ଡେଲାଙ୍ଗ,୩୧/୧—ନାମାଙ୍କନ ପତ୍ର ଦାଖଲ ପ୍ରକ୍ରିୟା ଶେଷ ହେବା ପରେ ସମ୍ପ୍ରତି ଗାଁ ଗହଳିରେ ନିର୍ବାଚନ ଉଷ୍ମତା ପ୍ରକାଶ ପାଇବା ସହ ପ୍ରାର୍ଥୀମାନଙ୍କ ପ୍ରଚାର କାର୍ଯ୍ୟ ସରଗରମ ହେଉଛି।ଏହି ପରିପ୍ରେକ୍ଷୀରେ ସୋମବାର ହରିରାଜପୁର ପଞ୍ଚାୟତର ସମିତି ସଭ୍ୟା ପ୍ରାର୍ଥୀନୀ ତଥା ଡେଲାଙ୍ଗ ବ୍ଲକ ମିଶନ ଶକ୍ତି ମହିଳା ମହାସଂଘ ସମ୍ପାଦିକା ବାସନ୍ତୀ ସାହୁ ଘରକୁ ଘର ବୁଲି ନିର୍ବାଚନ ପ୍ରଚାର ଆରମ୍ଭ କରିଛନ୍ତି।ସେ ତରଡା ଗ୍ରାମର ୧୪ ନମ୍ବର ୱାର୍ଡରେ ପହଞ୍ଚି ନିର୍ବାଚନ ପ୍ରଚାର ଶୁଭାରମ୍ଭ କରିବା ସହ ଯୁବ,ମହିଳା ଓ ବୟୋଜ୍ୟେଷ୍ଠ ବ୍ୟକ୍ତିଙ୍କ ନିକଟରେ ଭୋଟ ଭିକ୍ଷା କରିବା ସହ ବସ୍ ଚିହ୍ନରେ ବିପୁଳ ସଂଖ୍ୟାରେ ଭୋଟ ଦେଇ ତାଙ୍କୁ ସମିତି ସଭ୍ୟା ଭାବେ ବିଜୟୀ କରିବାକୁ ନିବେଦନ କରିଛନ୍ତି।ଏପରିକି ଭୋଟରମାନଙ୍କ ନିକଟତର ହୋଇ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ବିଭିନ୍ନ ଜନକଲ୍ୟାଣକାରୀ ଯୋଜନା ସମ୍ପର୍କରେ ଅବଗତ କରାଇବା ସହ ବିଜେଡି ସମର୍ଥିତ ପ୍ରାର୍ଥୀଙ୍କୁ ଭୋଟ ଦେଇ ନବନିର୍ବାଚିତ ଯୁବ ବିଧାୟକ ରୁଦ୍ରପ୍ରତାପ ମହାରଥୀଙ୍କ ହାତ ମୁଠାକୁ ଟାଣ କରିବା ନିମନ୍ତେ ଶ୍ରୀମତୀ ସାହୁ ଭୋଟରମାନଙ୍କୁ ନିବେଦନ କରିଛନ୍ତି।ଏହି ପ୍ରଚାର କାର୍ଯ୍ୟରେ ତାଙ୍କ ସହ ମିନାକ୍ଷୀ ପ୍ରଧାନ,ମମତା ନାୟକ ଓ ରେଣୁବାଳା ପଟ୍ଟନାୟକ ସାମିଲ ହୋଇ କୋଭିଡ କଟକଣା ଅନୁଯାୟୀ ଘରକୁ ଘର ବୁଲି ଭୋଟ ଭିକ୍ଷା କରୁଥିବା ଜଣାପଡିଛି।
