ଫୁଲବାଣୀ ତା ୨୮।୧୨ :ଫୁଲବାଣୀ ସହରରେ ଜନଗହଳି ଅଂଚଳରେ ସ୍ପଷ୍ଟ ଦିବାଲୋକରେ ଜଣେ ବ୍ୟକ୍ତି ଦୁଇ ଜଣଙ୍କ ଉପରକୁ ଏସିଡ୍ ଫୋପାଡି ଦେଇଛି। ଆଜି ଅପରାହ୍ନ ପ୍ରାୟ ଗୋଟାଏ ୩୦ ମିନିଟ୍ ସମୟରେ ସ୍ଥାନୀୟ ମାଷ୍ଟରପଡା ନିକଟସ୍ଥ ଶଶୀ ଦୋକାନ ଛକରେ ପ୍ରମୋଦ ସାହୁ ନାମକ ଜଣେ ଯୁବକ ସୂରଜ ମହାନ୍ତି ନାମକ ଆଉଜଣେ ଯୁବକଙ୍କ ଉପରକୁ ଅତର୍କିତ ଭାବରେ ଏସିଡ୍ ଫୋପାଡି ଥିଲେ ଫଳରେ ସୂରଜ ଗୁରୁତର ଭାବେ ଆହତ ହୋଇଛନ୍ତି। ତାଙ୍କର ଗୋଟିଏ ଆଖିରେ ଏସିଡ ପଡିବା ସହିତ ଶରୀରର ବିଭିନ୍ନ ଅଙ୍ଗରେ ମଧ୍ୟ ଏସିଡ଼ ପଡିଛି। ଖବର ପାଇ ସୂରଜଙ୍କ ବାପା ଚନ୍ଦ୍ର ମହାନ୍ତି ଘଟଣା ସ୍ଥଳରେ ପହଞ୍ଚି ଥିଲେ ତେବେ ଅଭିଯୁକ୍ତ ତାଙ୍କ ଏପରକୁ ମଧ୍ୟ ଏସିଡ୍ ଫୋପାଡି ଦେଇଥିଲେ। ତେବେ ସେ ସାମାନ୍ୟ ଆହତ ହୋଇଥିବା ଜଣାପଡ଼ିଛି। ପ୍ରମୋଦ ସ୍ଥାନୀୟ ପଟ୍ଟାବାଲି ସାହି ନିକଟରେ ଗୋଟିଏ ଦୋକାନ କରିଛନ୍ତି। ତେବେ କୌଣସି କାରଣରୁ ଉଭୟଙ୍କ ମଧ୍ୟରେ ପୂର୍ବ ଶତ୍ରୁତା କେନ୍ଦ୍ର କରି ଏହି ଘଟଣା ଘଟିଥିବା ନେଇ ପ୍ରତ୍ଯକ୍ଷଦର୍ଶୀ ମାନେ କହିଥିବା ଜଣାପଡିଛି। ତେବେ ସୂରଜ ଗୁରୁତର ଭାବେ ଆହତ ହୋଇଥିବା ଯୋଗୁଁ ଫୁଲବାଣୀ ସ୍ଥିତ ଜିଲ୍ଲା ମୁଖ୍ୟ ଚିକିତ୍ସାଳୟର ଡାକ୍ତର ତାଙ୍କୁ ବ୍ରହ୍ମପୁର କୁ ରେଫର କରିଛନ୍ତି। ଫୁଲବାଣୀ ପୋଲିସ୍ ଖବର ପାଇ ପ୍ରମୋଦ ଙ୍କୁ ଅଟକ ରଖି ପଚରାଉଚରା କରିବା ସହିତ ଘଟଣାର ତଦନ୍ତ କରୁଥିବା ଜଣାପଡିଛି। ଏହି ଭଳି ଏସିଡ୍ ମାଡ ଘଟଣା ସହରରେ ପ୍ରଥମ ଥର ଲାଗି ଘଟିଥିବା ବେଳେ ଏସିଡ୍ କେଉଁଠୁ ଆସିଲା ତାହା ତଦନ୍ତ ପରେ ହିଁ ସ୍ପଷ୍ଟ ହେବ।
