ବେତନଟୀ/ବୈଶିଙ୍ଗା : ରାଇକମାସ୍ଥିତ ରଘୁନାଥ ଉଚ୍ଚ ବିଦ୍ୟାଳୟର ଦଶମ ଶ୍ରେଣୀ ଛାତ୍ର ଶ୍ରୀମାନ ସିଦ୍ଧି ବିନାୟକ ଜେନାଙ୍କ ବିଜ୍ଞାନ ପ୍ରକଳ୍ପ “ହାଇଟେକ ସୋଲାର ଗ୍ରେନ ଷ୍ଟୋରେଜ” ଜବାହାରଲାଲ ନେହେରୁ ଜାତୀୟ ବିଜ୍ଞାନ, ଗଣିତ ଓ ପରିବେଶ ପ୍ରଦର୍ଶନୀରେ ଅଂଶଗ୍ରହଣ କରିବାପାଇଁ ମନୋନୀତ ହୋଇଥିବା ଜଣାଯାଇଛି। ଶ୍ରୀମାନ ଜେନାଙ୍କର ଏହି ପ୍ରକଳ୍ପଟି ଜିଲ୍ଲା ତଥା ରାଜ୍ୟ ସ୍ତରରେ ବିଚାରକ ମଣ୍ଡଳୀଙ୍କ ଦ୍ୱାରା ପ୍ରଶଂସିତ ହୋଇ ପୁରସ୍କୃତ ହୋଇଥିଲା। ଆସନ୍ତା ଫେବୃଆରୀ ୮ ତାରିଖ ପୂର୍ବାହ୍ନ ୧୦ ଘଟିକା ସମୟରେ ଆଭାଷୀ ମାଧ୍ୟମରେ ପ୍ରଦର୍ଶନୀରେ ପ୍ରଦର୍ଶିତ ହେବ ବୋଲି ଏନ୍.ସି .ଇ.ଆର.ଟି ନୂଆ ଦିଲ୍ଲୀ ଙ୍କ ତରଫରୁ ସଂପୃକ୍ତ ବିଦ୍ୟାଳୟର ପ୍ରଧାନଶିକ୍ଷକଙ୍କୁ ସୂଚନା ଦିଆଯାଇଛି। ପରିବେଶ ଅନୁକୂଳ ତଥା ସୌର ଶକ୍ତି ଦ୍ୱାରା ପରିଚାଳିତ ଶସ୍ୟ ଭଣ୍ଡାର ପ୍ରକଳ୍ପଟି ବିଦ୍ୟାଳୟର ବିଜ୍ଞାନ ଶିକ୍ଷକ ଅଜିତ କୁମାର ଜେନାଙ୍କ ମାର୍ଗଦର୍ଶନରେ ଶ୍ରୀମାନ ସିଦ୍ଧି ବିନାୟକ ପ୍ରସ୍ତୁତ କରିଥିଲେ। ସ୍ଵଳ୍ପ ମୂଲ୍ୟରେ ତିଆରି ତଥା କୃଷକ ମାନଙ୍କର ଅତି ଦରକାରୀ ଯନ୍ତ୍ରାଂଶ ଭାବରେ ଏହା ଉପଯୋଗୀ ବୋଲି ବିଚାରକ ମଣ୍ଡଳୀଙ୍କ ଦ୍ୱାରା ମତ ପ୍ରକାଶ ପାଇଥିଲା। ସିଦ୍ଧି ବିନାୟକଙ୍କ ଏହି ସଫଳତା ପାଇଁ ଜିଲ୍ଲା ଶିକ୍ଷା ଅଧିକାରୀ ନନ୍ଦକିଶୋର ଗିରି , ବିଜ୍ଞାନ ସୁପରଭାଇଜର ଓ ଅନ୍ୟ ଅଧିକାରୀ ମାନେ ଏବଂ ରଘୁନାଥ ଉଚ୍ଚ ବିଦ୍ୟାଳୟର ସମସ୍ତ ଶିକ୍ଷକ/ଶିକ୍ଷିକା ମାନେ ଅଭିନନ୍ଦନ ଜଣାଇଛନ୍ତି ।
