୧୧,୨୦୦ କୋଟି ଟଙ୍କା ନିବେଶରେ ନିର୍ମିତ ନୋଇଡା ଅନ୍ତର୍ଜାତୀୟ ବିମାନବନ୍ଦର ପର୍ଯ୍ୟାୟ-୧ର ଉଦ୍‌ଘାଟନ କଲେ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ

By Suvendra Pattanaik : ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି ଉତ୍ତରପ୍ରଦେଶର ଜିଓ୍ବାରଠାରେ ନୋଇଡା ଅନ୍ତର୍ଜାତୀୟ ବିମାନବନ୍ଦରର ଉଦ୍‌ଘାଟନ କରିଛନ୍ତି। ଏହି ଅବସରରେ ଗର୍ବ ଓ ଆନନ୍ଦ ପ୍ରକାଶ କରି ପ୍ରଧାନମନ୍ତ୍ରୀ କହିଥିଲେ ଯେ ଆଜି ବିକଶିତ ଉତ୍ତରପ୍ରଦେଶ ଓ ବିକଶିତ ଭାରତ ଅଭିଯାନ କ୍ଷେତ୍ରରେ ଏକ ନୂଆ ଅଧ୍ୟାୟ ଯୋଡ଼ାଯାଇଛି। ଭାରତର ବୃହତ୍ତମ ରାଜ୍ୟ ଏବେ ସର୍ବାଧିକ ସଂଖ୍ୟକ ଅନ୍ତର୍ଜାତୀୟ ବିମାନବନ୍ଦର ଥିବା ରାଜ୍ୟମାନଙ୍କ ମଧ୍ୟରେ ଅନ୍ୟତମ ପାଲଟିଛି। ପ୍ରଧାନମନ୍ତ୍ରୀ କହିଥିଲେ ଯେ ଆଜି ସେ ଦୁଇଗୁଣ ଆନନ୍ଦ ଅନୁଭବ କରୁଛନ୍ତି, ପ୍ରଥମତଃ ସେ ଏହାର ଭିତ୍ତିପ୍ରସ୍ତର ସ୍ଥାପନ କରିଥିଲେ ଓ ଏବେ ଉଦ୍‌ଘାଟନ ମଧ୍ୟ କରିଛନ୍ତି ଓ ଦ୍ବିତୀୟତଃ ଏହି ବିମାନବନ୍ଦରର ନାମ ଉତ୍ତରପ୍ରଦେଶ ସହିତ ସଂପର୍କିତ ରହିଛି। “ଏହି ରାଜ୍ୟ ମୋତେ ନିଜର ପ୍ରତିନିଧି ଭାବେ ସଂସଦକୁ ପଠାଇଥିଲା ଓ ଏହାର ନାମ ଏବେ ଏହି ଭବ୍ୟ ବିମାନବନ୍ଦର ସହ ଯୋଡ଼ି ହୋଇଛି।

ନବନିର୍ମିତ ନୋଏଡା ବିମାନବନ୍ଦରର ସୁଦୂରପ୍ରସାରୀ ପ୍ରଭାବ ଉପରେ ଆଲୋକପାତ କରି ପ୍ରଧାନମନ୍ତ୍ରୀ କହିଥିଲେ ଯେ ନୋଏଡା ବିମାନବନ୍ଦର ଆଗ୍ରା, ମଥୁରା, ଆଲିଗଡ଼, ଗାଜିଆବାଦ, ମିରଟ, ଇଟାୱା, ବୁଲନ୍ଦସହର ଏବଂ ଫରିଦାବାଦ ସମେତ ଏକ ବିସ୍ତୃତ ଅଞ୍ଚଳକୁ ଉପକୃତ କରିବ। ଏହି ବିମାନବନ୍ଦର ପଶ୍ଚିମ ଉତ୍ତର ପ୍ରଦେଶର ଚାଷୀ, କ୍ଷୁଦ୍ର ଏବଂ ମଧ୍ୟମ ଉଦ୍ୟୋଗ ଏବଂ ଯୁବକମାନଙ୍କ ପାଇଁ ଅନେକ ନୂତନ ନିଯୁକ୍ତି ସୁଯୋଗ ଆଣିବ। ଶ୍ରୀ ମୋଦୀ କହିଛନ୍ତି, “ଏଠାରୁ ସାରା ବିଶ୍ୱକୁ ବିମାନ ଉଡ଼ିବ ଏବଂ ଏହି ବିମାନବନ୍ଦର ‘ବିକଶିତ ଉତ୍ତରପ୍ରଦେଶର ଉଡ଼ାଣର ପ୍ରତୀକ ହେବ।” ଏଥିପାଇଁ ସେ ରାଜ୍ୟର ଲୋକମାନଙ୍କୁ, ବିଶେଷକରି ପଶ୍ଚିମ ଉତ୍ତର ପ୍ରଦେଶର ଲୋକମାନଙ୍କୁ ହାର୍ଦ୍ଦିକ ଅଭିନନ୍ଦନ ଜଣାଇଥିଲେ।

ବର୍ତ୍ତମାନର ବିଶ୍ୱ ପରିସ୍ଥିତି ଉପରେ ବକ୍ତବ୍ୟ ରଖି ପ୍ରଧାନମନ୍ତ୍ରୀ କହିଥିଲେ ଯେ ପଶ୍ଚିମ ଏସିଆରେ ଏକ ମାସରୁ ଅଧିକ ସମୟ ଧରି ଯୁଦ୍ଧ ଚାଲିଛି ଓ ଏହାକୁ ନେଇ ସମଗ୍ର ବିଶ୍ବ ଚିନ୍ତିତ ଅଛି। ଏହା ଫଳରେ ଅନେକ ଦେଶରେ ଖାଦ୍ୟ, ପେଟ୍ରୋଲ, ଡିଜେଲ, ଗ୍ୟାସ ଏବଂ ସାର ଭଳି ଅତ୍ୟାବଶ୍ୟକ ସାମଗ୍ରୀର ଅଭାବ ରହିଛି। ଭାରତ ଏହି ଯୁଦ୍ଧଗ୍ରସ୍ତ ଅଞ୍ଚଳରୁ ପ୍ରଚୁର ପରିମାଣରେ ଅଶୋଧିତ ତେଲ ଏବଂ ଗ୍ୟାସ ଆମଦାନୀ କରେ। ତେବେ ଶ୍ରୀ ମୋଦୀ ଆଶ୍ୱାସନା ଦେଇ କହିଥିଲେ, “ସରକାର ଏହି ସଙ୍କଟର ବୋଝ ସାଧାରଣ ପରିବାର ଏବଂ କୃଷକଙ୍କ ଉପରେ ନପଡ଼ିବା ପାଇଁ ସମସ୍ତ ପ୍ରକାରର ପଦକ୍ଷେପ ନେଉଛନ୍ତି।”

ବିଶ୍ୱ ସଙ୍କଟ ସମୟରେ ମଧ୍ୟ ଭାରତର ନିରନ୍ତର ଦ୍ରୁତ ଅଭିବୃଦ୍ଧି କଥା ଉଲ୍ଲେଖ କରି ପ୍ରଧାନମନ୍ତ୍ରୀ କହିଛନ୍ତି ଯେ କେବଳ ପଶ୍ଚିମ ଉତ୍ତର ପ୍ରଦେଶରେ ଗତ କିଛି ସପ୍ତାହ ମଧ୍ୟରେ ଏହା ଉଦ୍‌ଘାଟିତ କିମ୍ବା ଭିତ୍ତିପ୍ରସ୍ତର ସ୍ଥାପନ ହୋଇଥିବା ଚତୁର୍ଥ ପ୍ରମୁଖ ପ୍ରକଳ୍ପ। “ଏହି ସମୟ ମଧ୍ୟରେ, ନୋଏଡାରେ ଏକ ପ୍ରମୁଖ ସେମିକଣ୍ଡକ୍ଟର କାରଖାନାର ଶିଳାନ୍ୟାସ କରାଯାଇଥିଲା, ଦେଶର ପ୍ରଥମ ଦିଲ୍ଲୀ-ମିରଟ ନମୋ ଭାରତ ଟ୍ରେନ୍ ଚାଲିଥିଲା, ମିରଟ ମେଟ୍ରୋର ସଂପ୍ରସାରଣ କରାଯାଇଥିଲା ଏବଂ ଆଜି ନୋଏଡା ଅନ୍ତର୍ଜାତୀୟ ବିମାନବନ୍ଦର ଉଦ୍‌ଘାଟିତ ହେଉଛି,” ପ୍ରଧାନମନ୍ତ୍ରୀ ମୋଦୀ କହିଛନ୍ତି।

ପ୍ରଧାନମନ୍ତ୍ରୀ ଉତ୍ତର ପ୍ରଦେଶର ବିକାଶରେ ଏହି ଉଲ୍ଲେଖନୀୟ ସଫଳତା ପାଇଁ ବର୍ତ୍ତମାନ ସରକାରଙ୍କୁ ଶ୍ରେୟ ଦେଇଥିଲେ। ସେ କହିଥିଲେ ଯେ ସେମିକଣ୍ଡକ୍ଟର କାରଖାନା ଭାରତକୁ ପ୍ରଯୁକ୍ତିବିଦ୍ୟାରେ ଆତ୍ମନିର୍ଭରଶୀଳ କରୁଛି, ମିରଟ୍ ମେଟ୍ରୋ ଏବଂ ନମୋ ଭାରତ ରେଳ ଦ୍ରୁତ ଏବଂ ସ୍ମାର୍ଟ ସଂଯୋଗ ପ୍ରଦାନ କରୁଛି ଏବଂ ଜେୱାର ବିମାନବନ୍ଦର ସମଗ୍ର ଉତ୍ତର ଭାରତକୁ ବିଶ୍ୱ ସହିତ ସଂଯୋଗ କରୁଛି। ଶ୍ରୀ ମୋଦୀ କହିଥିଲେ, “ବର୍ତ୍ତମାନର ସରକାରଙ୍କ ଅଧୀନରେ, ଆଜି ନୋଏଡା ୟୁପିର ବିକାଶର ଏକ ଶକ୍ତିଶାଳୀ ଇଞ୍ଜିନ୍ ପାଲଟିଛି।”

ଏହି ବିମାନବନ୍ଦର ପ୍ରକଳ୍ପର ଇତିହାସ ବିଷୟରେ ସୂଚନା ଦେଇ ପ୍ରଧାନମନ୍ତ୍ରୀ ମନେ ପକାଇଥିଲେ ଯେ ଜେୱାର ବିମାନବନ୍ଦରକୁ ୨୦୦୩ ମସିହାରେ ଅଟଳ ଜୀଙ୍କ ଦ୍ୱାରା ଅନୁମୋଦନ କରାଯାଇଥିଲା। ଏବଂ ବର୍ତ୍ତମାନର ସରକାର ଏଠାରେ କ୍ଷମତାକୁ ଆସିବା ମାତ୍ରେ ଏହାର ଶିଳାନ୍ୟାସ କରାଯାଇଥିଲା, ନିର୍ମାଣ ଆରମ୍ଭ ହୋଇଥିଲା ଏବଂ ବର୍ତ୍ତମାନ ଏହା କାର୍ଯ୍ୟକ୍ଷମ ହୋଇଛି।

ଲଜିଷ୍ଟିକ୍ସ ହବ୍ ଭାବରେ ଏହି ଅଞ୍ଚଳର ଉଦୀୟମାନ ଭୂମିକା ଉପରେ ଆଲୋକପାତ କରି ପ୍ରଧାନମନ୍ତ୍ରୀ ବ୍ୟାଖ୍ୟା କରିଥିଲେ ଯେ ଏହି ଅଞ୍ଚଳ ଦୁଇଟି ପ୍ରମୁଖ ମାଲ ପରିବହନ କରିଡର (ଗାଇଡେଡ୍ ଟ୍ରେନ ପାଇଁ ବିଛାଯାଇଥିବା ସ୍ୱତନ୍ତ୍ର ରେଳ ଟ୍ରାକ୍) ର କେନ୍ଦ୍ର ହେବାକୁ ଯାଉଛି, ଯାହା ଉତ୍ତର ଭାରତ ସହ ବଙ୍ଗୋପସାଗର ଏବଂ ଗୁଜରାଟ ସହିତ ସଂଯୋଗକୁ ବୃଦ୍ଧି କରିଛି। ସେ ଉଲ୍ଲେଖ କରିଥିଲେ ଯେ ଦାଦ୍ରି ଏକ ରଣନୈତିକ କେନ୍ଦ୍ର ଯେଉଁଠାରେ ଏହି ଦୁଇଟି କରିଡର ମିଶିଥାଏ; ଏହାର ଅର୍ଥ ହେଉଛି ଏଠାରେ ଚାଷୀମାନେ ଯାହା ବି ଚାଷ କରନ୍ତି ଏବଂ ଯାହା ବି ଶିଳ୍ପ ଉତ୍ପାଦନ କରନ୍ତି ତାହା ଏବେ ସ୍ଥଳ ଏବଂ ଆକାଶ ମାର୍ଗରେ ବିଶ୍ୱର ପ୍ରତ୍ୟେକ କୋଣକୁ ଶୀଘ୍ର ପରିବହନ କରାଯାଇପାରିବ। ପ୍ରଧାନମନ୍ତ୍ରୀ ମୋଦୀ କହିଥିଲେ “ଏପରି ବହୁମୁଖୀ ସଂଯୋଗୀକରଣ ସମଗ୍ର ବିଶ୍ୱର ନିବେଶକଙ୍କ ପାଇଁ ୟୁପିକୁ ଏକ ପ୍ରମୁଖ ଆକର୍ଷଣ କରିଥାଏ।”

ଏହି କ୍ଷେତ୍ରର ଭାବମୂର୍ତ୍ତିରେ ପରିବର୍ତ୍ତନ ବିଷୟରେ ଉଲ୍ଲେଖ କରି ପ୍ରଧାନମନ୍ତ୍ରୀ କହିଥିଲେ, “ଆଜି, ନୋଏଡା ସମଗ୍ର ବିଶ୍ୱକୁ ସ୍ୱାଗତ କରିବାକୁ ପ୍ରସ୍ତୁତ। ଏହି ସମଗ୍ର ଅଞ୍ଚଳ ‘ଆତ୍ମନିର୍ଭର ଭାରତ’ ପାଇଁ ସଂକଳ୍ପକୁ ମଜବୁତ କରୁଛି।”

ପ୍ରଧାନମନ୍ତ୍ରୀ ଏହି ପ୍ରକଳ୍ପକୁ ବାସ୍ତବତାରେ ପରିଣତ କରିବା ପାଇଁ ନିଜ ଜମି ଦାନ କରିଥିବା ଚାଷୀମାନଙ୍କ ପ୍ରତି କୃତଜ୍ଞତା ପ୍ରକାଶ କରିଥିଲେ। ସେ ଉଲ୍ଲେଖ କରିଥିଲେ ଯେ କୃଷି ଏବଂ ଚାଷବାସ ଏହି ଅଞ୍ଚଳର ଅର୍ଥନୀତି ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ଆଧୁନିକ ସଂଯୋଗୀକରଣର ପ୍ରସାର ପଶ୍ଚିମ ୟୁପିରେ ଖାଦ୍ୟ ପ୍ରକ୍ରିୟାକରଣର ସମ୍ଭାବନାକୁ ଆହୁରି ବୃଦ୍ଧି କରିବ। ସେ କହିଥିଲେ “ଏଠାରୁ, କୃଷି ଉତ୍ପାଦ ଏବେ ବିଶ୍ୱ ବଜାରରେ ଅଧିକ ଦକ୍ଷତାର ସହିତ ପହଞ୍ଚିବ।”

ଅଶୋଧିତ ତୈଳ ଉପରେ ଭାରତର ନିର୍ଭରଶୀଳତା ହ୍ରାସ କରିବାରେ ଆଖୁ ଚାଷୀଙ୍କ ଅବଦାନକୁ ସ୍ୱୀକାର କରି ପ୍ରଧାନମନ୍ତ୍ରୀ ଆଖୁରୁ ଉତ୍ପାଦିତ ଇଥାନଲର ଗୁରୁତ୍ୱପୂର୍ଣ୍ଣ ଭୂମିକା ଉପରେ ଆଲୋକପାତ କରିଥିଲେ। ସେ କହିଥିଲେ ଯେ ଇଥାନଲ ଉତ୍ପାଦନ ବୃଦ୍ଧି କରି ଏହାକୁ ପେଟ୍ରୋଲ ସହିତ ମିଶ୍ରଣ କରିନଥିଲେ, ଭାରତକୁ ପ୍ରତିବର୍ଷ ପ୍ରାୟ ୪.୫ କୋଟି ବ୍ୟାରେଲ – କିମ୍ବା ପ୍ରାୟ ୭୦୦ କୋଟି ଲିଟର – ଅତିରିକ୍ତ ଅଶୋଧିତ ତେଲ ଆମଦାନୀ କରିବାକୁ ପଡିଥାନ୍ତା। ସେ କହିଥିଲେ, “ଏହି ସଙ୍କଟ ସମୟରେ ଆମ ଚାଷୀଙ୍କ କଠିନ ପରିଶ୍ରମ ଦେଶକୁ ଏହି ବଡ଼ ଆଶ୍ୱସ୍ତି ଆଣିଦେଇଛି।”

ପ୍ରଧାନମନ୍ତ୍ରୀ ଆହୁରି ମଧ୍ୟ କହିଥିଲେ ଯେ ଇଥାନଲ୍ କେବଳ ଦେଶକୁ ନୁହେଁ ବରଂ ଚାଷୀମାନଙ୍କୁ ମଧ୍ୟ ପ୍ରଚୁର ଲାଭ ଦେଇଛି; ଏହା ପ୍ରାୟ ୧.୫ ଲକ୍ଷ କୋଟି ଟଙ୍କାର ବୈଦେଶିକ ମୁଦ୍ରା ସଞ୍ଚୟ କରିଛି। ସେ ପୁରୁଣା ଦିନଗୁଡ଼ିକୁ ମନେ ପକାଇଥିଲେ ଯେତେବେଳେ ଆଖୁ ଚାଷୀମାନଙ୍କୁ ସେମାନଙ୍କର ପ୍ରାପ୍ୟ ପାଇଁ ବର୍ଷ ବର୍ଷ ଧରି ଅପେକ୍ଷା କରିବାକୁ ପଡୁଥିଲା। କିନ୍ତୁ ଆଜି ସରକାରଙ୍କ ପ୍ରୟାସ ଯୋଗୁଁ, ଆଖୁ ଚାଷୀଙ୍କ ଅବସ୍ଥାରେ ଯଥେଷ୍ଟ ଉନ୍ନତି ହୋଇଛି।”

ବିମାନବନ୍ଦରଗୁଡ଼ିକ କେବଳ ସୁବିଧା ନୁହେଁ ବରଂ ପ୍ରଗତିର ବାହନ ବୋଲି ଉଲ୍ଲେଖ କରି ପ୍ରଧାନମନ୍ତ୍ରୀ ଭାରତର ବିମାନ ଚଳାଚଳ ଭିତ୍ତିଭୂମିର ବିପୁଳ ପ୍ରସାରଣ ଉପରେ ଗୁରୁତ୍ୱାରୋପ କରିଥିଲେ। ଆଜି ଦେଶରେ ୧୬୦ରୁ ଅଧିକ ବିମାନବନ୍ଦର ଅଛି ବୋଲି ଉଲ୍ଲେଖ କରି ପ୍ରଧାନମନ୍ତ୍ରୀ ମୋଦୀ କହିଥିଲେ ଯେ ବିମାନ ସଂଯୋଗୀକରଣ ଆଉ ବଡ଼ ମହାନଗର ପର୍ଯ୍ୟନ୍ତ ସୀମିତ ନାହିଁ ବରଂ ଛୋଟ ସହରଗୁଡ଼ିକରେ ମଧ୍ୟ ପହଞ୍ଚିପାରୁଛି। ବର୍ତ୍ତମାନର ସରକାର ସାଧାରଣ ଭାରତୀୟଙ୍କ ପାଇଁ ବିମାନ ଯାତ୍ରାକୁ ସୁଲଭ କରିଛନ୍ତି, ଉତ୍ତର ପ୍ରଦେଶରେ ବିମାନବନ୍ଦର ସଂଖ୍ୟା ୧୭କୁ ବୃଦ୍ଧି ପାଇଛି।

ଉଡାନ୍ ଯୋଜନାର ପ୍ରଭାବ ଉପରେ ଆଲୋକପାତ କରି ପ୍ରଧାନମନ୍ତ୍ରୀ କହିଥିଲେ ଯେ ସରକାର ବିମାନବନ୍ଦର ନିର୍ମାଣ ଲାଗି ଉଦ୍ୟମ କରିବା ସହ ଏହା ମଧ୍ୟ ସୁନିଶ୍ଚିତ କରୁଛନ୍ତି ଯେ ସାଧାରଣ ଲେକଙ୍କ ପାଇଁ ଯେପରି ବିମାନଭଡ଼ା ସୁଲଭ ରହିବ। ଉଡାନ୍ ଯୋଜନାରେ ୧୬ ନିୟୁତରୁ ଅଧିକ ନାଗରିକ ସୁଲଭ ମୂଲ୍ୟରେ ଯାତ୍ରା କରିବା ପାଇଁ ଟିକେଟ ବୁକ୍ କରିଛନ୍ତି ବୋଲି ସେ ଉଲ୍ଲେଖ କରିଥିଲେ।  ଶ୍ରୀ ମୋଦୀ କହିଥିଲେ, “ସମ୍ପ୍ରତି, କେନ୍ଦ୍ର ସରକାର ପ୍ରାୟ ୨୯,୦୦୦ କୋଟି ଟଙ୍କାର ଅନୁମୋଦନ ସହିତ ଉଡାନ୍ ଯୋଜନାକୁ ଆହୁରି ବିସ୍ତାର କରିଛନ୍ତି, ଯାହା ଅଧୀନରେ ଆଗାମୀ ବର୍ଷଗୁଡ଼ିକରେ ଛୋଟ ସହରଗୁଡ଼ିକରେ ୧୦୦ଟି ନୂତନ ବିମାନବନ୍ଦର ଏବଂ ୨୦୦ଟି ନୂତନ ହେଲିପ୍ୟାଡ୍ ନିର୍ମାଣ କରାଯିବ। ଏହା ଉତ୍ତର ପ୍ରଦେଶକୁ ମଧ୍ୟ ବଡ଼ ଲାଭ ଦେବ।”

ଭାରତର ଦ୍ରୁତ ଗତିରେ ବଢ଼ୁଥିବା ବିମାନ ଚଳାଚଳ କ୍ଷେତ୍ର ବିଷୟରେ କହି ପ୍ରଧାନମନ୍ତ୍ରୀ କହିଥିଲେ ଯେ ନୂତନ ବିମାନବନ୍ଦର ନିର୍ମାଣ ହେବା ସହିତ ନୂତନ ବିମାନର ଚାହିଦା ମଧ୍ୟ ବୃଦ୍ଧି ପାଉଛି ଏବଂ ବିଭିନ୍ନ ବିମାନ କମ୍ପାନୀଗୁଡ଼ିକ ଶହ ଶହ ନୂତନ ବିମାନ ପାଇଁ ଅର୍ଡର ଦେଉଛନ୍ତି। ଶ୍ରୀ ମୋଦୀ କହିଥିଲେ ଯେ ଏହା ପାଇଲଟ୍, କ୍ୟାବିନ କ୍ରୁ ଏବଂ ରକ୍ଷଣାବେକ୍ଷଣ କର୍ମଚାରୀଙ୍କ ସମେତ ଯୁବପିଢ଼ିଙ୍କ ପାଇଁ ବିପୁଳ ନିଯୁକ୍ତି ସୁଯୋଗ ସୃଷ୍ଟି କରୁଛି; ଏହି ବର୍ଦ୍ଧିତ ଚାହିଦା ପୂରଣ କରିବା ପାଇଁ, ଆମ ସରକାର ବିମାନ ଚଳାଚଳ କ୍ଷେତ୍ରରେ ତାଲିମ ସୁବିଧାର ମଧ୍ୟ ବିସ୍ତାର କରୁଛି।

ଭାରତର ବିମାନ ଚଳାଚଳ ଇକୋସିଷ୍ଟମରେ ଏକ ବଡ଼ ଅଭାବ ବିଷୟରେ ଉଲ୍ଲେଖ କରି ପ୍ରଧାନମନ୍ତ୍ରୀ ରକ୍ଷଣାବେକ୍ଷଣ, ମରାମତି ଏବଂ ନବୀକରଣ (ଏମଆରଓ) କ୍ଷେତ୍ର ପ୍ରତି ଦୃଷ୍ଟି ଆକର୍ଷଣ କରିଥିଲେ। ସେ ଉଲ୍ଲେଖ କରିଥିଲେ ଯେ ୮୫ ପ୍ରତିଶତ ଭାରତୀୟ ବିମାନକୁ ଏବେ ବି ଏମଆରଓ ସେବା ପାଇଁ ବିଦେଶକୁ ଯିବାକୁ ପଡୁଛି। ସରକାର ଏମଆରଓ କ୍ଷେତ୍ରରେ ମଧ୍ୟ ଭାରତକୁ ଆତ୍ମନିର୍ଭରଶୀଳ କରିବା ପାଇଁ ପ୍ରତିବଦ୍ଧ ବୋଲି ସେ କହିଥିଲେ।  ସେ ଜେୱାରରେ ସ୍ଥାପନ ହେବାକୁ ଥିବା ଏମଆରଓ କେନ୍ଦ୍ରର ଭିତ୍ତିପ୍ରସ୍ତର ସ୍ଥାପନ ଉପରେ ଆଲୋକପାତ କରିଥିଲେ। ସେ କହିଥିଲେ ଯେ, ସମ୍ପୂର୍ଣ୍ଣ ହେବା ପରେ, ଏହି କେନ୍ଦ୍ର ଭାରତ ଏବଂ ବିଦେଶୀ ବିମାନଗୁଡ଼ିକୁ ରକ୍ଷଣାବେକ୍ଷଣ ଓ ମରାମତି ସେବା ଯୋଗାଇବ, ଦେଶ ପାଇଁ ରାଜସ୍ୱ ସୃଷ୍ଟି କରିବ । ଏହା ସହିତ ଭାରତର ଅର୍ଥ ଭାରତରେ ରହିବ ଏବଂ ଯୁବକମାନଙ୍କ ପାଇଁ ଅଗଣିତ ନିଯୁକ୍ତି ସୁଯୋଗ ହେବ।

ନାଗରିକମାନଙ୍କୁ ସୁବିଧା ସୁନିଶ୍ଚିତ କରିବା ଏବଂ ସେମାନଙ୍କର ସମୟ ଏବଂ ଟଙ୍କା ସଞ୍ଚୟ କରିବା ସରକାରଙ୍କ ପ୍ରାଥମିକତା ବୋଲି ଉଲ୍ଲେଖ କରି ପ୍ରଧାନମନ୍ତ୍ରୀ ମେଟ୍ରୋ ଏବଂ ବନ୍ଦେ ଭାରତ ଭଳି ଆଧୁନିକ ରେଳ ସେବାର ବିସ୍ତାର ବିଷୟରେ କହିଥିଲେ। ପ୍ରଧାନମନ୍ତ୍ରୀ କହିଥିଲେ, “ଏପର୍ଯ୍ୟନ୍ତ, ୨୫ ନିୟୁତରୁ ଅଧିକ ଯାତ୍ରୀ ଦିଲ୍ଲୀ-ମିରଟ ନମୋ ଭାରତ ରେଳ ବ୍ୟବହାର କରିଛନ୍ତି। ଦିଲ୍ଲୀ ଏବଂ ମିରଟ ମଧ୍ୟରେ ଯାତ୍ରା ପୂର୍ବରୁ କିଛି ଘଣ୍ଟା ଲାଗୁଥିବାବେଳେ ଏବେ କିଛି ମିନିଟ ଲାଗୁଛି।

ଏକ ବିକଶିତ ଭାରତ ପାଇଁ ଆଧୁନିକ ଭିତ୍ତିଭୂମିରେ ଅଭୂତପୂର୍ବ ନିବେଶ ଉପରେ ଗୁରୁତ୍ୱାରୋପ କରି ପ୍ରଧାନମନ୍ତ୍ରୀ କହିଥିଲେ ଯେ ଗତ ଏଗାର ବର୍ଷ ମଧ୍ୟରେ ଭିତ୍ତିଭୂମି ବଜେଟ୍ ଛଅ ଗୁଣରୁ ଅଧିକ ବୃଦ୍ଧି ପାଇଛି; ରାଜପଥ ଏବଂ ଏକ୍ସପ୍ରେସୱେ ନିର୍ମାଣରେ ୧୭ ଲକ୍ଷ କୋଟି ଟଙ୍କା ଖର୍ଚ୍ଚ ହୋଇଛି ଏବଂ ୧ ଲକ୍ଷ କିଲୋମିଟରରୁ ଅଧିକ ନିର୍ମାଣ କରାଯାଇଛି। ସେ ଉଲ୍ଲେଖ କରିଥିଲେ ଯେ ୨୦୧୪ ପୂର୍ବରୁ ୨୦,୦୦୦ କିଲୋମିଟର ରେଳଧାରଣାର ବିଦ୍ୟୁତୀକରଣ ହୋଇଥିବାବେଳେ ତାପରଠାରୁ ୪୦ ହଜାର କିଲୋମିଟର ବିଦ୍ୟୁତୀକରଣ ହୋଇଛି। ବ୍ରଡ-ଗେଜ୍ ନେଟୱାର୍କର ପ୍ରାୟ ୧୦୦ ପ୍ରତିଶତ ବିଦ୍ୟୁତୀକରଣ ହୋଇଛି। ପ୍ରଧାନମନ୍ତ୍ରୀ ଗୁରୁତ୍ୱାରୋପ କରି କହିଥିଲେ ଯେ ପ୍ରଥମ ଥର ପାଇଁ କାଶ୍ମୀର ଉପତ୍ୟକା ଏବଂ ଉତ୍ତର-ପୂର୍ବ ରାଜ୍ୟଗୁଡ଼ିକର ରାଜଧାନୀଗୁଡ଼ିକୁ ରେଳ ନେଟୱାର୍କ ଦ୍ୱାରା ସଂଯୋଗ କରାଯାଉଛି। ଗତ ଦଶ ବର୍ଷ ମଧ୍ୟରେ ବନ୍ଦର କ୍ଷମତା ଦ୍ୱିଗୁଣିତ ହୋଇଛି ଏବଂ ଆଭ୍ୟନ୍ତରୀଣ ଜଳପଥ ସଂଖ୍ୟା ନିରନ୍ତର ବୃଦ୍ଧି ପାଉଛି। ଶ୍ରୀ ମୋଦୀ କହିଛନ୍ତି, ” ଏକ ବିକଶିତ ଭାରତରେ ପରିଣତ ହେବା ପାଇଁ ଆବଶ୍ୟକ ପ୍ରତ୍ୟେକ କ୍ଷେତ୍ରରେ ଦେଶ ଦ୍ରୁତ ପ୍ରଗତି କରୁଛି।”

ବିଶ୍ୱସ୍ତରୀୟ ଚ୍ୟାଲେଞ୍ଜର ସମ୍ମୁଖୀନ ହେବା ପାଇଁ ସାମୂହିକ ପ୍ରୟାସ ଏବଂ ଜାତୀୟ ଏକତା ପାଇଁ ଆହ୍ୱାନ ଦେଇ ପ୍ରଧାନମନ୍ତ୍ରୀ କହିଛନ୍ତି ଯେ ସେ ସଂସଦରେ ଏ ନେଇ ବିସ୍ତୃତଭାବେ ଆଲୋଚନା କରିଛନ୍ତି । ବର୍ତ୍ତମାନ ଚାଲିଥିବା ସଂଘର୍ଷରୁ ଉପୁଜିଥିବା ସଙ୍କଟର ମୁକାବିଲା କିପରି କରିବେ ସେ ବିଷୟରେ ମୁଖ୍ୟମନ୍ତ୍ରୀମାନଙ୍କ ସହିତ ମଧ୍ୟ ବିସ୍ତୃତ ଆଲୋଚନା କରିଛନ୍ତି। ସେ ଲୋକମାନଙ୍କୁ ଶାନ୍ତି ଏବଂ ଧୈର୍ଯ୍ୟର ସହିତ ଏହି ସଙ୍କଟର ମୁକାବିଲା କରିବାକୁ ଆହ୍ୱାନ ଦେଇଥିଲେ ଓ ଏହାକୁ ଭାରତୀୟମାନଙ୍କର ସର୍ବଶ୍ରେଷ୍ଠ ଶକ୍ତି ବୋଲି କହିଥିଲେ। ସେ କହିଥିଲେ ଯେ ଭାରତୀୟମାନଙ୍କ ସ୍ୱାର୍ଥ ଏବଂ ଭାରତର ସ୍ୱାର୍ଥରେ ଯାହା ଅଛି ତାହା ଭାରତ ସରକାରଙ୍କ ନୀତି ଏବଂ ରଣନୀତି। ଶ୍ରୀ ମୋଦୀ ଶେଷରେ କହିଥିଲେ, “ମୁଁ ବିଶ୍ୱାସ କରୁଛି ଯେ ସମସ୍ତ ରାଜନୈତିକ ଦଳ ଦେଶର ସାମୂହିକ ପ୍ରୟାସକୁ ମଜବୁତ କରିବେ।”