ରାୟଗଡା : କ୍ରମାଗତ ସରକାରୀ ଅବହେଲା ପ୍ରତିବାଦରେ ପ୍ରାଣୀ ଚିକିତ୍ସକ ମାନେ ଆନେ୍ଦାଳନର ଡାକରା ଦେଇଛନ୍ତି । ପ୍ରାଣୀ ଚିକିତ୍ସକ ମାନେ ସେମାନଙ୍କ ସମସ୍ତ ଦାୟିତ୍ୱକୁ ସୁଚାରୁରୂପେ ସଂପାଦନ କରୁଥିଲେ ମଧ୍ୟ ପ୍ରାଣୀ ଚିକିତ୍ସକ ମାନଙ୍କୁ ରାଜ୍ୟ ସରକାର ବୈମାତୃକ ମନୋଭାବ ପ୍ରଦର୍ଶନ କରୁଥିବା ଅଭିଯୋଗ କରିଛି ପ୍ରାଣୀ ଚିକିତ୍ସକ ସେବା ସଂଘ । କରୋନା ଯୋଦ୍ଧାର ସ୍ୱକୃତି ନ ପାଇଁ ମଧ୍ୟ ରାଜ୍ୟର ସମସ୍ତ ପ୍ରାଣୀ ଚିକିତ୍ସକ ମାନେ ୨୪ ଘଂଟିଆ ସେବା ଯୋଗାଇ ଆସିଥିଲେ । ତେବେ ସଂଘ ତରଫରୁ କରାଯାଇଥିବା ନ୍ୟାର୍ଯ୍ୟ ଦାବୀ ମଧ୍ୟ ସରକାର ଆଜି ପର୍ଯ୍ୟନ୍ତ ମାନି ନାହାନ୍ତି ବୋଲି ସଂଘ ଅଭିଯୋଗ କରିଛି । ପୂର୍ବରୁ ସାଧାରଣ ଡାକ୍ତରଙ୍କ ସହ ସମାନ ପଦ ମର୍ଯ୍ୟଦାରେ କାମ କରୁଥିବା ବେଳେ ଗତ ୧୫ ବର୍ଷ ହେଲା ସରକାର ଏହି ଅଧିକାର ହଟାଇ ଦେଇଛନ୍ତି ।
କେନ୍ଦ୍ର ସରକାରଙ୍କ ସମେତ ଦେଶର ପ୍ରାୟ ୨୦ଟି ରାଜ୍ୟ ପ୍ରାଣୀ ଚିକିତ୍ସକ ମାନଙ୍କୁ ଡାକ୍ତରଙ୍କ ସହ ସମାନ ପଦବୀ ଦେଉଥିବା ବେଳେ ଓଡିଶାରେ ଏହାର ବ୍ୟତିକ୍ରମ ଦେଖାଦେଇଛି ବୋଲି ମଧ୍ୟ ସଂଘ ଅଭିଯୋଗ କରିଛି । ଦୀର୍ଘଦିନରୁ ପ୍ରାଣୀ ଚିକିତ୍ସକ ମାନେ ସେମାନଙ୍କୁ କନିଷ୍ଠ ପ୍ରଥମ ଶ୍ରେଣୀରେ ପ୍ରାଥମିକ ନିଯୁକ୍ତି ପାଇଁ ଦାବୀ କରି ଆସୁଥିଲେ ମଧ୍ୟ ସରକାର ବିଭିନ୍ନ କାରଣ ଦର୍ଶାଇ ଏହାକୁ ଟାଳି ଆସୁଛନ୍ତି ବୋଲି ସଂଘ ଅଭିଯୋଗ କରିଛି । ଏହାର ପ୍ରତିବାଦରେ ସଂଘ ତରଫରୁ ଆନେ୍ଦାଳନତ୍ମକ ପନ୍ଥା ଗ୍ରହଣ କରିବାକୁ ବାଧ୍ୟ ହେବୁ ବୋଲି ମଧ୍ୟ ସଂଘ ତରଫରୁ ଚେତାବନୀ ଦିଆଯାଇଛି । ଚଳିତ ମାସ ୨୫ ତାରିଖରୁ ସମସ୍ତ ପ୍ରାଣୀ ଚିକିତ୍ସକ କଳାବ୍ୟାଜ୍ ପରିଧାନ କରିବା ସହ ଡିଜିଟାଲ ସେବା ବର୍ଜନ କରିବେ ବୋଲି ଚେତାବନୀ ଦେଇଛନ୍ତି । ମେ ୧ ତାରିଖରୁ କଲମ ଛାଡ, ଚିକିତ୍ସାଳୟ ପରିସର ବାହାରେ କାର୍ଯ୍ୟଦିବସ ଏବଂ କାର୍ଯ୍ୟ ନିର୍ଘଟଂ ବାହରେ ସେବା ବିରତି କରାଯିବା ସହ ଦାବୀ ପୂରଣ ନ ହେଲେ ମେ ୧୫ରୁ ସମୂହ ଛୁଟି ଓ ମେ ୨୫ ତାରିଖରେ ସମୂହ ଇସ୍ତଫା ଦେବେ ବୋଲି ସଂଘ ତରଫରୁ ଘୋଷଣା କରାଯାଇଛି । ଏ ନେଇ ରାୟଗଡା ପ୍ରାଣୀ ଚିକିତ୍ସା ସେବା ସଂଗ ତରଫରୁ ଏକ ଦାବୀପତ୍ର ମୁଖ୍ୟମନ୍ତ୍ରୀଙ୍କ ଉଦ୍ୟେଶରେ ରାୟଗଡା ଜିଲ୍ଲାପାଳ ସରୋଜ କୁମାର ମିଶ୍ରଙ୍କୁ ପ୍ରଦାନ କରାଯାଇଛି ।
