଦରରେ ହାଇ-ଏଣ୍ଡ ଜିପିୟୁ ଯୋଗାଇଥାଏ। ବର୍ତ୍ତମାନ ସୁଦ୍ଧା ୩୮,୦୦୦ ରୁ ଅଧିକ ଜିପିୟୁ ଅନ୍ତର୍ଭୁକ୍ତ କରାଯାଇଛି, ଯାହା ଘଣ୍ଟା ପ୍ରତି ମାତ୍ର ୬୫ ଟଙ୍କା ରିହାତି ଦରରେ ଉପଲବ୍ଧ।
୨. ଇଣ୍ଡିଆ ଏଆଇ ଆପ୍ଲିକେସନ୍ ଡେଭଲପମେଣ୍ଟ ଇନିସିଏଟିଭ୍: ଏହା ଭାରତ-ନିର୍ଦ୍ଦିଷ୍ଟ ଆହ୍ୱାନଗୁଡ଼ିକ ପାଇଁ ଏଆଇ ପ୍ରୟୋଗ ପ୍ରସ୍ତୁତ କରେ।
୩. ଏଆଇ କୋଷ: ଏହା ଏଆଇ ମଡେଲଗୁଡ଼ିକୁ ତାଲିମ ଦେବା ପାଇଁ ବୃହତ ଡାଟାସେଟ୍ ପ୍ରସ୍ତୁତ କରେ। ଏଥିରେ ୫,୫୦୦ ରୁ ଅଧିକ ଡାଟାସେଟ୍ ଏବଂ ୨୫୧ଟି ଏଆଇ ମଡେଲ୍ ରହିଛି।
୪. ଇଣ୍ଡିଆ ଏଆଇ ଫାଉଣ୍ଡେସନ୍ ମଡେଲ୍: ଏହା ଭାରତର ନିଜସ୍ୱ ଲାର୍ଜ ମଲ୍ଟିମୋଡାଲ୍ ମଡେଲ୍ ପ୍ରସ୍ତୁତ କରେ।
୫. ଇଣ୍ଡିଆ ଏଆଇ ଫ୍ୟୁଚର ସ୍କିଲ୍ସ: ଏହା ଏଆଇ-ଦକ୍ଷ ବୃତ୍ତିଗତମାନଙ୍କୁ ପ୍ରସ୍ତୁତ କରେ।
୬. ଇଣ୍ଡିଆ ଏଆଇ ଷ୍ଟାର୍ଟଅପ୍ ଫାଇନାନ୍ସିଂ: ଏହା ଏଆଇ ଷ୍ଟାର୍ଟଅପ୍ଗୁଡ଼ିକୁ ଆର୍ଥିକ ସହାୟତା ପ୍ରଦାନ କରେ।
୭. ସେଫ୍ ଆଣ୍ଡ ଟ୍ରଷ୍ଟେଡ୍ ଏଆଇ: ଏହା ଦାୟିତ୍ୱବାନ ଏବଂ ସୁରକ୍ଷିତ ଏଆଇ ବ୍ୟବହାର ନିଶ୍ଚିତ କରେ।
ଇଣ୍ଡିଆ ମୋବାଇଲ୍ କଂଗ୍ରେସ ୨୦୨୫ ରେ ଏଆଇ
୮ ଅକ୍ଟୋବର ୨୦୨୫ରେ ନୂଆଦିଲ୍ଲୀର ଯଶୋଭୂମିଠାରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଦ୍ୱାରା ଉଦ୍ଘାଟିତ ୯ମ ଇଣ୍ଡିଆ ମୋବାଇଲ୍ କଂଗ୍ରେସରେ ଏଆଇ କେନ୍ଦ୍ରବିନ୍ଦୁ ସାଜିଥିଲା। ଏହାର ବିଷୟବସ୍ତୁ ଥିଲା “Innovate to Transform” (ପରିବର୍ତ୍ତନ ପାଇଁ ନୂତନତ୍ୱ)।
ସରକାରଙ୍କ ଅନ୍ୟାନ୍ୟ ପ୍ରମୁଖ ପଦକ୍ଷେପ
- ଭାଷିନୀ (Bhashini): ଏହା ଏକ ଏଆଇ-ଚାଳିତ ପ୍ଲାଟଫର୍ମ ଯାହା ବିଭିନ୍ନ ଭାରତୀୟ ଭାଷାରେ ଅନୁବାଦ ଏବଂ ବକ୍ତବ୍ୟ ସୁବିଧା ପ୍ରଦାନ କରି ଭାଷାଗତ ବାଧା ଦୂର କରେ। ଏହା ୨୦ଟି ଭାରତୀୟ ଭାଷାକୁ ସମର୍ଥନ କରୁଛି।
- ଭାରତଜେନ୍ ଏଆଇ: ଏହା ହେଉଛି ପ୍ରଥମ ସରକାରୀ ପାଣ୍ଠି ପ୍ରାପ୍ତ, ସ୍ୱଦେଶୀ ମଲ୍ଟିମୋଡାଲ୍ ଲାର୍ଜ ଲାଙ୍ଗୁଏଜ୍ ମଡେଲ୍ ଯାହା ୨୨ଟି ଭାରତୀୟ ଭାଷାକୁ ସମର୍ଥନ କରେ।
- ସର୍ବମ ଏଆଇ: ଆଧାର ସେବାଗୁଡ଼ିକୁ ଅଧିକ ସ୍ମାର୍ଟ ଏବଂ ସୁରକ୍ଷିତ କରିବା ପାଇଁ ଏହା ୟୁଆଇଡିଏଆଇ ସହିତ କାମ କରୁଛି।
ଦୈନନ୍ଦିନ ଜୀବନ ଓ କାର୍ଯ୍ୟରେ ଏଆଇ
ଏଆଇ କେବଳ ଟେକ୍ନୋଲୋଜି ନୁହେଁ, ଏହା ସଶକ୍ତିକରଣର ଏକ ମାଧ୍ୟମ।
- ସ୍ୱାସ୍ଥ୍ୟସେବା: ରୋଗର ପ୍ରାରମ୍ଭିକ ଚିହ୍ନଟ ଏବଂ ଚିକିତ୍ସାରେ ସାହାଯ୍ୟ କରେ।
- କୃଷି: କିଷାନ ଇ-ମିତ୍ର ଭଳି ପଦକ୍ଷେପ ମାଧ୍ୟମରେ କୃଷକଙ୍କୁ ପାଣିପାଗ ଏବଂ କୀଟନାଶକ ସମ୍ପର୍କରେ ସୂଚନା ଦିଏ।
- ଶିକ୍ଷା: ସିବିଏସ୍ଇ ଏବଂ ଦିକ୍ଷା ପ୍ଲାଟଫର୍ମ ମାଧ୍ୟମରେ ଏଆଇକୁ ଶିକ୍ଷାଦାନର ଅଂଶ କରାଯାଇଛି।
- ଶାସନ ଓ ନ୍ୟାୟ: କୋର୍ଟର ରାୟଗୁଡ଼ିକୁ ଆଞ୍ଚଳିକ ଭାଷାରେ ଅନୁବାଦ କରିବାରେ ଏଆଇ ସାହାଯ୍ୟ କରୁଛି।
ଏଆଇ ଯୋଗୁଁ କ’ଣ ବେକାରୀ ବଢ଼ିବ?
ଏଆଇକୁ ଚାକିରି ପାଇଁ ବିପଦ ବୋଲି ମନେ କରାଯାଉଥିଲେ ମଧ୍ୟ ପ୍ରକୃତରେ ଏହା ନୂତନ ସୁଯୋଗ ସୃଷ୍ଟି କରୁଛି। ନାସକମ୍ ରିପୋର୍ଟ ଅନୁଯାୟୀ, ଭାରତର ଏଆଇ ଦକ୍ଷତା ସମ୍ପନ୍ନ ବ୍ୟକ୍ତିଙ୍କ ସଂଖ୍ୟା ୨୦୨୭ ସୁଦ୍ଧା ୧୨.୫ ଲକ୍ଷ ଅତିକ୍ରମ କରିବ। ସରକାରଙ୍କ ଫ୍ୟୁଚରସ୍କିଲ୍ସ, ପ୍ରାଇମ ପରି ପ୍ରୋଗ୍ରାମଗୁଡ଼ିକ ଆଇଟି ବୃତ୍ତିଧାରୀଙ୍କୁ ନୂତନ ଟେକ୍ନୋଲୋଜିରେ ଦକ୍ଷ କରିବା ପାଇଁ କାର୍ଯ୍ୟ କରୁଛି।
ଆର୍ଟିଫିସିଆଲ୍ ଇଣ୍ଟେଲିଜେନ୍ସ କ୍ଷେତ୍ରରେ ଭାରତର ଯାତ୍ରା ଏକ ସ୍ପଷ୍ଟ ଦୂରଦୃଷ୍ଟି ଏବଂ ଦୃଢ଼ ପଦକ୍ଷେପକୁ ପ୍ରତିଫଳିତ କରେ। ଇଣ୍ଡିଆ ଏଆଇ ମିଶନ ଏବଂ ଅନ୍ୟାନ୍ୟ ସରକାରୀ ଯୋଜନାଗୁଡ଼ିକ ଭାରତକୁ ଏକ ବିଶ୍ୱସ୍ତରୀୟ ଏଆଇ ନେତା ଭାବେ ପ୍ରତିଷ୍ଠିତ କରିବା ସହ ୨୦୪୭ ସୁଦ୍ଧା ବିକଶିତ ଭାରତ ଗଠନର ଭିତ୍ତିଭୂମି ସ୍ଥାପନ କରୁଛି।
