ଯୁଗେ ଯୁଗେ ପ୍ରତିଟି ଯୁଗରେ ଚିର ଅମର କୃପାବାନ ଭଗବାନ ମହାବୀର ହନୁମାନଙ୍କ ପ୍ରତ୍ୟକ୍ଷତା ଓ ତାଙ୍କ ଆଶୀର୍ବାଦ କୃପା ପ୍ରତିଟି ଯୁଗର ଭକ୍ତମାନେ ପ୍ରାପ୍ତ ହେଉଛନ୍ତି । ଅନେକ ହୁଏତ ଜାଣିନଥିବେ ଆଜି ପର୍ଯ୍ୟନ୍ତ ମହାବୀର ହନୁମାନଙ୍କ ଆଶୀର୍ବାଦ ଭିନ୍ନ ଭିନ୍ନ ଭାବନାରେ ଅନେକ ଭକ୍ତ ପ୍ରାପ୍ତ ହେଉଛନ୍ତି । ତେବେ ଆସନ୍ତୁ ଆଜିର ଆଲୋଚନାରେ ଆମେ କିଛି ଅନାଲୋଚିତ ତଥ୍ୟ ଉପରେ ସହୃଦୟ ଭଗବାନ ମହାବୀରଙ୍କ ଭକ୍ତମାନଙ୍କ ପାଖରେ ଉପସ୍ଥାପନ କରିବା ।
ବନବାସ ସମୟରେ ମା’ ସୀତାଙ୍କୁ ଛଳରେ ରାବଣ ହରଣ କରି ଲଙ୍କାପୁରୀକୁ ନେଇଗଲା । ଶ୍ରୀରାମ ଓ ଲକ୍ଷ୍ମଣ ମା’ସୀତାଙ୍କୁ ଠାବ କରିବାରେ ଅନେକ ପ୍ରଚେଷ୍ଟା କରି ବିଫଳ ହେଲେ । ତାଙ୍କର ସାକ୍ଷାତ ହେଲା ଭକ୍ତ ହନୁମାନଙ୍କ ସହିତ । ମା’ସୀତାଙ୍କୁ ଠାବ କରି ଉଦ୍ଧାରି କରିବାର ଦାୟିତ୍ୱ ନେଲେ ହନୁମାନ । ଏ ଲକ୍ଷ୍ୟ ନେଇ ସେ ଯାତ୍ରା କଲେ ଲଙ୍କାପୁରୀ । ରାବଣର ଲଙ୍କାପୁରୀକୁ ଯିବା ବାଟରେ ହନୁମାନଙ୍କୁ ଅନେକ ବାଧାବିଘ୍ନର ସାମ୍ନା ହେବାକୁ ପଡ଼ିଲା । କିନ୍ତୁ ସଙ୍କଟମୋଚନ ହନୁମାନ ଅବିଚଳିତ ହୋଇ ତାଙ୍କର ଯାତ୍ରା ଜାରି ରଖିଲେ । ଶେଷରେ ହନୁମାନ ସବୁର୍ଣ୍ଣ ଲଙ୍କାର ମନୋରମ ସମୁଦ୍ର ତଟଦେଶରେ ପହଞ୍ଚôଲେ । ସେଠାରୁ ଲଙ୍କାପୁରୀ ବେଶ ଆକର୍ଷଣୀୟ ଦେଖାଯାଉଥିଲା ।
ହନୁମାନ ଚାରିଆଡ଼େ ନଜର ପକାଇଲେ ଏବଂ ଦେଖିଲେ ଲଙ୍କାପୁରୀ ଗୋଟିଏ ଗଡ଼ ଭଳି ସୁରକ୍ଷିତ ସ୍ଥାନରେ ଅଛି । ମା’ସୀତାଙ୍କୁ ଏଠାରୁ ସୁରକ୍ଷିତ ନେଇ ଆସିବା ପାଇଁ ରାବଣ ସହିତ ନିଶ୍ଚିତ ଯୁଦ୍ଧ କରିବାକୁ ପଡ଼ିବ । ତେଣୁ ସେ ଲଙ୍କାପୁରୀର ବିଭିନ୍ନ ସୁରକ୍ଷିତ ସ୍ଥାନ ସନ୍ଧାନରେ ବାହାରିଲେ । ହନୁମାନ ଚିନ୍ତାକଲେ ଯେ ଦିବାଲୋକରେ ଲଙ୍କାପୁରୀ ମଧ୍ୟକୁ ପ୍ରବେଶ କରିବା ସହଜସାଧ୍ୟ ନୁହେଁ । ତେଣୁ ରାତ୍ରି ସମୟରେ ଲଙ୍କା ଭିତରେ ପ୍ରବେଶ କରିବା ପାଇଁ ଅପେକ୍ଷା କଲେ । ରାତି ହେଲା ଏବଂ ହନୁମାନ ଅଣିମା ସିଦ୍ଧି ଯୋଗୁଁ ତାଙ୍କର ନିଜର ବିଶାଳକାୟ ଶରୀରକୁ କ୍ଷୁଦ୍ରାଦିକ୍ଷୁଦ୍ର କରି ଶ୍ରୀରାମଙ୍କ ନାଁ ନେଇ ଲଙ୍କାପୁରୀରେ ପ୍ରବେଶ କଲେ । କିନ୍ତୁ ଲଙ୍କାର ଅଧିଷ୍ଠାତ୍ରୀ ଦେବୀ ଲଙ୍କିନୀ ହନୁମାନଙ୍କ ଆଗମନକୁ ଜାଣିପାରି ତାଙ୍କୁ ଅଟକାଇଲେ । କପିଶ୍ରେଷ୍ଠ ହନୁମାନ ଲଙ୍କିନୀଙ୍କ ସହିତ କୌଣସି ବାଦବିବାଦ ବା ଯୁଦ୍ଧ କଲେ ନାହିଁ ।
କାରଣ ଜଣେ ସ୍ତ୍ରୀ ସହିତ ଯୁଦ୍ଧ କରିବା ନୀତିସଙ୍ଗତ ନୁହେଁ । ତେଣୁ ହନୁମାନ ବାମ ହାତରେ ଲଙ୍କିନୀଙ୍କର ମୁଣ୍ଡରେ ଆଘାତ କଲେ । ହନୁମାନଙ୍କ ଦ୍ୱାରା ଆଘାତପ୍ରାପ୍ତ ହୋଇ ଲଙ୍କିନୀ ମୂର୍ଚ୍ଛା ହେଲେ । କିଛି ସମୟ ପରେ ଲଙ୍କିନୀ ଚେତନା ପାଇ ହର୍ଷିତ ହେଲେ । କାରଣ ବ୍ରହ୍ମାଙ୍କ ଭବିଷ୍ୟତବାଣୀ ଅନୁଯାୟୀ ଜଣେ ବାନରର ମୁଷ୍ଟି ପ୍ରହାରରେ ଲଙ୍କିନୀ ମୁର୍ଚ୍ଛା ଯିବା ଅର୍ଥ ହେଉଛି ଲଙ୍କାପୁରୀରେ ଶ୍ରୀରାମଙ୍କ ଆଗମନ ଏବଂ ଦଶାନନର ପତନ । ବ୍ରହ୍ମାଙ୍କର ବାଣୀ ରକ୍ଷା ହେଲା । ଦଶାନନର ପତନ ଅର୍ଥ ଧର୍ମର ପ୍ରତିଷ୍ଠା । ଏହାପରେ ହନୁମାନ ଶ୍ରୀରାମଙ୍କ ଆଦେଶ ଅନୁଯାୟୀ ମା’ସୀତାଙ୍କୁ ଠାବ କରିବାକୁ ମନସ୍ଥ କଲେ ।
Comments are closed.