ରାୟଗଡ଼ା ରେଳ ମଣ୍ଡଳରେ ସତର୍କତା ସଚେତନତା ସପ୍ତାହ ପାଳିତ : ମଣ୍ଡଳ ରେଳ ପ୍ରବନ୍ଧକଙ୍କ ଦ୍ୱାରା ରେଳ କର୍ମଚାରୀଙ୍କୁ ସତ୍ୟନିଷ୍ଠାର ଶପଥ ପାଠ

ରାୟଗଡ଼ା, ୨୬ ଅକ୍ଟୋବର ୨୦୨୬: ସତର୍କତା ସଚେତନତା ସପ୍ତାହ ପାଳନ ଅବସରରେ ରାୟଗଡ଼ା ରେଳ ମଣ୍ଡଳର ମଣ୍ଡଳ ରେଳ ପ୍ରବନ୍ଧକ ଶ୍ରୀ ଅମିତାଭ ସିଂହଲ ରେଳ କର୍ମଚାରୀମାନଙ୍କୁ ସତ୍ୟନିଷ୍ଠାର ଶପଥ ପାଠ କରାଇଥିଲେ। ଏହି ଅବସରରେ କର୍ମଚାରୀମାନେ ନିଜ କର୍ତ୍ତବ୍ୟ ସମ୍ପାଦନରେ ସଚ୍ଚୋଟତା, ସତ୍ୟନିଷ୍ଠା, ସ୍ୱଚ୍ଛତା ଓ ଉତ୍ତରଦାୟିତ୍ୱ ବଜାୟ ରଖିବାକୁ ଶପଥ ନେଇଥିଲେ।

ଏହି ଶପଥ ଗ୍ରହଣ ସମାରୋହରେ କର୍ମଚାରୀମାନେ ଦୁର୍ନୀତି ଦୂରୀକରଣ ଏବଂ ନୈତିକ କାର୍ଯ୍ୟପଦ୍ଧତିକୁ ପ୍ରୋତ୍ସାହନ ଦେବା ପାଇଁ ସଂକଳ୍ପ ନେଇଥିଲେ। ସେମାନେ ନିୟମ ଓ ବିଧିବିଧାନର ଅନୁପାଳନ କରିବା ସହିତ ସମସ୍ତ ସରକାରୀ କାର୍ଯ୍ୟରେ ନିରପେକ୍ଷତା ଓ ସ୍ୱଚ୍ଛତା ବଜାୟ ରଖିବାକୁ ପ୍ରତିବଦ୍ଧତା ପ୍ରକାଶ କରିଥିଲେ। ଦୁର୍ନୀତି ବିରୋଧରେ ଲଢ଼େଇରେ ସରକାର, ନାଗରିକ ଓ ଅନ୍ୟାନ୍ୟ ସମ୍ପୃକ୍ତ ପକ୍ଷଙ୍କ ସାମୂହିକ ପ୍ରୟାସର ଗୁରୁତ୍ୱ ଉପରେ ମଧ୍ୟ ଶପଥରେ ଗୁରୁତ୍ୱ ଦିଆଯାଇଥିଲା।

ଏହି ଅବସରରେ ମଣ୍ଡଳ ରେଳ ପ୍ରବନ୍ଧକ ଶ୍ରୀ ଅମିତାଭ ସିଂହଲ କର୍ମଚାରୀମାନଙ୍କୁ ନିଜ କର୍ତ୍ତବ୍ୟ ପାଳନରେ ସଚ୍ଚୋଟ ଓ ନିଷ୍ଠାପର ରହିବା ସହିତ ସର୍ବୋଚ୍ଚ ନୈତିକ ମାନଦଣ୍ଡ ବଜାୟ ରଖିବାକୁ ଆହ୍ୱାନ ଦେଇଥିଲେ। ସେ କହିଥିଲେ ଯେ ସଚ୍ଚୋଟତା, କର୍ତ୍ତବ୍ୟନିଷ୍ଠା ଓ ନୈତିକ ଆଚରଣ ଜନସାଧାରଣଙ୍କ ବିଶ୍ୱାସ ବୃଦ୍ଧି କରିବା ସହ ରେଳ ପ୍ରଶାସନକୁ ଅଧିକ ଦକ୍ଷ କରିଥାଏ। ଦୁର୍ନୀତିଠାରୁ ଦୂରେଇ ରହିବା, ନିୟମାନୁସାରେ କାର୍ଯ୍ୟ କରିବା ଏବଂ ସଂଗଠନରେ ସତ୍ୟନିଷ୍ଠାର ସଂସ୍କୃତିକୁ ସୁଦୃଢ଼ କରିବା ପାଇଁ ସେ କର୍ମଚାରୀମାନଙ୍କୁ ଆହ୍ୱାନ ଜଣାଇଥିଲେ।

ସତର୍କତା ସଚେତନତା ସପ୍ତାହ ପାଳନ ମାଧ୍ୟମରେ ରାୟଗଡ଼ା ରେଳ ମଣ୍ଡଳ ସାର୍ବଜନୀନ ସେବାରେ ନୈତିକତା, ସ୍ୱଚ୍ଛତା ଓ ଉତ୍ତରଦାୟିତ୍ୱକୁ ପ୍ରୋତ୍ସାହନ ଦେବା ପ୍ରତି ନିଜର ପ୍ରତିବଦ୍ଧତାକୁ ପୁନଃଦୋହରାଇଛି। ମଣ୍ଡଳ କାର୍ମିକ ଅଧିକାରୀ (ଭାରପ୍ରାପ୍ତ) ଶ୍ରୀ ଦିଗମ୍ବର ପାଢ଼ୀ ଶପଥ ଗ୍ରହଣ ସମାରୋହର ସଂଯୋଜନା କରିଥିଲେ।