Odisha news

ସଙ୍କଟରେ ତେଲ ଲୁଣର ସଂସାର

0

ଯଦୁମଣି ପାଣିଗ୍ରାହୀ : ଚଳିତ ୨୦୨୦ ବର୍ଷଟି ସମଗ୍ର ବିଶ୍ୱ ଲାଗି ବିପତ୍ତି ଓ ବିପର୍ଯ୍ୟୟର ବର୍ଷ ଭାବେ ଉଭା ହୋଇଛି  । କରୋନା ମହାମାରୀ ସମୁଦାୟ ମାନବଜାତିର ମେରୁଦଣ୍ଡକୁ ଦୋହଲାଇ ଦେଇଛି ଯେମିତି  । ଏହି ମହାମାରୀ ବିରୋଧରେ ଆଜି ସାରା ବିଶ୍ୱବାସୀ ଲଢେଇ ଜାରି ରଖିଥିବା ବେଳେ ଏହା ଆଉ କେତେଦିନ ଯାଏଁ ଚାଲିବ ତାହାର କୌଣସି ସଠିକତା ଅଥବା ନିର୍ଦ୍ଦିଷ୍ଟତା ବି ଆମ ପାଖରେ ନାହିଁ  । କାରଣ ଏହି ମହାମାରୀର ପ୍ରକୋପ ହ୍ରାସ ପାଇବା ପରିବର୍ତ୍ତେ ବରଂ ଦିନକୁଦିନ ଉଗ୍ର ରୂପ ଧାରଣ କରିବାରେ ଲାଗିଛି  । ଆକ୍ରାନ୍ତ ଓ ମୃତାହତଙ୍କ ସଂଖ୍ୟା ବି ଧୀରେ ଧୀରେ ବୃଦ୍ଧି ପାଇ ଚାଲିଛି । କରୋନା ପାଇଁ ଅନ୍ୟାନ୍ୟ ଦେଶ ମାନଙ୍କ ପରି ଭାରତରେ ପ୍ରାୟ ୩ ମାସରୁ ଉଦ୍ଧ୍ୱର୍ ସମୟ ଧରି ଲକ୍ଡାଉନ ପ୍ରକ୍ରିୟା ବଳବତ୍ତର ରହିଛି  । ଯାହା ମଣିଷର ଜୀବନ ଜୀବିକାକୁ ବହୁମାତ୍ରାରେ ପ୍ରଭାବିତ କରିଛି  । ଖଣିଖାଦାନ, ବ୍ୟବସାୟ ପ୍ରତିଷ୍ଠାନ ଓ କଳକାରଖାନା ଆଦି ବନ୍ଦ ରହିବା ଯୋଗୁଁ ବହୁ ଲୋକ କାମଧନ୍ଦା ଅଭାବରୁ ଘରେ ବେରୋଜଗାର ହୋଇ ବସିବାକୁ ବାଧ୍ୟ ହୋଇଛନ୍ତି  ।

ଭାରତ ଭଳି ସ୍ୱଳ୍ପ ବିକଶିତ ଦେଶରେ ଅବସ୍ଥା କ୍ରମଶଃ ଖରାପ ଆଡକୁ ଗତି କରୁଛି  । ସରକାରଙ୍କର ରାଜସ୍ୱ ଆଦାୟର ପ୍ରାୟ ସବୁ ବାଟ ଏବେ ବନ୍ଦ ହୋଇ ଯାଇଥିବା କାରଣରୁ ଏ ଦେଶର ଅର୍ଥନୀତି ଧୀରେ ଧୀରେ ଦୁର୍ବଳ ହେବାରେ ଲାଗିଛି  । ଆଗକୁ ବି ଏହି ସ୍ଥିତି ଆହୁରି ସଙ୍ଗୀନ ହେବାର ଯଥେଷ୍ଟ ସମ୍ଭାବନା ରହିଛି  । ଆଉ ଏହାର ପ୍ରଭାବ ଦେଶର ସବୁ କ୍ଷେତ୍ରରେ ପ୍ରତିଫଳିତ ହେବାରେ ଲାଗିଛି  । ଦେଶରେ ସର୍ବତ୍ର ଏକ ଅସ୍ୱାଭାବିକ ପରିସ୍ଥିତି ସୃଷ୍ଟି ହୋଇଥିବା ବେଳେ ଭାରତ-ଚୀନ ସୀମାରେ ଏବେ ପ୍ରବଳ ଉତ୍ତେଜନା ଲାଗି ରହିବା ଓ ଯୁଦ୍ଧ ଭଳି ପରିସ୍ଥିତି ସୃଷ୍ଟି ହେବା ଘଟଣା ଦେଶ ଲାଗି ଆହୁରି ବିପଦ ସୃଷ୍ଟି କରିଛି  । ଗୋଟେପଟେ କରୋନା ବିରୋଧରେ ଲଢେଇ ତ ଅନ୍ୟପଟେ ବହିଃ ଶତ୍ରୁକୁ ଦମନ କରିବାକୁ ମଧ୍ୟ ଲଢେଇ ଅବ୍ୟାହତ ରହିଛି  । ଆଉ ଠିକ ଏହି ସମୟରେ ଏ ଦେଶର ଅଗଣିତ କୃଷକ, ଶ୍ରମିକ, ଖଟିଖିଆ ମେହନତି ମଣିଷ ନିଜ ନିଜର ଜୀବନ ଜୀବିକା ନେଇ ଲଢେଇ ଜାରି ରଖିଛନ୍ତି  ।

ଗତ ତିନି ମାସରୁ ଅଧିକ ସମୟ ଧରି ଲକ୍ଡାଉନ ଭିତରେ ଦେଶରେ ଜିନିଷପତ୍ରର ଦର ଅପ୍ରତ୍ୟାଶିତ ଭାବେ ବୃଦ୍ଧି ପାଇଥିବା ଘଟଣା ପ୍ରାୟ ସମସ୍ତେ ଅଙ୍ଗେ ନିଭାଇଥିବେ  । ବଜାରରେ ବିଶେଷକରି ନିତ୍ୟ ବ୍ୟବହାର୍ଯ୍ୟ ସାମଗ୍ରୀ ଯୋଗାଣକାରୀ ମାନେ ଖାଉଟିଙ୍କୁ ମନଇଚ୍ଛା ଶୋଷଣ କରିବାରେ ଯଥେଷ୍ଟ ସକ୍ଷମ ହୋଇଛନ୍ତି । ଲକଡାଉନର ପ୍ରାଥମିକ ପର୍ଯ୍ୟାୟରେ ଯାନବାହନ ଚଳାଚଳ ବାଧାପ୍ରାପ୍ତ ହେବା ଜିନିଷପତ୍ର ଆସିପାରିଲା ନାହିଁ  । ଫଳରେ ନିଜ ପାଖରେ ଏସବୁ ମହଜୁଦ ରଖିଥିବା ବ୍ୟବସାୟୀ ମାନେ ଏହାକୁ ଏକ ସୁଯୋଗ ଭାବେ ନେଇ ସାମଗ୍ରୀ କଳାବଜାର କରିବାକୁ ଲାଗିପଡିଥିଲେ । ଆଉ ଲକଡାଉନ ଭିତରେ ଥିବା ଲୋକେ ବାଧ୍ୟ ହୋଇ ଚଢା ଦାମରେ ଏସବୁ ସାମଗ୍ରୀ କିଣି ପରିବାର ଚଳାଇବାକୁ ଯଥାସାଧ୍ୟ ପ୍ରୟାସ କରିଥିଲେ  ।

ଏସବୁ ଭିତରେ ନିମ୍ନ ଓ ନିମ୍ନ ମଧ୍ୟବିତ୍ତ ଶ୍ରେଣୀର ଲୋକେ ବିଶେଷଭାବେ କ୍ଷତିଗ୍ରସ୍ତ ହୋଇଥିଲେ  । ପରେ ଅବଶ୍ୟ ଅତ୍ୟାବଶ୍ୟକ ସାମଗ୍ରୀ ପରବହନକୁ ଅନୁମତି ମିଳିଲା  । ମାତ୍ର ଏବେ ଉତ୍ପାଦନ ହ୍ରାସ, ତୈଳ ଦରରେ କ୍ରମାଗତ ବୃଦ୍ଧି ଯୋଗୁଁ ଅଧିକ ପରିବହନ ଖର୍ଚ୍ଚ ଓ ସରକାରୀ ଟେକ୍ସ ଲାଗୁ ହେବା ଫଳରେ ଅତ୍ୟାବଶ୍ୟକ ସାମଗ୍ରୀର ମୂଲ୍ୟ ପୂର୍ବପରି ଅପରିବର୍ତ୍ତିତ ରହିଛି  । ତେଣୁ ଏବେ ବି ସେହି ବର୍ଦ୍ଧିତ ଦରରେ ଲୋକଙ୍କୁ ସାମଗ୍ରୀ କ୍ରୟ କରିବାକୁ ପଡୁଛି  । ମାସ ମାସ ହେଲା ଲୋକେ କାମଧନ୍ଦା ନପାଇ ଘରେ ବସି ରହିଥିବା ବେଳେ ଅତ୍ୟାବଶ୍ୟକ ଦ୍ରବ୍ୟର ଏତାଦୃଶ ମୂଲ୍ୟ ବୃଦ୍ଧି ସେମାନଙ୍କ ତେଲ ଲୁଣର ସଂସାର ପ୍ରତି ଘୋର ସଙ୍କଟ ସୃଷ୍ଟି କରିଛି  ।

ଓଡିଶା ପରି ଏକ ଆର୍ଥିକ ଅସ୍ୱଚ୍ଛଳ ରାଜ୍ୟରେ କରୋନା ମହାମାରୀ ଚାଷ ଓ ଚାଷୀଙ୍କୁ ଗୁରୁତର ପ୍ରଭାବିତ କରିଛି  । କରୋନା ଜନିତ ଲକଡାଉନ ଯୋଗୁଁ ଚାଷୀ ତା’ର ଉତ୍ପାଦିତ ସାମଗ୍ରୀକୁ ବିକ୍ରି କରିବାର ସୁଯୋଗ ନପାଇ ଆର୍ଥିକ ଭାବେ କ୍ଷତିଗ୍ରସ୍ତ ହୋଇଛି  । ସେହିପରି ବାହାର ରାଜ୍ୟକୁ କାମ କରିବାକୁ ଯାଇଥିବା ପ୍ରବାସୀ ଓଡିଆ ମାନେ ଘରକୁ ଫେରି ଆସିବା ଦ୍ୱାରା ସେମାନଙ୍କ ପରିବାରର ଆର୍ଥିକ ଆୟ ଏକରକମ ବନ୍ଦ ହୋଇଯାଇଛି  । ବାହାରେ କାମଧନ୍ଦା କରି ସେମାନଙ୍କ ପରିବାରର ଗୁଜୁରାଣ ମେଣ୍ଟାଉଥିବା ଏହି ପ୍ରବାସୀ ଓଡିଆ ମାନେ ଏବେ ପରିବାର ଲାଗି ବୋଝ ପାଲଟି ଯାଇଛନ୍ତି  ।

ବର୍ତ୍ତମାନ ବଜାରରେ ନିତ୍ୟ ବ୍ୟବହାର୍ଯ୍ୟ ସାମଗ୍ରୀର ଦର ବୃଦ୍ଧି ସହ ତାଳ ଦେଇ ପନିପରିବା ଦର ଦିନକୁଦିନ ମହଙ୍ଗା ହେବାରେ ଲାଗିଛି  । ଯାହାଫଳରେ ସାଧାରଣ ମଣିଷ ଟିଏ ଏଭଳି ଚଢା ଦରରେ ସାମଗ୍ରୀ ଓ ପନିପରିବା କିଣି ତା’ର ଦୈନନ୍ଦିନର ଆବଶ୍ୟକତା ମେଣ୍ଟାଇବା କଷ୍ଟକର ହୋଇପଡିଛି  । ଆଜି ଆମ ଦେଶ ଓ ରାଜ୍ୟରେ କରୋନା ସଂକ୍ରମିତଙ୍କ ସଂଖ୍ୟା ଯେଭଳି ଭାବେ ବୃଦ୍ଧି ପାଇବାରେ ଲାଗିଛି ଏହା ଆଗକୁ ଆହୁରି ସଙ୍କଟଜନକ ପରିସ୍ଥିତି ସୃଷ୍ଟି କରିବ  । ଏଥିରୁ ସ୍ପଷ୍ଟ ଅନୁମାନ କରିହୁଏ ଯେ, ସ୍ୱାଭାବିକ ପରିସ୍ଥିତି ଆସିଲା ବେଳକୁ ଆହୁରି କିଛି ମାସ ଲାଗିପାରେ  । ତେଣୁ ଦୁର୍ବଳ ଆର୍ଥିକ ସ୍ଥିତି ମଧ୍ୟଦେଇ  ଗତି କରୁଥିବା ସାଧାରଣ ଲୋକଙ୍କ କ୍ରୟ ଶକ୍ତି ଧୀରେ ଧୀରେ ହ୍ରାସ ପାଇବା ପ୍ରାୟ ନିଶ୍ଚିତ  । ଲୋକଙ୍କ ପାଖରେ ଯାହାକିଛି ଗଚ୍ଛିତ ଅର୍ଥ ଥିଲା ସେସବୁ ଏବେ ପ୍ରାୟ ଶେଷ ହୋଇଯାଇଛି  ।

ସରକାରୀ ଚାକିରିଆ ଓ ବ୍ୟବସାୟୀ ଗୋଷ୍ଠୀଙ୍କୁ ବାଦ ଦେଲେ ବିଶେଷ କରି ଚାଷୀ, ଦିନ ମଜୁରିଆ, ପ୍ରବାସରୁ ଫେରିଥିବା ଶ୍ରମିକ ଓ ଅନ୍ୟାନ୍ୟ ବେସରକାରୀ କାମରେ ନିୟୋଜିତ ଥିବା ଲୋକଙ୍କ ପାଖରେ ଏବେ ଆୟର କୌଣସି ପନ୍ଥା ନଥିବା ବେଳେ ବର୍ତ୍ତମାନର ବଜାର ଦର ସେମାନଙ୍କୁ ବେଶ ପ୍ରଭାବିତ କରିଛି  । ବଜାରରେ ତେଜରତି ସାମଗ୍ରୀ ଠାରୁ ଆରମ୍ଭ କରି ଅନ୍ୟାନ୍ୟ ପ୍ରାୟ ସବୁ ନିତ୍ୟ ବ୍ୟବହାର୍ଯ୍ୟ ସାମଗ୍ରୀର ମୂଲ୍ୟ ବେଶ ଉଚ୍ଚା ରହିଥିବା ବେଳେ ତାହା ସହିତ ତାଳ ଦେଇ ଆଳୁ, ବିଲାତି, ବାଇଗଣ, ପୋଟଳ, କଲରା ଓ ଭେଣ୍ଡି ଆଦି ପନିପରିବା ଦର ବି ଆକାଶଛୁଆଁ ହୋଇଯାଇଛି  ।

ଯାହାକୁ ନେଇ ଏବେ ସାଧାରଣ ଖାଉଟି ଅଡୁଆ ପରିସ୍ଥିତିରେ ପଡିଯାଇଛି  । ଗତ କିଛି ମାସ ହେଲା ପ୍ରତିକୂଳ ପାଗ ଯୋଗୁଁ ପନିପରିବା ଚାଷ ସାଂଘାତିକ ଭାବେ କ୍ଷତିଗ୍ରସ୍ତ ହୋଇଛି  । ଯାହାଫଳରେ ଚାଷୀର ଆମଦାନୀ ବହୁ ପରିମାଣରେ ହ୍ରାସ ପାଇଛି  । ଲୋକଙ୍କ ଚାହିଦା ଅନୁସାରେ ପନିପରିବାର ଅଭାବ ପରିଲକ୍ଷିତ ହେଉଥିବା ବେଳେ ଏଗୁଡିକର ଦର ବଢିବାରେ ଲାଗିଛି  । ବଜାର ଦର ବଢିବା ସାଙ୍ଗକୁ ବର୍ତ୍ତମାନ ଧାନ ଚାଷ କାର୍ଯ୍ୟ ଆରମ୍ଭ ହୋଇଯାଇଥିବାରୁ ଚାଷୀମାନେ ପରିବାର ଚଳାଇବା ସହ ମୂଲିଆ ମଜୁରିଆଙ୍କୁ ଖାଇବାକୁ ଦେବା ନେଇ ଚିନ୍ତାରେ ପଡିଯାଇଛନ୍ତି  । ଏବେ ଉଭୟ କେନ୍ଦ୍ର ଓ ରାଜ୍ୟ ସରକାରଙ୍କ ନଜର ଯଦିଓ କରୋନା ମୁକାବିଲା କ୍ଷେତ୍ରରେ କେନ୍ଦ୍ରୀଭୂତ ତଥାପି ସାଧାରଣ ଲୋକଙ୍କୁ କାମଧନ୍ଦା ଯୋଗାଇ ଦେଇ ସେମାନଙ୍କ ଆୟ ବୃଦ୍ଧି ପ୍ରତି ସରକାରଙ୍କୁ ନଜର ଦେବାକୁ ପଡିବ  । ତା’ ନହେଲେ ସାଧାରଣ ଲୋକଙ୍କ ତେଲ ଲୁଣର ସଂସାର ପ୍ରତି ଆଗକୁ ମହାସଙ୍କଟ ସୃଷ୍ଟି ହେବ ଯାହା ଆଜିର ପରିସ୍ଥିତିରେ ବୋଝ ଉପରେ ନଳିତା ବିଡା ସଦୃଶ ବିବେଚିତ ହେବ  ।

Leave A Reply

Your email address will not be published.