ଆଗରପଡ଼ା: ଆଗରପଡ଼ା ନିକଟସ୍ଥ ·ରିଗାଁ ପଞ୍ଚାୟତର ବାଲିପୋଖରୀ ହାଇସ୍କୁଲରେ ଅସ୍ଥାୟୀ ସଙ୍ଗରୋଧକ କେନ୍ଦ୍ର କରାଯାଇଛି । ଏହି କେନ୍ଦ୍ରରେ ଚଳିତମାସ ୨ ତାରିଖରୁ ୪୯ ଜଣ ପ୍ରବାସୀ ରହି ଆସୁଥିଲେ । ତେବେ ନୂତନ ନିୟମାନୁସାରେ ଆଜି ଉକ୍ତ କେନ୍ଦ୍ରରୁ ୪୯ ଜଣ ପ୍ରବାସୀଙ୍କୁ ପ୍ରମାଣପତ୍ର ସହ ଆସନ୍ତା ୭ଦିନ ପର୍ଯ୍ୟନ୍ତ ନିଜନିଜ ଗୃହରେ ସଙ୍ଗରୋଧରେ ରହିବାକୁ ପରାମର୍ଶ ଦିଆଯାଇ ଛାଡ଼ି ଦିଆଯାଇଛି । ଏଠାରେ ଏବେ ୯ ଜଣ ପ୍ରବାସୀ ରହିଛନ୍ତି ।
ଯେହତୁ ଉକ୍ତ କେନ୍ଦ୍ରରୁ ବ୍ଲକର ପ୍ରଥମ କରୋନା ରୋଗୀ ଚିହ୍ନଟ ହୋଇଥିଲେ ତେଣୁ ଉକ୍ତ କେନ୍ଦ୍ରକୁ ଆଗରପଡ଼ା ଦମକଳ ବାହିନୀ ପକ୍ଷରୁ ଜୀବାଣୁ ନାଶକ ଦ୍ରବଣ ଦ୍ୱାରା ପରିସ୍କାର କରାଯାଇଛି । ପ୍ରବାସୀଙ୍କ ଆଗମନ ଜାରୀ ରହିଥିବାରୁ ଏହାକୁ ଜୀବାଣୁମୁକ୍ତ କରିବା ଆବଶ୍ୟକତା ଦେଖାଦେଇଥିଲା । ଏହି କାର୍ଯ୍ୟକ୍ରମରେ ଦମକଳ ବାହିନୀର କର୍ମକର୍ତ୍ତାଙ୍କ ସମେତ ସରପଞ୍ଚ ବନମାଳୀ ବେହେରା, ପୂର୍ବତନ ସମିତିସଭ୍ୟ ରାମଚନ୍ଦ୍ର ସାହୁ, ୱାର୍ଡ଼ସଭ୍ୟ ରଞ୍ଜନ ସାହୁ, ଦେବେନ୍ଦ୍ର ମଲ୍ଲିକ, ରଥ ବେହେରା ପ୍ରମୁଖ ଉପସ୍ଥିତ ଥିଲେ ।
