ବ୍ରହ୍ମପୁର , ୧୯/୧- ବଡବ୍ଜ଼ାର ପୋଲିସ ଜଣେ ବୋଲେରୋ ଗାଡି ଚୋରକୁ କାବୁ କରିଛି। ତା ନିକଟରୁ ୩ ଟି ଗାଡି ଜବତ କରିଛି। ବ୍ରହ୍ମପୁରରେ ବାରମ୍ବାର ବିଭିନ୍ନ ସ୍ଥାନରୁ ଗାଡି ଚୋରି ହେବା ପରେ ପୋଲିସ ପାଇଁ ଏହା ଚାଲେଞ୍ଜ ହୋଇପଡିଥିଲା। ଶେଷରେ ବଡ଼ବଜାର ଥାନା ପୋଲିସ ଖୋର୍ଦ୍ଧା ଜିଲ୍ଲା ଜଟଣି ଥାନା ତାରାବୋଇ ଗ୍ରାମରୁ ଏକ ବଲେରୋ ଗାଡ଼ି ଜବତ କରିଥିଲା। ଏ ସଂକ୍ରାନ୍ତରେ ଖୋର୍ଦ୍ଧା ଟାଉନ୍ ଥାନା ମୁକୁନ୍ଦପ୍ରସାଦ ଗ୍ରାମର ଉଜିର୍ ଖାନ୍(୫୭)କୁ ଗିରଫ କରାଯାଇଥିବା ବ୍ରହ୍ମପୁର ଟାଉନ୍ ଏସ୍ଡିପିଓ ବିଷ୍ଣୁପ୍ରସାଦ ପତି ସୂଚନା ଦେଇଛନ୍ତି। ଅଭିଯୁକ୍ତଙ୍କୁ ମଙ୍ଗଳବାର କୋର୍ଟ ଚାଲାଣ କରାଯାଇଛି। ଏହା ସହିତ ଜଟଣି ଥାନା ଇଲାକାର ବିଭିନ୍ନ ସ୍ଥାନରେ ଲୁଚାଇ ରଖିଥିବା ଅନ୍ୟ ଏକ ସ୍କର୍ପିଓ ଓ ପିକ୍ଅପ୍ ଭାଡ଼ି ମଧ୍ୟ ଜବତ ହୋଇଛି। ଉଜିର୍ ଏକ ଚୋର ଗ୍ୟାଙ୍ଗ୍ ସହିତ ମିଶି ବିଭିନ୍ନ ସ୍ଥାନରେ ଏଭଳି ଗାଡ଼ି ଚୋରି କରିଛନ୍ତି। ପୋଲିସ ଫେରାର୍ ଚୋରଙ୍କୁ ଧରିବା ପାଇଁ ଉଦ୍ୟମ ଜାରି ରଖିଛି। ବିଭିନ୍ନ ସ୍ଥାନରୁ ଗାଈ-ବଳଦ ଚୋରି କରିବା ପାଇଁ ଚୋରମାନେ ବଲେରୋ ଗାଡ଼ି ବ୍ୟବହାର କରୁଥିଲେ। ସେହିପରି ସ୍କର୍ପିଓ ଗାଡ଼ିରେ ଚୋରମାନେ ଖୋର୍ଦ୍ଧାରୁ ବ୍ରହ୍ମପୁର ଆସି ଗାଡ଼ି ଚୋରି କରିଥିବା ପୋଲିସ ତଦନ୍ତରେ ଜଣାପଡ଼ିଛି।ବଡ଼ବଜାର ଥାନା ଅନ୍ତର୍ଗତ ପାଣିଗ୍ରାହୀନଗରରେ ରହୁଥିବା ଜଗଦୀଶ ତ୍ରିପାଠୀଙ୍କ ବଲେରୋ ଗାଡ଼ି ଗତ ୧୨ତାରିଖରେ ଚୋରି ହୋଇ ଯାଇଥିଲା। ଏ ନେଇ ସେ ଥାନାରେ ଅଭିଯୋଗ କରିବା ପରେ ପୋଲିସ କେସ୍ ନମ୍ବର ୭/୨୨ରେ ମାମଲା ରୁଜୁ କରି ତଦନ୍ତ ଜାରି ରଖିଥିଲା। ଗାଡ଼ିକୁ ଟ୍ରାକ୍ କରି ପୋଲିସ ତା’ର ସନ୍ଧାନ ପାଇ ଖୋର୍ଦ୍ଧାରେ ଚଢ଼ଉ କରିଥିଲା। ଚୋରି ଗାଡ଼ି ଜବତ କରିବା ସହିତ ଅନ୍ୟ ଦୁଇଟି ଗାଡ଼ି ମଧ୍ୟ ଜବତ କରିଛି। ତେବେ ଏହି ଚୋରି ରାକେଟ୍ରେ ସମ୍ପୃକ୍ତ ଥିବା ଅନ୍ୟ ସଦସ୍ୟ ଫେରାର୍ ରହିଛନ୍ତି। ସେମାନଙ୍କୁ ଧରିବା ପାଇଁ ପୋଲିସ ଉଦ୍ୟମ ଜାରି ରଖିଥିବା ଏସ୍ଡିପିଓ ପତି କହିଛନ୍ତି।
