ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳର ସମବାୟ ମନ୍ତ୍ରୀମାନଙ୍କ ସହ ଶ୍ରୀ ଅମିତ ଶାହଙ୍କ ଉଚ୍ଚସ୍ତରୀୟ ବୈଠକ

Suvendra Pattanaik :କେନ୍ଦ୍ର ଗୃହ ଏବଂ ସମବାୟ ମନ୍ତ୍ରୀ ଶ୍ରୀ ଅମିତ ଶାହ ଆଜି ଗୁଜରାଟର ଗାନ୍ଧୀନଗରଠାରେ ‘ସହକାର ସେ ସମୃଦ୍ଧି’ ବିଷୟବସ୍ତୁ ଉପରେ ସମସ୍ତ ରାଜ୍ୟ ଏବଂ କେନ୍ଦ୍ରଶାସିତ ଅଞ୍ଚଳର ସମବାୟ ମନ୍ତ୍ରୀମାନଙ୍କ ସହ ଏକ ମନ୍ଥନ ବୈଠକରେ ଅଧ୍ୟକ୍ଷତା କରିଛନ୍ତି। ମନ୍ଥନ ବୈଠକରେ ଶ୍ରୀ ଅମିତ ଶାହ ଇଥାନଲ, ଶକ୍ତି, ଜୈବିକ ପଟାସ, ପଣ୍ୟାଗାର ଏବଂ ପ୍ରୋଟିନ୍ ପାଉଡର ପ୍ଲାଣ୍ଟ ସହ ଜଡ଼ିତ ୨୬୫ କୋଟି ଟଙ୍କାର ପ୍ରକଳ୍ପର ଉଦଘାଟନ ଏବଂ ଭିତ୍ତିପ୍ରସ୍ତର ସ୍ଥାପନ କରିଥିଲେ। ସେ ଏହି ପ୍ରଦର୍ଶନୀକୁ ମଧ୍ୟ ପରିଦର୍ଶନ କରିଥିଲେ ଏବଂ ସମବାୟ ସମିତିରେ ସର୍ବୋତ୍ତମ ଅଭ୍ୟାସ ଏବଂ ଅନ୍ତର୍ଜାତୀୟ ସମବାୟ ବର୍ଷ ଉପରେ ଏକ ରିପୋର୍ଟ ଉନ୍ମୋଚନ କରିଥିଲେ। ଏହି ଅବସରରେ କେନ୍ଦ୍ର ସମବାୟ ରାଷ୍ଟ୍ରମନ୍ତ୍ରୀ ଶ୍ରୀ କ୍ରିଷନ ପାଲ ଗୁର୍ଜର, ସମବାୟ ମନ୍ତ୍ରଣାଳୟର ସଚିବ ଶ୍ରୀ ମୁରଲୀଧର ମୋହୋଲ ଏବଂ ଅନ୍ୟ ମାନ୍ୟଗଣ୍ୟ ବ୍ୟକ୍ତି ଉପସ୍ଥିତ ଥିଲେ।
ଶ୍ରୀ ଶାହ ତାଙ୍କ ଅଭିଭାଷଣରେ କହିଥିଲେ ଯେ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ଦେଶ ପ୍ରତ୍ୟେକ କ୍ଷେତ୍ରରେ ପ୍ରଗତି କରୁଛି। ଆଗାମୀ ପଚିଶ ବର୍ଷ ମଧ୍ୟରେ ବିଶ୍ୱ ଅର୍ଥ ବ୍ୟବସ୍ଥାର ଯେଉଁ ଦିଗ ନିର୍ଦ୍ଧାରଣ କରିବ, ସେହି କ୍ଷେତ୍ରରେ ଭାରତ ଆଜି ଅଗ୍ରଣୀ ଭାବେ କାର୍ୟ୍ୟ କରୁଛି। ସେ କହିଥିଲେ ଯେ ଏହି ମନ୍ଥନ ବୈଠକର ଆୟୋଜନ କରାଯାଇଛି କାରଣ ଆମେ ୨୦୪୭ ସୁଦ୍ଧା ଭାରତକୁ ଏକ ସମ୍ପୂର୍ଣ୍ଣ ବିକଶିତ ରାଷ୍ଟ୍ରରେ ପରିଣତ କରିବାକୁ ଚାହୁଁଛୁ। ସେ କହିଥିଲେ ଯେ ଏକ ସମ୍ପୂର୍ଣ୍ଣ ବିକଶିତ ଭାରତର ଅର୍ଥ ହେଉଛି ଏପରି ଏକ ବ୍ୟବସ୍ଥା ସୃଷ୍ଟି କରିବା ଯେଉଁଥିରେ ୧୪୦ କୋଟି ଲୋକ ସମ୍ମାନର ସହ ବଞ୍ଚିପାରିବେ। ସେ କହିଥିଲେ ଯେ କେବଳ ସମବାୟ ସମିତି ହିଁ ଏକ ମାଧ୍ୟମ ହୋଇପାରିବ ଯାହା ମାଧ୍ୟମରେ ଭାରତର ପ୍ରତ୍ୟେକ ପରିବାର ଏବଂ ବ୍ୟକ୍ତି ସମ୍ମାନର ସହ ବଞ୍ଚିପାରିବେ।
ଶ୍ରୀ ଶାହ କହିଥିଲେ ଯେ, ଯେ ପର୍ୟ୍ୟନ୍ତ କୃଷି, ଗ୍ରାମୀଣ ବିକାଶ ଏବଂ ପଶୁପାଳନ କ୍ଷେତ୍ରକୁ ସୁଦୃଢ଼ କରାଯାଇନାହିଁ, ସେ ପର୍ୟ୍ୟନ୍ତ ବ୍ୟାପକ ଜାତୀୟ ବିକାଶ ସମ୍ଭବ ନୁହେଁ। ସେ କହିଥିଲେ ଯେ ଏହି ପ୍ରୟାସକୁ ସଫଳ କରିବା ପାଇଁ ଆମେ ସମସ୍ତେ ନିଷ୍ଠାର ସହ କାର୍ୟ୍ୟ କରିବା ଆବଶ୍ୟକ। ସେ କହିଥିଲେ ଯେ ବିଗତ ଚାରି ବର୍ଷ ମଧ୍ୟରେ ଆମେ ସମବାୟ କ୍ଷେତ୍ରକୁ ଆଗକୁ ବଢ଼ାଇବା ପାଇଁ ଏକ ବୈଜ୍ଞାନିକ ଆଭିମୁଖ୍ୟ ଗ୍ରହଣ କରିଛୁ ଏବଂ ଏହାର ଫଳାଫଳ ଏବେ ଦୃଶ୍ୟମାନ ହେଉଛି।
ସମବାୟ ସମିତିର ସ୍ୱୀକୃତି ବୃଦ୍ଧି ପାଇଁ କେନ୍ଦ୍ର ସମବାୟ ମନ୍ତ୍ରୀ ପ୍ରମୁଖ କ୍ଷେତ୍ର ଉପରେ ଗୁରୁତ୍ୱାରୋପ କରିଥିଲେ। ଖାଦ୍ୟ ଶସ୍ୟ ସଂରକ୍ଷଣ ଉପରେ ଗୁରୁତ୍ୱାରୋପ କରି ସେ କହିଥିଲେ ଯେ ଆଗାମୀ ଦିନରେ ସମବାୟ କ୍ଷେତ୍ର ଦ୍ୱାରା ଦୁଇଗୁଣ ସମ୍ପ୍ରସାରଣ ସହିତ ସଂରକ୍ଷଣ କ୍ଷମତା ପ୍ରାୟ ତିନିଗୁଣ ବୃଦ୍ଧି କରିବାର ଆବଶ୍ୟକତା ରହିଛି। ସେ କହିଥିଲେ ଯେ ଏହା ସମସ୍ତଙ୍କ ଦାୟିତ୍ୱ ଏବଂ ଏହାକୁ କେବଳ ପାକସ୍ ଉପରେ ଛାଡ଼ିଦେବା ଉଚିତ ନୁହେଁ; ତହସିଲ ସ୍ତରୀୟ ସମବାୟ ଡାଏରୀ, ରାଜ୍ୟ ସ୍ତରୀୟ ବିପଣନ ସଂଘ, ଆର୍ଥିକ ସହାୟତା ମାଧ୍ୟମରେ ଜିଲ୍ଲା ସମବାୟ ବ୍ୟାଙ୍କ ଏବଂ ଜିଲ୍ଲା ବିକ୍ରୟ-କ୍ରୟ ସଂଘଗୁଡ଼ିକ ବଡ଼ ବଡ଼ ପଣ୍ୟାଗାର ନିର୍ମାଣ କରିବା ଉଚିତ। ସେ ଆହୁରି ମଧ୍ୟ କହିଛନ୍ତି ଯେ ଉତ୍ତର ଭାରତ-ପଞ୍ଜାବ ଏବଂ ହରିୟାଣାରୁ ୭୦ ପ୍ରତିଶତ ଖାଦ୍ୟଶସ୍ୟ କ୍ରୟ କରାଯାଇଥାଏ ଏବଂ ଯଦି କ୍ରୟ, ସଂରକ୍ଷଣ ଏବଂ ବିତରଣକୁ ଆଞ୍ଚଳିକ ସ୍ତରରେ ସମନ୍ୱିତ କରାଯାଏ, ତେବେ ପରିବହନ ଖର୍ଚ୍ଚ ଅତିକମରେ ୩୦ ରୁ ୪୦ ପ୍ରତିଶତ ହ୍ରାସ କରାଯାଇପାରିବ। ସାରା ଦେଶରେ ମହଜୁଦ ବ୍ୟବସ୍ଥା ସର୍ବଭାରତୀୟ ସ୍ତରରେ ସମସ୍ତଙ୍କ ପାଇଁ ସମାନ ଭାବେ ଉପଲବ୍ଧ ହେବା ଉଚିତ।
ଶ୍ରୀ ଅମିତ ଶାହ କହିଥିଲେ ଯେ ବନ୍ଦ ହୋଇଯାଇଥିବା ଚିନି କାରଖାନାଗୁଡ଼ିକୁ ପୁନଃ ଆରମ୍ଭ କରିବା ଲାଗି ସମସ୍ତ ରାଜ୍ୟ ପ୍ରୟାସ କରିବା ଉଚିତ। ସେ କହିଥିଲେ ଯେ ଏକ ଜାତୀୟ ସ୍ତରୀୟ ସମବାୟ ସମିତି ଗଠନ କରାଯାଇଛି। ଆର୍ଥିକ ଦୃଷ୍ଟିରୁ ଦୁର୍ବଳ ଥିବା ଚିନି କାରଖାନାଗୁଡ଼ିକ ସାର ଏବଂ ଗ୍ୟାସ ଉତ୍ପାଦନ କରିପାରିବେ, ଏବଂ ସଫଳ ପରୀକ୍ଷଣଗୁଡ଼ିକ ଦର୍ଶାଇଛନ୍ତି ଯେ ଚିନି କାରଖାନାଗୁଡ଼ିକରୁ ଏଗାରଟି ଭିନ୍ନ ଉତ୍ପାଦ ଉତ୍ପାଦନ କରାଯାଇପାରିବ। ସେ କହିଥିଲେ ଯେ ମାର୍ଚ୍ଚ ପ୍ରଥମ ସପ୍ତାହରେ ସେ କାର୍ୟ୍ୟକ୍ଷମ ଢାଞ୍ଚାକୁ ଚୂଡ଼ାନ୍ତ ରୂପ ଦେବେ ଏବଂ କେବଳ ଚିନି ଉତ୍ପାଦନ କରୁଥିବା ଚିନି କାରଖାନାଗୁଡ଼ିକରେ, ଜାତୀୟ ସ୍ତରର ସମବାୟ ଅନ୍ୟ ସମସ୍ତ ଆବଶ୍ୟକୀୟ ଉପାଦାନ ଯୋଗ କରିବାରେ ସୁବିଧା ପ୍ରଦାନ କରିବ। ଏଥିପାଇଁ ରାଜ୍ୟଗୁଡ଼ିକୁ ମଧ୍ୟ ନମନୀୟ ନୀତି ଗ୍ରହଣ କରିବାକୁ ପଡ଼ିବ।
କେନ୍ଦ୍ର ଗୃହମନ୍ତ୍ରୀ କହିଥିଲେ ଯେ ପ୍ରତ୍ୟେକ ରାଜ୍ୟ ନିଜ ନିଜ ଦୁଗ୍ଧ ଏବଂ ସମବାୟ ବିଭାଗର ଦଳଗୁଡ଼ିକୁ ବନାସ ଡାଏରୀ ପରିଦର୍ଶନ କରିବା ପାଇଁ ପଠାଇବା ଉଚିତ। ସେ କହିଥିଲେ ଯେ ବନାସ ଡାଏରୀ ବିଭିନ୍ନ ପଦକ୍ଷେପ ଗ୍ରହଣ କରିଛି, ଯେଉଁଥିରୁ ସମସ୍ତ ରାଜ୍ୟ ଗୁରୁତ୍ୱପୂର୍ଣ୍ଣ ଶିକ୍ଷା ଲାଭ କରିପାରିବେ।
‘ସହକାରିତା ମେ ସହକାର’ (ସମବାୟ ସମିତି ମଧ୍ୟରେ ସହଯୋଗ) ଉପରେ ଗୁରୁତ୍ୱାରୋପ କରି କେନ୍ଦ୍ର ଗୃହ ଓ ସମବାୟ ମନ୍ତ୍ରୀ କହିଥିଲେ ଯେ ସମସ୍ତ ସମବାୟ ସଂସ୍ଥା ଜିଲ୍ଲା ସମବାୟ ବ୍ୟାଙ୍କରେ ନିଜର ବ୍ୟାଙ୍କ ଆକାଉଣ୍ଟ ରଖିବା ଉଚିତ। ସେ କହିଥିଲେ ଯେ ଭାରତ ସରକାର ନିଷ୍ପତ୍ତି ନେଇଛନ୍ତି ଯେ ସମବାୟ ବ୍ୟାଙ୍କଗୁଡ଼ିକୁ ଭାରତ ସରକାରଙ୍କ ସମସ୍ତ ଯୋଜନା ପାଇଁ ନୋଡାଲ ଏଜେନ୍ସି କରାଯାଇ ପାରିବ। ସେ କହିଥିଲେ ଯେ ରାଜ୍ୟ ସରକାରମାନେ ଏହା ସୁନିଶ୍ଚିତ କରିବା ଉଚିତ ଯେ ପିଏମ-କିଷାନ ଏବଂ ବାର୍ଦ୍ଧକ୍ୟ ଭତ୍ତା ଭଳି ଯୋଜନା ଅନ୍ତର୍ଗତ ପାଣ୍ଠି ଏହି ବ୍ୟାଙ୍କଗୁଡ଼ିକ ଜରିଆରେ ପଠାଯାଉ।
ଶ୍ରୀ ଶାହ କହିଥିଲେ ଯେ ଆଗାମୀ ଦିନରେ ଛୋଟ ଶ୍ରମିକ, ବଢ଼େଇ, ପାଣିପାଇପ୍ ମିସ୍ତ୍ରୀ ଏବଂ ବିଦ୍ୟୁତ କାରିଗରମାନଙ୍କ ପାଇଁ ମଧ୍ୟ ସମବାୟ ସମିତି ଗଠନ କରାଯିବ, ଯେଉଁମାନେ ଶୋଷଣର ଶିକାର ହେଉଛନ୍ତି, ଯାହାଦ୍ୱାରା ସେମାନେ ଉଚିତ ଏବଂ ସମ୍ମାନଜନକ ପାରିଶ୍ରମିକ ପାଇବେ। ସେ କହିଥିଲେ ଯେ ଆଗାମୀ ଦିନରେ ଦେଶର ୪୦ ପ୍ରତିଶତରୁ ଅଧିକ ଲୋକ ସମବାୟ କ୍ଷେତ୍ର ସହିତ ଯୋଡ଼ି ହୋଇଯିବେ।
କେନ୍ଦ୍ର ଗୃହମନ୍ତ୍ରୀ କହିଥିଲେ ଯେ ଆଗାମୀ ବର୍ଷଗୁଡ଼ିକରେ ଭାରତ ଟ୍ୟାକ୍ସି ପ୍ରତ୍ୟେକ ମହାନଗର ନିଗମରେ ପହଞ୍ଚିବ। ୩ ଲକ୍ଷରୁ ଅଧିକ ଚାଳକ ଏଥିରେ ଯୋଗ ଦେଇଛନ୍ତି। ଏହାଦ୍ୱାରା ଉଭୟ ଚାଳକ ଏବଂ ଯାତ୍ରୀ ଉପକୃତ ହେବେ।
ଏହାପୂର୍ବରୁ ମନ୍ଥନ ବୈଠକରେ ବିଭିନ୍ନ ଉପସ୍ଥାପନା ମାଧ୍ୟମରେ, ପ୍ରଗତି, ସଫଳତା ଏବଂ ସମବାୟ ସମ୍ବନ୍ଧୀୟ ପଦକ୍ଷେପର ଭବିଷ୍ୟତ କାର୍ୟ୍ୟ ଯୋଜନାର ସମୀକ୍ଷା ଏବଂ ମୂଲ୍ୟାଙ୍କନ କରାଯାଇଥିଲା। ଗ୍ରାମୀଣ ଅର୍ଥବ୍ୟବସ୍ଥାକୁ ତ୍ୱରାନ୍ୱିତ କରିବା ପାଇଁ ୨ ଲକ୍ଷ ନୂତନ ବହୁମୁଖୀ ପ୍ରାଥମିକ କୃଷି ଋଣ ସମିତି (ପାକସ୍), ଦୁଗ୍ଧ ଏବଂ ମତ୍ସ୍ୟ ସମବାୟ ସମିତି ପ୍ରତିଷ୍ଠା ଦିଗରେ ଅଗ୍ରଗତି ଉପରେ ଆଲୋଚନା କରାଯାଇଥିଲା। କୃଷକମାନଙ୍କ ପାଇଁ ଉନ୍ନତ ସଂରକ୍ଷଣ, ମୂଲ୍ୟ ସ୍ଥିରତା ଏବଂ ଉନ୍ନତ ବଜାର ଉପଲବ୍ଧତା ସୁନିଶ୍ଚିତ କରିବା ପାଇଁ ବିଶ୍ୱର ସର୍ବବୃହତ ଶସ୍ୟ ସଂରକ୍ଷଣ ଯୋଜନା ଅଧୀନରେ ଆଧୁନିକ ପଣ୍ୟାଗାରଗୁଡ଼ିକର ଏକ ଦେଶବ୍ୟାପୀ ନେଟୱାର୍କ ସମ୍ପ୍ରସାରଣ ଉପରେ ଗୁରୁତ୍ୱ ଦିଆଯାଇଥିଲା।
ଏହି ବୈଠକରେ ସମବାୟ ମାଧ୍ୟମରେ ରପ୍ତାନୀ, ଜୈବିକ କୃଷି ଏବଂ ଗୁଣାତ୍ମକ ବିହନ ଯୋଗାଣକୁ ପ୍ରୋତ୍ସାହନ ଦେବା ଲାଗି ନବଗଠିତ ଜାତୀୟ ସମବାୟ ପ୍ରତିଷ୍ଠାନ-ନ୍ୟାସନାଲ କୋଅପରେଟିଭ୍ ଏକ୍ସପୋର୍ଟସ୍ ଲିମିଟେଡ୍ (ଏନ.ସି.ଇ. ଏଲ.), ନ୍ୟାସନାଲ କୋଅପରେଟିଭ୍ ଅର୍ଗାନିକ୍ସ ଲିମିଟେଡ୍ (ଏନ.ସି.ଓ.ଏଲ.) ଏବଂ ଭାରତୀୟ ବୀଜ ସହକାରୀ ସମିତି ଲିମିଟେଡ୍ (ବି.ବି.ଏସ.ଏସ.ଏଲ.) ରେ ରାଜ୍ୟଗୁଡ଼ିକର ସକ୍ରିୟ ଅଂଶଗ୍ରହଣ ଉପରେ ଗୁରୁତ୍ୱ ଦିଆଯାଇଥିଲା। ରାଜ୍ୟ ସମବାୟ ଆଇନରେ ସମୟୋଚିତ ସଂସ୍କାର, ୯୭ତମ ସମ୍ବିଧାନ ସଂଶୋଧନ ଅନୁରୂପ ଆଦର୍ଶ ଆଇନକୁ ଗ୍ରହଣ କରିବା, ସମବାୟ ଚିନି କାରଖାନାଗୁଡ଼ିକର ଆର୍ଥିକ କାର୍ୟ୍ୟକାରିତା ଏବଂ ଲାଭପ୍ରଦତାରେ ଉନ୍ନତି ଆଣିବା, ଦୁଗ୍ଧ କ୍ଷେତ୍ରରେ ଗତିଶୀଳ ଏବଂ ସ୍ଥାୟୀତ୍ୱକୁ ପ୍ରୋତ୍ସାହିତ କରିବା ଏବଂ ଅମୁଲ ଏବଂ ଏନ. ଡି. ଡି. ବି. ସହଯୋଗରେ ନୂତନ ଦୁଗ୍ଧ ସମବାୟ ସମିତି ଗଠନ ଉପରେ ମଧ୍ୟ ଆଲୋଚନା କରାଯାଇଥିଲା।
ଡାଲି ଏବଂ ମକା ଉତ୍ପାଦନକୁ ପ୍ରୋତ୍ସାହିତ କରିବା, ସମବାୟ ବ୍ୟାଙ୍କ ସମ୍ବନ୍ଧୀୟ ଆହ୍ୱାନର ସମାଧାନ, ଅଂଶୀଦାର ସେବା ସଂସ୍ଥା (ଏସ୍. ଏସ୍. ଇ.) ଏବଂ ଛତା ଢାଞ୍ଚାକୁ ମଜବୁତ କରିବା, ସଦସ୍ୟତା ଏବଂ ସଚେତନତା ଅଭିଯାନର ସମ୍ପ୍ରସାରଣ ଏବଂ ଏକ ପ୍ରଭାବଶାଳୀ ଗଣମାଧ୍ୟମ ଏବଂ ଯୋଗାଯୋଗ ରଣନୀତି ବିକଶିତ କରିବା ଉପରେ ବିସ୍ତୃତ ଉପସ୍ଥାପନା ଏବଂ ଆଲୋଚନା ମଧ୍ୟ ଏହି ବୈଠକରେ ଅନ୍ତର୍ଭୁକ୍ତ ଥିଲା। ଏହାବ୍ୟତୀତ ପାକସ୍ ଏବଂ ଆର.ସି.ଏସ୍. କାର୍ୟ୍ୟାଳୟଗୁଡ଼ିକର କମ୍ପ୍ୟୁଟରୀକରଣ, ଜାତୀୟ ସମବାୟ ଡାଟାବେସର ଉପଯୋଗ, ମାନବ ସମ୍ବଳ ବିକାଶ ଏବଂ ତାଲିମ ଏବଂ ଜାତୀୟ ସମବାୟ ବିକାଶ ନିଗମ (ଏନ. ସି. ଡି. ସି.) ଯୋଜନାଗୁଡ଼ିକର ଉନ୍ନତ କାର୍ୟ୍ୟାନ୍ୱୟନ ସମ୍ବନ୍ଧରେ ରାଜ୍ୟଗୁଡ଼ିକଠାରୁ ଆଶା କରାଯାଉଥିବା ବିଷୟଗୁଡ଼ିକ ସେୟାର କରାଯାଇଥିଲା।