ଭଞ୍ଜନଗର : ଜଙ୍ଗଲ ନିଆଁରେ ଜଳିଗଲା ଡାଙ୍ଗୁଆପଲ୍ଲୀ ଗ୍ରାମ ହରିଜନ ସାହିର ୯ଟି ପରିବାରର ୧୪ ବଖରା ଘର । ମୁଜାଗଡ ବନାଞ୍ଚଳ ଇଲାକାର ଜଙ୍ଗଲ ପାଖ ଗାଆଁଭାବେ ପରିଚିତ ଡାଙ୍ଗୁଆପଲ୍ଲୀ ଗ୍ରାମରେ ଶନିବାର ଅତର୍କିତ ଜଙ୍ଗଲ ନିଆଁ ଉଡି ଆସି ଗ୍ରାମର ଖଳାରେ ଥିବା ପାଳଗଦାରେ ଲାଗିଥିଲା । ପାଳଗଦା ଲାଗିବାସହ ଏହି ନିଆଁ ଗ୍ରାମର ହରିଜନ ସାହିର ୯ଟି ପରିବାରର ୧୪ ବଖରା ଘରକୁ ଗ୍ରାସ କରିଛି । ଅଗ୍ନିକାଣ୍ଡରେ ଗ୍ରାମର ନିରଞ୍ଜନ ପ୍ରଧାନଙ୍କ ୨ ବଖରା ଘର ସମେତ କୁମର ନାଇକଙ୍କ ୨ ବଖରା, ଗହନ ନାଇକଙ୍କ ୩ ବଖରା, ଦିଲ୍ଲୀପ ନାଇକଙ୍କ ୨ ବଖରା ସହ ବିଦ୍ୟାଧର ନାଇକ, ରତନ ନାଇକ, ମନୋଜ ନାଇକ, ଶ୍ରୀକାନ୍ତ ନାଇକ, ଅଶୋକ କୁମାର ନାଇକଙ୍କ ଗୋଟିଏ ବଖରା ଲେଖାଏଁ ଘର ପୋଡିଜଳି ଛାରଖାର ହୋଇଯାଇଛି । ଅଗ୍ନିକାଣ୍ଡ ସଂପର୍କରେ ସୁଚନା ପାଇ ଭଞ୍ଜନଗର ଦମକଳ ବାହିନୀ ଘଟଣାସ୍ଥଳରେ ପହଞ୍ଚି ଦୀର୍ଘ ୪ଘଣ୍ଟା କାଳ କସରତ କରି ନିଆଁକୁ ଆୟତ୍ତ କରିଥିଲେ । ଦିନ ସାଢେ ଗୋଟାଏରୁ ନିଆଁ ଲାଗିଥିବାବେଳେ ଅପରାହ୍ନ ସାଢେ ୫ଟାରେ ଏହା କାବୁ ହୋଇଥିଲା । ତେବେ ସେତେବେଳକୁ ଏହି ୯ଟି ପରିବାରର ସବୁକିଛି ପୋଡିଜଳି ଛାରଖାର ହୋଇଯାଇଛି । ଏହି ଅଗ୍ନିକାଣ୍ଡରେ ପାଖାପାଖି ଲକ୍ଷାଧିକ ଟଙ୍କାର ସାମଗ୍ରୀ ପୋଡିଜଳି ଛାରଖାର ହୋଇଯାଇଛି । ସୁଚନାଯୋଗ୍ୟଯେ ଏବେ ଜଙ୍ଗଲ ନିଆଁରେ ସାରା ଭଞ୍ଜନଗର ଇଲାକା ଉତ୍ତପ୍ତ ହୋଇପଡିଛି । ବେଶ କିଛି ଦିନ ହେଲା ଏହି ଜଙ୍ଗଲ ନିଆଁ ଲୋକଙ୍କୁ ବେଶ କଲବଲ କଲାଣି ।
