ବେତନଟୀ : ବେତନଟୀ ତହସିଲଦାର ଅନିଶା ଦାସଙ୍କ ଅଭିଯୋଗ ମୂଳେ ବେଆଇନ ଭାବେ ମୋରମ ପରିବହନ କରୁ ଥିବା ଦୁଇଟି ଡମ୍ଫର ବିରୁଦ୍ଧରେ ମାମଲା ନମ୍ବର ୧୫୮/୨୦୨୦ ରୁଜୁ ହୋଇ ବୈଶିଙ୍ଗା ଥାନା ଆଇଆଇସି ଲକ୍ଷ୍ମୀଧର ସ୍ୱାଇଁ ନିଜେ ତଦନ୍ତ କରୁଛନ୍ତି । ବଡସାହିର ବ୍ୟବସାୟୀ ଶ୍ରୀକାନ୍ତ ଦାସ ବୈଶିଙ୍ଗା ଥାନାରେ ଲିଖିତ ଭାବେ ଅଭିଯୋଗ କରିଛନ୍ତି କି ତାଙ୍କର ଓଡି-୦୧ଏଫ-୯୨୪୮ ଡମ୍ଫରରେ ବଡସାହିର ଗଜଡିହି ମୋରମ ଖାଦାନରୁ ମୋରମ ଆଇଟିଆରକୁ ପଠା ଯାଉ ଥିବା ବେଳେ ସେହି ଗାଡିକୁ ଏକ ଧଳା କାର ଆସି ଆଗରୁ ଅଟକାଇ ଥିଲା ।
ଏହି ଗାଡିରୁ ଜଗା ଓରଫ ଖଗେଶ୍ୱର ବେହେରା ଓ ଶିବାଶିଷ ଓରଫ ରିଣ୍ଟୁ ନାଥ ବାହାରି ଡ୍ରାଇଭର ତପନ କୁମାର ବିନ୍ଧାଣୀଙ୍କୁ ଗାଡିର କାଗଜପତ୍ର ମାଗି ଥିଲେ । ଡ୍ରାଇଭର ତୁମେ ସରକାରୀ ଲୋକ ନୁହଁ ବୋଲି କହି କାଗଜପତ୍ର ଦେବାକୁ ମନା କରି ଦେଇ ଥିଲା । ଏଥିରେ ଉତ୍ୟୋକ୍ତ ହୋଇ ଯୁବକ ମାନେ ୨୦ ହଜାର ଟଙ୍କା ମାଗି ଥିବାର ଅଭିଯୋଗ କରିଛନ୍ତି । ଡ୍ରାଇଭର ପାଖରେ ତେଲ ପକାଇବାକୁ ଥିବା ୬୦୦୦ ଟଙ୍କା ଛଡାଇ ନେଇ ଥିଲେ । ଏହି ସମୟରେ ବେତନଟୀ ତହସିଲଦାର ଅନିଶା ଦାସ ଓ ଅନ୍ୟ ଜଣେ ମହିଳା ସେଠାରେ ପହଞ୍ଚି ଥିଲେ । ପରେ ତହସିଲଦାର ଗାଡିଟିକୁ ବୈଶିଙ୍ଗା ଥାନାରେ ଜିମା ଦେଇ ଥିଲେ ଓ ଡ୍ରାଇଭରକୁ ଗାଳି ଗୁଲଜ କରି ଥିଲେ । ପରେ ଏହି ଘଟଣାରେ ହସ୍ତକ୍ଷେପ କରି ଅଭିଜିତ ମହଲ ନାମକ ମଧ୍ୟସ୍ଥି ତହସିଲଦାରଙ୍କୁ ଏକ ଲକ୍ଷ ଟଙ୍କା ଦେବାକୁ କହି ଥିବାର ଅଭିଯୋଗରେ ଲେଖା ଅଛି ।
ଏହି ଅଭିଯୋଗକ୍ରମେ ବୈଶିଙ୍ଗା ଥାନା ଆଇଆଇସି ଲକ୍ଷ୍ମୀଧର ସ୍ୱାଇଁ ଦଫା ୩୪୧, ୩୨୩, ୨୯୪, ୩୭୯, ୩୮୪, ୫୦୬, ୩୪ ଭାରତୀୟ ପିଙ୍ଗଳ କୋର୍ଡ ମୂଳେ ମାମଲା ନମ୍ବର ୧୫୯/୨୦୨୦ ରୁଜୁ କରି ଏସଆଇ ଅନନ୍ତ ଚରଣ ନାଏକଙ୍କୁ ତଦନ୍ତ ଭାର ପ୍ରଦାନ କରିଛନ୍ତି । ଏହି ମାମଲାରେ ବେତନଟୀ ତହସିଲଦାର ଅନିଶା ଦାସ, ଜଗା ଓରଫ ଖଗେଶ୍ୱର ବେହେରା, ରିଣ୍ଟୁ ଓରଫ ଶିବାଶିଷ ନାଥ, ଅଭିଜିତ ମହଲ ଓ ଗାଡିରେ ବସି ଥିବା ଅନ୍ୟ ଜଣେ ମହିଳାଙ୍କ ନାମରେ ମାମଲା ରୁଜୁ ହୋଇ ଥିବାର ଜଣା ପଡିଛି । ପୋଲିସ ଏହି ମାମଲାରେ ଅଭିଜିତ ମହଲ, ଶିବାଶିଷ ନାଥଙ୍କୁ ଗିରଫ କରି ଥିବାର ଜଣା ପଡିଛି । ଅଭିଜିତ ବ୍ୟବହାର କରୁ ଥିବା ଜେଏଚ-୦୫ସିଇ-୪୦୮୫ ଏକ୍ସୟୁଭିକୁ ପୋଲିସ ଜବତ କରିଛି । ତେବେ ଡମ୍ଫର ଗୁଡିକୁ କୌଣସି ପ୍ରାଇଭେଟ ବ୍ୟକ୍ତି ଯାଞ୍ଚ କରି ନଥିଲେ । ମୁଁ ନିଜେ ଉପସ୍ଥିତ ରହି ଯାଞ୍ଚ କରି ଥିଲି ଓ ଗାଡିରେ କୌଣସି ପରମିଟ ନଥିଲା ବୋଲି ତହସିଲଦାର ଅନିଶା ଦାସ କହିଛନ୍ତି । ତାଙ୍କ ବିରୁଦ୍ଧରେ ଅଣା ଯାଇ ଥିବା ଅଭିଯୋଗ ସମ୍ପୂର୍ଣ୍ଣ ମିଥ୍ୟା ବୋଲି ତହସିଲଦାର କହିଛନ୍ତି
