ମୁମ୍ବାଇ: ଆଇପିଏଲ୍-୨୦୨୨ ଆସନ୍ତା ୨୬ ତାରିଖରୁ ଆରମ୍ଭ ହେବ। ଏହି ପଞ୍ଚଦଶ ସଂସ୍କରଣର ସମସ୍ତ ମ୍ୟାଚ୍ ମହାରାଷ୍ଟ୍ରର ୪ ଭେନ୍ୟୁରେ ହିଁ ଖେଳାଯିବ। ୨୬ ତାରିଖ ଉଦ୍ଘାଟନୀ ଦିବସରେ ଗତଥରର ବିଜେତା ଚେନ୍ନାଇ ସୁପର କିଙ୍ଗ୍ସ ଏବଂ ନୂଆ ଅଧିନାୟକ ଶ୍ରେୟସ ଆୟରଙ୍କ ନେତୃତ୍ବାଧୀନ କୋଲ୍କାତା ନାଇଟ୍ ରାଇଡର୍ସ ମୁହାଁମୁହିଁ ହେବେ। କୋଭିଡ୍ ମାର୍ଗଦର୍ଶିକା ଅନୁଯାୟୀ ଆଇପିଏଲ୍ରେ ଦର୍ଶକଙ୍କୁ ଷ୍ଟାଡିୟମ୍ ଅନୁମତି ଉପରେ ମହାରାଷ୍ଟ୍ର ସରକାର କଟକଣା ଲଗାଇଛନ୍ତି। ଷ୍ଟାଡିୟମ୍ର ଆକାରକୁ ନେଇ ୨୫ ପ୍ରତିଶତ ଦର୍ଶକଙ୍କୁ ଅନୁମତି ଦେବାକୁ ରାଜ୍ୟ ସରକାର ନିଷ୍ପତ୍ତି ନେଇଥିଲେ। ସେହି ଦୃଷ୍ଟିରୁ ଏଥର ୨୫ ପ୍ରତିଶତ ଦର୍ଶକଙ୍କୁ ଷ୍ଟାଡିୟମ ପ୍ରବେଶ ଅନୁମତି ମିଳିବ ବୋଲି ବୁଧବାର ଆୟୋଜକ ସ୍ପଷ୍ଟ କରିଛନ୍ତି।। ତଥାପି ମ୍ୟାଚ୍ ଦେଖିବା ପାଇଁ ଅଧିକରୁ ଅଧିକ ଦର୍ଶକ ବ୍ୟାକୁଳ ଥିବାରୁ ଏଥିରେ ବୃଦ୍ଧି କରିବାକୁ ବିସିସିଆଇ ଆଶା ରଖିଛି। ଏନେଇ ରାଜ୍ୟ ସରକାରଙ୍କ ସହ ଆଲୋଚନା ଜାରି ରହିଛି। ପ୍ରାଥମିକ ପର୍ଯ୍ୟାୟରେ ଷ୍ଟାଡିୟମ୍ଗୁଡ଼ିକର ଆକାର ଅନୁଯାୟୀ ଏକ ଚତୁର୍ଥାଂଶ ଆସନରେ ଦର୍ଶକଙ୍କୁ ରାଜ୍ୟ ସରକାର ଅନୁମତି ପ୍ରଦାନ କରଥିଲେ ମଧ୍ୟ ଏଥିରେ ବୃଦ୍ଧି ହୋଇପାରିବ ବୋଲି ଭାରତୀୟ କ୍ରିକେଟ୍ ନିୟଂତ୍ରଣ ବୋର୍ଡ (ବିସିସିଆଇ) ଆଶା ବାନ୍ଧିଛି। ଆମେ ରାଜ୍ୟ ସରକାରଙ୍କ ସହ ଏନେଇ ବୁଝାମଣା କରିଛୁ ଏବଂ ଷ୍ଟାଡିୟମ୍ରେ ୨୫ ପ୍ରତିଶତରୁ ଅଧିକ ଦର୍ଶକ ଖେଳ ଦେଖିବାର ସୁଯୋଗ ପାଇପାରିବେ ବୋଲି ବିସିସିଆଇର ଜଣେ କର୍ମକର୍ତ୍ତା କହିଛନ୍ତି। କୋଭିଡ୍ ମାମଲା ଦିନକୁ ଦିନ ହ୍ରାସ ପାଉଥିବାରୁ ଅଧିକରୁ ଅଧିକ ଦର୍ଶକ ଷ୍ଟାଡିୟମ୍ ପ୍ରବେଶ ପାଇଁ ଅନୁମତି ପାଇପାରିବେ ବୋଲି ଆମେ ଆଶା ବାନ୍ଧିଥିବା କାର୍ଯ୍ୟକର୍ତ୍ତା ଜଣକ କହିଛନ୍ତି।
ପ୍ରାଥମିକ ଆକଳନ ଅନୁଯାୟୀ, ୱାଙ୍ଖ୍ଡେ ଷ୍ଟାଡିୟମ୍ରେ ୯୮୦୦ରୁ ୧୦୦୦୦, ପଡ଼ୋଶୀ ବ୍ରାବର୍ଣ୍ଣ ଷ୍ଟାଡିୟମ୍ରେ ୭ରୁ ୮୦୦୦ ଏବଂ ନେରୁଲର ଡିୱାଇ ପାଟିଲ ଷ୍ଟାଡିୟମ୍ରେ ୧୧ରୁ ୧୨୦୦୦ ଦର୍ଶକଙ୍କୁ ଖେଳ ଦେଖିବା ପାଇଁ ଅନୁମତି ମିଳିବ। ସେହିପରି ପୁନେର ମହାରାଷ୍ଟ୍ର କ୍ରିକେଟ୍ ଷ୍ଟାଡିୟମ୍ରେ ୧୨,୦୦୦ ଦର୍ଶକଙ୍କୁ ଅନୁମତି ମିଳିବ। ହେଲେ ଆଉ କିଛି ଅଧିକ ଦର୍ଶକଙ୍କୁ ଅନୁମତି ଦେବାକୁ ବିସିସିଆଇ ସରକାରଙ୍କ ସହ ଆଲୋଚନା କରୁଥିବା କହିଛି।
