ପୁରୀ: ଜଗନ୍ନାଥ ବଲ୍ଲଭ ମଠ ପାର୍କିଂ ସ୍ଥଳରେ ଥିବା ବିଭିନ୍ନ ୪ ଜକିଆ ଯାନ ଗୁଡ଼ିକରୁ ଦାଦା ବଟି ଆଦାୟ ଅଭିଯୋଗରେ ଟାଉନ ଥାନା ପୋଲିସ ଆଜି ୩ ଜଣ ଅସାମାଜିକ ଯୁବକଙ୍କୁ ଗିରଫ କରି କୋର୍ଟ ଚାଲାଣ କରିଛି। ଗିରଫ ହୋଇଥିବା ଯୁବକ ମାନଙ୍କ ପରିଚୟ ହେଲା ଟାଉନ ଥାନା ଅନ୍ତର୍ଗତ ମାର୍କଣ୍ଡେଶ୍ୱର ସାହିର ରାମୀନି ପ୍ରସାଦ ସିଂ (୨୧), ବାସେଲି ସାହି ଥାନା ଅନ୍ତର୍ଗତ ମଙ୍ଗଳାଘାଟର ମୁନା ଓରଫ ବାସୁ ଦେବ ମହାପାତ୍ର(୨୦) ଓ ବଣ୍ଟି ଓରଫ ଦେବାଶିଷ ସ୍ୱାଇଁ(୨୨)। ଅଭିଯୁକ୍ତ ମାନଙ୍କ ଠାରୁ ପୋଲିସ ୧ ଗୋଟି କଟୁରୀ, ୧ ଗୋଟି ଲୁହା ପାଇପ, ୩ ଗୋଟି ମୋବାଇଲ ଫୋନ ଓ ନଗଦ ୧୨ ଶହ ଟଙ୍କା ଜବତ କରିଛି।
ଏ ସମ୍ପର୍କରେ ଟାଉନ ଥାନା ଆଇଆଇସି ଗୋକୁଳ ରଞ୍ଜନ ଦାସ ସୂଚନା ଦେଇ କହିଛନ୍ତି ଯେ ଶୁକ୍ରବାର ସକାଳେ ପୋଲିସ ପକ୍ଷରୁ ପେଟ୍ରୋଲିଙ୍ଗ କରା ଯାଉଥିଲା। ପୋଲିସ ବିଶେଷ ସୂତ୍ରରୁ ଖବର ପାଇଥିଲା କେତେକ ଅସାମାଜିକ ଯୁବକ ଜଗନ୍ନାଥ ବଲ୍ଲଭ ପାର୍କିଂ ସ୍ଥଳ ପ୍ରସ୍ଥାନ ଗେଟ୍ ନିକଟରେ ବାହାରୁ ଆସୁଥିବା ଟୁରିଷ୍ଟ ଗାଡ଼ି ଚାଲକଙ୍କୁ କଟୁରୀ ଏବଂ ଲୁହା ପାଇପ ଦେଖାଇ ଭୟଭୀତ କରି ବଟି ଆଦାୟ କରୁଛନ୍ତି। ଉକ୍ତ ତଥ୍ୟ ଆଧାରରେ ଟାଉନ ଥାନା ପୋଲିସ ଓ ସ୍ବତନ୍ତ୍ର ସ୍ଵାଡ ସେଠାରେ ଅତର୍କିତ ଭାବେ ଚଢ଼ାଉ କରି ଥିଲେ। ଚଢ଼ାଉ ସମୟରେ ଅଭିଯୁକ୍ତ ମାନେ ପୋଲିସ ହାତରେ ଧରା ପଡି ଥିଲେ। ଏନେଇ ଟାଉନ ଥାନା ପୋଲିସ ଏକ ମାମଲା ରୁଜୁ କରି ଅଭିଯୁକ୍ତମାନଙ୍କୁ ଗିରଫ କରି କୋର୍ଟ ଚାଲାଣ କରିଛି।
