• ୨୦୩୬ ସୁଦ୍ଧା ବିକଶିତ ଓଡ଼ିଶାର ସ୍ୱପ୍ନ ସାକାର କରିବା ପାଇଁ ହେଲେ ଆଗାମୀ ୧୦ ବର୍ଷ ଆମ ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ
• ଓଡ଼ିଶାକୁ ଅପପୁଷ୍ଟିରୁ ମୁକ୍ତ କରିବା, ସିଙ୍ଗଲ୍ ୟୁଜ୍ ପ୍ଲାଷ୍ଟିକ ବାରଣ କରିବା,ବ୍ୟାପକ ବୃକ୍ଷରୋପଣ କରିବା ପାଇଁ ଗୋଟିଏ ପାଦ ଆଗକୁ ବଢାଇବା
• ବିକଶିତ ଭାରତ ଡାଏଲୋଗର ଉଦ୍ଦେଶ୍ୟ ହେଉଛି ଯୁବବର୍ଗଙ୍କ ଲୁକ୍କାୟିତ ପ୍ରତିଭାକୁ ଲୋକଲୋଚନକୁ ଆଣିବା
• ଓଡ଼ିଶାରେ ରୋଜଗାର ବଢାଇବା ପାଇଁ ୧୦୦ କ୍ୟୁବ୍ ଷ୍ଟାର୍ଟଅପ୍ ଏକ ଜନଆନ୍ଦୋଳନ
ନୂଆଦିଲ୍ଲୀ/ଭୁବନେଶ୍ୱର, ଜାନୁଆରୀ ୧୧ – ୨୦୩୬ ସୁଦ୍ଧା ବିକଶିତ ଓଡ଼ିଶାର ସ୍ୱପ୍ନ ସାକାର କରିବା ପାଇଁ ହେଲେ ପ୍ରତିଟି ଓଡ଼ିଆଙ୍କୁ ନିଜର ଦାୟିତ୍ୱବୋଧ ବୁଝିବାକୁ ହେବ । ଓଡ଼ିଶାକୁ ଅପପୁଷ୍ଟିରୁ ମୁକ୍ତ କରିବା, ସିଙ୍ଗଲ୍ ୟୁଜ୍ ପ୍ଲାଷ୍ଟିକ ବାରଣ କରିବା, ବ୍ୟାପକ ବୃକ୍ଷରୋପଣ କରିବା ପାଇଁ ଗୋଟିଏ ଗୋଟିଏ ପାଦ ଆଗକୁ ବଢାଇବାକୁ ହେବ । ଯେତେବେଳେ ଆମେ ନିଜର ଦାୟିତ୍ୱକୁ ଠିକ୍ ଭାବେ ବୁଝିପାରିବା, ସେତେବେଳେ ବିକଶିତ ଓଡ଼ିଶା ମାଧ୍ୟମରେ ବିକଶିତ ଭାରତର ସ୍ୱପ୍ନ ସାକାର ହୋଇପାରିବ ଏବଂ ସମସ୍ତଙ୍କ ଅଧିକାର ପୂରା ହୋଇପାରିବ ବୋଲି କହିଛନ୍ତି କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ।
ନୂଆଦିଲ୍ଲୀ ଠାରେ ‘ବିକଶିତ ଭାରତ ୟଙ୍ଗ୍ ଲିଡର ଡାଏଲୋଗ୍ – ୨୦୨୬’ ପାଇଁ ମନୋନୀତ ହୋଇଥିବା ଓଡ଼ିଶାର ଯୁବ ପ୍ରତିନିଧିଙ୍କ ସହ ଆଲୋଚନା କରିଛନ୍ତି ଶ୍ରୀ ପ୍ରଧାନ । ସେ କହିଛନ୍ତି, ବିକଶିତ ଭାରତ ଡାଏଲୋଗର ପ୍ରକୃତ ଉଦ୍ଦେଶ୍ୟ ହେଉଛି ସେମାନଙ୍କ ଲୁକ୍କାୟିତ ପ୍ରତିଭାକୁ ଲୋକଲୋଚନକୁ ଆଣିବା ତଥା ‘ବଣମଲ୍ଲୀକୁ ପାରିଜାତ ପୁଷ୍ପରେ’ ରୂପାନ୍ତରିତ କରିବା । ଆଲୋଚନା କାଳରେ ଅଂଶଗ୍ରହଣକାରୀଙ୍କ ପ୍ରଶ୍ନର ଉତ୍ତରରେ ଶ୍ରୀ ପ୍ରଧାନ କହିଛନ୍ତି, ଶିକ୍ଷା ବ୍ୟବସ୍ଥାରେ ଏକ ବଡ଼ ପରିବର୍ତ୍ତନ ଆଣିବା ଉଦ୍ଦେଶ୍ୟରେ ଆମ ଦେଶରେ ଜାତୀୟ ଶିକ୍ଷା ନୀତି ଲାଗୁ କରାଯାଇଛି । ଏହି ନୀତି କେବଳ ସହର ନୁହେଁ, ବରଂ ଗ୍ରାମାଞ୍ଚଳର ପିଲାମାନଙ୍କ ପାଇଁ ମଧ୍ୟ ସମାନ ସୁଯୋଗ ସୃଷ୍ଟି କରୁଛି । ଏହି ନୂତନ ଶିକ୍ଷା ନୀତିର ସବୁଠାରୁ ବଡ଼ ଶକ୍ତି ହେଉଛି ଟେକ୍ନୋଲୋଜି ।
ଆଜିର ଏଆଇ ଯୁଗରେ ଭାଷା ଆଉ ବାଧକ ହୋଇ ରହିବ ନାହିଁ । ଆଇଆଇଟି ମାଡ୍ରାସରେ ଯେଉଁ ଜଟିଳ ବିଷୟ ଇଂରାଜୀରେ ପଠାଯାଉଛି, ଏଆଇ ସାହାଯ୍ୟରେ ତାହା ଆମ ମାତୃଭାଷାରେ ରୂପାନ୍ତରିତ ହୋଇପାରୁଛି । ଏହାର ଅର୍ଥ, ଆଗାମୀ ଦିନରେ ଆମ ରାଇରଙ୍ଗପୁର କିମ୍ବା କୋରାପୁଟର ଜଣେ ଛାତ୍ର ମଧ୍ୟ ବିଶ୍ୱସ୍ତରୀୟ ଶିକ୍ଷା ନିଜ ଭାଷାରେ ପାଇପାରିବେ । ଏଆଇ କ୍ଷେତ୍ରରେ କାମ କରୁଥିବା ‘ସରଭମ୍’ ର ସହପ୍ରତିଷ୍ଠାତା ଓଡ଼ିଆ ପୁଅ ପ୍ରତ୍ୟୁଷ କୁମାର ଓଡ଼ିଶାର ଗୌରବ ବଢାଇଛନ୍ତି ।
ଶ୍ରୀ ପ୍ରଧାନ କହିଛନ୍ତି, ବର୍ଷ ବର୍ଷ ଧରି ଆମେ ମାକାଉଲେଙ୍କ ଦ୍ୱାରା ପ୍ରଣୀତ ଶିକ୍ଷା ବ୍ୟବସ୍ଥାରେ ବାନ୍ଧି ହୋଇ ରହିଥିଲେ, ଯେଉଁଠି କେବଳ ଡିଗ୍ରୀକୁ ମାନ୍ୟତା ମିଳୁଥିଲା। କିନ୍ତୁ ଆଜି ପ୍ରଧାନମନ୍ତ୍ରୀଙ୍କ ନେତୃତ୍ୱରେ ଆମେ ‘ଡିଗ୍ରୀ ଅପେକ୍ଷା ଦକ୍ଷତା’କୁ ପ୍ରାଥମିକତା ଦେଉଛୁ । ସ୍କୁଲ ସ୍ତରରୁ ହିଁ ପିଲାମାନେ ନିଜ ରୁଚି ଅନୁସାରେ କୋଡିଂ, ସଙ୍ଗୀତ, କ୍ରୀଡ଼ା କିମ୍ବା ବୈଷୟିକ ଶିକ୍ଷା ଗ୍ରହଣ କରିପାରିବେ । ଆଇଆଇଟି ଭଳି ସମ୍ମାନଜନକ ଶିକ୍ଷାନୁଷ୍ଠାନରେ ସ୍ପୋର୍ଟ୍ସ କୋଟା ଆରମ୍ଭ ହେବା ଆମ ଶିକ୍ଷା ବ୍ୟବସ୍ଥାରେ ଏକ ଯୁଗାନ୍ତକାରୀ ପଦକ୍ଷେପ ବୋଲି ସେ କହିଥିଲେ ।
ଆମ ଦେଶ ଜ୍ଞାନ ଆଧାରିତ ଅର୍ଥନୀତି ଦିଗରେ ଅଗ୍ରସର ହେଉଥିବା ବେଳେ ନୂଆପିଢିର ପିଲାମାନଙ୍କୁ ଆଧୁନିକ ଦୁନିଆ ସହ ରୋଜଗାର ଦେବା ପାଇଁ ଏବେଠାରୁ ପ୍ରସ୍ତୁତ କରାଇବାକୁ ହେବ । ସେମାନଙ୍କୁ ନିଯୁକ୍ତି କରିବା ନୁହେଁ ବରଂ ନିଯୁକ୍ତିଦାତା କରାଇବା ପାଇଁ କର୍ତ୍ତବ୍ୟ କରିବାକୁ ହେବ । ୧୦୦ କ୍ୟୁବ୍ ତନ୍ମଧ୍ୟରୁ ଗୋଟିଏ କର୍ତ୍ତବ୍ୟ । ୨୦୩୬ରେ ଓଡ଼ିଶା ଭାଷା ଭିତ୍ତିରେ ଶତାବର୍ଷିକୀ ପାଳନ କରିବା ବେଳେ ସ୍ଥାପନା ହେବାକୁ ଥିବା ୧୦୦ଟି ଷ୍ଟାର୍ଟଅପର ପ୍ରତ୍ୟେକ ଷ୍ଟାର୍ଟଅପର ମୂଲ୍ୟ ଆନୁମାନିକ ମୂଲ୍ୟ ୧୦୦ କୋଟି ଟଙ୍କା ହେବ ବୋଲି ଶ୍ରୀ ପ୍ରଧାନ ମତପ୍ରକାଶ କରିଥିଲେ ।
