ବେତନଟୀ : ବୈଶିଙ୍ଗା ଥାନା ଅଧୀନ ଗଡ଼ଦେଉଳିଆ ଗାଁ ନିକଟରେ ଥିବା ଆକାଶିଆ ଜଙ୍ଗଲରେ ଥିବା ଏକ ଗଛରୁ ବୁଧବାର ଜଣେ ବିବାହିତ ଯୁବକଙ୍କ ଝୁଲନ୍ତା ମୃତଦେହକୁ ଉଦ୍ଧାର କରିଛି ବୈଶିଙ୍ଗା ପୁଲିସ l ମୃତ ଯୁବକ ଜଣକ ବାଲେଶ୍ୱର ସଦର ଥାନା ଅଧୀନ ସହାଦା ଗାଁର ପାଗୁଲୁ ସିଂର ପୁଅ ଡ଼ୁମା ସିଂ(୩୨)ବୋଲି ଜଣାପଡିଛି l ପୁଲିସର ସୂଚନା ମୁତାବକ ମୃତ ଡ଼ୁମା ଦୁଇ ମାସ ହେବ ଗଡ଼ଦେଉଳିଆ ସ୍ଥିତ ନିଜ ଶଶୁର ଘରେ ରହି ଆସୁଥିଲେ l ବୁଧବାର ସକାଳୁ ସମୟରେ ଶୌଚ ହେବାକୁ କହି ଘରୁ ବାହାରି ଯାଇଥିଲା ଯେ ଦୀର୍ଘ ସମୟ ପର୍ଯ୍ୟନ୍ତ ଘରକୁ ଫେରିନଥିଲେ l ତାଙ୍କ ସ୍ତ୍ରୀ ମାମା ଓ ପରିବାର ଲୋକ ବହୁ ଖୋଜାଖୋଜି କରିଥିଲେ । କିଛି ଗ୍ରାମବାସୀ ମଶାଣି ପାଖ ଜଙ୍ଗଲ ଭିତରେ ଗୋଟେ ଗଛରେ ଏକ ମୃତଦେହ ଝୁଲୁଥିବାର ଦେଖି ପରିବାର ବର୍ଗଙ୍କୁ ଖବର ଦେଇଥିଲେ । ପରିବାର ବର୍ଗ ସଙ୍ଗେ ସଙ୍ଗେ ଘଟଣାସ୍ଥଳରେ ପହଞ୍ଚି ଡ଼ୁମାର ମୃତ ଦେହ ଦେଖିବାକୁ ପାଇଥିଲେ l ପରେ ମୃତ ଯୁବକଙ୍କ ଶଳା ସନିଆ ସିଂ ବୈଶିଙ୍ଗା ଥାନାରେ ଏକ ଲିଖିତ ଅଭିଯୋଗ ଦେବା ପରେ ଏ ନେଇ ବୈଶିଙ୍ଗା ଥାନାରେ ଏକ ଅପମୃତ୍ୟୁ ମାମଲା ରୁଜୁ କରିବା ସହ ଘଟଣା ସ୍ଥଳ ପହଞ୍ଚି ତଦନ୍ତ କରିଥିଲା ବୈଶିଙ୍ଗା ପୁଲିସ । ମୃତଦେହ ଜବତ କରିବା ସହ ବ୍ୟବଚ୍ଛେଦ ପାଇଁ ବାରିପଦା ଜିଲ୍ଲା ମୁଖ୍ୟ ଚିକିତ୍ସାଳୟକୁ ପଠାଇଥିବା ବେଳେ ଅଧିକ ତଦନ୍ତ ଜାରି ରଖିଥିବା ଥାନା ଅଧିକାରୀ ତପନ କୁମାର ପ୍ରଧାନ ସୂଚନା ଦେଇଛନ୍ତି l ଅନ୍ୟପଟେ ପାରିବାରିକ କଳହରୁ ଯୁବକ ଜଣକ ଆତ୍ମହତ୍ୟା କରିଥାଇ ପାରନ୍ତି ବୋଲି ପୁଲିସ ସନ୍ଦେହ କରୁଛି l
