ମୁଖ୍ୟ ଶାସନ ସଚିବଙ୍କ ଅଧ୍ୟକ୍ଷତାରେ ଭାରତୀୟ ଜନଗଣନା-୨୦୨୭ ପ୍ରସ୍ତୁତି ପରିପ୍ରେକ୍ଷୀରେ ଜିଲ୍ଲାପାଳମାନଙ୍କ ସହିତ ଆଲୋଚନା

ଭୁବନେଶ୍ୱର: ତା ୧୭.୦୩.୨୦୨୬ : ରାଜ୍ୟ ସରକାରଙ୍କ ଯୋଜନା ଏବଂ ସଂଯୋଜନ ବିଭାଗ ଆନୁକୂଲ୍ୟରେ ଆଜି ଲୋକସେବା ଭବନସ୍ଥିତ  ସମ୍ମିଳନୀ କକ୍ଷରେ ମୁଖ୍ୟ ଶାସନ ସଚିବ ଶ୍ରୀମତୀ ଅନୁ ଗର୍ଗଙ୍କ ଅଧ୍ୟକ୍ଷତାରେ ଜିଲ୍ଲାପାଳମାନଙ୍କ ବୈଠକ  ଅନୁଷ୍ଠିତ ହୋଇଯାଇଛି । ଏହି ବୈଠକରେ ବିଭିନ୍ନ ଗୁରୁତ୍ୱପୂର୍ଣ୍ଣ ପ୍ରସଙ୍ଗ ମଧ୍ୟରେ ଭାରତୀୟ ଜନଗଣନା-୨୦୨୭ ପରିପ୍ରେକ୍ଷୀରେ ସ୍ୱତନ୍ତ୍ର ଆଲୋଚନା କରାଯାଇଥିଲା । ବୈଠକରେ ରାଜ୍ୟର ସମସ୍ତ ଜିଲ୍ଲାପାଳ ଏବଂ ମହାନଗର ନିଗମଗୁଡିକର ଆୟୁକ୍ତ ତଥା ପ୍ରମୁଖ ଜନଗଣନା ଅଧିକାରୀମାନେ ଆଭାସୀ  ମାଧ୍ୟମରେ ଯୋଗ  ଦେଇଥିଲେ ।  ମୁଖ୍ୟ ଶାସନ ସଚିବ ଜନଗଣନା ଭଳି ଜାତୀୟ ମହାନ କାର୍ୟ୍ୟରେ ସକ୍ରିୟ ଭାବରେ ସାମିଲ ହୋଇ ନ୍ୟସ୍ତ ଥିବା କାର୍ୟ୍ୟଗୁଡିକୁ ସମୟାନୁସାରେ ସମ୍ପାଦନ କରିବାକୁ ପରାମର୍ଶ ଦେଇଥିଲେ ।

  ବୈଠକରେ ରାଜ୍ୟ ଜନଗଣନା ନିର୍ଦ୍ଦେଶକ ଶ୍ରୀ ନିଖିଳ ପବନ କଲ୍ୟାଣ, ଭାରତୀୟ ଜନଗଣନା ୨୦୨୭ ର ପ୍ରଥମ ପର୍ୟ୍ୟାୟର ଗୃହଗଣନା ଓ ଗୃହ ତାଲିକା ପ୍ରସ୍ତୁତିର ବିବରଣୀ ଉପସ୍ଥାପନ କରିଥିଲେ । ଓଡ଼ିଶାରେ ଜନଗଣନାର  ପ୍ରଥମ ପର୍ୟ୍ୟାୟରେ  ଗୃହଗଣନା ଓ ଗୃହତାଲିକା କାର୍ୟ୍ୟକ୍ରମ ଅପ୍ରେଲ ୧୬ ରୁ ଆରମ୍ଭ ହୋଇ ମଇ ୧୫ ପର୍ୟ୍ୟନ୍ତ ହେବାକୁ ଥିବା ବେଳେ  ଅପ୍ରେଲ ୧ ରୁ ଅପ୍ରେଲ ୧୫ ମଧ୍ୟରାତ୍ର ପର୍ୟ୍ୟନ୍ତ ସ୍ଵ-ଗଣନାର ପ୍ରାବଧାନ ରହିଛି । ଏହି ଅବସରରେ ଶ୍ରୀ କଲ୍ୟାଣ ଜିଲ୍ଲାମାନଙ୍କରେ ବର୍ତ୍ତମାନର କାର୍ୟ୍ୟର ସ୍ଥିତି ବିଷୟରେ ଆଲୋକପାତ କରିଥିଲେ।

ଏହି ସମ୍ମିଳନୀରେ ରାଜ୍ୟ ଉନ୍ନୟନ କମିଶନର ତଥା ଅତିରିକ୍ତ ମୁଖ୍ୟ ଶାସନ ସଚିବ ଶ୍ରୀଯୁକ୍ତ ଦେଓ ରଞ୍ଜନ କୁମାର ସିଂ ଅଂଶ ଗ୍ରହଣ କରି ଜନଗଣନା ତଥ୍ୟର ବହୁମୂଲ୍ୟ ଉପଯୋଗିତା ବିଷୟରେ ଅବଗତ କରାଇଥିଲେ ।  ଜନଗଣନା ନିମନ୍ତେ ଓଡ଼ିଶାର ନୋଡାଲ ବିଭାଗ ତଥା ରାଜସ୍ୱ ଓ ବିପର୍ୟ୍ୟୟ  ପରିଚାଳନା  ବିଭାଗ ଅତିରିକ୍ତ ମୁଖ୍ୟ ଶାସନ ସଚିବ ଡଃ. ଅରବିନ୍ଦ କୁମାର ପାଢୀ ଅଂଶଗ୍ରହଣ କରି ଜନଗଣନାର ସଫଳ କାର୍ୟ୍ୟାନ୍ୱୟନ ପାଇଁ ଜିଲ୍ଲାପାଳମାନଙ୍କୁ ଆବଶ୍ୟକୀୟ ପରାମର୍ଶ ଦେଇଥିଲେ ।