ଖରସ୍ରୋତା ନଦୀ ପଠାରେ ୧୪୪ ଜାରି, ଦୁଇ ପୂର୍ବତନ ବିଧାୟକଙ୍କ ସମେତ ୨ଶହରୁ ଉର୍ଦ୍ଧ୍ୱ ଗିରଫ୍
ଘଟଣା ସ୍ଥଳରେ ଉତ୍ତେଜନା, ୧୧ ପ୍ଲାଟୁନ୍ ଫୋର୍ସ ମୁତୟନ ଗିରଫ୍ ପ୍ରତିବାଦରେ ସନ୍ଧ୍ୟାରେ କଟକ-ଚାନ୍ଦବାଲି ରାସ୍ତା ରୋକ
ଆଳି: ଖରସ୍ରୋତା ଠାରେ ପ୍ରସ୍ତାବିତ ମେଗା ପାନୀୟଜଳ ପ୍ରକଳ୍ପକୁ ନେଇ ଗତକାଲି ଖରସ୍ରୋତା ବଞ୍ଚାଅ ସଂଗ୍ରାମ ସମିତି ତରଫରୁ ମଶାଲ ଶୋଭାଯାତ୍ରା କରାଯାଇ ପ୍ରକଳ୍ପ କାର୍ଯ୍ୟକୁ ତିବ୍ର ବିରୋଧ କରାଯିବା ପରେ ଆଜି ନଦୀ ଶଯ୍ୟା ଧାରଣା ସ୍ଥଳରେ ଜିଲ୍ଲା ପ୍ରଶାସନ ତରଫରୁ ୧୪୪ ଜାରି କରାଯାଇ ଆନ୍ଦୋଳନକାରୀମାନଙ୍କୁ ଗିରଫ୍ କରାଯିବା ସହ କମ୍ପାନୀ ପକ୍ଷରୁ ପ୍ରକଳ୍ପକାର୍ଯ୍ୟ ଆରମ୍ଭ କରାଯାଇଛି ।
ପ୍ରଶାସନ ତରଫରୁ ୧୪୪ ଜାରି ଘୋଷଣା ପରେ ସଂଗ୍ରାମ ସମିତି ତରଫରୁ ୧୪୪ ଭଙ୍ଗକରି ଦୁଇ ପୂର୍ବତନ ବିଧାୟକ ଦୋଳଗୋବିନ୍ଦ ନାୟକ, ଦେବେନ୍ଦ୍ର ଶର୍ମାଙ୍କ ସମେତ ସମିତିର ସଭାପତି ଦୁର୍ଯ୍ୟୋଧନ ମହାନ୍ତି, ସମ୍ପାଦକ ବିଧାନ ଦାସ, ଶରତ ରାଉତ, କାଳିପ୍ରସାଦ ନାୟକ, ସବିତା ବରଜ, ମଙ୍ଗୁଳି ଚରଣ ବେହେରା, ରବିନାରାୟଣ ବେହେରା, ରବିନାରାୟଣ ସ୍ୱାଇଁ, ଶୁବଳ ରାଉତ, ଶୈଳେନ୍ଦ୍ର ଜେନାଙ୍କ ସମେତ ଦୁଇଶହରୁ ଉର୍ଦ୍ଧ୍ୱ ଆନ୍ଦୋଳନକାରୀଙ୍କୁ ପୋଲିସ୍ ଗିରଫ୍ କରିଥିଲା ।
ଏହି ଆନ୍ଦୋଳନକାରୀଙ୍କ ମଧ୍ୟରୁ ଶତାଧିକ ମହିଳା ସାମିଲ ଥିବା ବେଳେ, ଗିରଫକୁ ନେଇ ଭାରିଗଦା ବରୁଣାଡିହା ସମେତ ରାଜକନିକା ଅଞ୍ଚଳରେ ବ୍ୟାପକ ଉତ୍ତେଜନା ଦେଖାଦେଇଥିଲା । ଶହ ଶହ ସଂଖ୍ୟାରେ ମହିଳା, ପୁରୁଷ ଓ ଯୁବକ, ଛାତ୍ରମାନେ ଆନ୍ଦୋଳନରେ ସାମିଲ ହୋଇ ପ୍ରକଳ୍ପ ବିରୋଧି ନାରାଦେଇ ସେମାନଙ୍କୁ ଗିରଫ କରିବା ପାଇଁ ଜିଦ୍ ଧରିଥିଲେ ।ବହୁ ଆନ୍ଦୋଳନକାରୀ ଜୋର ଜବରଦସ୍ତ ପୋଲିସ ଗାଡ଼ିକୁ ଚଢୁଥିବାର ଦେଖାଯାଇଥିଲା ।
ଆଜି ଦିନ ତମାମ ଅଚ୍ୟୁତପୁର, ଭାରିଗଦା, ବରୁଣଡିହା ଛକ ନିକଟରେ ଆନ୍ଦୋଳନକାରୀ ଓ ପୋଲିସଙ୍କ ମଧ୍ୟରେ ଛକାପଞ୍ଝା ଲାଗିରହିଥିଲା । ବହୁ ପୋଲିସ ଅଧିକାରୀଙ୍କ ସହ ଜିଲ୍ଲା ପ୍ରଶାସନ ତରଫରୁ କନିକା ତହସିଲଦାର, ବିଡିଓ ଓ ଆଳିର ତହସିଲଦାର ବିଡିଓ କେନ୍ଦ୍ରପଡ଼ା ଅତିରିକ୍ତ ଜିଲ୍ଲାପାଳ ଘଟଣାସ୍ଥଳରେ ରହି ପରିସ୍ଥିତି ଅନୁଧ୍ୟାନ କରିଥିଲେ ।
କେନ୍ଦ୍ରପଡ଼ା ଏସପି ଗିରଫ୍ ହୋଇଥିବା ଦୁଇ ବିଧାୟକ ଓ ଆନ୍ଦୋଳନକାରୀଙ୍କୁ ରଖାଯାଇଥିବା କଷଣଅଣ୍ଟା ଠାରେ ଭେଟି ଆଲୋଚନା କରିବା ସହ ଖରସ୍ରୋତା ନଦୀ ପଠାରେ ହେଉଥିବା ପ୍ରକଳ୍ପ କାର୍ଯ୍ୟକୁ ବୁଲି ଦେଖିଥିଲେ । କମ୍ପାନୀ ତରଫରୁ ଖରସ୍ରୋତା ନଦୀ ପଠାରେ ଅସ୍ଥାୟୀ କଣ୍ଟେନର ମେଶିନ, ଗାଡ଼ି, ବୋଟ ଗୁଡ଼ିକ ରଖି କାର୍ଯ୍ୟ ଆରମ୍ଭ କରିଛି । ମଧ୍ୟାହ୍ନରେ ସାମାନ୍ୟ ଉତ୍ତେଜନା ହ୍ରାସ ପାଇଥିବା ବେଳେ, ଅପରାହ୍ଣରେ ଭାରିଗଦା ଅବବାହିକାରେ ଶହ ଶହ ସଂଖ୍ୟାରେ ମହିଳା ଓ ପୁରୁଷ ଆନ୍ଦୋଳନକାରୀମାନେ ବରୁଣାଡିହା ଛକ ଠାରେ ପ୍ରକଳ୍ପକୁ ବିରୋଧକରି ନିଆଁ ଲଗାଇ କଟକ-ଚାନ୍ଦବାଲି ରାସ୍ତାକୁ ଅବରୋଧ କରିଛନ୍ତି । ଘଟଣାସ୍ଥଳରେ ଉତ୍ତେଜନା ଲାଗି ରହିଛି, ପ୍ରଶାସନ ତରଫରୁ ୧୧ ପ୍ଲାଟୁନ ପୋଲିସ ଫୋର୍ସ ମୁତୟନ ରଖାଯାଇଛି l
ସୂଚନାଯୋଗ୍ୟ, କେନ୍ଦ୍ରାପଡ଼ା ଜିଲ୍ଲା ରାଜକନିକାର ଭରିଗଦାରେ ୮୦୦ କୋଟି ଟଙ୍କା ବିନିମୟରେ ପ୍ରସ୍ତାବିତ ମେଗା ପାନୀୟଜଳ ପ୍ରକଳ୍ପ ପାଇଁ ମିଳିଛି ଅନୁମତି । ଏହି ପ୍ରକଳ୍ପ କାର୍ଯ୍ୟକାରୀ ହେଲେ ଭଦ୍ରକ ଜିଲ୍ଲାର ୪ ବ୍ଲକକୁ ପାନୀୟ ଜଳ ଯୋଗାଇ ଦିଆଯିବ।କିନ୍ତୁ ସ୍ଥାନୀୟ ଅଞ୍ଚଳରେ ନଦୀ ପାଣି ଲୁଣା ହୋଇଯିବ। ପାଣି ଅଭାବ ଯୋଗୁ ଚାଷ କାର୍ଯ୍ୟ ବାଧାପ୍ରାପ୍ତ ହେବ । ଜୈବ ବିବିଧତା ଉପରେ ଏହାର ଘୋର ପ୍ରଭାବ ପଡ଼ିବ ବୋଲି କୁହାଯାଇ ସମିତି ପକ୍ଷରୁ ଏହାକୁ ବିରୋଧ କରାଯାଉଛି। ଏପରିକି ଗତ ୨ ବର୍ଷ ହେବ ସଭା, ସମିତି, ଧାରଣା ତଥା ମାନବଶୃଙ୍ଖଳ ଜରିଆରେ ଏହି ପ୍ରକଳ୍ପକୁ ବିରୋଧ କରାଯାଉଥିବା ବେଳେ ପ୍ରଶାସନ ସହ ବାରମ୍ବାର ଆଲୋଚନା ବି ଫେଲ୍ ମାରିଛି।
କୃଷି, କୃଷକ, ଜୈବ ବିବିଧତାକୁ ଛାରଖାର କରି କୌଣସି ପରିସ୍ଥିତିରେ ବି ଖରସ୍ରୋତାରୁ ବୁନ୍ଦାଏ ପାଣି ଦିଆଯିବ ନାହିଁ ବୋଲି ସମିତି ଚେତାବନୀ ଦେଇଛି । ଖରସ୍ରୋତା ନଦୀର ତଳମୁଣ୍ଡରେ ବ୍ୟରେଜ ନିର୍ମାଣ କରି ପାନୀୟଜଳ ପ୍ରକଳ୍ପ ନିର୍ମାଣ କରିବା ପାଇଁ ଆନ୍ଦୋଳନକାରୀ ଦାବି କରିଛନ୍ତି ।
Comments are closed.