ପୋଲିସ ର ବିଳମ୍ବିତ ରାତିରେ ଅତର୍କିତ ଭାବେ ଘାଟିରେ ଚଢାଉ : ଡକାୟତି ଉଦ୍ୟମ ପଣ୍ଡ, ୭ ଗିରଫ , ୨ ଖଣ୍ଡା , ୪ଟି ଜୀବନ୍ତ ବୋମା ଜବତ

ଭଞ୍ଜନଗର : ଭଞ୍ଜନଗର ପୁଲିସ ପୁଣିଥରେ ଏକ ଡକାୟତି ଉଦ୍ୟମକୁ ପଣ୍ଡ କରିଛି । କଳିଙ୍ଗା ଘାଟିର ଅନ୍ଧାରିକୋଟରେ ଡକାୟତି କରିବାପାଇଁ ଡକାୟତମାନେ ପ୍ରସ୍ତୁତି ଚଳାଇଥିବାବେଳେ ପୁଲିସ ପୂର୍ବରୁ ଉକ୍ତ ଡକାୟତମାନଙ୍କ ଗତିବିଧି ଉପରେ ନଜର ରଖି ଅତର୍କିତଭାବେ ଗୁରୁବାର ବିଳମ୍ବିତ ରାତିରେ ଘାଟିରେ ଚଢାଉ କରିଥିଲା । ଫଳରେ ୭ଜଣ ଡକାୟତ ଧରାପଡିଥିଲେ । ପୁଲିସ ଏମାନଙ୍କୁ କାବୁ କରିବାସହ ଏମାନଙ୍କ ନିକଟରୁ ୨ଟି ଖଣ୍ଡା, ୪ଟି ଜୀବନ୍ତ ବୋମା ସହ ଡକାୟତିରେ ବ୍ୟବହାର କରାଯାଉଥିବା ବିଭିନ୍ନ ଜିନିଷ ଜବତ କରିଛି ।

ଗୁରୁବାର ଭଞ୍ଜନଗର ଥାନା ଅଧିକାରୀ ସୁଦୀପ୍ତ କୁାମର ସାହୁ ଏକ ପ୍ରେସ ରିଲିଜରେ ଏସମ୍ପର୍କରେ ସୂଚନା ଦେଇଛନ୍ତି । କରୋନା ସଂକ୍ରମଣ କାଳରେ ସାମାଜିକ ଦୂରତା ରକ୍ଷା ଦୃଷ୍ଟିରୁ ଗଣମାଧ୍ୟମ ପ୍ରତିନିଧିମାନଙ୍କୁ ଥାନାକୁ ନଡାକି ଏମାନଙ୍କୁ ପ୍ରେସ ରିଲିଜ ଜରିଆରେ ସୂଚନା ଦିଆଯାଇଥିବା ଥାନା ଅଧିକାରୀ ସାହୁ ଉଲ୍ଲେଖ କରିଛନ୍ତି । ତେବେ ଏହି ଚଢାଉ ବେଳେ ଅନ୍ଧାରର ସୁଯୋଗ ନେଇ ୨ଜଣ ଡକାୟତ ଚମ୍ପଟ ମାରିଥିବା ସେ ସୂଚୀତ କରିଛନ୍ତି ।

ମିିଳିଥିବା ସୂଚନା ପ୍ରକାରେ ଭଞ୍ଜନଗର ଥାନା ଅନ୍ତର୍ଗତ କଳିଙ୍ଗାଘାଟିର ଅନ୍ଧାରିକୋଟ ନିକଟରେ ରାତିରେ ବିଭିନ୍ନ ସ୍ଥାନରୁ ବହୁ ରାତ୍ରକାଳୀନ ବସ ଚଳାଚଳ କରୁଥିବାବେଳେ ଅଧିକାଂଶ ମାଲବାହୀ ଟ୍ରକ୍ ମଧ୍ୟ ଚଳାଚଳ କରୁଛି । ଏଣୁ ଏହାର ସୁଯୋଗ ନେଇ ଡକାୟତି ଉଦ୍ୟମ କରିବାକୁ ଯୋଜନା ପ୍ରସ୍ତୁତ କରୁଥିବାବେଳେ ପୋଲିସ ଏମାନଙ୍କ ଗତିବିଧିକୁ ପୂର୍ବରୁ ନଜର ରଖିଥିବାରୁ ଏକ ବଡଧରଣର ଡକାୟତି ଉଦ୍ୟମ ଫସର ଫାଟିଛି । ଗିରଫ ଡକାୟତମାନେ ହେଲେ ଦୟା ନାୟକ (ଅଳସୁ) ଜଗନ୍ନାଥପ୍ରସାଦ ଥାନା, ସାଧୁ ନାୟକ, ଲଣ୍ଡା ନାୟକ,  ପପୁ ନାୟକ, ପବନ ନାୟକ (ସମସ୍ତଙ୍କ ଘର ବେଗୁନିଆ), ସୁନୀଲ ନାୟକ (ସାନକୋଦଣ୍ଡା, ଭଞ୍ଜନଗର ଥାନା) ଓ  ଜୟସେନ ନାୟକ ଘର ଗାଙ୍ଗପୁର ବୋଲି ପୁଲିସ ସୂଚନା ଦେଇଛି ।

ଏସମ୍ପର୍କରେ ଭଞ୍ଜନଗର ଥାନାରେ ଏକ ମାମଲା ରୁଜୁ କରାଯାଇଥିବାବେଳେ ସନ୍ଧ୍ୟାରେ ସମସ୍ତ ଅଭିଯୁକ୍ତଙ୍କୁ କୋର୍ଟଚାଲଣ କରାଯାଇଛି । ଆଉ ଜାମିନ ନାମଞ୍ଜୁର କାରଣରୁ ସମସ୍ତ ଅଭିଯୁକ୍ତଙ୍କୁ ଜେଲ ହାଜତକୁ ପଠାଇ ଦିଆଯାଇଥିବା ଥାନା ଅଧିକାରୀ ସୁଦୀପ୍ତ କୁାମର ସାହୁ ସୂଚନା ଦେଇଛନ୍ତି । ଏହି ଚଢାଉରେ ଅନ୍ୟମାନଙ୍କ ମଧ୍ୟରେ ଏସଆଇ ନିରଞ୍ଜନ ଦାଶ, ସମୀର ବେହେରା, ଲିତାରାଣୀ ପରିଡାଙ୍କ ସମେତ ବହୁ ପୋଲିସ କର୍ମଚାରୀ ଅଂଶଗ୍ରହଣ କରିଥିଲେ ।