ନାଗରିକମାନଙ୍କୁ ଆତଙ୍କିତ ହୋଇ ଏଲପିଜି ସିଲିଣ୍ଡରର ବୁକିଂ ନ କରିବାକୁ ଅନୁରୋଧ; ଏଲପିଜି ବିତରକ ଏଜେନ୍ସିଗୁଡ଼ିକରେ ଭିଡ଼ ରୋକିବା ନିମନ୍ତେ ବୁକିଂ ଲାଗି ଡିଜିଟାଲ ମାଧ୍ୟମ ବ୍ୟବହାର କରିବାକୁ ଦିଆଗଲା ପରାମର୍ଶ
ନିରବଚ୍ଛିନ୍ନ ଘରୋଇ ଏଲପିଜି ଯୋଗାଣ ସୁନିଶ୍ଚିତ କରିବା ସରକାରଙ୍କ ସର୍ବୋଚ୍ଚ ପ୍ରାଥମିକତା
- ଘରୋଇ ଏଲପିଜି ଉତ୍ପାଦନ ପ୍ରାୟ ୩୧% ବୃଦ୍ଧି ପାଇଛି
- ରାଜ୍ୟ/କେନ୍ଦ୍ରଶାସିତ ପ୍ରଦେଶ ସରକାର ଅତ୍ୟାବଶ୍ୟକ ସାମଗ୍ରୀର ମହଜୁଦଖୋରୀ ଏବଂ କଳାବଜାର ରୋକିବା ପାଇଁ ପଦକ୍ଷେପ ନେଉଛନ୍ତି
- ଦୁଇଟି ଭାରତୀୟ ଏଲପିଜି ଜାହଜ ହର୍ମୁଜ୍ ପ୍ରଣାଳୀ ଅତିକ୍ରମ କରି ସାରିଛନ୍ତି; ଏହି ଦୁଇଟି ଜାହାଜ ୧୬-୧୭ ମାର୍ଚ୍ଚରେ ମୁନ୍ଦ୍ରା ଏବଂ କାଣ୍ଡଲାରେ ପହଞ୍ଚିବା ପାଇଁ ସ୍ଥିର ହୋଇଛି
- ସାମୁଦ୍ରିକ ବାଣିଜ୍ୟ ଉପରେ ପ୍ରଭାବକୁ ହ୍ରାସ କରିବା ପାଇଁ ସରକାର ବନ୍ଦର, ଜାହାଜ ଚଳାଚଳ ଏବଂ ଲଜିଷ୍ଟିକ୍ସ ଅଂଶୀଦାରମାନଙ୍କ ସହିତ କାମ କରୁଛନ୍ତି
- ନାଗରିକମାନଙ୍କୁ ମିଥ୍ୟା ସୂଚନା ପ୍ରତି ସତର୍କ ରହିବାକୁ ଏବଂ କେବଳ ପ୍ରାମାଣିକ ଉତ୍ସ ଏବଂ ସରକାରୀ ହ୍ୟାଣ୍ଡେଲ ଉପରେ ନିର୍ଭର କରିବାକୁ ପରାମର୍ଶ ଦିଆଯାଇଛି
- ଆଗାମୀ ଖରିଫ ୨୦୨୬ ପାଇଁ ପର୍ଯ୍ୟାପ୍ତ ପରିମାଣରୁ ଅଧିକ ସାର ଷ୍ଟକ୍ ଉପଲବ୍ଧ
- ପଶ୍ଚିମ ଏସିଆ ପରିସ୍ଥିତି ଉପରେ ଏକ ସାଧାରଣ ସ୍ଥିତି ଗ୍ରହଣ କରିବା ଲାଗି ବ୍ରିକ୍ସ ମଧ୍ୟରେ ଆଲୋଚନା ଚାଲିଛି
ପଶ୍ଚିମ ଏସିଆର ସାମ୍ପ୍ରତିକ ଘଟଣାକ୍ରମରୁ ସୃଷ୍ଟି ହୋଇଥିବା ପରିସ୍ଥିତି ସମ୍ପର୍କରେ ସଦ୍ୟତମ ସୂଚନା ପ୍ରଦାନ କରିବା ପାଇଁ ଭାରତ ସରକାରଙ୍କ ଦ୍ୱାରା ଆଜି ନୂଆଦିଲ୍ଲୀର ନେସନାଲ ମିଡିଆ ସେଣ୍ଟରରେ ଚତୁର୍ଥ ଆନ୍ତଃମନ୍ତ୍ରୀସ୍ତରୀୟ ସମ୍ମିଳନୀ ଅନୁଷ୍ଠିତ ହୋଇଯାଇଛି। ଗତ ୩ ଦିନ ଭଳି ଆଜି ମଧ୍ୟ ପେଟ୍ରୋଲିୟମ ଓ ପ୍ରାକୃତିକ ବାଷ୍ପ ମନ୍ତ୍ରଣାଳୟ, ବୈଦେଶିକ ବ୍ୟାପାର ମନ୍ତ୍ରଣାଳୟ, ବନ୍ଦର, ଜାହାଜ ଚଳାଚଳ ଓ ଜଳପଥ ମନ୍ତ୍ରଣାଳୟ ଏବଂ ସୂଚନା ଓ ପ୍ରସାରଣ ମନ୍ତ୍ରଣାଳୟର ବରିଷ୍ଠ ଅଧିକାରୀମାନେ ଗଣମାଧ୍ୟମକୁ ସବିଶେଷ ସୂଚନା ଦେଇଛନ୍ତି। ବିଶେଷ କରି ଇନ୍ଧନ ଯୋଗାଣ, ସାମୁଦ୍ରିକ କାର୍ଯ୍ୟକଳାପ, ଯୁଦ୍ଧଗ୍ରସ୍ତ କ୍ଷେତ୍ରରେ ଭାରତୀୟ ନାଗରିକଙ୍କ ସୁରକ୍ଷା ଓ କଲ୍ୟାଣ ସମ୍ପର୍କରେ ବିସ୍ତୃତ ସୂଚନା ଦିଆଯାଇଥିଲା।
ପ୍ରାକୃତିକ ବାଷ୍ପ
ପ୍ରାଥମିକତା କ୍ଷେତ୍ରଗୁଡ଼ିକୁ ସୁରକ୍ଷିତ ଯୋଗାଣ ଜାରି ରହିଛି । ଏସବୁ କ୍ଷେତ୍ର ପାଇଁ କୌଣସି କଟକଣା ବିନା ପିଏନଜି ଏବଂ ସିଏନଜିର ଶତପ୍ରତିଶତ ଯୋଗାଣ କରାଯାଉଛି। ତେଣୁ, ଭୟଭୀତ ହେବାର କୌଣସି ଆବଶ୍ୟକତା ନାହିଁ। ଶିଳ୍ପ ଓ ବାଣିଜ୍ୟିକ ଗ୍ରାହକମାନଙ୍କୁ ଯୋଗାଣ ୮୦% ନିୟନ୍ତ୍ରିତ କରାଯାଉଛି।
ଗେଲ୍ ଦେଶର ପ୍ରମୁଖ ସହରାଞ୍ଚଳ କେନ୍ଦ୍ର / ସହର ଯଥା ଦିଲ୍ଲୀ, ମୁମ୍ବାଇ, ଅହମ୍ମଦାବାଦ, ହାଇଦ୍ରାବାଦ, ଚେନ୍ନାଇ, ବାଙ୍ଗାଲୋର, ଲକ୍ଷ୍ନୌ, କାନପୁର, ଜୟପୁର ଇତ୍ୟାଦିରେ ଅନୁମୋଦିତ ସିଟି ଗ୍ୟାସ୍ ବିତରଣ (ସିଜିଡି) ସଂସ୍ଥାଗୁଡ଼ିକ ସହିତ ବୈଠକ କରିଛି । ହୋଟେଲ ଏବଂ ରେସ୍ତୋରାଁ ପାଇଁ ନୂତନ ବାଣିଜ୍ୟିକ ପିଏନଜି ସଂଯୋଗକୁ ତ୍ୱରାନ୍ୱିତ ଏବଂ ପ୍ରୋତ୍ସାହିତ କରିବା ପାଇଁ ସେମାନଙ୍କୁ ପରାମର୍ଶ ଦିଆଯାଇଛି । ଏହାଦ୍ଵାରା ଏଲପିଜି ଯୋଗାଣ ଉପରେ ଚାପ ହ୍ରାସ କରାଯାଇପାରିବ।
ଏଲପିଜି
- ପ୍ରଚଳିତ ଭୂରାଜନୈତିକ ପରିସ୍ଥିତିକୁ ଦୃଷ୍ଟିରେ ରଖି ଏଲପିଜି ଯୋଗାଣ ଏବେ ବି ଚିନ୍ତାର ବିଷୟ ରହିଛି।
- ଏଲପିଜି ବିତରକମାନଙ୍କ ସ୍ତରରେ କୌଣସି ଅଭାବ ଦେଖିବାକୁ ମିଳିନାହିଁ।
- ଆତଙ୍କିତ ହୋଇ କ୍ରୟ ଯୋଗୁଁ ଏଲପିଜି ବୁକିଂ ସଂଖ୍ୟାରେ ବୃଦ୍ଧି ଘଟିଛି। ଗତକାଲି ଦୈନିକ ବୁକିଂ ହାରାହାରି ୫୫.୭ ଲକ୍ଷରୁ ବୃଦ୍ଧି ପାଇ ୮୮.୮ ଲକ୍ଷ ହୋଇଛି।
- ପ୍ରାଥମିକତା ଆଧାରରେ ଉପଭୋକ୍ତାଙ୍କୁ ବାଣିଜ୍ୟିକ ସିଲିଣ୍ଡର ବିତରଣ ପାଇଁ ରାଜ୍ୟ ସରକାରଙ୍କୁ ଦାୟିତ୍ୱ ଦିଆଯାଇଛି। ୨୯ଟି ରାଜ୍ୟ/କେନ୍ଦ୍ରଶାସିତ ଅଞ୍ଚଳରେ ଗ୍ରାହକଙ୍କ ପାଇଁ ବାଣିଜ୍ୟିକ ଏଲପିଜି ଉପଲବ୍ଧ କରାଯାଇଛି।
- ବର୍ତ୍ତମାନ ସିଲିଣ୍ଡରର ଅନଲାଇନ୍ ବୁକିଂ ୮୪% ରହିଛି ।
ରାଜ୍ୟ ସରକାରଙ୍କ ଦ୍ୱାରା ଆୟୋଜିତ ବୈଠକ
- ପେଟ୍ରୋଲ, ଡିଜେଲ ଏବଂ ଏଲପିଜି ସମେତ ଅତ୍ୟାବଶ୍ୟକ ସାମଗ୍ରୀର ଯୋଗାଣ ସ୍ଥିତି ତଦାରଖ କରିବାରେ ରାଜ୍ୟ/କେନ୍ଦ୍ରଶାସିତ ପ୍ରଦେଶ ସରକାରଙ୍କ ଭୂମିକା ଅତ୍ୟନ୍ତ ଗୁରୁତ୍ୱପୂର୍ଣ୍ଣ।
- ହରିୟାଣା ଏବଂ ଗୋଆର ମାନ୍ୟବର ମୁଖ୍ୟମନ୍ତ୍ରୀମାନେ ରାଜ୍ୟରେ ଏଲପିଜିର ଚାହିଦା ଓ ଯୋଗାଣ ସ୍ଥିତି ସମୀକ୍ଷା କରିବା ପାଇଁ ବରିଷ୍ଠ ସରକାରୀ ଅଧିକାରୀ ଏବଂ ତୈଳ କମ୍ପାନୀଗୁଡ଼ିକର ଉଚ୍ଚ ପଦାଧିକାରୀଙ୍କ ସହିତ ବୈଠକ କରିଛନ୍ତି।
- ତେଲଙ୍ଗାନାର ମୁଖ୍ୟ ସଚିବ ତୈଳ ବିପଣନ କମ୍ପାନୀଗୁଡ଼ିକର ପ୍ରତିନିଧି ଏବଂ ନାଗରିକ ଯୋଗାଣ ବିଭାଗର ଅଧିକାରୀଙ୍କ ସହିତ ଗ୍ରାହକମାନଙ୍କୁ ଏଲପିଜି ଷ୍ଟକ୍ ସ୍ଥିତି, ଯୋଗାଣ ଏବଂ ବଣ୍ଟନ ସମୀକ୍ଷା କରିଛନ୍ତି।
- ତୈଳ କମ୍ପାନୀଗୁଡ଼ିକ ଆନ୍ଧ୍ର ପ୍ରଦେଶର ନାଗରିକ ଯୋଗାଣ କମିଶନରଙ୍କ ସହିତ ମଧ୍ୟ ବୈଠକ କରିଥିଲେ ଏବଂ ତାଙ୍କୁ ଏଲପିଜି, ପିଡିଏସ୍ ଏସକେଓ ଓ ବାଣିଜ୍ୟିକ ଏଲପିଜି ସହିତ ସମସ୍ତ ବିକାଶ ବିଷୟରେ ଅବଗତ କରାଇଥିଲେ।
- ପରିସ୍ଥିତି ତଦାରଖ କରିବା ପାଇଁ ୧୭ଟି ରାଜ୍ୟ/କେନ୍ଦ୍ରଶାସିତ ପ୍ରଦେଶରେ ନିୟନ୍ତ୍ରଣ କକ୍ଷ ସ୍ଥାପନ କରାଯାଇଛି ଏବଂ ଅନେକ ରାଜ୍ୟ/କେନ୍ଦ୍ରଶାସିତ ପ୍ରଦେଶ ଗଣମାଧ୍ୟମକୁ ସୂଚନା ମଧ୍ୟ ପ୍ରଦାନ କରୁଛନ୍ତି।
ପ୍ରବର୍ତ୍ତନ କାର୍ଯ୍ୟାନୁଷ୍ଠାନ
- ପେଟ୍ରୋଲ, ଡିଜେଲ ଏବଂ ଏଲପିଜି ସମେତ ଅତ୍ୟାବଶ୍ୟକ ସାମଗ୍ରୀର ଜମାଖୋରୀ ଏବଂ କଳାବଜାରୀ ରୋକିବାରେ ରାଜ୍ୟ / କେନ୍ଦ୍ରଶାସିତ ପ୍ରଦେଶଗୁଡ଼ିକର ସରକାର ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରୁଛନ୍ତି।
- ମହାରାଷ୍ଟ୍ର ଏବଂ ରାଜସ୍ଥାନରେ, ଖାଦ୍ୟ ଯୋଗାଣ ଓ ସାଧାରଣ ବଣ୍ଟନ ବିଭାଗ ଏବଂ ତୈଳ ବିପଣନ କମ୍ପାନୀଗୁଡ଼ିକର ମିଳିତ ଯାଞ୍ଚ ଦଳ ଅନେକ ସ୍ଥାନରେ ଚଢାଉ କରିଥିଲେ। ରାଷ୍ଟ୍ରାୟତ୍ତ ତୈଳ କମ୍ପାନୀଗୁଡ଼ିକ ଗତକାଲି ପ୍ରାୟ ୧୩୦୦ ଏଲପିଜି ବିତରକମାନଙ୍କରେ ଠିକଣାରେ ଯାଞ୍ଚ କରିଥିଲେ।
- ଉତ୍ତର ପ୍ରଦେଶରେ, ପ୍ରବର୍ତ୍ତନ ଦଳଗୁଡ଼ିକ ୧,୪୮୩ ସ୍ଥାନ ଯାଞ୍ଚ କରିଛନ୍ତି; ୨୪ଟି ଏଫଆଇଆର ରୁଜୁ ହୋଇଛି (ଏଲପିଜି ବିତରକଙ୍କ ବିରୁଦ୍ଧରେ ୪ ଏବଂ ବ୍ୟକ୍ତିବିଶେଷଙ୍କ ବିରୁଦ୍ଧରେ ୨୦), ୬ ଜଣଙ୍କୁ ଗିରଫ କରାଯାଇଛି ଏବଂ ୧୯ ଜଣଙ୍କ ବିରୁଦ୍ଧରେ ମାମଲା ରୁଜୁ କରାଯାଇଛି।
- ଏଲପିଜିର ମହଜୁଦକାରୀ ଏବଂ କଳାବଜାର ଯାଞ୍ଚ କରିବା ପାଇଁ ଆନ୍ଧ୍ର ପ୍ରଦେଶ (ତିରୁପତି), ବିହାର, ଓଡିଶା ଏବଂ କର୍ଣ୍ଣାଟକ ସମେତ ଅନେକ ରାଜ୍ୟରେ ମଧ୍ୟ ଚଢାଉ କରାଯାଇଛି।
ଅନ୍ୟାନ୍ୟ ସରକାରୀ ପଦକ୍ଷେପ
- ସରକାରଙ୍କ ସର୍ବୋଚ୍ଚ ପ୍ରାଥମିକତା ହେଉଛି ଘରୋଇ ଏବଂ ପ୍ରାଥମିକ କ୍ଷେତ୍ର ଯେପରିକି ହସ୍ପିଟାଲ ଏବଂ ଶିକ୍ଷାନୁଷ୍ଠାନ ପାଇଁ ନିରବଚ୍ଛିନ୍ନ ଘରୋଇ ଏଲପିଜି ଯୋଗାଣ ସୁନିଶ୍ଚିତ କରିବା। ରିଫାଇନାରୀରୁ ଏଲପିଜି ଉତ୍ପାଦନ ମଧ୍ୟ ପ୍ରାୟ ୩୧% ବୃଦ୍ଧି ପାଇଛି।
- ୧୩.୦୩.୨୦୨୬ ତାରିଖର ସିଏକ୍ୟୁଏମ ଅର୍ଡର ଏନସିଆରରେ ଶିଳ୍ପ, ହୋଟେଲ ଏବଂ ରେସ୍ତୋରାଁ ଦ୍ୱାରା ଏକ ମାସ ପାଇଁ ପ୍ରାକୃତିକ ଗ୍ୟାସ ବଦଳରେ ବାୟୋମାସ/ଆରଡିଏଫ ପେଲେଟ୍ ବ୍ୟବହାର କରିବାକୁ ଅନୁମତି ଦେଇଛି; ଯେଉଁଠାରେ ବିକଳ୍ପ ଉପଲବ୍ଧ ନାହିଁ ସେଠାରେ କୋଇଲା କିମ୍ବା କିରୋସିନ ବ୍ୟବହାର କରାଯାଇପାରିବ। ଯୁକ୍ତିସଂଗତ ପଦକ୍ଷେପ କ୍ରମେ ଏଲପିଜି ବୁକିଂ ବ୍ୟବଧାନ ବୃଦ୍ଧି କରିବା (ସହରାଞ୍ଚଳରେ ୨୫ ଦିନ ଏବଂ ଗ୍ରାମାଞ୍ଚଳରେ ୪୫ ଦିନ ପର୍ଯ୍ୟନ୍ତ) ଅନ୍ତର୍ଭୁକ୍ତ। ରାଜ୍ୟ/କେନ୍ଦ୍ରଶାସିତ ପ୍ରଦେଶଗୁଡ଼ିକୁ ଅତିରିକ୍ତ ୪୮ ହଜାର କିଲୋଲିଟର କିରୋସିନ ଆବଣ୍ଟିତ କରାଯାଇଛି ଏବଂ ଆତିଥ୍ୟ କ୍ଷେତ୍ରରେ ଏଲପିଜି ଉପରେ ଚାପ ହ୍ରାସ କରିବା ପାଇଁ କିରୋସିନ ଏବଂ କୋଇଲା ଭଳି ବିକଳ୍ପ ଇନ୍ଧନ ବ୍ୟବହାର କରାଯାଉଛି।
- ପିଏସୟୁ ତୈଳ କମ୍ପାନୀଗୁଡ଼ିକୁ ଡିଜିଟାଲ୍ ଏଲପିଜି ବୁକିଂକୁ ପ୍ରୋତ୍ସାହିତ କରିବା, ଆତଙ୍କିତ ହୋଇ ବୁକିଂକୁ ନିରୁତ୍ସାହିତ କରିବା ଏବଂ ଡିଲରସିପ୍ଗୁଡ଼ିକୁ ଅନାବଶ୍ୟକ ଭାବେ ନଯିବାକୁ କୁହାଯାଇଛି।
ସାର୍ବଜନୀନ ପରାମର୍ଶ-
- ନାଗରିକମାନଙ୍କୁ ଭୟଭୀତ ନ ହେବାକୁ ପରାମର୍ଶ ଦିଆଯାଇଛି। ସରକାର ପରିବାର ଏବଂ ଅତ୍ୟାବଶ୍ୟକ କ୍ଷେତ୍ର ପାଇଁ ଏଲପିଜି ଉପଲବ୍ଧତା ବଜାୟ ରଖିବା ପାଇଁ ପ୍ରତିବଦ୍ଧ।
- ଆଇଭିଆରଏସ୍ କଲ୍, ଏସଏମଏସ୍, ହ୍ୱାଟ୍ସଆପ୍ ଏବଂ ତୈଳ ବିପଣନ କମ୍ପାନୀଗୁଡ଼ିକର ମୋବାଇଲ୍ ଆପ୍ ଭଳି ଡିଜିଟାଲ୍ ପ୍ଲାଟଫର୍ମ ମାଧ୍ୟମରେ ଏଲପିଜି ସିଲିଣ୍ଡରଗୁଡ଼ିକ ସହଜରେ ବୁକ୍ କରାଯାଇପାରିବ। ଗ୍ରାହକମାନଙ୍କୁ ଘରୁ ସିଲିଣ୍ଡର ବୁକ୍ କରିବାକୁ ଏବଂ ଅଯଥାରେ ଏଲପିଜି ବିତରକମାନଙ୍କ ପାଖକୁ ଯିବାରୁ ବିରତ ରହିବାକୁ ପରାମର୍ଶ ଦିଆଯାଇଛି।
- ନାଗରିକମାନଙ୍କୁ ଆତଙ୍କିତ ବୁକିଂ ଏଡାଇବା ଏବଂ ଏଲପିଜି ଏଜେନ୍ସିଗୁଡ଼ିକରେ ଭିଡ଼ ରୋକିବା ପାଇଁ ବୁକିଂ ନିମନ୍ତେ ଡିଜିଟାଲ୍ ମୋଡ୍ ବ୍ୟବହାର କରିବାକୁ ଅନୁରୋଧ କରାଯାଇଛି।
- ଗ୍ରାହକମାନେ ଯେଉଁଠାରେ ଉପଲବ୍ଧ ରହିଛି ସେଠାରେ ପିଏନଜି ଭଳି ବିକଳ୍ପ ଇନ୍ଧନ ବାଛିପାରିବେ, ଏବଂ ଏକ ଦଶନ୍ଧି ଧରି ନିର୍ଭରଯୋଗ୍ୟ ଭାବରେ ଏଲପିଜି ଯୋଗାଣ କରୁଥିବା ତୈଳ ବିପଣନ କମ୍ପାନୀଗୁଡ଼ିକୁ ବିଶ୍ୱାସ କରିବାକୁ ଅନୁରୋଧ କରାଯାଇଛି।
- ଗଣମାଧ୍ୟମକୁ ସଠିକ୍ ସୂଚନା ପ୍ରସାରଣ କରିବାକୁ ଏବଂ ସରକାରୀ ସୂତ୍ର ଉପରେ ନିର୍ଭର କରିବାକୁ ଅନୁରୋଧ କରାଯାଇଛି। ପେଟ୍ରୋଲିୟମ ଓ ପ୍ରାକୃତିକ ବାଷ୍ପ ମନ୍ତ୍ରଣାଳୟ ଏବଂ ରାଷ୍ଟ୍ରାୟତ୍ତ ତୈଳ ବିପଣନ କମ୍ପାନୀଗୁଡ଼ିକର ସୋସିଆଲ ମିଡିଆ ପୃଷ୍ଠାଗୁଡ଼ିକରେ ବିସ୍ତୃତ ଅପଡେଟ୍ ଉପଲବ୍ଧ।
ସାମୁଦ୍ରିକ ସୁରକ୍ଷା ଏବଂ ଜାହାଜ ଚଳାଚଳ
ବନ୍ଦର, ଜାହାଜ ଏବଂ ଜଳପଥ ମନ୍ତ୍ରଣାଳୟ ପାରସ୍ୟ ଉପସାଗର ଅଞ୍ଚଳରେ ପ୍ରଚଳିତ ସାମୁଦ୍ରିକ ପରିସ୍ଥିତି ଏବଂ ଏହି ଅଞ୍ଚଳରେ କାର୍ଯ୍ୟରତ ଭାରତୀୟ ନାବିକ ଓ ଜାହାଜଗୁଡ଼ିକର ସୁରକ୍ଷା ସୁନିଶ୍ଚିତ କରିବା ପାଇଁ ନିଆଯାଉଥିବା ପଦକ୍ଷେପ ବିଷୟରେ ଗଣମାଧ୍ୟମକୁ ସୂଚନା ଦେଇଛି। ଏଥିରେ କୁହାଯାଇଛି:
- ଗତ ୨୪ ଘଣ୍ଟା ମଧ୍ୟରେ ଭାରତୀୟ ନାବିକଙ୍କ ସହିତ ଜଡିତ କୌଣସି ନୂତନ ଜାହାଜରେ ଅଘଟଣ ଘଟିନାହିଁ। ଏହି ଅଞ୍ଚଳର ସମସ୍ତ ଭାରତୀୟ ନାବିକ ସୁରକ୍ଷିତ ଅଛନ୍ତି।
- ଗତକାଲି ପର୍ଯ୍ୟନ୍ତ ପାରସ୍ୟ ଉପସାଗର କ୍ଷେତ୍ର (ହର୍ମୁଜ୍ ପ୍ରଣାଳୀର ପଶ୍ଚିମରେ) ରେ ଥିବା ୨୪ ଟି ଜାହାଜ ମଧ୍ୟରୁ, ଦୁଇଟି ଭାରତୀୟ ଏଲପିଜି ବାହକ ଜାହାଜ – ଶିବାଲିକ୍ ଏବଂ ନନ୍ଦ ଦେବୀ – ପ୍ରାୟ ୯୨,୭୧୨ ମେଟ୍ରିକ୍ ଟନ୍ ଏଲପିଜି ନେଇ ଆଜି ସକାଳେ ହରମୁଜ୍ ପ୍ରଣାଳୀ ପାର କରିଥିଲେ। ସେମାନେ ଯଥାକ୍ରମେ ୧୬ ଏବଂ ୧୭ ମାର୍ଚ୍ଚରେ ମୁନ୍ଦ୍ରା ବନ୍ଦର ଏବଂ କାଣ୍ଡଲା ବନ୍ଦରରେ ପହଞ୍ଚିବାର କାର୍ଯ୍ୟସୂଚୀ ରହିଛି।
- ବର୍ତ୍ତମାନ ପାରସ୍ୟ ଉପସାଗର କ୍ଷେତ୍ରରେ ୬୧୧ ନାବିକଙ୍କ ସହିତ ୨୨ ଟି ଭାରତୀୟ ଜାହାଜ ଅଛି। ଜାହାଜ ଚଳାଚଳ ମହାନିର୍ଦ୍ଦେଶାଳୟ ଜାହାଜ ମାଲିକ, ଆରପିଏସଏଲ ଏଜେନ୍ସି ଏବଂ ଭାରତୀୟ ମିଶନ ସହିତ ପରିସ୍ଥିତି ଉପରେ କଡ଼ା ନଜର ରଖିଛି।
- ଗତ ୨୪ ଘଣ୍ଟା ମଧ୍ୟରେ, ଜାହାଜ ଚଳାଚଳ ମହାନିର୍ଦ୍ଦେଶାଳୟ କଣ୍ଟ୍ରୋଲ ରୁମ୍ ନାବିକ, ପରିବାର ଏବଂ ସାମୁଦ୍ରିକ ଅଂଶୀଦାରଙ୍କ ଠାରୁ ପ୍ରାୟ ୩୧୨ ଟି କଲ୍ ଏବଂ ୪୬୦ ଟି ଇମେଲ୍ ପାଇଛି। ଗତ ୧୫ ଦିନ ମଧ୍ୟରେ, ଏହା ୨,୭୩୭ ଟି କଲ୍ ଏବଂ ୪,୯୦୦ ରୁ ଅଧିକ ଇମେଲ୍ ପାଇଛି ଏବଂ ଆବଶ୍ୟକ ପଦକ୍ଷେପ ନେଇଛି।
- ଜାହାଜ ଚଳାଚଳ ମହାନିର୍ଦ୍ଦେଶାଳୟରେ ଏକ କ୍ୱିକ୍ ରେସପନ୍ସ ଟିମ୍ ୨୪ ଘଣ୍ଟିଆ କାର୍ଯ୍ୟ କରୁଛି ଏବଂ ଜାହାଜ ଚଳାଚଳ କମ୍ପାନୀ, ଦୂତାବାସ, ପେଟ୍ରୋଲିୟମ ମନ୍ତ୍ରଣାଳୟର ତାଲିକାଭୁକ୍ତ ବୀମାକାରୀଙ୍କ ସହ ସମନ୍ୱୟ ରଖିଛି। ପ୍ରାୟ ୧୩୦୦ ନାବିକ ଏବଂ ସେମାନଙ୍କ ପରିବାରଙ୍କ ଚିନ୍ତାର ସମାଧାନ କରାଯାଇଛି।
- ଗତ ୨୪ ଘଣ୍ଟା ମଧ୍ୟରେ, ଉପସାଗରର ବିମାନବନ୍ଦର ଏବଂ ଆଞ୍ଚଳିକ ସ୍ଥାନରୁ ୩୦ ନାବିକଙ୍କୁ ପ୍ରତ୍ୟର୍ପଣ କରାଯାଇଛି, ଯାହା ମୋଟ ପ୍ରତ୍ୟର୍ପଣ ସଂଖ୍ୟା ୨୫୩ରେ ପହଞ୍ଚାଇଛି ।
- ସରକାର ସାମୁଦ୍ରିକ ବାଣିଜ୍ୟ ଉପରେ କାର୍ଯ୍ୟକ୍ଷମ ପ୍ରଭାବକୁ କମ କରିବା ପାଇଁ ବନ୍ଦର, ଜାହାଜ ଲାଇନ ଏବଂ ଲଜିଷ୍ଟିକ୍ସ ଅଂଶୀଦାରମାନଙ୍କ ସହିତ କାମ କରୁଛନ୍ତି।
- ବନ୍ଦରଗୁଡ଼ିକୁ ଆଙ୍କରେଜ୍, ବର୍ଥ ଭଡ଼ା ଏବଂ ଷ୍ଟୋରେଜ୍ ଚାର୍ଜରେ ରିହାତି ଭଳି ଆଶ୍ୱସ୍ତିକର ପଦକ୍ଷେପ ପ୍ରଦାନ କରିବାକୁ ପରାମର୍ଶ ଦିଆଯାଇଛି। କାମରାଜର ବନ୍ଦରରେ ୨୫,୦୦୦ ମେଟ୍ରିକ୍ ଟନ୍ ବାରାଇଟ୍ କାର୍ଗୋ ସମେତ କିଛି ନିର୍ଦ୍ଦିଷ୍ଟ କ୍ଷେତ୍ରରେ ଲିଜ୍ ସମ୍ପ୍ରସାରଣ ମଧ୍ୟ ମଞ୍ଜୁର କରାଯାଇଛି।
- ଇନ୍ଧନ ଯୋଗାଣ ସୁନିଶ୍ଚିତ କରିବା ପାଇଁ ପ୍ରମୁଖ ବନ୍ଦରଗୁଡ଼ିକ ଏଲପିଜି ଜାହାଜଗୁଡ଼ିକୁ ପ୍ରାଥମିକତା ବର୍ଥିଂ ଦେଉଛନ୍ତି। ଗତ କିଛି ଦିନ ମଧ୍ୟରେ, ପ୍ରମୁଖ ବନ୍ଦରଗୁଡ଼ିକରେ ଛଅଟି ଏଲପିଜି ଜାହାଜ ଗ୍ରହଣ କରାଯାଇଛି।
- ବନ୍ଦରଗୁଡ଼ିକ ଉପସାଗରକୁ ଯାଉଥିବା ଭାରପ୍ରାପ୍ତ ଜାହାଜ ପାଇଁ ସୁରକ୍ଷିତ ଆଙ୍କରେଜ୍ କ୍ଷେତ୍ର ମଧ୍ୟ ପ୍ରଦାନ କରୁଛନ୍ତି ଯେଉଁଗୁଡ଼ିକ ବର୍ତ୍ତମାନ ପରିବହନ କରିବାକୁ ଅକ୍ଷମ।
- ଭାରତୀୟ ନାବିକମାନଙ୍କ ସୁରକ୍ଷା ଏବଂ କଲ୍ୟାଣ ସୁନିଶ୍ଚିତ କରିବା ପାଇଁ ବିଦେଶ ମନ୍ତ୍ରଣାଳୟ, ଭାରତୀୟ ମିଶନ, ଜାହାଜ କମ୍ପାନୀ ଏବଂ ଅନ୍ୟାନ୍ୟ ସାମୁଦ୍ରିକ ଅଂଶୀଦାରମାନଙ୍କ ସହିତ ସମନ୍ୱୟ ରଖି ଜାହାଜ ମନ୍ତ୍ରଣାଳୟ ପରିସ୍ଥିତି ଉପରେ କଡ଼ା ନଜର ରଖିଛି।
ପଶ୍ଚିମ ଏସିଆରେ ଭାରତୀୟ ନାଗରିକଙ୍କ ସୁରକ୍ଷା
ପଶ୍ଚିମ ଏସିଆ ଅଞ୍ଚଳରେ ରହୁଥିବା କିମ୍ବା ଯାତ୍ରା କରୁଥିବା ଭାରତୀୟ ନାଗରିକଙ୍କ ସୁରକ୍ଷା ଏବଂ କଲ୍ୟାଣ ସମ୍ପର୍କରେ ବୈଦେଶିକ ମନ୍ତ୍ରଣାଳୟ ଏକ ସୂଚନା ପ୍ରଦାନ କରିଛି ଏବଂ ଭାରତୀୟ ପ୍ରବାସୀଙ୍କ ସହିତ ଭାରତୀୟ ଦୂତାବାସଗୁଡ଼ିକର ନିରନ୍ତର ସମ୍ପର୍କକୁ ଉଲ୍ଲେଖ କରିଛି। ଏଥିରେ କୁହାଯାଇଛି:
- ସଂଘର୍ଷ ଆରମ୍ଭ ହେବା ପରଠାରୁ, ଭାରତ ଆଲୋଚନା ମାଧ୍ୟମରେ ଉତ୍ତେଜନା ହ୍ରାସ ଏବଂ ସମସ୍ୟାର ସମାଧାନ ପାଇଁ ନିରନ୍ତର ଆହ୍ୱାନ କରିଆସିଛି। ଭାରତ ସାମଗ୍ରୀ ଏବଂ ଇନ୍ଧନର ଅବାଧ ପରିବହନ ସୁନିଶ୍ଚିତ କରିବା ଏବଂ ଶକ୍ତି ସୁବିଧା ସମେତ ନାଗରିକ ଭିତ୍ତିଭୂମି ଉପରେ ଆକ୍ରମଣକୁ ଏଡାଇବା ଉପରେ ଗୁରୁତ୍ୱାରୋପ କରିଛି।
- ଭାରତ ରାଜନୈତିକ ଏବଂ କୂଟନୈତିକ ସ୍ତରରେ ଜିସିସି ଦେଶ, ଇରାନ, ଯୁକ୍ତରାଷ୍ଟ୍ର ଏବଂ ଇସ୍ରାଏଲ ସମେତ ପ୍ରମୁଖ ଅଂଶୀଦାରମାନଙ୍କ ସହିତ ଘନିଷ୍ଠ ଯୋଗାଯୋଗରେ ରହିଛି। ପ୍ରଧାନମନ୍ତ୍ରୀ, ବୈଦେଶିକ ବ୍ୟାପାର ମନ୍ତ୍ରୀ ଏବଂ ଭାରତୀୟ ଦୂତାବାସଗୁଡ଼ିକ ଭାରତର ପ୍ରାଥମିକତା, ବିଶେଷକରି ଇନ୍ଧନ ସୁରକ୍ଷା ଏବଂ ସୁରକ୍ଷିତ ସାମୁଦ୍ରିକ ପରିବହନକୁ ଗୁରୁତ୍ୱାରୋପ କରିବା ପାଇଁ ପ୍ରତିପକ୍ଷମାନଙ୍କ ସହିତ ସକ୍ରିୟ ଭାବରେ ଯୋଗାଯୋଗ କରୁଛନ୍ତି।
- ଶିବାଲିକ୍ ଓ ନନ୍ଦାଦେବୀ ବ୍ୟତୀତ ଅନ୍ୟ ଭାରତ ଅଭିମୁଖୀ ଜାହାଜ ଉପସାଗର ଅଞ୍ଚଳରେ ପ୍ରସ୍ତୁତ ଅଛନ୍ତି ଏବଂ ନିରାପଦ ଓ ଅବିଚ୍ଛିନ୍ନ ପଥ ସୁନିଶ୍ଚିତ କରିବା ପାଇଁ ପ୍ରୟାସ ଜାରି ରହିଛି।
- ସଂଘର୍ଷ କାରଣରୁ ଉତ୍ପନ୍ନ ବିମାନ ଚଳାଚଳ ପ୍ରତିବନ୍ଧକ ଯୋଗୁଁ, ଇରାନୀ କର୍ତ୍ତୃପକ୍ଷ ଫସି ରହିଥିବା ଇରାନୀ ନାଗରିକମାନଙ୍କୁ ସ୍ୱଦେଶ ଫେରାଇ ଆଣିବା ପାଇଁ ଗତକାଲି ରାତିରେ କୋଚିରୁ ଏକ ଚାର୍ଟର୍ଡ ବିମାନ ବ୍ୟବସ୍ଥା କରିଥିଲେ।
- ଆଗାମୀ ଖରିଫ 2026 ଋତୁ ପାଇଁ ଭାରତରେ ବର୍ତ୍ତମାନ ପର୍ଯ୍ୟାପ୍ତ ପରିମାଣରୁ ଅଧିକ ସାର ମହଜୁଦ ଅଛି। ଗତ ବର୍ଷ ତୁଳନାରେ ୟୁରିଆ ମହଜୁଦ ଅଛି; ଡିଏପି ମହଜୁଦ ପ୍ରାୟ ଦୁଇଗୁଣ ଏବଂ ଏନପିକେ ମହଜୁଦ ମଧ୍ୟ ଯଥେଷ୍ଟ ଅଧିକ। ରବି ଋତୁ ଶେଷ ହେବା ସହିତ ଘରୋଇ ୟୁରିଆ ଉତ୍ପାଦନ ବ୍ୟବହାରକୁ ଅତିକ୍ରମ କରିବ ବୋଲି ଆଶା କରାଯାଉଛି। ଅନ୍ୟପଟେ ବିଶ୍ୱସ୍ତରୀୟ ଟେଣ୍ଡର ପୂର୍ବରୁ ଦିଆଯାଇସାରିଛି ଏବଂ ମାର୍ଚ୍ଚ ଶେଷ ସୁଦ୍ଧା ଯୋଗାଣ ଆଶା କରାଯାଉଛି।
- ବର୍ତ୍ତମାନର ପରିସ୍ଥିତିରେ କିଛି ସଦସ୍ୟ ଦେଶଙ୍କ ସମ୍ପୃକ୍ତି ଯୋଗୁଁ ବ୍ରିକ୍ସ ମଧ୍ୟରେ ଏକ ସାଧାରଣ ସ୍ଥିତିକୁ ନେଇ ଶେର୍ପା ସ୍ତରରେ ଆଲୋଚନା ଚାଲିଛି। ଭାରତ ବ୍ରିକ୍ସ ଅଧ୍ୟକ୍ଷ ଭାବରେ ବିଚାରବିମର୍ଶକୁ ସହଜ କରିଛି ଏବଂ ଉଚ୍ଚସ୍ତରୀୟ କୂଟନୈତିକ ଯୋଗାଯୋଗ ମାଧ୍ୟମରେ ରୁଷ ସମେତ ଅଂଶୀଦାରମାନଙ୍କ ସହିତ ସମ୍ପର୍କ ସ୍ଥାପନ କରିଛି।
- ବୈଦେଶିକ ବ୍ୟାପାର ମନ୍ତ୍ରଣାଳୟ ପଶ୍ଚିମ ଏସିଆ ଏବଂ ଉପସାଗରୀୟ ଅଞ୍ଚଳରେ ପରିବର୍ତ୍ତିତ ଘଟଣାକ୍ରମ ଉପରେ କଡ଼ା ନଜର ରଖିଛି। ଭାରତୀୟ ନାଗରିକଙ୍କ ସୁରକ୍ଷା ଏବଂ କଲ୍ୟାଣ ସର୍ବୋଚ୍ଚ ପ୍ରାଥମିକତା ରହିଛି। ବିଭିନ୍ନ ସୂଚନା ଦେବା ପାଇଁ ଏକ ନିୟନ୍ତ୍ରଣ କକ୍ଷ କାର୍ଯ୍ୟକ୍ଷମ ଅଛି ଏବଂ ଦୂତାବାସଗୁଡ଼ିକ ୨୪ ଘଣ୍ଟିଆ ହେଲ୍ପଲାଇନ୍ ଚଳାଇ ପରାମର୍ଶ ଜାରି କରୁଛନ୍ତି ଏବଂ ଫସି ରହିଥିବା ଭାରତୀୟମାନଙ୍କୁ ଭିସା, ପରିବହନ ଏବଂ ଲଜିଷ୍ଟିକ୍ ସହାୟତା ପ୍ରଦାନ କରୁଛନ୍ତି।
- ୨୮ ଫେବୃଆରୀ ଠାରୁ, ପ୍ରାୟ ୧ ଲକ୍ଷ ୭୨ ହଜାର ଯାତ୍ରୀ ଏହି ଅଞ୍ଚଳରୁ ଭାରତ ଫେରିଛନ୍ତି। ଓମାନ, ସାଉଦୀ ଆରବ, ୟୁଏଇ ଏବଂ କତରରୁ ବିମାନ ଚଳାଚଳ ସହିତ ବିମାନ ସଂଯୋଗରେ ଉନ୍ନତି ହେଉଛି। ବାହାରିନ, କୁଏତ ଏବଂ ଇରାକରେ ଥିବା ଭାରତୀୟମାନଙ୍କୁ ଭିସା ବୃଦ୍ଧି, ଟ୍ରାଞ୍ଜିଟ୍ ଭିସା ଏବଂ ପରବର୍ତ୍ତୀ ଯାତ୍ରାରେ ସହାୟତା କରାଯାଉଛି।
- ଗତକାଲି ଓମାନର ସୋହରରେ ଏକ ଘଟଣାରେ, ଦୁଇ ଜଣ ଭାରତୀୟ ନାଗରିକ ପ୍ରାଣ ହରାଇଥିଲେ। ଏଥିରେ ଦଶ ଜଣ ଆହତ ହୋଇଥିଲେ, କିନ୍ତୁ ଏମାନଙ୍କ ଅବସ୍ଥା ଗୁରୁତର ନାହିଁ। ଦୂତାବାସ ପ୍ରଭାବିତ ବ୍ୟକ୍ତିମାନଙ୍କୁ ସହାୟତା କରୁଛି। ଓମାନ କର୍ତ୍ତୃପକ୍ଷଙ୍କ ସହିତ ସମନ୍ୱୟ ରଖି ମୃତଦେହକୁ ଶୀଘ୍ର ଫେରାଇ ଆଣିବାକୁ ସୁବିଧା ଯୋଗାଇ ଦେଉଛି।
- ସଫେସିଆ ବିଷ୍ଣୁ ଜାହାଜରେ ଥିବା (୧୧ ମାର୍ଚ୍ଚ, ଇରାକର ଉପକୂଳରୁ) ୧୫ଜଣ ଭାରତୀୟ ନାବିକମାନଙ୍କୁ ସୁରକ୍ଷିତ ଭାବରେ ସ୍ଥାନାନ୍ତର କରାଯାଇଛି ଏବଂ ସେମାନେ ବର୍ତ୍ତମାନ ବାସରାରେ ଅଛନ୍ତି। ଦୂତାବାସ ସେମାନଙ୍କୁ ସହାୟତା କରୁଛି ଏବଂ ମୃତ ଭାରତୀୟ ନାଗରିକଙ୍କ ଦେହାବଶେଷକୁ ସ୍ୱଦେଶ ଫେରାଇ ଆଣିବା ସହିତ ଭାରତକୁ ସେମାନଙ୍କର ଶୀଘ୍ର ଫେରିବା ପାଇଁ ସମନ୍ୱୟ କରୁଛି।
- ପୂର୍ବ ଘଟଣାଗୁଡ଼ିକରେ, ପାଞ୍ଚ ଜଣ ଭାରତୀୟ ନାଗରିକ ପ୍ରାଣ ହରାଇଛନ୍ତି ଏବଂ ଜଣେ ନିଖୋଜ ଅଛନ୍ତି। ନିଖୋଜ ବ୍ୟକ୍ତିଙ୍କୁ ଖୋଜିବା ଏବଂ ମୃତଦେହ ସ୍ୱଦେଶ ଫେରାଇ ଆଣିବା ପାଇଁ ଓମାନ, ଇରାକ ଏବଂ ୟୁଏଇରେ ଥିବା ଦୂତାବାସଗୁଡ଼ିକ ସ୍ଥାନୀୟ କର୍ତ୍ତୃପକ୍ଷଙ୍କ ସହିତ ଯୋଗାଯୋଗରେ ରହିଛନ୍ତି।
ଗଣ ଯୋଗାଯୋଗ
ଆଜିର ସାମ୍ବାଦିକ ସମ୍ମିଳନୀରେ ସୂଚନା ଏବଂ ପ୍ରସାରଣ ମନ୍ତ୍ରଣାଳୟର ଅଧିକାରୀ ଜନସାଧାରଣଙ୍କ ନିକଟରେ ଯାଞ୍ଚ କରାଯାଇଥିବା ସୂଚନାର ପ୍ରସାରଣ ସୁନିଶ୍ଚିତ କରିବା ପାଇଁ ଗ୍ରହଣ କରାଯାଇଥିବା ଯୋଗାଯୋଗ ପଦକ୍ଷେପ ବିଷୟରେ କହିଥିଲେ। ମନ୍ତ୍ରଣାଳୟ ଗୁରୁତ୍ୱାରୋପ କରି କହିଛି:
- କିଛି ସୋସିଆଲ ମିଡିଆ ହ୍ୟାଣ୍ଡେଲରେ ଏଆଇ-ଜେନେରେଟେଡ୍ ଭିଡିଓ ଏବଂ ଭ୍ରମାତ୍ମକ ବାର୍ତ୍ତା ସମେତ ନକଲି ସୂଚନା ପ୍ରସାରିତ ହେଉଛି। ନାଗରିକମାନଙ୍କୁ ସତର୍କ ରହିବାକୁ ଏବଂ କେବଳ ପ୍ରାମାଣିକ ଉତ୍ସ ଏବଂ ସରକାରୀ ହ୍ୟାଣ୍ଡେଲ ଉପରେ ନିର୍ଭର କରିବାକୁ ପରାମର୍ଶ ଦିଆଯାଇଛି।
- ମୋବାଇଲ୍ (ଏସଏମଏସ), ପୋର୍ଟାଲ କିମ୍ବା ଆଇଭିଆରଏସ ଭଳି ଅନଲାଇନ୍ କିମ୍ବା ଡିଜିଟାଲ୍ ପ୍ଲାଟଫର୍ମ ମାଧ୍ୟମରେ ଏଲପିଜି ସିଲିଣ୍ଡର ବୁକିଂ କରାଯିବା ଉଚିତ। ଗ୍ରାହକମାନଙ୍କୁ ଶାରୀରିକ ଭାବରେ ବିତରକଙ୍କ ପାଖକୁ ନଯିବାକୁ ପରାମର୍ଶ ଦିଆଯାଇଛି।
- ରାଜ୍ୟ ସରକାର ଏବଂ ଜିଲ୍ଲାସ୍ତରୀୟ କମିଟିଗୁଡ଼ିକ, ତୈଳ ବିପଣନ କମ୍ପାନୀଗୁଡ଼ିକ (ଓଏମସି) ସହିତ ସମନ୍ୱୟ ରଖି, ପରିସ୍ଥିତି ଉପରେ ନଜର ରଖୁଛନ୍ତି ଏବଂ ମହଜୁଦ ଏବଂ କଳାବଜାରୀ ବିରୁଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ କରୁଛନ୍ତି।
- ନାଗରିକମାନଙ୍କୁ ଆତଙ୍କିତ ବୁକିଂରେ ଲିପ୍ତ ନ ରହିବା ଏବଂ ସାଧାରଣ ସିଲିଣ୍ଡର ରିଫିଲ୍ ଚକ୍ର ଅନୁସାରେ କେବଳ ଏଲପିଜି ସିଲିଣ୍ଡର ବୁକିଂ କରିବାକୁ ଅନୁରୋଧ କରାଯାଇଛି।
- ସାମ୍ବାଦିକ ସମ୍ମିଳନୀରେ ମିଳିଥିବା ସୂଚନା ଅନୁଯାୟୀ, ଭାରତ ସରକାର ପଶ୍ଚିମ ଏସିଆରେ ଘଟୁଥିବା ଘଟଣା ଉପରେ କଡ଼ା ନଜର ରଖିଛନ୍ତି ଏବଂ ସମ୍ପୃକ୍ତ ମନ୍ତ୍ରଣାଳୟ ଓ ଏଜେନ୍ସିଗୁଡ଼ିକ ମଧ୍ୟରେ ସମନ୍ୱୟ ବଜାୟ ରଖିଛନ୍ତି। ଇନ୍ଧନ ଯୋଗାଣକୁ ସୁରକ୍ଷିତ ରଖିବା, ଭାରତୀୟ ନାଗରିକଙ୍କ ସୁରକ୍ଷା ସୁନିଶ୍ଚିତ କରିବା, ସାମୁଦ୍ରିକ କାର୍ଯ୍ୟକଳାପ ବଜାୟ ରଖିବା ଏବଂ ଦେଶସାରା ଅତ୍ୟାବଶ୍ୟକ ସାମଗ୍ରୀ ଉପଲବ୍ଧ ରଖିବା ପାଇଁ ଜରୁରି ପଦକ୍ଷେପ ନିଆଯାଇଛି।
