ବାରିପଦା : ୨୦୧୯ ମସିହା ଠାରୁ ଓଡିଶାରେ ଥିବା ବିଭିନ୍ନ ପ୍ରକାର ଲୋକ କଳାର ପ୍ରଚାର ପ୍ରସାର ସହ ସୁରକ୍ଷା ପାଇଁ ଏହି ଦିନଟିକୁ ଓଡିଶାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଲୋକକଳା ଦିବସ ଭାବରେ ଘୋଷଣା କରିଛନ୍ତି । ସେହିଦିନ ଠାରୁ ଜୁନ୍ ୧୪ ତାରିଖ ଦିନଟିକୁ ଲୋକକଳା ଦିବସ ଭାବରେ ଓଡିଶାରେ ପାଳନ କରାଯାଇ ଆସୁଛି । ଆଜି ବିଜେଡି ସାଂସ୍କୃତିକ ସମନ୍ୱୟ ସାମୁଖ୍ୟ ପକ୍ଷରୁ ରାଜ୍ୟସ୍ତରରେ ଏହି ଲୋକକଳା ଦିବସକୁ ଭର୍ଚ୍ଚୁଆଲ ମୋଡରେ ପାଳନ କରାଯାଇଥିବା ବେଳେ, ସବୁ ଜିଲ୍ଲାର ବିଭିନ୍ନ ପ୍ରକାରର ଲୋକକଳା ପରିବେଷଣ କରୁଥିବା କଳାକାର ମାନେ ନିଜନିଜର ସାଂସ୍କୃତିକ କାର୍ଯ୍ୟକ୍ରମ ମାଧ୍ୟମରେ ଏହି ଅବସରରେ ଯୋଡି ହୋଇ ନିଜନିଜର କଳାକୌଶଳ ପ୍ରଦର୍ଶନ କରିଥିଲେ ।
ତେବେ ଚଳିତଥର କରୋନା ସଚେତନତାର ବାର୍ତ୍ତାକୁ ନେଇ କଳାକାର ମାନେ ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରିଥିବାବେଳେ, ମୟୂରଭଞ୍ଜ ଜିଲ୍ଲା ସଂଯୋଜକ ଦୀପକ କୁମାର ନାୟକଙ୍କ ନେତୃତ୍ୱରେ ବାରିପଦା ବ୍ଲକ ହାତିକୋଟ ଗ୍ରାମପଞ୍ଚାୟତର ଜାମଦାପାଳ ଗ୍ରାମରେ ଜିଲ୍ଲାସ୍ତରୀୟ ଲୋକ କଳା ଦିବସ ପାଳନ କରାଯାଇଥିବାର ଜଣାଯାଇଛି । ଏହି ଅବସରରେ ସାନ୍ତାଳି ନୃତ୍ୟ ଗୀତ ମାଧ୍ୟମରେ କରୋନା ସଚେତନତା ଧର୍ମୀ ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରାଯାଇଥିଲା ।
ମୟୂରଭଞ୍ଜ ଜିଲ୍ଲାର ଲୋକପ୍ରିୟ ସାନ୍ତାଳି ନୃତ୍ୟ ମାଧ୍ୟମରେ କରୋନା ସଚେତନତାର ବାର୍ତ୍ତାକୁ ଭର୍ଚ୍ଚୁଆଲ ମିଟ୍ରେ ଉପସ୍ଥିତ ଥିବା ସମସ୍ତ ମାନ୍ୟଗଣ୍ୟ ଅତିଥି ବେଶ ପ୍ରଶଂସା କରିଥିବାବେଳେ, କାର୍ଯ୍ୟକ୍ରମ ପରିଚାଳନାରେ ସାଂସ୍କୃତିକ ସମନ୍ୱୟ ସାମୁଖ୍ୟର ସଦସ୍ୟ ରମାକାନ୍ତ ରାଉତ, ଦିଲ୍ଲିପ କୁମାର ପାତ୍ର, ଜୟ ବୋଷ, ଗଣେଶ ଚନ୍ଦ୍ର ମହାନ୍ତ ଓ ସାମଲ କୁମାର ମାଝୀ ପ୍ରମୁଖ ପରିଚାଳନା କରିଥିଲେ । ରାଜ୍ୟସ୍ତରରେ ବିଜେଡି ସାଂସ୍କୃତିକ ସମନ୍ୱୟ ସାମୁଖ୍ୟର ଆବାହକ ରବି ନାରାୟଣ ନନ୍ଦଙ୍କ ତତ୍ତ୍ୱାବଧାନ କ୍ରମେ ରାଜ୍ୟ ସଂଯୋଜକ ପ୍ରବୀର ମହାନ୍ତି କାର୍ଯ୍ୟକ୍ରମ ପରିଚାଳନା କରିଥିଲେ ।
Comments are closed.