ଦଶପଲ୍ଲା୨୪/୧ : ଚଳିତ ତ୍ରିସ୍ତରୀୟ ପାଞ୍ଚାୟତ ନିର୍ବାଚନ ପାଇଁ ସବୁଦଳ ଲାଗିପଡିଛନ୍ତି । ବିଜୟ ପାଇଁ ରଣକୌଶଳ ଚାଲିଥିବା ବେଳେ ପାଞ୍ଚାୟତ ନିର୍ବାଚନ ପୂର୍ବରୁ ବିଧାୟକ ଙ୍କ ଫଳକ ଓ ଶିଳାନ୍ୟାସ ଉଦଘାଟନ ଓ ଏବେ ପ୍ରଚାର ବେଶ ଚର୍ଚ୍ଚାର ବିଷୟ ହୋଇଛି । ମାତ୍ର ବିଧାୟକ ନିର୍ବାଚନ ପ୍ରଚାର ପାଇଁ ଦଶପଲ୍ଲା ବ୍ଲକ କୁଜାମେଣ୍ଢି ଗ୍ରାମ ପଂଚାୟତ ଯାଇଥିବା ବେଳେ ଏହି ପାଞ୍ଚାୟତ ର ପଧାନପଡା ଗ୍ରାମବାସୀ ବିଧାୟକ ଙ୍କ ଉପରେ ତାତି ଥିବାବେଳେ ସେହି ପଂଚାୟତର ବଣି ଗ୍ରାମବାସୀ ମାନେ ହୁଳହୁଳି ପକାଇ ବିଧାୟକ ଙ୍କୁ ଆଦରି ନେଇଥିଲେ ।
ଦୀର୍ଘଦିନ ହେଲା କୁଜାମେଣ୍ଢି ଦେଇ ବହି ଯାଇଥିବା ବୃତଙ୍ଗ ସେତୁ ପାଇଁ ପଞ୍ଚାୟତ ବାସୀ ଓ ନିକଟ ତମ ପଂଚାୟତ ର କେତକ ଗ୍ରାମର ଗ୍ରାମବାସୀ ମାନେ ଦାବି କରି ଆସୁଥିବା ବେଳେ ବିଭିନ୍ନ ସମୟ ରେ ଗ୍ରାମବାସୀ ମାନେ ଆନ୍ଦୋଳନାତ୍ମକ ପନ୍ଥା ଗ୍ରହଣ କରିଥିଲେ । ସବୁବେଳେ କେବଳ ପ୍ରଶାସନିକ ପ୍ରତିଶ୍ରୁତି ମିଳିଥିଲେ ମଧ୍ୟ କୌଣସି ସୁଫଳ ମିଳୁନାହିଁ । ଏହାକୁ ନେଇ ଏହି ନଦୀ ଉପରେ ନିର୍ଭରଶୀଳ ଗ୍ରାମବାସୀମାନେ ଗତ ପଂଚାୟତ ନିର୍ବାଚନ ସମୟ ରେ ନିର୍ବାଚନ ପ୍ରତ୍ୟାହାର କରିଥିଲେ । ଏପରିକି ବିଧାନସଭା ନିର୍ବାଚନ ସମୟରେ ଏହି ପୋଲ ପାଇଁ ବିଧାୟକ ପ୍ରତିଶ୍ରୁତି ଦେଇଥିଲେ ମଧ ଆଜିପର୍ଯ୍ୟନ୍ତ ପୋଲ ନିର୍ମାଣ ହୋଇନାହିଁ । ଏହାକୁ ନେଇ ଲୋକ ମାନଙ୍କ ମଧ୍ୟରେ ଅସନ୍ତୋଷ ଲାଗି ରହିଥିବା ବେଳେ ବିଧାୟକ ଙ୍କ ଉପରେ ତାତିଥିଲେ ପ୍ରଧାନପଡା ଗ୍ରାମବାସୀ ।
ଅନ୍ୟ ପାର୍ଶ୍ୱରେ ସେହି ପାଞ୍ଚାୟତ ର ବଣି ଗ୍ରାମର ଗ୍ରାମବାସୀ ମାନେ ବିଧାୟକ ଙ୍କୁ ଆଦରି ନେଇଛନ୍ତି ।ପୂର୍ବରୁ ବୃତଙ୍ଗ ସେତୁ ନିର୍ମାଣ ପାଇଁ ଆନ୍ଦୋଳନ ରେ ସାମିଲ ହୋଇଥିଲା ଏହିଗ୍ରାମ । ଯାହାର ନେତୃତ୍ୱ ନେଇଥିଲେ ଏହି ଗ୍ରାମର ଜିତୁ ସାହୁ । ଏବେ ଜିତୁ ସାହୁ ବିଧାୟକ ଙ୍କ ସମର୍ଥନ ରେ ସମିତି ସଭ୍ୟ ଭାବେ ପ୍ରତିଦ୍ବନ୍ଦିତା କରୁଥିବା ବେଳେ ବଣି ଗ୍ରାମବାସୀ ବିଧାୟକ ଙ୍କୁ ସମର୍ଥନ ଜଣାଇଛନ୍ତି । ଏପରିକି ନିର୍ବାଚନ ପରେ ଟେଣ୍ଡର କରାଯାଇ ଏହି ପୋଲ ନିର୍ମାଣ କରାଯିବ ବୋଲି ବିଧାୟକ ପୁଣି ପ୍ରତିଶୃତି ଦେଇଛନ୍ତି ।ମାତ୍ର ବୃତଙ୍ଗ ପୋଲ ନିର୍ମାଣ କୁ ନେଇ ପଞ୍ଚାୟତ ବାସୀ ଙ୍କ ମଧ୍ୟରେ ଅସନ୍ତୋଷ ଜାରି ରହିଥିବା ବେଳେ ଆଗାମୀ ପଞ୍ଚାୟତ ନିର୍ବାଚନ ରେ ଏହାର କି ପ୍ରଭାବ ରହିବ ତାହା ଦେଖିବାକୁ ବାକି ରହିଛି । ମାତ୍ର ଏଭଳି ଘଟଣା ରାଜନୈତିକ ପ୍ରଣୋଦିତ ବୋଲି ଚର୍ଚା ହେଉଥିବା ବେଳେ ନିର୍ବାଚନ ସମୟ ରେ ବିଧାୟକ ଙ୍କୁ ବିରୋଧ ବିଧାୟକ ଙ୍କ ସମର୍ଥକ ପ୍ରାର୍ଥୀ ଙ୍କ ଉପରେ ପ୍ରଭାବ ପକାଇବା ସମ୍ଭାବନା ରହିଛି ।
