କରୋନା ପଜିଟିଭ ଓ ସିଟିସ୍କାନ : ଆସନ୍ତୁ ଡାକ୍ତର ଡାକ୍ତର ପ୍ରଫୁଲ୍ଲ କୁମାର ଦାସ କଣ କହୁଛନ୍ତି

ଡାକ୍ତର ପ୍ରଫୁଲ୍ଲ କୁମାର ଦାସ (କନସ୍ଲଣ୍ଟାଟ ରେଡ଼ିଓଲୋଜିଷ୍ଟ, ଏମ୍ଆରଆଇ କେନ୍ଦ୍ର, ଶ୍ରୀରାମଚନ୍ଦ୍ର ଭଞ୍ଜ ମେଡ଼ିକାଲ କଲେଜ, କଟକ,)  : ବର୍ତ୍ତମାନ ସମୟରେ ଭୟାବହ କରୋନା ପରିପ୍ରେକ୍ଷୀରେ ସିଟି ସ୍କାନ ପରୀକ୍ଷାକୁ ଗୁରୁତ୍ୱ ଦିଆଯାଉଛି । ତେବେ କରୋନା ସଂକ୍ରମିତଙ୍କ ଭିତରେ ଏହାକୁ ନେଇ ଅନେକ ପ୍ରଶ୍ନ, ଭୟ, ଆଶଙ୍କା ରହୁଛି ଯାହାକି ପରବର୍ତ୍ତୀ ସମୟରେ ସେମାନଙ୍କ ପାଇଁ ବିପଦପୂର୍ଣ୍ଣ ମଧ୍ୟ ମନେହୁଏ । ତେବେ ଏ କ୍ଷେତ୍ରରେ ଡାକ୍ତରଙ୍କ ଭୂମିକା ଅତ୍ୟନ୍ତ ଗୁରୁତ୍ୱପୂର୍ଣ୍ଣ । ଅନେକ ପ୍ରଶ୍ନ କରନ୍ତି ଛାତିର ସିଟି ସ୍କାନ କେତେବେଳେ ଦରକାର ? ଏହାର ଉତ୍ତର ହେବ ଲକ୍ଷଣ ଆରମ୍ଭର ୫ରୁ ୭ ଦିନ ପରେ । (ପଲ୍ସ ଅକ୍ସିମିଟରରେ ଘର ଭିତରେ ଅମ୍ଳଜାନସ୍ତର ୯୫ ପ୍ରତିଶତରୁ କମ୍ ଥିଲେ) । ସେହିପରି ଜଣେ ପଚାରନ୍ତି ଦୁଇ ଚାରିଦିନ ତଳେ ଜ୍ୱର ଥିଲା କିନ୍ତୁ ବର୍ତ୍ତମାନ ସୁସ୍ଥ ଲାଗୁଛି ଓ ଦେହ ଭଲ ଅଛି । ଅମ୍ଳଜାନସ୍ତର ଘର ଭିତରେ ୯୫ ପ୍ରତିଶତରୁ ଅଧିକ ରହିଛି । ଧଇଁସଇଁ ଲାଗୁ ନାହିଁ । ଏ କ୍ଷେତ୍ରରେ ସିଟି ସ୍କାନ କରିବା ଦରକାର ନାହିଁ ।

ସିଟି ସ୍କାନରେ କୋଭିଡ଼ ଜଣାପଡ଼ିଥିଲା । ଦୁଇ ସପ୍ତାହ ପରେ ଏବେ ସୁସ୍ଥ ଅଛନ୍ତି, ଅମ୍ଳଜାନସ୍ତର ଠିକ୍ ଅଛି । ସଂକ୍ରମଣ ସ୍ତର ଯାଞ୍ଚ ପାଇଁ ଆଉ ଥରେ ସିଟି ସ୍କାନ କରିବା ଦରକାର କି? ଏହାର ଉତ୍ତର ହେଉଛି ସଂକ୍ରମଣ ସ୍ତର ଜାଣିବା ପାଇଁ ପୁଣିଥରେ ସିଟି ସ୍କାନ କରିବା ଆବଶ୍ୟକତା ନାହିଁ । ଡାକ୍ତରଙ୍କ ଦ୍ୱାରା ସୁସ୍ଥ ବୋଲି ଘୋଷଣା ହେବା ପରେ ପୁନଃ ପରୀକ୍ଷା ଦରକାର ନାହିଁ । ଫୁସ୍ଫୁସ୍ର କ୍ଷତ ଭଲ ହେବା ପାଇଁ ୬ରୁ ୮ ସପ୍ତାହ ସମୟ ଲାଗିଥାଏ । ସେହିପରି ଜଣେ ଜଣେ କୁହନ୍ତି ମୋର ଜଣେ ନିକଟତର ସମ୍ପର୍କୀୟ କୋଭିଡ଼ ସଂକ୍ରମିତ ଥିଲେ, ମୁଁ ସିଟି ସ୍କାନ କରିବି କି? ଏ କ୍ଷେତ୍ରରେ ମନେରଖନ୍ତୁ ଗୁରୁତର ଲକ୍ଷଣ ନଥିଲେ ସିଟି ସ୍କାନର ଆବଶ୍ୟକତା ନାହିଁ, ପ୍ରଥମେ ଆର୍ଟିପିସିଆର ପରୀକ୍ଷା କରନ୍ତୁ । ସପ୍ତାହକ ପରେ ଲକ୍ଷଣ ଦେଖା ଦେଲେ ସ୍କାନ କରି ପାରନ୍ତି । ଶ୍ୱାସରୁଦ୍ଧ ଅଧିକ ଜଣାପଡ଼ିଲେ କି ଡିଡାଇମର ପରୀକ୍ଷାରେ ସମସ୍ୟା ଥିଲେ କିମ୍ବା ହୃଦ୍ ପରୀକ୍ଷା ପରେ ଯଦି ଶିରାରେ ରକ୍ତ ଜମାଟ ବାନ୍ଧିଥିବା ଜଣାପଡ଼େ ତେବେ ସିଟି ସ୍କାନ କରିବା ଆବଶ୍ୟକ ।

ଅନେକଙ୍କ ଭିତରେ କରୋନାର ଆର୍ଟିିପିସିଆର ରିପୋର୍ଟ ପଜିଟିଭ ଆସିଲେ ସିଟି ସ୍କାନ କରିବା ଦରକାର କି ବୋଲି ପ୍ରଶ୍ନ ସେମାନଙ୍କୁ ଆନେ୍ଦାଳିତ କରିଥାଏ ତେବେ ଏ କ୍ଷେତ୍ରରେ ଆମେ କହିବୁ କୋଭିଡ଼ ଲକ୍ଷଣ ସହିତ ଅଧିକ କାଶ କିମ୍ବା ଶ୍ୱାସକ୍ରିୟାରେ କଷ୍ଟ ଅନୁଭବ କରୁଥିଲେ ସିଟି ସ୍କାନ କରନ୍ତୁ । ସେହିଭଳି ଆର୍ଟିପିସିଆର ରିପୋର୍ଟ ନେଗେଟିଭ ରହିଛି କିନ୍ତୁ ଲକ୍ଷଣ ଗୁଡ଼ିକ ଭାଇରାଲ ସଂକ୍ରମଣ ଭଳି ଜଣାପଡ଼ୁଥିଲେ କ’ଣ କରାଯିବ ବୋଲି ପ୍ରଶ୍ନ ଉଠିଲେ ଏ କ୍ଷେତ୍ରରେ ମନେରଖନ୍ତୁ ନିଜକୁ ପ୍ରଥମେ ସଙ୍ଗରୋଧରେ ରଖନ୍ତୁ । ଯଦି ଲକ୍ଷଣ ଅଧିକ ଜଣାପଡ଼ୁଛି ତେବେ ଫୁସ୍ଫୁସ୍ ସଂକ୍ରମିତ ଅଛି କି ନାହିଁ ତାହା ଜାଣିବା ପାଇଁ ସିଟି ସ୍କାନ କରିବା ଆବଶ୍ୟକ । ଶରୀରରେ ଅମ୍ଳଜାନସ୍ତର ୯୫ ପ୍ରତିଶତରୁ କମ୍ ଥିଲେ କ’ଣ କରାଯିବ ବୋଲି ପ୍ରଶ୍ନ ଉଠିଲେ ଏ କ୍ଷେତ୍ରରେ ମନେରଖନ୍ତୁ ଫୁସ୍ଫୁସ୍ ସଂକ୍ରମଣ ହୋଇଛି ନାହିଁ ଜାଣିବା ପାଇଁ ସିଟି ସ୍କାନ କରାଯାଇପାରେ ।

ଆଉ ଗୋଟିଏ କଥା ହେଉଛି କରୋନା ସମୟରେ ଅନେକ କୋରାଡ଼୍ସର ଅର୍ଥ କ’ଣ ବୋଲି ପଚାରନ୍ତି । ବାସ୍ତବରେ କୋରାଡ଼୍ସ ହେଉଛି ସିଟି ସ୍କାନ ଦ୍ୱାରା କୋଭିଡ଼ ସଂକ୍ରମଣ ଚିହ୍ନଟର ଏକ ମାଧ୍ୟମ । କୋରାଡ଼୍ସ-୫ ରିପୋର୍ଟ ଆସିଲେ ଜଣେ ରୋଗୀ ଗୁରୁତର ବୋଲି କହି ପାରିବା କି? ତେବେ ମନେରଖନ୍ତୁ କୋରାଡ଼୍ସ ୧-୫ ପର୍ଯ୍ୟନ୍ତ ରହିଥାଏ । ଜଣେ ରୋଗୀଙ୍କ କୋରାଡ଼୍ସ ୪-୫ ମଧ୍ୟରେ ରହିଲେ ତାଙ୍କ ଫୁସ୍ଫୁସ୍ରେ କୋଭିଡ଼ ସଂକ୍ରମଣର ଯଥେଷ୍ଟ ସମ୍ଭାବନା ରହିଛି । କିନ୍ତୁ ସେ ଗୁରୁତର ନୁହଁନ୍ତି । ବର୍ତ୍ତମାନ ସମୟରେ ଆମ ମାନଙ୍କ ଭିତରେ ଏପରିକି ଅନେକ ସ୍ୱାସ୍ଥ୍ୟ ସଚେତକ ବ୍ୟକ୍ତିମାନେ ମଧ୍ୟ କୁହନ୍ତି ଯେ ମୋର କୋଭିଡ଼ ଅଛି, ମୋର ପିଲାର ସିଟି ସ୍କାନ କରିବା ଆବଶ୍ୟକ କି? ଏ କ୍ଷେତ୍ରରେ ଆମେ ପରାମର୍ଶ ଦେଉ ଛୋଟ ପିଲାଙ୍କ ସିଟି ସ୍କାନ କରିବା ଆବଶ୍ୟକ ନୁହେଁ, ଛୋଟ ପିଲା ସଂକ୍ରମିତ ହେଲେ ମଧ୍ୟ ସେମାନେ ଶୀଘ୍ର ସୁସ୍ଥ ହୋଇଥାନ୍ତି । ଆବଶ୍ୟକସ୍ଥଳେ ଛାତି ପରୀକ୍ଷା କରାଯାଇପାରେ । ଅନେକ ଭାବନ୍ତି ଡାକ୍ତରଖାନାରେ ଭର୍ତ୍ତି ପୂର୍ବରୁ ସିଟି ସ୍କାନ କରିବା ପାଇଁ କାହିଁକି କୁହାଯାଏ? ଏ କ୍ଷେତ୍ରରେ ସର୍ବପ୍ରଥମେ ମନେରଖନ୍ତୁ ରୋଗୀଙ୍କ ଫୁସ୍ଫୁସ୍ ସଂକ୍ରମିତ ହୋଇଥିଲେ ମଧ୍ୟ ବେଳେ ବେଳେ ଲକ୍ଷଣ ଜଣାପଡ଼େ ନାହିଁ ।

ରୋଗୀ କୋଭିଡ଼ ସଂକ୍ରମିତ ମଧ୍ୟ ହୋଇଥାଇପାରନ୍ତି । ଆର୍ଟିପିସିଆର ପରୀକ୍ଷା ବଦଳରେ ସିଟିସ୍କାନ ଦ୍ୱାରା ରୋଗୀ କୋଭିଡ଼ ସଂକ୍ରମିତ କି ନୁହଁ ଶୀଘ୍ର ଜଣାପଡ଼ିଥାଏ । ଅସ୍ତ୍ରୋପଚାର ଆବଶ୍ୟକ କି ନାହିଁ ତାହା ମଧ୍ୟ ଜଣାପଡ଼ିଥାଏ । ସେହିପରି କେତେକ ବଡ଼ ଆଶ୍ଚର୍ଯ୍ୟକର ପ୍ରଶ୍ନ ପଚାରନ୍ତି ଛାତିର ସିଟି ସ୍କାନ କରିବା କ୍ଷତିକାରକ କି, ଏହା କ୍ୟାନସରର କାରଣ ହୋଇପାରେ କି? ଏ କ୍ଷେତ୍ରରେ ଜାଣିରଖନ୍ତୁ ବର୍ତ୍ତମାନ ଅଳ୍ପ ବିକିରଣ ପ୍ରୟୋଗ କରାଯାଉଛି, ସିଟି ସ୍କାନ ଦ୍ୱାରା କ୍ୟାନସର ହୋଇଥାଏ ବୋଲି ସେଭଳି କିଛି ପ୍ରମାଣ ମିଳି ନାହିଁ । ହଁ ଆଉ କେତେକ ପ୍ରଶ୍ନ ଉଠାନ୍ତି ସମସ୍ତ କୋଭିଡ଼ ପଜିଟିଭ୍ଙ୍କ ସିଟି ସ୍କାନରେ ସମସ୍ୟା ଥାଏ କି? ମନେରଖନ୍ତୁ ସମସ୍ତ କୋଭିଡ଼ ପଜିଟିଭଙ୍କ ସିଟି ସ୍କାନ ସମସ୍ୟା ନଥାଏ, ୭ରୁ ୧୦ ପ୍ରତିଶତ ରୋଗୀଙ୍କ ରିପୋର୍ଟ ସ୍ୱାଭାବିକ ରହିଥାଏ । କେହି କେହି ମୋବାଇଲ ମାଧ୍ୟମରେ ପଚାରନ୍ତି ଯେ ସିଟି ସ୍କାନ ସ୍ୱାଭାବିକ ଅଛି, କିନ୍ତୁ ରୋଗୀଙ୍କ ଜ୍ୱର ଅଛି, ରୋଗୀ ଜଣକ ସଙ୍ଗରୋଧରେ ରହିବା ଜରୁରୀ କି? ଏ କ୍ଷେତ୍ରରେ ପରାମର୍ଶ ହେବ ନିଶ୍ଚିତ ଭାବେ ରୋଗୀଙ୍କୁ ସଙ୍ଗରୋଧରେ ରହିବା ଆବଶ୍ୟକ, କାରଣ ସେ ଅନ୍ୟମାନଙ୍କୁ ସଂକ୍ରମିତ କରିପାରନ୍ତି ।

ସେହିପରି ପ୍ରଶ୍ନ ଉଠେ ସିଟି ସ୍କାନରେ ଫୁସ୍ଫୁସ୍ ସଂକ୍ରମିତ ଜଣାପଡ଼ିଥିବା କୋଭିଡ଼ ରୋଗୀ ସୁସ୍ଥ ହେବା ପରେ ଭବିଷ୍ୟତରେ ତାଙ୍କର ପୁଣିଥରେ ଫୁସ୍ଫୁସ୍ ସମସ୍ୟା ସୃଷ୍ଟି ହୋଇପାରେ କି? ଏ କ୍ଷେତ୍ରରେ ଆମେ କହିବୁ କୋଭିଡ଼ରୁ ଆରୋଗ୍ୟଲାଭ କଲା ପରେ ଭବିଷ୍ୟତରେ ସମସ୍ତ ରୋଗୀଙ୍କ ଫୁସ୍ଫୁସ୍ ସମସ୍ୟା ରହେନାହିଁ । ଖୁବ୍ କମ୍ ରୋଗୀଙ୍କ ଫୁସ୍ଫୁସ୍ରେ ଥିବା ନରମ କୋଷ କିଛି ଦିନ ପରେ ତନ୍ତୁ ଜାତୀୟ କୋଷରେ ପରିଣତ ହୋଇଥାଏ । ଯାହାଫଳରେ ସେମାନଙ୍କର ଦୀର୍ଘସ୍ଥାୟୀ ସମସ୍ୟା ରହିଥାଏ । କିନ୍ତୁ ଏଭଳି ଲୋକଙ୍କ ସଂଖ୍ୟା ଖୁବ୍ କମ । ସର୍ବପ୍ରଥମେ ମାନସିକ ଭାବେ ଦୃଢ଼ ରୁହନ୍ତୁ । ଡାକ୍ତରୀ ଚିକିତ୍ସା ଓ ସରକାରୀ ସ୍ୱାସ୍ଥ୍ୟ ପରାମର୍ଶକୁ ଗ୍ରହଣ କରନ୍ତୁ । ଦେଖିବେ ଆପଣ ଆରୋଗ୍ୟ ଲାଭ ସହ ଏ ଦୁନିଆ ପୁଣିଥରେ ହସି ଉଠିବ ।