ବିଶାଳ ସ୍ୱାସ୍ଥ୍ୟ ଶିବିରରେ ୪ ହଜାରରୁ ଅଧିକ ରୋଗୀଙ୍କ ଚିକିତ୍ସା ସହ ୩୬୫ଟି ଚକ୍ଷୁ ଅସ୍ତ୍ରୋପଚାର କଲା ସେନାବାହିନୀ ଚିକିତ୍ସା ସେବା
ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ଜନ୍ମମାଟି ମୟୂରଭଞ୍ଜ ଜିଲ୍ଲାର ରାଇରଙ୍ଗପୁରଠାରେ ସେନାବାହିନୀ ଚିକିତ୍ସା ସେବା (ଏଏଫଏମଏସ) ପକ୍ଷରୁ ଏକ ବିଶାଳ ସ୍ୱାସ୍ଥ୍ୟସେବା ଶିବିର ଏବଂ ‘ଅପରେସନ ଦୃଷ୍ଟି’ର ଦ୍ୱାଦଶ ସଂସ୍କରଣ ଅନୁଷ୍ଠିତ ହୋଇଯାଇଛି । ଏଥିରେ ସେନାବାହିନୀର ପ୍ରଶିକ୍ଷିତ ବିଶେଷଜ୍ଞ ଡାକ୍ତର, ଦନ୍ତ ଚିକିତ୍ସକ ଏବଂ ସ୍ୱାସ୍ଥ୍ୟକର୍ମୀମାନେ ତିନି ଦିନ ଧରି ଚାରି ହଜାରରୁ ଅଧିକ ରୋଗୀଙ୍କର ଚିକିତ୍ସା କରିଥିଲେ । ପ୍ରତ୍ୟେକ ରୋଗୀଙ୍କୁ ଶିବିର ପରିସରରେ ମାଗଣାରେ ଚିକିତ୍ସା କରାଯାଇଥିଲା।
ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ଜନ୍ମସ୍ଥାନ ମୟୂରଭଞ୍ଜର ଗ୍ରାମାଞ୍ଚଳର ଅନେକ ପରିବାର ପାଇଁ ଜଣେ ବିଶେଷଜ୍ଞ ଡାକ୍ତରଙ୍କ ଚିକିତ୍ସା ପାଇବା ସମୟସାପେକ୍ଷ ଏବଂ ମହଙ୍ଗା ହୋଇଥାଏ । ଏଥିପାଇଁ ଦୂର ସହରକୁ ଯିବାକୁ ପଡ଼ିଥାଏ ଏବଂ ପ୍ରାୟତଃ ଦୈନିକ ମଜୁରି ହରାଇବା ଏବଂ ଚିକିତ୍ସା ସ୍ଥଗିତ ରଖିବା ଭଳି ସମସ୍ୟା ଦେଖାଦିଏ । ଅପରେସନ୍ ଦୃଷ୍ଟି ମାଧ୍ୟମରେ ସେନାବାହିନୀ ଚିକିତ୍ସା ସେବା ପକ୍ଷରୁ ଲୋକଙ୍କ ଘରପାଖରେ ବିଶେଷଜ୍ଞ ଡାକ୍ତର ଓ ସ୍ୱାସ୍ଥ୍ୟକର୍ମୀଙ୍କ ଚିକିତ୍ସାକୁ ପହଞ୍ଚାଇଥିଲା। ଏଠାରେ ଚକ୍ଷୁ, ହୃଦରୋଗ, ନେଫ୍ରୋଲୋଜି, ଚର୍ମରୋଗ, ଦନ୍ତ ଏବଂ ସାଧାରଣ ଭେଷଜ ଚିକିତ୍ସା ସେବା ଯୋଗାଇ ଦିଆଯାଇଥିଲା । ରୋଗୀଙ୍କୁ ଗୋଟିଏ କ୍ୟାମ୍ପସ ମଧ୍ୟରେ ରୋଗ ପରୀକ୍ଷା, ଚିକିତ୍ସା ଏବଂ ଆବଶ୍ୟକ ସ୍ଥଳେ ରେଫର ସୁବିଧା ମିଳିଥିଲା ।
ହୃଦ୍ରୋଗ ବିଭାଗରେ ୪୦୦ରୁ ଅଧିକ ରୋଗୀଙ୍କ ଚିକିତ୍ସା ସହ ୨୯୮ଟି ଇସିଜି ଏବଂ ୪୦୬ଟି ଇକୋକାର୍ଡିଓଗ୍ରାମ୍ ହୋଇଥିଲା । ଏହା ବ୍ୟତୀତ ୨୯ ଜଣ ରୋଗୀଙ୍କୁ ଉନ୍ନତ ଚିକିତ୍ସା ପାଇଁ ଚିହ୍ନଟ କରାଯାଇ ଆଞ୍ଜିଓଗ୍ରାଫି, ସିଟି ଆଞ୍ଜିଓଗ୍ରାଫି, ଭାଲ୍ଭ୍ ଅସ୍ତ୍ରୋପଚାର, ଡିଭାଇସ୍ ଇମ୍ପ୍ଲାଣ୍ଟେସନ୍ ଏବଂ ବେଲୁନ୍ ପଲ୍ମୋନାରୀ ଭାଲ୍ଭୋଟୋମି ପାଇଁ ଅନ୍ୟତ୍ର ପଠାଯାଇଛି । ବୃକ୍କ ରୋଗ ବିଭାଗରେ ୪୦୦ରୁ ଅଧିକ ରୋଗୀଙ୍କ ଚିକିତ୍ସା ସହ ୩୪୧ଟି ଅଲଟ୍ରାସାଉଣ୍ଡ କରାଯାଇଛି । ଚର୍ମରୋଗ ବିଭାଗରେ ୫୦୦ରୁ ଅଧିକ ରୋଗୀଙ୍କୁ, ଦନ୍ତ ବିଭାଗରେ ୨୨୧ ଜଣ ରୋଗୀଙ୍କୁ, ସାଧାରଣ ଭେଷଜ ବିଭାଗରେ ୩୩୯ ଜଣ ରୋଗୀଙ୍କୁ ଚିକିତ୍ସା ଦିଆଯାଇଛି ।
ବୁଧବାର ଏଏଫଏମଏସ ଡିଜି ଏୟାର ମାର୍ଶାଲ ସନ୍ଦୀପ ଥରେଜା ରାଇରଙ୍ଗପୁର ସ୍ୱାସ୍ଥ୍ୟ ଶିବିରକୁ ଆସିଥିଲେ। ସେ ରୋଗୀ ଏବଂ ସେମାନଙ୍କ ସମ୍ପର୍କୀୟଙ୍କ ସହ ମତବିନିମୟ କରିଥିଲେ । ସେହିପରି ଅସ୍ତ୍ରୋପଚାର ହୋଇଥିବା ରୋଗୀଙ୍କୁ ଔଷଧ କିଟ୍ ପ୍ରଦାନ କରିଥିଲେ। ଏହି ଶିବିରରେ ସହଯୋଗ କରିଥିବା ସମସ୍ତଙ୍କୁ ସେ ଉଚ୍ଚ ପ୍ରଶଂସା କରିଥିଲେ ।
ଏହି ଶିବିରରେ ସ୍ୱାସ୍ଥ୍ୟସେବା ପାଇଥିବା ରୋଗୀ ଏବଂ ସେମାନଙ୍କର ସମ୍ପର୍କୀୟମାନେ ଏଏଫଏମଏସର ସାଧୁ ଉଦ୍ୟମକୁ ପ୍ରଶଂସା କରିଥିଲେ । ଉଦାହରଣ ସ୍ୱରୂପ, ଦୀର୍ଘ ଦିନ ଧରି ମୋତିଆବିନ୍ଦୁ କାରଣରୁ ଦୃଷ୍ଟି ଶକ୍ତି ହରାଇବାର ଆଶଙ୍କାରେ ପଡ଼ିଥିବା ୭୫ ବର୍ଷ ବୟସ୍କ ବିଶ୍ୱନାଥଙ୍କୁ ଏଏଫଏମଏସର ଡାକ୍ତରମାନେ ଦକ୍ଷତାର ସହିତ ଚକ୍ଷୁ ଅସ୍ତ୍ରୋପଚାର କରାଇଥିଲେ। ଦୀର୍ଘ ଦୁଇ ବର୍ଷ ଧରି ଚକ୍ଷୁ ସମସ୍ୟାରେ ପୀଡ଼ିତ ବିଶ୍ୱନାଥ ସବୁଆଡ଼ୁ ନିରାଶ ହେବା ପରେ ଶେଷରେ ଏହି ଶିବିର ମାଧ୍ୟମରେ ନୂଆ ଦୃଷ୍ଟି ଶକ୍ତି ଫେରିପାଇଛନ୍ତି । ଆଉ ଜଣେ ୬୦ ବର୍ଷୀୟା ମହିଳା ସୋମ୍ବାରୀ ଗୋପେ ମଧ୍ୟ ଆଧୁନିକ ମୋତିଆବିନ୍ଦୁ ଅସ୍ତ୍ରୋପଚାର ମାଧ୍ୟମରେ ନିଜର ଦେଖିବା ଶକ୍ତି ଫେରିପାଇଛନ୍ତି ।
ରାଇରଙ୍ଗପୁରରେ ଆୟୋଜିତ ସ୍ୱାସ୍ଥ୍ୟ ଶିବିର ଅପରେସନ୍ ଦୃଷ୍ଟି ଏଏଫଏମଏସ ପକ୍ଷରୁ ଦେଶବ୍ୟାପୀ ଯୋଗାଇ ଦିଆଯାଉଥିବା ସ୍ୱାସ୍ଥ୍ୟସେବା ପ୍ରୟାସର ଏକ ଅଂଶବିଶେଷ । ପୂର୍ବରୁ ଏହି ପ୍ରତିଷ୍ଠାନ ଦେଶର ବିଭିନ୍ନ ଉପାନ୍ତ ତଥା ପଛୁଆ ଅଞ୍ଚଳରେ ସ୍ୱାସ୍ଥ୍ୟସେବା ଯୋଗାଇ ଦେଇ ସୁଖ୍ୟାତି ଅର୍ଜନ କରିଛି । ସେନାବାହିନୀ ଚିକିତ୍ସା ସେବା – ଏଏଫଏମଏସ ରାଇରଙ୍ଗପୁରରେ କେବଳ ଏକ ସ୍ୱାସ୍ଥ୍ୟସେବା ଶିବିର ଆୟୋଜନ କରିନାହିଁ, ବରଂ ମୟୂରଭଞ୍ଜ ଭଳି ଏକ ପଛୁଆ ଅଞ୍ଚଳରେ ଆରୋଗ୍ୟର ସ୍ପର୍ଶ ଏବଂ ଦୃଷ୍ଟି ଶକ୍ତିର ଆଲୋକ ବିତରଣ କରିଛି ।
