ପୁରୀ :ପବିତ୍ର ରମଜାନ ମାସ ଶେଷରେ ମୁସଲିମ ସମ୍ପ୍ରଦାୟ ପକ୍ଷରୁ ଶ୍ରଦ୍ଧା ଓ ଭକ୍ତିଭବାନା ସହକାରେ ଇଦ–ଉଲ–ଫିତର ପାଳିତ ହୋଇଯାଇଛି । ତେବେ କରୋନା ସଂକ୍ରମଣ ଜନିତ ଲକଡାଉନ କଟକଣା ଯୋଗୁଁ ଇଦ୍ ପର୍ବ ପାଳନ ଫିକା ପଡି ଥିବା ଲକ୍ଷ କରାଯାଇଛି । ପୁରୀ ସହରରେ ଥିବା ଦୁଇଟିି ମସଜିଦ କୁମ୍ଭାରପଡାର ହରିଣୀ ହାଟ ଓ ଚିତ୍ରକାର ସାହିର ନାଜରଖାନା ମସଜିଦରେ ସାମୁହିକ ଇଦ୍ ପ୍ରାର୍ଥନା ସମାବେଶ ହୋଇନାହିଁ ।
ମୁସଲିମ ସମ୍ପ୍ରଦାୟର ବ୍ୟକ୍ତିମାନେ ନିଜ ଘରେ ଇଦ୍ ପ୍ରାର୍ଥନା କରିବା ପାଇଁ ପରାମର୍ଶ ଦିଆଯାଇ ମସଜିଦ ଦ୍ୱୟରେ ବିଜ୍ଞପ୍ତି ମରାଯାଇଥିଲା । ତେଣୁ ମସଜିଦମାନଙ୍କରେ ଶ୍ରଦ୍ଧାଳୁଙ୍କ ସମାଗମ ଦେଖିବାକୁ ମିଳିନଥିଲା । ମୁସଲିମ ସମ୍ପ୍ରଦାୟର ଆବାଳ ବୃଦ୍ଧବନିତା ନବବସ୍ତ୍ର ପରିଧାନ ପୂର୍ବକ ଘରେ ଘରେ ନମାଜ ପାଠ କରିଥିଲେ । ଏଥିସହିତ ବିଧି ଅନୁଯାୟୀ ଦରିଦ୍ରଙ୍କୁ ଖାଦ୍ୟ ଓ ଅର୍ଥ ଦାନ ମଧ୍ୟ କରିଥିଲେ । ମୁସଲିମ ଗୃହସ୍ଥାମନେ ସାମାଜିକ ଦୂରତା ରକ୍ଷା କରି ପରସ୍ପରକୁ ଇଦ୍ ମୁବାରକ ଜଣାଇଥିଲେ ।
