ଭଞ୍ଜନଗର – କରୋନା ନେଲା କରୋନା ଯୋଦ୍ଧାଙ୍କ ଜୀବନ । ବେଲଗୁଣ୍ଠା ବ୍ଲକ ଧୁମୁଛାଇ ପଞ୍ଚାୟତ ସରପଞ୍ଚ ମନୋଜ କୁମାର ପ୍ରଧାନଙ୍କ କରୋନା ସଂକ୍ରମଣ କାରଣରୁ ମୃତ୍ୟୁ ଘଟିଛି । ଜଣେ ଆଗଧାଡିର କରୋନା ଯୋଦ୍ଧା ଭାବେ ଗତ ୪ମାସ ଧରି ନିଜକୁ ପ୍ରବାସୀ ଓଡିଆଙ୍କ ସେବା ତଥା କରୋନା ଆକ୍ରାନ୍ତଙ୍କ ସେବାରେ ନିୟୋଜିତ କରିଥିଲେ । ଏଭଳି ଦୁଃଖଦ ଖବର ପ୍ରଚାରିତ ହେବାମାତ୍ରେ ଭଞ୍ଜନଗର ଅଂଚଳରେ ଶୋକର ଛାୟା ଖେଳିଯାଇଛି ।
ଭଞ୍ଜନଗର ମେଡିକାଲ ପରିସରରେ ଏଡିଏମ୍ ବିଶାଲ ସିଂ, ଉପଜିଲ୍ଲାପାଳ ରାଜେନ୍ଦ୍ର ମିଞ୍ଜ, ବେଲଗୁଣ୍ଠା ବିଡିଓ ଶଶୀଭୁଷଣ ମହାପାତ୍ର, ବେଲଗୁଣ୍ଠା ତହସିଲଦାର ସରୋଜ କୁମାର ବେହେରା, ଭଞ୍ଜନଗର ଏସଡିପିଓ ଶୁଭ୍ରାଂଶୁ ଶେଖର ମିଶ୍ର, ଥାନା ଅଧିକାରୀ ସୁଦୀପ୍ତ କୁମାର ସାହୁ, ବେଲଗୁଣ୍ଠା ଫାଣ୍ଡି ଅଧିକାରୀ ପ୍ରକାଶ ଚନ୍ଦ୍ର ସାହୁ, ମେଡିକାଲ ସୁପରିଟେଣ୍ଡଣ୍ଟ ଡାକ୍ତର ସିତାଂଶୁ ଶେଖର ଶତପଥୀ ପ୍ରମୁଖ ଉପସ୍ଥିତ ରହି ଦିବଙ୍ଗତ ସରପଞ୍ଚଙ୍କ ଶବଧାରରେ ପୁଷ୍ପଗୁଛ ସହ ଅର୍ପଣ କରିବାସହ ତାଙ୍କୁ ଶେଷ ସମ୍ମାନ ପ୍ରଦାନ କରିଥିଲେ । ସରପଞ୍ଚଙ୍କ ଶବର କଫିନ ଉପରେ ତାଙ୍କର ବହୁ ସମର୍ଥକ ଜାତୀୟ ପତାକା ପକାଇ ଅମର ରହେ ଧ୍ୱନୀ ଦେଇଥିଲେ ।
କରୋନା ସଂକ୍ରମଣ ଆରମ୍ଭରୁ ଧୁମୁଛାଇ ପଞ୍ଚାୟତରେ ପ୍ରବାସୀଙ୍କ ସଂଗରୋଧ କେନ୍ଦ୍ର ପରିଚାଳନା ଠାରୁ ଆରମ୍ଭ କରି ଏବେ ପଞ୍ଚାୟତର କୋଭିଡ କେର୍ ହୋମ ଜଗିବା ଭଳି ସବୁ କାମ ସେ ନିଜେ ପ୍ରତ୍ୟକ୍ଷ ଭାବେ ବୁଝୁଥିଲେ । ଜିଲ୍ଲା ପ୍ରଶାସନର ସମସ୍ତ ଗାଇଡଲାଇନ୍ ମାନି ସେ ତାଙ୍କର ସେବା ସାଧାରଣ ଲୋକଙ୍କୁ ଯୋଗାଇ ଆସୁଥିଲେ । କରୋନା ରୋଗୀଙ୍କୁ ସେ ସାହାସ ଯୋଗଇବାସହ ସେଠାରେ କ୍ୟାମ୍ପ ପକାଇ ସମସ୍ତ କଥା ବୁଝୁଥିଲେ । ସେ ଜଣେ ସଚ୍ଚୋଟ, କର୍ମନିଷ୍ଠ ସେବକଭାବେ ନିଜର କର୍ତ୍ତବ୍ୟ ସଂପାଦନରେ ତିଳେମାତ୍ର ଅବହେଳା କରିନଥିଲେ । ଆଉ ଶେଷରେ ଗତ କିଛିଦିନ ହେବ ସେ ଜ୍ୱରରେ ପୀଡିତ ରହିଥିଲେ ମଧ୍ୟ ଏଥିରେ ଭୃକ୍ଷେପ ନକରି କୋଭିଡ କେର୍ ହୋମ ଦାୟିତ୍ୱ ନିଜେ ତଦାରଖ କରୁଥିଲେ ।
ଗୁରୁବାର ରାତି ପାଖାପାଖି ସାଢେ ୧୦ଟାରେ ସେ ଅଧିକ ଅସୁସ୍ଥତା ଅନୁଭବ କରିବାସହ ନିଶ୍ୱାସ ପ୍ରଶ୍ୱାସ ନେବାରେ କଷ୍ଟ ଅନୁଭବ କରିବାରୁ ତୁରନ୍ତ ଭଞ୍ଜନଗର ମେଡିକାଲରେ ଭର୍ତ୍ତି ହୋଇଥିଲେ । ହେଲେ ମେଡିକାଲରେ ପହଞ୍ଚିବାପରେ ତାଙ୍କର ପ୍ରାଣବାୟୁ ଉଡିଯାଇଥିଲା । ଏଭଳି ଖବର ପ୍ରଚାରିତ ହେବାପରେ ସାରା ଭଞ୍ଜନଗରରେ ଶୋକର ଛାୟା ଖେଳିଯାଇଥିଲା । ଗତକାଲି ରାତିରୁ ମୃତ ସରପଞ୍ଚଙ୍କ ଶବ ଏଠାରେ ମର୍ଯ୍ୟଦା ସହ ରଖାଯାଇଥିଲା । ରାତିରେ ତାଙ୍କର ଆଣ୍ଟିଜେନ୍ ଟେଷ୍ଟ ମଧ୍ୟ କରାଯାଇଥିଲା । ଏହାପରେ ସେ କରୋନାରେ ମୃତ୍ୟୁବରଣ କରିଥିବା ସ୍ପଷ୍ଟ କରାଯାଇଥିଲାବୋଲି ଉପଜିଲ୍ଲାପାଳ ରାଜେନ୍ଦ୍ର ମିଞ୍ଜ ନିଜ ପ୍ରତିକି୍ରୟାରେ ଉଲ୍ଲେଖ କରିଛନ୍ତି । ଅନ୍ୟପକ୍ଷରେ ତାଙ୍କର ସେବା ମନୋଭାବ ସବୁଦିନ ପାଇଁ ମନେ ରହିବବୋଲି ଧୁମୁଛାଇ ପଞ୍ଚାୟତବାସୀ ଉଲ୍ଲେଖ କରିଛନ୍ତି । ତୁରନ୍ତ ଏଭଳି ଜଣେ କରୋନା ଯୋଦ୍ଧାଙ୍କ ପରିବାରଙ୍କୁ ସରକାରଙ୍କ ସ୍ଥିରୀକୃତ କରୋନା ଯୋଦ୍ଧା କ୍ଷତିପୁରଣ ଅର୍ଥ ପ୍ରଦାନ କରିବାକୁ ଧୁମୁଛାଇ ପଞ୍ଚାୟତବାସୀଙ୍କ ପକ୍ଷରୁ ଦାବୀ କରାଯାଇଛି ।
