ନୀଳଗିରି : ବଧୂକୁ ନିର୍ଯ୍ୟାତନା ଦେଇ ମାଡ଼ମାରି ମାରିଦେଇଥିବାର ନୀଳଗିରି ଥାନାରେ ଅଭିଯୋଗପରେ ସ୍ୱାମୀ ଗିରଫ ହୋଇ ଜେଲ ଯାଇଥିଲେ । ପୁଣି ଏହି ଘଟଣାରେ ସଂପୃକ୍ତଥିବା ନଣନ୍ଦ ଓ ଦିଅରକୁ ନୀଳଗିରି ପୋଲିସ ଗିରଫ କରି ଜେଲ ହାଜତକୁ ପଠାଇ ଦେଇଛି । ସୂଚନା ଅନୁସାରେ ନୀଳଗିରି ଥାନା ସିଆଡିମାଳ ପଞ୍ଚାୟତ ଅଧିନ ସୀତାପତିପୁର ଗ୍ରାମର ଉମାକାନ୍ତ ବେହେରାଙ୍କ ଝିଅକୁ ୮ ବର୍ଷ ପୂର୍ବେ ଉକ୍ତ ଗ୍ରାମର ଚନ୍ଦନ ସିଂ ପ୍ରେମ ବିବାହ କରିଥିଲେ ।
କିଛି ବର୍ଷପରେ ସ୍ୱାମୀ ଓ ସ୍ତ୍ରୀ ମଧ୍ୟରେ ଝଗଡ଼ା ହେବା ସହିତ ଚନ୍ଦନ ନିଜର ସ୍ତ୍ରୀକୁ ଶାରୀରିକ ଓ ମାନସିକ ନିର୍ଯ୍ୟାତନା ଦେଇ ଆସୁଥିଲେ । ଅଗଷ୍ଟ ମାସ ୧୧ ତାରିଖ ସନ୍ଧ୍ୟାରେ ନିଜର ସ୍ତ୍ରୀ ସୁଭଦ୍ରାକୁ ଚନ୍ଦନ ଓ ତାର ଭଉଣୀ, ଭାଇମାନେ ମିଶି ପିଟି ପିଟି ମାରିଦେଇଥିବାର ଶୁଭଦ୍ରାର ବାପା ନୀଳଗିରି ଥାନାରେ ଅଭିଯୋଗ କଲାପରେ ନୀଳଗିରି ଥାନାର ଆଇ.ଆଇ.ସି. ମିନତୀ ବିଶ୍ୱାଳ ଘଟଣାର ତଦନ୍ତ କରି ପ୍ରଥମେ ସ୍ୱାମୀ ଚନ୍ଦନଙ୍କୁ ପରେ ଭଉଣୀ , ଭାଇକୁ ଗିରଫ କରି କୋର୍ଟ ଚାଲାଣ କରିଥିଲେ । କୋର୍ଟରେ ସେମାନଙ୍କ ଜାମିନ୍ ନାମାଞ୍ଜୁର ହେବାରୁ ଜେଲ ହାଜତକୁ ପଠାଇ ଦିଆଯାଇଛି ।
