ଦଶପଲ୍ଲା୨୪/୩ : ଗୁରୁବାରଦିନ ଶେଷ ହୋଇଛି ପୌର ନିର୍ବାଚନ । ଏହି ପୌର ନିର୍ବାଚନ ରେ ଦଶପଲ୍ଲା ଏନ ଏ ସି ର ୧୬ ୱାର୍ଡ ପାଇଁ ନିର୍ବାଚନ ଅନୁଷ୍ଠିତ ହୋଇଥିବା ବେଳେ ପ୍ରଥମ ଥର ପାଇଁ ଅଧ୍ୟକ୍ଷ ପଦ ପାଇଁ ସିଧାସଳଖ ପ୍ରତ୍ୟକ୍ଷ ନିର୍ବାଚନ ଅନୁଷ୍ଠିତ ହୋଇଛି । ୧୬ ଟି ୱାର୍ଡ ପାଇଁ ୪୪ ଜଣ ପ୍ରାର୍ଥୀ ପ୍ରତିଦ୍ବନ୍ଦିତା କରୁଥିବା ବେଳେ ଅଧ୍ୟକ୍ଷା ପଦ ପାଇଁ ୩ ଜଣ ପ୍ରତିଦ୍ବନ୍ଦିତା କରୁଛନ୍ତି । ସମୁଦାୟ ୪୭ ଜଣ ଙ୍କ ଭାଗ୍ୟ ଏବେ ଏବେ ଏଭିଏମ ରେ ସିଲ ହୋଇ ରହିଛି । ଭୋଟ ପାଇଁ ଦଶପଲ୍ଲା ଏନ ଏ ସି ର ୧୬ ଗୋଟି ୱାର୍ଡ ରେ ୨୧ ଟି ବୁଥ କରାଯାଇଥିବା ବେଳେ ଏଥି ମଧ୍ୟରେ ଗୋଟିଏ ପିଙ୍କ ବୁଥ କରାଯାଇଥିଲା । ସମୁଦାୟ ୧୫୨୯୪ ଜଣ ଭୋଟର ଙ୍କ ମଧ୍ୟରୁ ୧୧୪୪୩ ଜଣ ଭୋଟର ଭୋଟ ଦେଇଥିବା ନିର୍ବାଚନ ଅଧିକାରୀ କେ ଭି ରାଓ ଙ୍କ ଠାରୁ ସୂଚନା ମିଳିଛି ।
ଶାନ୍ତି ଶୃଙ୍ଖଳା ସହ ନିର୍ବାଚନ ଶେଷ ହୋଇଥିବା ବେଳେ ଦୁଇ ନମ୍ବର ୱାର୍ଡ ର ୩ ନମ୍ବର ବୁଥ ରେ ୪ ଜଣ ଭୋଟର ଭୋଟ ଦେବାକୁ ଆସିବା ପୂର୍ବରୁ ସେମାନଙ୍କ ନାମରେ ଅନ୍ୟକେହି ଭୋଟ ଦେଇଥିବା ଜାଣିବା ପରେ ସେହି ବୁଥ ରେ ଅସନ୍ତୋଷ ଦେଖାଯାଇଥିଲା । ମାତ୍ର ଏ ନେଇ ନିର୍ବାଚନ ଅଧିକାରୀଙ୍କ ନିକଟ ରେ ଅଭିଯୋଗ ହୋଇ ନଥିବା ଜଣାପଡିଛି । ସେହିପରି ଦଶପଲ୍ଲା ବାଳିକା ଉଚ ବିଦ୍ୟାଳୟ ଭୋଟ କେନ୍ଦ୍ର ବାହାରେ ବିଶୃଙ୍ଖଳା ଦେଖାଦେବା ପରେ ସେଠାରେ ପୋଲିସ ପହଂଚି ଆୟତ୍ତ କରିଥିଲା । ମୁଖ୍ୟତଃ ସମସ୍ତ ୱାର୍ଡ ରେ ସିଧାସଳଖ ବିଜେଡି ଓ ସ୍ୱାଧୀନ ପ୍ରାର୍ଥୀଙ୍କ ମଧ୍ୟରେ ତୀବ୍ର ପ୍ରତିଦ୍ବନ୍ଦିତା ହୋଇଥିବା ବେଳେ ୫ନଂ ଓ ୧୧ନଂ ୱାର୍ଡ ରେ ବିଜେଡି ଓ ବିଜେପି ମଧ୍ୟରେ ପ୍ରତିଦ୍ବନ୍ଦିତା ସ୍ପଷ୍ଟ ହୋଇଛି । ମାତ୍ର ଏହି ନିର୍ବାଚନ ରେ ବିଜେଡି ଆଗରେ ଥିବା ଚର୍ଚ୍ଚା ହେଉଛି ।
