ନାଟ୍ୟ ସାରଥି ଅଭୟ କୁମାର ଦାସ : ବିଶିଷ୍ଟ ଗାନ୍ଧିବାଦୀ ରାଜନେତା ମାହାଙ୍ଗାର ପ୍ରାକ୍ତନ ବିଧାୟକ କବି, ସାହିତି୍ୟକ, ଆଧ୍ୟାତ୍ମିକବାଦୀ, ଶିକ୍ଷକନେତା, ବିହନ ନିଗମ ଓ କାଜୁ ନିଗମର ପୂର୍ବତନ ଅଧ୍ୟକ୍ଷ ବିକ୍ରମ କେଶରୀ ବର୍ମାଙ୍କ ପରଲୋକ ହୋଇଛି । ମାହାଙ୍ଗା ଅଞ୍ଚଳରେ ବିଜୁ ବାବୁଙ୍କ ସଂସ୍ପର୍ଶ ପାଇବା ପରେ ଲୋକସେବାକୁ ଗୁରୁତ୍ୱ ଦେଇ ଜଣେ ଶାନ୍ତ, ସରଳ, ଭଦ୍ର ଓ ଅମାୟିକ ବ୍ୟକ୍ତିଙ୍କ ପରଲୋକ ଅଞ୍ଚଳବାସୀଙ୍କୁ ଦୁଃଖିତ କରିଛି । ଗ୍ରାମାଞ୍ଚଳରେ ଉଚ୍ଚଶିକ୍ଷାର ଅଗ୍ରଗତି ପାଇଁ ପ୍ରତି ଘରୁ ମୁଠିଏ ମୁଠିଏ ଚାଉଳ ସଂଗ୍ରହ କରି କୁଅାଁପାଳ ଅଞ୍ଚଳରେ ଜବାହାରଲାଲ ନେହେରୁଙ୍କ ନାମରେ ଏକ ମହାବିଦ୍ୟାଳୟ ତିଆରି କରିଥିଲେ କେବଳ ସେତିକି ନୁହେଁ ଏହି ଅଞ୍ଚଳରେ ବିଭିନ୍ନ ଘରୋଇ ଶିଳ୍ପ ତାଲିମ କେନ୍ଦ୍ର ସହ ସିଟି ଓ ବିଏଡ କେନ୍ଦ୍ର ମଧ୍ୟ ପ୍ରତିଷ୍ଠା କରିଥିଲେ ।
ଜଣେ ଶିକ୍ଷକ ନେତା ଓ କୃଷକ ନେତା ଭାବେ ସେ ବିଶିଷ୍ଟ ରାଜନେତା କଳିଙ୍ଗ ବୀର ବିଜୁବାବୁଙ୍କ ପ୍ରିୟପାତ୍ର ହୋଇପାରିଥିଲେ । ୧୯୯୦ ମସିହାରେ ସେ ରାଜ୍ୟ କୃଷକ ଜନତା ଦଳ ସଭାପତି ଓ ବିହନ ନିଗମ ଅଧ୍ୟକ୍ଷ ଭାବେ ନିଯୁକ୍ତ ହୋଇଥିଲେ । ସେ ଏପରି ଜଣେ ସତ୍ଚିନ୍ତନର ବ୍ୟକ୍ତିତ୍ୱ ଥିଲେ ଯେ ଦଳୀୟ ପାଣ୍ଠି ପାଇ ସେ ନିର୍ବାଚନ ବିଜୟ ଲାଭ ପରେ ଖର୍ଚ୍ଚରୁ ବଳି ପଡ଼ିଥିବା ଦୁଇଲକ୍ଷ ଟଙ୍କା ଦଳର ସଭାପତିଙ୍କୁ ଫେରସ୍ତ କରିଥିଲେ । ତାଙ୍କର ସରଳ ଜୀବନ ଓ ଅମାୟିକ ବ୍ୟକ୍ତିତ୍ୱ ସଂସ୍ପର୍ଶରେ ଯିଏ ଆସିଛନ୍ତି ସେ ତାଙ୍କୁ ଜୀବନ ତମାମ ମନେ ରଖିଛନ୍ତି ।
ବିଜୁବାବୁଙ୍କ ପରେ ଦଳର ଦାୟିତ୍ୱ ନବୀନ ବାବୁ ଗ୍ରହଣ କରିବା ପରେ ସେ ଦଳର ଉନ୍ନତି କଳ୍ପେ ସମସ୍ତ କାର୍ଯ୍ୟ ସମ୍ପାଦନ କରୁଥିଲେ । ନିଜ ମାହାଙ୍ଗା ନିର୍ବାଚନ ମଣ୍ଡଳୀରୁ ର୍ଦୁନୀତିକୁ ସମ୍ପୂର୍ଣ୍ଣ ଦୂରେଇବା ପାଇଁ ଏକଦା ଗାନ୍ଧିମୂର୍ତ୍ତି ନିକଟରେ ବିଡ଼ିଓଙ୍କ ସମେତ ସରକାରୀ କର୍ମଚାରୀଙ୍କୁ ଗୀତା ଛୁଇଁ ଶପଥ କରି କୌଣସି ର୍ଦୁନୀତି ପଇସା ଛୁଇଁବେ ନାହିଁ ବୋଲି ସେ ଯେଉଁ ଶପଥ ପାଠ କରାଇଥିଲେ କେବଳ ସେତେବେଳେ ସ୍ଥାନୀୟ ଅଞ୍ଚଳ ନୁହେଁ ରାଜ୍ୟ ରାଜନୀତିରେ ଚର୍ଚ୍ଚା ସୃଷ୍ଟି କରିଥିଲା ।
ଅନେକ ଜାତୀୟ ଗଣମାଧ୍ୟମ ସେ ସମୟରେ ଏହାକୁ ଏକ ବଡ଼ ଖବର ଭାବେ ପ୍ରକାଶ କରିଥିଲେ । ୨୦୦୪-୨୦୦୯ ପର୍ଯ୍ୟନ୍ତ ସେ ବିଧାୟକ ଥିବାବେଳେ ନିଜ ଅଞ୍ଚଳର ଅନେକ କାର୍ଯ୍ୟକ୍ରମରେ ସେ ବ୍ୟକ୍ତିଗତ ଭାବେ ସାମିଲ ହେବାସହ ତାଙ୍କ ଉଦ୍ୟମରେ ମାହାଙ୍ଗା ଅଞ୍ଚଳରେ ଅନେକ ବିକାଶ ସମ୍ଭବ ହୋଇପାରିଛି । ସେ କାଜୁ ନିଗମର ମଧ୍ୟ ଅଧ୍ୟକ୍ଷ ଭାବେ ଦାୟିତ୍ୱ ସମ୍ପାଦନ କରିଥିଲେ । ରାଜନୀତି ସହ ଗୀତ ଲେଖିବା, କବିତା, ଗଳ୍ପ, ଉପନ୍ୟାସ ଆଦି ଅନେକ ପୁସ୍ତକ ରଚନା କରି ୨୨ଖଣ୍ଡ ଗ୍ରନ୍ଥାବଳୀ ଲେଖିଯାଇଛନ୍ତି । ଅତି ସାଧାରଣ ଜୀବନ ର୍ନିବାହ କରି ତାଙ୍କ ପାଖକୁ ଯେତେବେଳେ ଯେଉଁ ଲୋକ ଯେକୌଣସି ସାହାଯ୍ୟ ପାଇଁ ବି ଯାଉଥିଲେ ସେ ତାଙ୍କୁ ନିଶ୍ଚିନ୍ତ ସାହାଯ୍ୟ କରୁଥିଲେ । କିନ୍ତୁ ଅସତ୍ ବାଟରେ ଗୋଟିଏ ପଇସା ରୋଜଗାର କରିବା ତାଙ୍କ ଜନ୍ମଜାତକରେ ନଥିଲା । ଭୟାବହ କରୋନା ମହାମାରୀ ମାହାଙ୍ଗା ମୂଲକର ତିନି ତିନିଜଣ ପ୍ରିୟ ପୁତ୍ରଙ୍କୁ ହରାଇଛି । ମାତ୍ର ନଅ ମାସ ଭିତରେ ମାହାଙ୍ଗାର ତିନିଜଣ ଅମୂଲ୍ୟ ସନ୍ତାନ ପୂର୍ବତନ ବିଧାୟକ ଶେଖ୍ ମତଲୁବ୍ ଅଲ୍ଲୀ, ପୂର୍ବତନ ବାଚସ୍ପତି ଶରତ କର ଓ ପରେ ଗାନ୍ଧିବାଦୀ ନେତା ବିକ୍ରମ କେଶରୀ ବର୍ମାଙ୍କ ପରଲୋକ ସ୍ଥାନୀୟ ଅଞ୍ଚଳବାସୀଙ୍କୁ ଅତ୍ୟନ୍ତ ମର୍ମାହତ କରିଛି ।
ଗଣକବି ବୈଷ୍ଣବ ପାଣିଙ୍କ ଜୟନ୍ତୀକୁ ରାଜ୍ୟ ସ୍ତରୀୟ ଉତ୍ସବ ଭାବେ ପାଳନ କରିବା ସହ ଅନେକ କାର୍ଯ୍ୟକ୍ରମରେ ଓ ଅନେକ ଉତ୍ସବରେ ଏହି ଲେଖକ ଗାନ୍ଧିବାଦୀ ନେତା ବିକ୍ରମ କେଶରୀ ବର୍ମାଙ୍କ ପରାମର୍ଶ, ସହଯୋଗ ଓ ଉପଦେଶ ଗ୍ରହଣ କରିଛି । ଯେକୌଣସି କାର୍ଯ୍ୟକ୍ରମରେ ବା ବୈଷ୍ଣବ ପାଣିଙ୍କ କୌଣସି କାର୍ଯ୍ୟକ୍ରମ ସମ୍ବନ୍ଧରେ ଆଲୋଚନା କରିବା ମାତ୍ରେ ସେ ଅତ୍ୟନ୍ତ ଖୁସି ମନରେ ଏ କାର୍ଯ୍ୟ ପାଇଁ ସହଯୋଗ କରିବା ସହ ଘଣ୍ଟା ଘଣ୍ଟା ଧରି ଆଲୋଚନା କରିଥିଲେ । ରାଜନୀତି ପଛ ଆଉ ବ୍ୟକ୍ତିନିଷ୍ଠ ସରଳ ସାଧୁଜୀବନ ଯେ ଆଗ ଏହାର ବଡ଼ ମୂର୍ତ୍ତିମନ୍ତ ପ୍ରତୀକ ଥିଲେ ବିକ୍ରମ କେଶରୀ ବର୍ମା । କୁଅାଁପାଳରେ ଜେଏମ୍ କଲେଜ ପ୍ରତିଷ୍ଠା କରି ୧୯୮୨ରୁ ୧୯୯୦ ପର୍ଯ୍ୟନ୍ତ ଅଧ୍ୟକ୍ଷ ଦାୟିତ୍ୱ ତୁଲାଇ ଥିଲେ । ପରେ ଏହି ଦାୟିତ୍ୱ ଛାଡ଼ି ରାଜନୀତିକୁ ସେବା ପାଇଁ ସେ ଯୋଗ ଦେଇଥିଲେ ।
୧୯୯୦-୧୯୯୫ ପର୍ଯ୍ୟନ୍ତ ରାଜ୍ୟ କୃଷକ ଜନତା ଦଳର ସଭାପତି ଭାବେ ସେ ଦାୟିତ୍ୱ ନିର୍ବାହ କରିଛନ୍ତି । ଜୀବନରେ ଅର୍ଥଲୋଭକୁ ତିଳେମାତ୍ର ଚିନ୍ତା କରିନଥିବା ଏପରି ଜଣେ ରାଜନେତା ଯଥାର୍ଥରେ ଜନନେତା । ଅନେକ ହୁଏତ ଜାଣିନଥିବେ ତାଙ୍କର ଏକମାତ୍ର ପୁଅର ଶିକ୍ଷା ଶେଷ ପରେ ତାଙ୍କୁ ସେ କୌଣସି ନିଜ ଉଦ୍ୟମରେ ସହାୟତା ଦେଇନାହାଁନ୍ତି କିମ୍ବା ନିଜ ପରିବାର ପାଇଁ ଖଣ୍ଡେ ଘର କି କୌଣସି ଅର୍ଥ ସର୍ବସ୍ୱ ରୋଜଗାର ଚିନ୍ତାଟିଏ ବି କରିନାହାଁନ୍ତି । ତାଙ୍କପରି ଜଣେ ସମର୍ପିତ ଜନସେବକ, ଶିକ୍ଷାବିତ୍ ଓ ଅମାୟିକ ବ୍ୟକ୍ତିତ୍ୱ ବିରଳ । ତାଙ୍କ ଶୋକ ସନ୍ତପ୍ତ ପରିବାର ବର୍ଗଙ୍କୁ ମହାପ୍ରଭୁ ଶ୍ରୀଜଗନ୍ନାଥ କୃପା ପ୍ରଦାନ କରି ଏ କଷ୍ଟ ସହିବା ପାଇଁ ଶକ୍ତି ଦିଅନ୍ତୁ ଏବଂ ମାହାଙ୍ଗା ମୂଲକରେ ଏପରି ଜଣେ ବରପୁତ୍ର ଗାନ୍ଧିବାଦୀ ସରଳ ବ୍ୟକ୍ତିତ୍ୱଙ୍କ ଅମ୍ଳାନ ଆତ୍ମା ପ୍ରତି କୋଟି କୋଟି ଓଡ଼ିଆଙ୍କ ପକ୍ଷରୁ ତାଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରୁଛି ।
Comments are closed.